Jasúé 3 - Ɓǎsɔ́ɔ̀ Báɓòɔ̀

Éézùɖùɛ̀-nyɔ̀ ɓěɔ̀ péɖé Jɔ́nì-nìɔ̀

¹ Ti ɓɛ́ dyéɖé-dyi-kpaìn-nyɔ̀ ɓěɔ̀ ɖǎ ma ɖe kɔ́ìn nyɛɛ, wéɔ̀ nyɔ kɔ ma ɓó dyíɛɛ gànà-kṹún mɛ̀nɛ̀ɛ̀ kɛɛ, Jasúé kè Éézùɖùɛ̀-nyɔ̀ séín ɓěɔ̀ sɔ̀ ma ɖé Sítììn-pàɔ̀ mú dyí, ké wa mu ma ɖé Jɔ́nì-nìɔ̀ wĩín. Ké wa nyànàìn ma ɓó waà jàɖàìn-gbò ɓěɔ̀ dyi, ké wa nyu ma ɓó wé gbɛ̀ǐ-gbɛ̀ǐ, hwɛ̀ ké wa péɖé ma.

² Ti ɓɛ́ wa ɖǎ ma wé tã ɓó Jɔ́nì-nìɔ̀ wĩín nyuɛɛ, waà nàìn-nyɔ̀ ɓěɔ̀ po ma zio ɖé jàɖàìn-hwɔ̀ɖɔ̀ɔ̀ múin,

³ ké wa ɖá, “Ɔ jǔ ké ɓě dyi sáa-zà-nyɔ̀ ɓě mɔ̀à Ɖíìváà-nyɔ̀ ɓěɛɛ Bounɓo mɔ̀à ɓěà Gèɖèpɔ́ɔ̀ kɛɛ gma-gbɔ̀ɖɔ̀ɔ̀ kpaa dyé ní, nìí, ɓě mɛ sɔ̀ dyí, ɓɛ́ ɓě ké wa kíɖíí sí.

⁴ Ké wa mu ɓě hwìè ɓɛ́ ɓě ké kpaa da zàìn, sepóɛɖé ɓě séè hwìè nìà kɛ kpa ɖò. Kɛɛ ɓě ní ɖá ɓɛ́ ɓě ké gma-gbɔ̀ɖɔ̀ɔ̀ bũ̌in xwɛ̃́ìn. Ɓě mɛ sè pá ɓɛ́ìn ɓáɖáa hɔ̃dɛ̀ɖɛ̀ hm̀m̌ jǔɛ kɛɛ ɓó ɓě kè gbɔ̀ɖɔ̀ɔ̀ pṹa.”

⁵ Ti ɓɛ́ Éézùɖùɛ̀-nyɔ̀ ɓěɔ̀ nàìn-nyɔ̀ ɓěɔ̀ ɖǎ ma zioɔ̀ poɛ hwɔɛɛ, Jasúé cɛ̃ɛ ma nyɔ ɓěɔ̀ gbo, ké ɔ ɖá, “Ɓě po ɓě mìɔùn wáká, ɓɛ́ ɓě ké mú hwɛ̀, sepóɛɖé Bounɓoɔ̀ mu dĩ́ín-dĩ̀ìn-ɖɛ̀ ɓě nyuùn ɖé ɓěà hwìɛ̀ ɓó gàɖàà.”

⁶ Ti ɓɛ́ zɔ̃ ɖǎ ma zɔ̃ɛɛ, Jasúé cɛ̃ɛ ma sáa-zà-nyɔ̀ ɓěɔ̀ gbo, ké ɔ ɖá, “Ɓě ɖú gma-gbɔ̀ɖɔ̀ɔ̀ dyí, ɓɛ́ ɓě ké à dyúa zi, ɓɛ́ ɓě ké péɖé kĩ́ín.” Ɔ jèɛɛ, sáa-zà-nyɔ̀ ɓěɔ̀ ɖú ma gma-gbɔ̀ɖɔ̀ɔ̀ dyí, ké wa zi ma nyɔ ɓěɔ̀ dyúa.

