Jasúé 4 - Ɓǎsɔ́ɔ̀ Báɓòɔ̀

Éézùɖùɛ̀-nyɔ̀ ɓěɔ̀ nyànàìn nyɔ-ɖɛ-hwìɖǐi-dyàìn-sɔ̀ɔ̌-kpò ɓě dyi

¹ Ti ɓɛ́ Éézùɖùɛ̀ɛ̀ ɓóɖó-dù gànáɔ̀ ɖǎ ma Jɔ́nì-nìɔ̀ péɖéɛ hwɔɛɛ, Bounɓoɔ̀ cɛ̃ɛ ma Jasúé gbo, ké ɔ ɖá,

² “M̀ mɛ gã gàa ɓaɖa-bùè sè sɔ̃́ sɔ̀ìn ɖé nyɔ ɓěɔ̀ hwìɛ̀. Gàa dyúáɖò mɛ sɔ̀ ɖé xwéɖé-dù ɖò-ɖò ɓěɔ̀ múin.

³ M̀ mɛ cɛ̃ɛ wa gbo, ɓɛ́ wa ké sɔ́ɔ́-kpò ɓaɖa-bùè sè sɔ̃́ ɖé Jɔ́nì-nìɔ̀ hwòɖǒǔn zà, ɓɛ́ wa ké wa kpa, ɓɛ́ wa ké wa dɛ̀ ɓě muà pɛ̃́ìn ɓó máaǔn wɛ̃ɛ dyí poìn. Wa mɛ zà sɔ́ɔ́-kpò ɓěɔ̀ dɛ̀ jɛ́ɛ́ ɓɛ́ sáa-zà-nyɔ̀ ɓěɔ̀ nyànàà dyiɛ.”

⁴ Ɔ jèɛɛ, Jasúé ɖá ma gàa ɓaɖa-bùè sè sɔ̃́ ɓě ɓɛ́ ɔ ɖǎ ma kà gã sɔ̀ìn ɖé Éézùɖùɛ̀ɛ̀ xwéɖé-dù ɖò-ɖò ɓěɔ̀ hwìɛ̀ kɛ.

⁵ Ké ɔ cɛ̃ɛ ma wa gbo, ké ɔ ɖá, “Ɓě mu ɖé Jɔ́nì-nìɔ̀ hwòɖǒǔn, ɓó Bounɓo mɔ̀à ɓěà Gèɖèpɔ́ɔ̀ kɛɛ gbɔ̀ɖɔ̀ɔ̀ dyúa, ɓɛ́ ɓě ɖò-ɖò ké sɔ́ɔ́-kpò dyúáɖò-dyúáɖò dyí ɖú, ɓɛ́ ɓě kéɛ kɔún dè, ɓɛ́ ɓě kéɛ dyà. Kà Éézùɖùɛ̀ɛ̀ xwéɖé-dù ɓěɔ̀ jĩ̀à kɛɛ, kǎà sɔ́ɔ́-kpòɔ̀ mɛ jĩ̀.

⁶ Sɔ́ɔ́-kpò ɓěɛ̀ mu ɖɛ Bounɓoɔ̀ ɖǎà nyu ɓó zɛ̃̌ɛ̀ kɛɛ jè ɓě hwìɖǐi dyàùn. Ɔ jǔ ké ɓěɛ̀ dyú ɓě dyi ɓě dyi diè, ké wa dyi níiń, ‘Ɖɛ́ kɔ̃̀ jè sɔ́ɔ́-kpò ɓěɛ̀ nyànàà dà dyiɛ́?’ ní,

⁷ nìí, ɓě mɛ cɛ̃ɛ wa gbo, ɓɛ́ ɓě ké níiń, ‘Sɔ́ɔ́-kpò ɓě nìà kɛ nyànà dà ɓó dyi, ɓɛ́ wa kéɛ à hwìɖǐi dyà kà Bounɓoɔ̀ cɛ̃ó zɔ̃̌ɔ̀ Jɔ́nì-nìɔ̀ kpó, ti ɓɛ́ sáa-zà-nyɔ̀ ɓěɔ̀ péɖéìnǒ Bounɓoɔ̀ gma-gbɔ̀ɖɔ̀ɔ̀ Jɔ́nì-nìɔ̀ kɛ.’ Kǎà sɔ́ɔ́-kpò ɓě nìà kɛ mu Éézùɖùɛ̀-nyɔ̀ ɓěɔ̀ ɖɛ-hwìɖǐi-dyàìn-ɖɛ̀ jǔùn kánáá pū.”

