Jasúé 6 - Ɓǎsɔ́ɔ̀ Báɓòɔ̀

Jɛ́ɖèkóò-hwɔ̀ɖɔ̀ɔ̀ wáɖá-wáɖá

¹ Ɓó tia ɓaɖaa, Jɛ́ɖèkóò-nyɔ̀ ɓěɔ̀ gbǎ ma hwɔɖɔɔ̀ gmɔ-wɔ̃̀ séín ɓěɔ̀ kóɖó-kóɖó, sepóɛɖé wa fɛ̃̀ìn ma Éézùɖùɛ̀-nyɔ̀ ɓěɔ̀ dyi mìɔ jè. Wa se ma wɔ̃́ ɓɛ́ nyɔ ɖò ké ma píé sí mɔɔ ɓɛ́ nyɔ ɖò ké ma ɖé hwɔɖɔɔ̀ mú dyá.

² Kɛɛ wé ɖòɛ̀ ɓaɖaa, Bounɓoɔ̀ cɛ̃ɛ ma Jasúé gbo, ké ɔ ɖá, “Gmɔ̀ nɔ̄, ní mu Jɛ́ɖèkóò-hwɔ̀ɖɔ̀ɔ̀ kè ɔ kã́áɔ̀ ɔ kè ɔ gàa-zà-nyɔ̀ ɓěɔ̀ m̀ xwaún dyi poùn.

³ M̀ kè nì to-vɔ̃-nyɔ̀ séín ɓěɔ̀ mɛ dɛ́ɖɛ́ hwɔɖɔɔ̀ ɖei kpa dyúáɖò ɓó wé séín. Ɓě mɛ nyuɛ náa ɓó wé mɛ̀nɛ̌ìn-ɖò xwíníín.

⁴ Ti ɓɛ́ ɓě muà hwɔɖɔɔ̀ ɖei dɛ́ɖɛ́iń nììn nyɛɛ, sáa-zà-nyɔ̀ mɛ̀nɛ̌ìn-sɔ̃́ mɛ zi gma-gbɔ̀ɖɔ̀ɔ̀ dyúa, ɓɛ́ wa ɖò-ɖò séín ké gã̀à ɓaɖaa kpa. Ɓó wéɔ̀ mɛ̀nɛ̌ìn-sɔ̃́ nììnɔ̀ ɓaɖaa, ɓě mɛ dɛ́ɖɛ́ hwɔɖɔɔ̀ ɖei kpa mɛ̀nɛ̌ìn-sɔ̃́, ɓɛ́ sáa-zà-nyɔ̀ ɓěɔ̀ ké waà gã̀à ɓěɔ̀ ɓaɖaa kpa.

⁵ Ɔ jǔ ké ɓě ɖǎ hwɔɖɔɔ̀ ɖei-dɛ́ɖɛ́-dɛ́ɖɛ́ɔ̀ kpa mɛ̀nɛ̌ìn-sɔ̃́ nììnɔ̀ nyuín, nìí, sáa-zà-nyɔ̀ ɓěɔ̀ mɛ ɓaɖa waà gã̀à ɓěɔ̀ gana-kà, ɓɛ́ ɓě séín ké mú páná ɖé wuɖu zoo mú. Nìí, hwɔɖɔɔ̀ gmɔɔ̀ mu wáɖáùn, ɓɛ́ ɓě ɖò-ɖò séín ké ɖé hwɔɖɔɔ̀ mú dyá.”

⁶ Ɔ jèɛɛ, Jasúé poìn ma sáa-zà-nyɔ̀ ɓěɔ̀ dyí, ké ɔ cɛ̃ɛ ma wa gbo, ké ɔ ɖá, “Ɓě ɖú Bounɓoɔ̀ gma-gbɔ̀ɖɔ̀ɔ̀ dyí, ɓɛ́ ɓěɛ̀ nyɔ-kpò mɛ̀nɛ̌ìn-sɔ̃́ ké gã̀à dyí ɖú, ɓɛ́ wa kéɛ dyúa zi.”

⁷ Hwɛ̀ ké ɔ cɛ̃ɛ ma ɔ gàa ɓěɔ̀ gbo, ké ɔ ɖá, “Ɓě ɖíɛ́ ɓě mɛ zi ɖé sáa-zà-nyɔ̀ ɓě ɓéɖéà Bounɓoɔ̀ gbɔ̀ɖɔ̀ɔ̀ kè gã̀à ɓěɔ̀ kɛɛ dyúa, ɓɛ́ ɓěà ké hwɔɖɔɔ̀ ɖei-dɛ́ɖɛ́-dɛ́ɖɛ́ gbɔ dè.”

