Jasúé 5 - Ɓǎsɔ́ɔ̀ Báɓòɔ̀

¹ Ti ɓɛ́ Ámɔ̀-nyɔ̀ ɓěɔ̀ kã́á séín ɓě nì ma ɖé Jɔ́nì-nìɔ̀ dyóɖó-dyi-kpáìn-naínɔ̀ kɛ kè Kénà-nyɔ̀ ɓěɔ̀ nììn kã́á séín ɓě nì ma ɖé Mɛ́ɖɛ̀tɔ̀wéɖénìà-dyòǒɔ̀ wĩin nyɛɛ wɔ̃́ɔ ma kà Bounɓoɔ̀ nyuɛ ma ké Jɔ́nì-nìɔ̀ ma ma ɓó Éézùɖùɛ̀-nyɔ̀ ɓěɔ̀ bìì, ké wa séín hwɔ ma péɖéɛ hwɛ̀ kɛɛ, wa kpá ma fã̀àǔn mìɔ, ké hwòɖǒ ɖò se ma wa xwíníín nì ɖe ɓó Éézùɖùɛ̀-nyɔ̀ ɓěɔ̀ jè.

Éézùɖùɛ̀-nyɔ̀ ɓěɔ̀ mɛ́ sàà ɖé Gíógàò-hwɔ̀ɖɔ̀ɔ̀ wĩín

² Ɓó tia ɓaɖaa, Bounɓoɔ̀ cɛ̃ɛ ma Jasúé gbo, ké ɔ ɖá, “Ɖú sɔ́ɔ́-pĩ̀à ɓě dyí, ɓɛ́ m̀ ké wa ɖǎ-dyù ɓě mú nyu, ɓɛ́ m̀ ké Éézùɖùɛ̀-gàà ɓě séè sàà mɛ́ keɛɛ sàà ɖáɓá.”

³ Ɔ jèɛɛ, Jasúé ɖú ma sɔ́ɔ́-pĩ̀à ɓě dyí, ké ɔ nyu ma wa ɖǎ-dyù ɓě mú, ké ɔ ɖáɓáìn ma Éézùɖùɛ̀-gàà ɓě séè ma kà sàà mɛ́ keɛɛ sàà ɖé toɖo ɓɛ́ wa ɖáìn Bĩ̀ɔ̌-tòɖòɔ̀ kɛɛ dya.

^4-6 Ɖɛ kɔ̃̀ jè Jasúé ɖáɓá ma kà wa sàà kɛɛ kɛà kɛ̀. Ti ɓɛ́ Éézùɖùɛ̀-nyɔ̀ ɓěɔ̀ sɔ̀ ma kà ɖé Íjè-ɓòɖòɔ̀ kɔ̃ɛɛ, gàa séín kè waà dyú-gàà ɓěɔ̀ ɖǎ ma sàà mɛ́ɛ hwɔ nɔ̀ɔ̀. Kɛɛ wa séè ma gàa-dyù séín ɓě ɓɛ́ wa wóɖóìn ma ɖé gbǎùn-fúɖúáɔ̀ kɔ̃ɛɛ ɖò sàà ɖáɓá ɓó zɔ̃ kpáɖá-nyɔ sɔ̃́ ɓɛ́ wa nyu ma kà ɖéɛɛ xwíníín. Ɓó ɖeɛɛ, ɖé zɔ̃ kpáɖá-nyɔ sɔ̃́ɔ̀ xwíníín nyɛɛ, gàa séín ɓě ɓɛ́ìn ma kà to vɔ̃ɔ ti wa sɔ̀ ma kà ɖé Íjè-ɓòɖòɔ̀ kɔ̃ɛɛ mɛ́ìn ma ɖé gbǎùn-fúɖúáɔ̀ kɔ̃ nyɛ̀nɛ̀ɛ̀, sepóɛɖé wa se ma Bounɓoɔ̀ wuɖu nyu jè. Bounɓoɔ̀ gboò ma kà wa se ma bãa-ɓòɖò ɓɛ́ ɔ ɖáìn ma kà wa ɓǎ ɓě nyɛ́nɛ́ín, ɓɛ́ ɔ ké ma kà wa nyíɛɛ dyéɛ mu fɔɔ cá kɛ.

⁷ Ɔ jèɛɛ, ɔ gã ma waà dyú-gàà ɓěɔ̀ ɓó wa bɛ̃̌ǐn, ɓɛ́ wa ké ma ɖé bãa-ɓòɖòɔ̀ kɔ̃ mu. Waà dyú-gàà ɓěɔ̀ mɔ̀ nyɔ ɓě ɓɛ́ Jasúé ɖáɓá ma kà sàà kɛ̀. Sepóɛɖé wa se ma wa sàà ɖáɓá ɖé gbǎùn-fúɖúáɔ̀ kɔ̃ jè.