⁸ Ké gàa ɓěɔ̀ nyu ma ɖɛ ɓɛ́ Jasúé cɛ̃ ma wa gboɛ. Wa nyuɛ ma kà Bounɓoɔ̀ nyuɛ ma kà Jasúé gbo cɛ̃ɛ kɛ. Wa zà ma sɔ́ɔ́-kpò ɓaɖa-bùè sè sɔ̃́ ɖé Jɔ́nì-nìɔ̀ hwòɖǒǔn kà Éézùɖùɛ̀ɛ̀ xwéɖé-dù ɓěɔ̀ nyu jĩ̀ɛ̀ kɛ. Ké wa kpa ma sɔ́ɔ́-kpò ɓěɔ̀ ɖé dɛ̀ Éézùɖùɛ̀-nyɔ̀ ɓěɔ̀ mu ma kà pɛ̃́ìn nyɛ, ké wa poìn ma wa dyí.

⁹ Ké Jasúé nyànàìn ma sɔ́ɔ́-kpò ɓaɖa-bùè sè sɔ̃́ kà kò ɖò dyi ɖé Jɔ́nì-nìɔ̀ hwòɖǒǔn, dɛ̀ ɓɛ́ sáa-zà-nyɔ̀ ɓě ɓéɖé ma kà gma-gbɔ̀ɖɔ̀ɔ̀ kɛɛ nyànà ma kà dyiɛ. Sɔ́ɔ́-kpò ɓěɔ̀ nì ɖé Jɔ́nì-nìɔ̀ hwòɖǒǔn ke.

¹⁰ Ɓó tia ɓaɖaa, sáa-zà-nyɔ̀ ɓě ɓéɖé ma kà gbɔ̀ɖɔ̀ɔ̀ kɛɛ nyànà ma ɓó Jɔ́nì-nìɔ̀ hwòɖǒǔn dyi, ké nyɔ ɓěɔ̀ fṹà, ké wa péɖé ma. Sáa-zà-nyɔ̀ ɓěɔ̀ gã̀ ma ɓó dyi nyànàǔn dyi tee, ké nyɔ ɓěɔ̀ hwɔ ma ɖɛ séín ɓɛ́ Bounɓoɔ̀ cɛ̃ ma kà Jasúé gboɛɛ nyuɛ hwɛ̀. Wa nyuɛ ma kà Mózè nyuɛ ma kà Jasúé gbo cɛ̃ɛ kɛ.

¹¹ Ti ɓɛ́ nyɔ séín ɓěɔ̀ ɖǎ ma péɖéɛ hwɔɛɛ, sáa-zà-nyɔ̀ ɓě ɓɛ́ wa ɓéɖé ma kà Bounɓoɔ̀ gbɔ̀ɖɔ̀ɔ̀ kɛɛ dyá ma toɖoí, ké wa zi ma nyɔ séín ɓěɔ̀ dyúa.

¹² Ɓó tia ɓaɖaa, gàa ɓě sɔ̀ ma kà ɖé Wuɖuɓíín nììn xwéɖé-dùɔ̀ kè Gáà nììn xwéɖé-dùɔ̀ ɔ kè Mànásì nììn xwéɖé-dù fáún-fáúnɔ̀ múɛɛ péɖé ma Jɔ́nì-nìɔ̀ kĩ́ín ɖé Éézùɖùɛ̀-nyɔ̀ tɔ̀ɔ̀ ɓěɔ̀ dyúa kà Mózè nyuɛ ma kà cɛ̃ɛ kɛ. Gàa ɓě nìà kɛ dyé ma ti ɓó to jè.

¹³ Wa ɓɛ́ìn ma nyɔ-kpò táázĩ̀ìn kpáɖá-nyɔ sɔ̃́ jǔɛ. Dɛ̀ wa péɖéìn ma kà Jɔ́nì-nìɔ̀ ɓó Bounɓoɔ̀ gbɔ̀ɖɔ̀ɔ̀ dyúa kɛɛ mɔ̀ ma ɖé Jɛ́ɖèkóò Bɔɔ-kpàɔ̀ kɔ̃.

¹⁴ Ɓó wéa ɓaɖaa, Bounɓoɔ̀ nyuɛ ké Éézùɖùɛ̀-nyɔ̀ séín ɓěɔ̀ dè ma Jasúé dya. Wa dyé ma ɔ kpéín tee kà wa nyu ma kà Mózè kpéín dyéɛ kɛ.