⁸ Ti ɓɛ́ Jasúé ɖǎ ma nyɔ ɓěɔ̀ gbo wùɖùɛ̀ hwɔɛɛ, sáa-zà-nyɔ̀ mɛ̀nɛ̌ìn-sɔ̃́ ɓěɔ̀ kpa ma gã̀à ɓaɖaa, ké sáa-zà-nyɔ̀ ɓě ɓɛ́ wa ɓéɖé ma kà Bounɓoɔ̀ gma-gbɔ̀ɖɔ̀ɔ̀ kɛɛ kɔ ma ɓó wa ɖeín dyí.

⁹ Ké to-vɔ̃-nyɔ̀ ɖíɛ́ ɓě nì ma ɖé sáa-zà-nyɔ̀ ɓě nì ma kà gã̀à ɓaɖaa kpauń wɛ̃ɛ dyúa, ké to-vɔ̃-nyɔ̀ tɔ̀ɔ̀ ɓěɔ̀ kɔ ma ɓó Bounɓoɔ̀ gbɔ̀ɖɔ̀ɔ̀ ɖeín dyí. Sáa-zà-nyɔ̀ ɓěɔ̀ kpa ma gã̀à ɓaɖaa,

¹⁰ kɛɛ Jasúé cɛ̃ɛ ma gàa ɓěɔ̀ gbo, ké ɔ ɖá, “Ɓěǐn ɖá ɓɛ́ ɓě ké mú páná, ké ɓěǐn ɖá ɓɛ́ ɓě ké wùɖù mɔɔ ɓɛ́ ɓě ké sáná pa. Ɓě mɛ fòìn, ɓɛ́ ḿ kéɛ ɓě gbo cɛ̃, ɓɛ́ ḿ ké níiń, ‘Ɓě páná mú’ hwɛ̀. Ɔ ɖǎ ná nìǐn, nìí, ɓě mɛ páná mú.”

¹¹ Ké Jasúé nyuɛ ké nyɔ ɓěɔ̀ dɛ́ɖɛ́ìn ma Bounɓoɔ̀ gbɔ̀ɖɔ̀ɔ̀ hwɔɖɔɔ̀ ɖei kpa dyúáɖò. Ké wa kɔ́ìn ma taún ɖe, ké wa pɛ̃́ ma dyi.

¹² Wéɔ̀ nyɔ kɔ ma ɓó dyíɛɛ gànà-kṹún mɛ̀nɛ̀ɛ̀ kɛɛ, Jasúé cɛ̃ɛ ma sáa-zà-nyɔ̀ ɓěɔ̀ kè ɔ gàa ɓěɔ̀ ɖɛ dyúáɖòɔ̀ gbo ɖe. Ké sáa-zà-nyɔ̀ ɓěɔ̀ ɖú ma Bounɓoɔ̀ gbɔ̀ɖɔ̀ɔ̀ dyí,

¹³ ké wa séín dɛ́ɖɛ́ ma hwɔɖɔɔ̀ ɖei kà wa nyuɛ ma kà kĩ́ín nyɛ. To-vɔ̃-nyɔ̀ ɖíɛ́ ɓě nì ma ɖé dyúa, ké sáa-zà-nyɔ̀ mɛ̀nɛ̌ìn-sɔ̃́ ɓě ɓɛ́ wa nì ma kà gã̀à ɓaɖaa kpauń wɛ̃ɛ kɔ ma ɓó wa ɖeín dyí, ké sáa-zà-nyɔ̀ ɓě ɓɛ́ wa ɓéɖé ma kà Bounɓoɔ̀ gbɔ̀ɖɔ̀ɔ̀ kɛɛ kɔ ma ɓó dyí, ké to-vɔ̃-nyɔ̀ tɔ̀ɔ̀ ɓěɔ̀ nì ma ɖé ɖeín.

¹⁴ Ɓó wéɔ̀ sɔ̃́ nììnɔ̀ ɓaɖaa, wa dɛ́ɖɛ́ ma hwɔɖɔɔ̀ ɖei kpa dyúáɖò ɖe, ké wa kɔ́ìn ma taún ɖe. Kǎà wa nyuɛ ma ɓó wé mɛ̀nɛ̌ìn-ɖò xwíníín.