⁸ Ti ɓɛ́ gàa séín ɓěɔ̀ ɖǎ ma sàà mɛ́ɛ hwɔɛɛ, wa gã̀ ma ɖé waà jàɖàìn-gbò ɓěɔ̀ múin tee, ké waà sàà-jè ɓěɔ̀ kɔ́ ma hwɛ̀.

⁹ Ké Bounɓoɔ̀ cɛ̃ɛ ma Jasúé gbo, ké ɔ ɖá, “Ɓó zɛ̃̌ɛ̀ kɛɛ, ḿ ɖǎ ɓě Íjè-ɓòɖòɔ̀ dɛ̃-gbɛ̌ɔ̀ kíɖíí zà.” Ɔ jèɛɛ, wa jǔìn ma páɔ̀ Gíógàò-nyɛ̀nɛ̀ kɔ̃̀ xwíníín mɔ̀à ɖɛ-kíɖíí-zà-zà kɛ, ké ɔ mɔ̀ páɔ̀ nyɛ́nɛ́ ke ɓó zɛ̃̌ɛ̀.

¹⁰ Ti ɓɛ́ Éézùɖùɛ̀-nyɔ̀ ɓěɔ̀ nì ma kà ɖé Gíógàò-hwɔ̀ɖɔ̀ɔ̀ wĩín, ɖé Jɛ́ɖèkóò Bɔɔ-kpàɔ̀ kɔ̃ɛɛ, wa pa ma Zĩ̀ìn-Kɔ̃in-hwɔ̀ɔ̀ ɓó waà dɛ̀nɛ̀ kĩ́ín-kĩ́ínɔ̀ wé ɓaɖa-bùè sè hĩinyɛ nììnɔ̀ hwìo.

¹¹ Ké wéɔ̀ nyɔ kɔ ma ɓó Zĩ̀ìn-Kɔ̃in-hwɔ̀ɔ̀ ɖeín dyíɛɛ mɔ̀ ma ti kĩ́ín-kĩ́ín ɓɛ́ Éézùɖùɛ̀-nyɔ̀ ɓěɔ̀ ké ma ɓáá-ɖɛ̀ ɓě nì ma ɖé Kénà-ɓòɖòɔ̀ kɔ̃ɛɛ ɖíɛ́ ɓě ɖiɛ. Wa ɖi ma bɛɖɛɛ̀ se dyáìn-ɖɛ̀ gbo nìɛ kè gbùǔ ɓó wéa ɓaɖa.

¹² Sɔ̀ìn ɓó wéa gboɛɛ, mánà ɖò se ma wáɖá ɖe, ké Éézùɖùɛ̀-nyɔ̀ ɓěɔ̀ se ma mánà ɖi ɖe, kɛɛ wa ɖiá ma ɓáá-ɖɛ̀ ɓě nì ma ɖé Kénà-ɓòɖòɔ̀ kɔ̃ɛɛ kánáá pū.

Bounɓoɔ̀ to-vɔ̃-nyɔ̀ ɓěɔ̀ nàìn-nyɔ̀ wóɖóìn Jasúé dyí

¹³ Wé ɖòɛ̀ ɓaɖaa, Jasúé nì ma ɓó Jɛ́ɖèkóò-hwɔ̀ɖɔ̀ɔ̀ wĩín, ké ti ɓɛ́ ɔ ɖú ma ɔ dyéɖéɔ̀ dyiíɛɛ, púɛɛ, ɔ dyé ma gàa ɖò. Gàaɔ̀ ɓéɖé ma gàsíà ɖò xwa. Ké Jasúé mu ma ɓó gàaɔ̀ gbo, ké ɔ diè ma ɔ dyi, ké ɔ ɖá, “M̀ mɔ̀ à ɖòò, mɔɔ m̀ mɔ̀ à gbo-vɔ̃-nyɔ̀ɔ̀?”

¹⁴ Ké gàaɔ̀ jǔ ma ɔ gɔ̃̌, ké ɔ ɖá, “Ḿ se nyɔ ɖò gbo zi, kɛɛ ḿ mɔ̀ Bounɓoɔ̀ to-vɔ̃-nyɔ̀ ɓěɔ̀ nàìn-nyɔ̀.” Púɛɛ, Jasúé taɓa ma dú hwuɖu ɓó ɔ dyúa, ké ɔ cɛ̃ɛ ma ɔ gbo, ké ɔ ɖá, “Ɓɔ̌ɔ̀, ní mu ɖɛ séín nì mu ḿ gbo cɛ̃ìn nyɛɛ nyuùn.”

¹⁵ Hwɛ̀ ké gàaɔ̀ cɛ̃ɛ ma ɔ gbo, ké ɔ ɖá, “Zà nì bǎɔ̀ ɓoún, sepóɛɖé pá kɔ̃̀ mú ɓɛ́ m̀ nyànàà dyiɛɛ hwɛ̀ mú.” Ké Jasúé nyuɛ ma náa.