¹⁵ Ti ɓɛ́ Éézùɖùɛ̀-nyɔ̀ ɓěɔ̀ ɖǎ ma Jɔ́nì-nìɔ̀ péɖéɛɛ, Bounɓoɔ̀ cɛ̃ɛ ma Jasúé gbo, ké ɔ ɖá,

¹⁶ “Cɛ̃ɛ sáa-zà-nyɔ̀ ɓě ɓɛ́ wa ɓéɖéà gma-gbɔ̀ɖɔ̀ɔ̀ kɛɛ gbo, ɓɛ́ wa ké toɖoí dyá.”

¹⁷ Ɔ jèɛɛ, Jasúé cɛ̃ɛ ma sáa-zà-nyɔ̀ ɓěɔ̀ gbo, ké ɔ ɖá, “Ɓě dyá toɖoí.”

¹⁸ Ké sáa-zà-nyɔ̀ ɓěɔ̀ dyá ma toɖoí. Ti ɓɛ́ wa dyá ma toɖoí nyɛ̀nɛ̀ɛ̀ kɛɛ, púɛɛ, Jɔ́nì-nìɔ̀ dyaìn ma dyí ɖe, ké ɔ dyíìn ma ɔ kpóóɔ̀ kɔ̃in ɖe kà ɔ nyu ma kà nìɛ̀ kĩ́ín nyɛ.

¹⁹ Ti ɓɛ́ Éézùɖùɛ̀-nyɔ̀ ɓěɔ̀ péɖé ma kà Jɔ́nì-nìɔ̀ kɛɛ mɔ̀ ma waà dɛ̀nɛ̀ kĩ́ín-kĩ́ínɔ̀ wé ɓaɖa-bùè nììnɔ̀ ɓaɖa. Ké wa nyànàìn ma waà jàɖàìn-gbò ɓěɔ̀ dyi ɖé Gíógàò-hwɔ̀ɖɔ̀ ɓɛ́ ɔ hwɔ ma ɖé Jɛ́ɖèkóò-hwɔ̀ɖɔ̀ɔ̀ dyóɖó-xwáɖáún-wóɖóìn-naínɔ̀ wĩín dyíɛɛ wĩín.

²⁰ Ké Jasúé nyànàìn ma sɔ́ɔ́-kpò ɓaɖa-bùè sè sɔ̃́ ɓě ɓɛ́ wa zà ma kà ɖé Jɔ́nì-nìɔ̀ hwòɖǒǔn wɛ̃ɛ dyi ɖé Gíógàò-hwɔ̀ɖɔ̀ɔ̀ wĩín.

²¹ Hwɛ̀ ké ɔ cɛ̃ɛ ma Éézùɖùɛ̀-nyɔ̀ ɓěɔ̀ gbo, ké ɔ ɖá, “Ɔ jǔ ké ɓěɛ̀ dyú ɓě dyi ɓě dyi diè ɖéé ɖé dyúa, ké wa dyi níiń, ‘Ɖɛ́ mɔ̀ sɔ́ɔ́-kpò ɓě nìà kɛ xwíníín nyɛ́?’ ní,

²² nìí, ɓě mɛ cɛ̃ɛ wa gbo, ɓɛ́ ɓě ké níiń, ‘Sɔ́ɔ́-kpò ɓě nìà kɛ dyàà à hwìɖǐi kà ɓɛ́ à péɖéìnǒ zɔ̃̌ɔ̀ Jɔ́nì-nìɔ̀ ɓó ɓóɖó dyɛ-dyɛ kɔ̃ɛ.’

²³ Ɓě cɛ̃ ɖɛ nìà kɛ ɓěɛ̀ dyú ɓěɔ̀ gbo, sepóɛɖé Bounɓo mɔ̀à ɓěà Gèɖèpɔ́ɔ̀ kɛɛ nyuɛ ké Jɔ́nì-nìɔ̀ ma ma ɓó ɓěà bìì, ké ɓěà séín hwɔ ma péɖéɛ hwɛ̀. Bounɓoɔ̀ nyuó zɔ̃̌ɔ̀ ɖɛ dyúáɖò nìà kɛ Dyóó Zĩ-zãɔ̀ bũ̌ ɓó à ɓǎ ɓě bìì ɖekè.

²⁴ Ɔ nyu ɖɛ nìà kɛ ɓɛ́ nyɔ séín nì ɓóɖó-kpàà kɔ̃ɛɛ kéɛ dyuò kà ɔ ɓéɖé kpéɛ, ɔ kè ɓɛ́ ɓě ké ɔ dyi fɛ̃̀ìn kánáá pū.”