¹⁵ Ɓó wéɔ̀ mɛ̀nɛ̌ìn-sɔ̃́ nììnɔ̀ ɓaɖaa, Jasúé kè ɔ nyɔ ɓěɔ̀ sɔ̀ ma dyí ɓó gànà-kṹún mɛ̀nɛ̀ɛ̀, ké wa dɛ́ɖɛ́ ma hwɔɖɔɔ̀ ɖei kà wa nyuɛ ma kà nyuɛ kĩ́ín nyɛ, kɛɛ ɓó wéa ɓaɖaa, wa dɛ́ɖɛ́ ma hwɔɖɔɔ̀ ɖei kpa mɛ̀nɛ̌ìn-sɔ̃́.

¹⁶ Ti ɓɛ́ wa ɖǎ ma hwɔɖɔɔ̀ dɛ́ɖɛ́ìn kpa mɛ̀nɛ̌ìn-sɔ̃́, ké sáa-zà-nyɔ̀ ɓěɔ̀ dyé ma ti, ɓɛ́ wa ké ma waà gã̀à ɓěɔ̀ ɓaɖa gana-kà kɛɛ, Jasúé cɛ̃ɛ ma nyɔ ɓěɔ̀ gbo, ké ɔ ɖá, “Ɓě páná mú, sepóɛɖé Bounɓoɔ̀ ɖǎ ɓě hwɔɖɔɛ̀ xwaún dyi po.

¹⁷ Bounɓoɔ̀ mɔ̀ nyɔ kɔ̃̀ hwɔɖɔ gànáà. Ɔ jèɛɛ, ɓě mɛ wáɖáa, ɓɛ́ ɓě ké nyɔ séín kè nyúà-ɖɛ̀ séín nì ɖéɛɛ ɖáɓá. Kɛɛ ɓě mɛ póìn Wéɖéháà mɔ̀à gbàɖàùn-mààɔ̀ kɛ kè nyɔ séín nì ɖé ɔ ɓíɖí-gbǒǔn wɛ̃, sepóɛɖé ɔ vǐè ma dyéɖé-dyi-kpaìn-nyɔ̀ ɓě ɓɛ́ à ɖoɓo ma kà kɛɛ ní jè.

¹⁸ Ɓěɛ̀ nyɔ ɖò ní ɖá ɓɛ́ ɔ ké ɖɛ ɓě ɓɛ́ ɓě kɔ̃̀ ɓɛ́ ɓě kéà mú gbɔɔ̀ kɛɛ ɖò dyí ɖú. Nyɔɔ̀ dyiɛ náa nyuín, nìí, ɔ mu ɔ mìɔùn kè à mɔ̀ Éézùɖùɛ̀-nyɔ̀ tɔ̀ɔ̀ ɓěɛɛ hwòɛ̌-wùɖù kɔ̃ dyàùn, ɓɛ́ à ké gǎ dyé.

¹⁹ Ɓě mɛ po séɓàɖà kè góò kè bàɖàsǐ ɔ kè nɛɛ̀-kpà séín nì hwɔɖɔɔ̀ múɛɛ wáká ɓó Bounɓoɔ̀ bìì. Ɓě mɛ kpa wa ɖé Bounɓoɔ̀ gbǒɔ̀ ɖɛín-dyi-dèìn-naínɔ̀.”

²⁰ Ti ɓɛ́ Jasúé ɖǎ wùɖùɛ̀ hwɔɛɛ, sáa-zà-nyɔ̀ ɓěɔ̀ ɓaɖa ma waà gã̀à ɓěɔ̀, ké nyɔ ɓěɔ̀ páná ma mú ɖé wuɖu zoo mú. Púɛɛ, hwɔɖɔɔ̀ gmɔɔ̀ wáɖá ma, ké gàa ɖò-ɖò séín dyá ma ɖé hwɔɖɔɔ̀ mú, ké wa ɖuɛ ma toún.

²¹ Wa ɖáɓá ma nyɔ séín kè nyúà-ɖɛ̀ séín ɓě nì ɖé hwɔɖɔɔ̀ múɛɛ gàsíà dyí nyɛ̀nɛ̀ɛ̀. Wa ɖáɓá ma gàa ɓě kè màa ɓě kè dyú mɛ́nɛ́ɛ́ ɓě kè ɓìɖǐ ɓě kè ɓáɖáá ɓě ɔ kè jǎkasì ɓě.

²² Ti ɓɛ́ wa nì ma hwɔɖɔɔ̀ wáɖáuń wɛ̃ɛ, Jasúé cɛ̃ɛ ma gàa-dyù hwà sɔ̃́ ɓě ɓɛ́ wa mɔ̀ ma kà dyéɖé-dyi-kpaìn-nyɔ̀ ɓěɔ̀ kɛɛ gbo, ké ɔ ɖá, “Ɓě mu ɖé gbàɖàùn-mààɔ̀ ɓíɖí-gbǒǔn, ɓɛ́ ɓě ké ɔ kè nyɔ séín ɓě nì ɖé ɔ gbǒɔ̀ múɛɛ síìn, wa ní kɔ̃̀ ɖà mɛ́, sepóɛɖé ɓě ɖììn ma ɔ wuɖu dyéɖéín kà ɓě se ma ɔ kè nyɔ ɓě nì ɖé ɔ gbǒɔ̀ múɛɛ ɖɛ gbà ɖò bũ̌ nyuɛ́ muɛ.”

²³ Ɔ jèɛɛ, gàa-dyù hwà sɔ̃́ ɓěɔ̀ mu ma, ké wa síìn ma Wéɖéháà kè ɔ ɖe kè ɔ ɓǎ kè ɔ ɖíí-gàà ɓěɔ̀ kè ɔ gbǒ-xwíníín-nyɔ̀ tɔ̀ɔ̀ ɓěɔ̀ ɔ kè nyɔ ɓě nì ma ɔ gboɛɛ ɖé píé, ké wa kpa ma wa ɖé Éézùɖùɛ̀-nyɔ̀ ɓěɔ̀ jàɖàìn-hwɔ̀ɖɔ̀ɔ̀ wĩín.

²⁴ Kɛɛ Éézùɖùɛ̀-sòjà ɓěɔ̀ fɔ̃ ma hwɔɖɔ gànáɔ̀ kè ɖɛ séín nì ma ɖé hwɔɖɔɔ̀ múɛ, ɔ sèìn ma séɓàɖà kè góò kè bàɖàsǐ ɔ kè nɛɛ̀-kpà-ɖɛ̀ ɓěɔ̀ ɖòùn. Wa kpa ma ɖɛ ɓě nìà kɛ ɖé Bounɓoɔ̀ gbǒɔ̀ ɖɛín-dyi-dèìn-naínɔ̀.

²⁵ Kɛɛ Jasúé póìn ma Wéɖéháà mɔ̀à gbàɖàùn-mààɔ̀ kɛ kè ɔ gbǒ-xwíníín-nyɔ̀ ɓěɔ̀ ɔ kè nyɔ ɓě nì ma ɔ gboɛ, sepóɛɖé ɔ vǐè ma gàa ɓě ɓɛ́ Jasúé ɖoɓo ma kà ɖé Jɛ́ɖèkóò-hwɔ̀ɖɔ̀ɔ̀ mú, ɓɛ́ wa ké ma kà dyéɖé dyi kpaìn nyɛɛ ní jè. Ɓó zɛ̃̌ɛ̀ kɛɛ, Wéɖéháà gbǒ-xwíníín-nyɔ̀ ɓěɔ̀ nì ɖé Éézùɖùɛ̀-nyɔ̀ ɓěɔ̀ hwìɛ̀ cĩ́ɛń ke.

²⁶ Ti ɓɛ́ Jasúé ɖǎ ma Jɛ́ɖèkóò-hwɔ̀ɖɔ̀ɔ̀ wáɖáa hwɔɛɛ, ɔ po ma Éézùɖùɛ̀-nyɔ̀ ɓěɔ̀ náún kóɖó-kóɖó, ké ɔ ɖá, “Nyɔ mu Jɛ́ɖèkóò-hwɔ̀ɖɔ̀ nìà kɛ poùn ɖeɛɛ, Bounɓoɔ̀ hwòɛ̌-wùɖù mu ɔ kɔ̃ dyiìn. Hwòɛ̌-wùɖùɔ̀ kɛà kɛ̀. Nyɔ mɔ̀ nyɔ mu hwɔɖɔɛ̀ poùn ɖeɛɛ, nyɔɔ̀ dyú séín mɛ hwɔ mɛ́ɛ. Ti ɔ mu hwɔɖɔɛ̀ hìɖì-kpà dèìn nyɛɛ, ɔ nyíɔ́-dyù mɛ sɔ̀ ɔ xwa. Ké ti ɔ mu hwɔɖɔɛ̀ gmɔ-wɔ̃̀ ɓě dyi nyànàìn nyɛɛ, ɔ kpàǔn-hwɛ̀ǐn mɛ sɔ̀ ɔ xwa.”

²⁷ Kǎà Bounɓoɔ̀ nyu ma ɓó Jasúé gbo nìɛ̀, ké Jasúé nyɛ́nɛ́ mu ma ɓóɖóɔ̀ dà séín.