⁷ Ké Bounɓoɔ̀ cɛ̃ɛ ma Jasúé gbo, ké ɔ ɖá, “Ní mu m̀ dya dèɛ̀ gbɔ dèìn ɓó zɛ̃̌ɛ̀ ɓó Éézùɖùɛ̀-dyù séín ɓěɔ̀ dyéɖé waí, ɓɛ́ wa kéɛ dyuò kà ḿ nì ɓó m̀ gbo kà dyúáɖò kà ḿ nì ma kà ɓó Mózè gboɛ.

⁸ M̀ mɛ cɛ̃ɛ sáa-zà-nyɔ̀ ɓě ɓéɖéà gma-gbɔ̀ɖɔ̀ɔ̀ kɛɛ gbo, ɓɛ́ m̀ ké níiń, ‘Ɔ jǔ ké ɓě ɖǎ ɓó Jɔ́nì-nìɔ̀ kpóóɔ̀ kɔ̃ nyiniín, nìí, ɓě mɛ sí níɔ̀ gbo, ɓɛ́ ɓě ké ɓó dyi nyànà.’ ”

⁹ Hwɛ̀ ké Jasúé cɛ̃ɛ ma Éézùɖùɛ̀-nyɔ̀ ɓěɔ̀ gbo, ké ɔ ɖá, “Ɓě xwɛ̃́ìn ḿ bũ̌in, ɓɛ́ ɓě ké ɖɛ Bounɓo mɔ̀à ɓěà Gèɖèpɔ́ɔ̀ kɛɛ cɛ̃ɛ ɖùǔ gbo tò.

¹⁰ Nì-nì Gèɖèpɔ́ɔ̀ nì ɓěà hwìɛ̀, ké ɔ muɛ nyuùn ɓɛ́ ɓěà ké Kénà-nyɔ̀ ɓěɔ̀ kè Hítì-nyɔ̀ ɓěɔ̀ kè Hívì-nyɔ̀ ɓěɔ̀ kè Pɛ́wìɖì-nyɔ̀ ɓěɔ̀ kè Gígà-nyɔ̀ ɓěɔ̀ kè Ámɔ̀-nyɔ̀ ɓěɔ̀ ɔ kè Jɛ́ɓù-nyɔ̀ ɓěɔ̀ kúmú. Ɖɛ ɓě muɛ ɓě dyí tɛ̀mɛ̀ìn kà ɖɛ ɓěɛ̀ mu kpáùn wɛ̃ɛ kɛà kɛ̀.

^11-13 Sáa-zà-nyɔ̀ ɓě ɓɛ́ wa ɓéɖéà Ɖɛɓíɔ́ mɔ̀ nyɔ kɔ̃̀à ɓóɖó-kpà gànáà wuɖuíɛɛ gma-gbɔ̀ɖɔ̀ɔ̀ kɛɛ mu ɓěà dyúa ziìn, ɓɛ́ wa ké Jɔ́nì-nìɔ̀ gbo sí kĩ́ín. Ti ɓɛ́ sáa-zà-nyɔ̀ ɓěɔ̀ ɓo mu níɔ̀ dyi tìnììn nyɛ̀nɛ̀ɛ̀ kɛɛ, nìí, ní séín muà ɖé ní-xwìà sɔ̀ìn nyɛɛ mu ziɛ ɓɔ́ùn, ɓɛ́ ɔ ké dyí dyá. Ɓó kàǔn wɛ̃ɛ, ɓě mɛ gã gàa ɓaɖa-bùè sè sɔ̃́. Gàa dyúáɖò mɛ sɔ̀ ɖé ɓěɛ̀ xwéɖé-dù ɖò-ɖò ɓěɔ̀ múin.”

¹⁴ Ɓó wéa ɓaɖaa, Éézùɖùɛ̀-nyɔ̀ ɓěɔ̀ sɔ̀ ma dyí, ké wa dè ma gbɛ̌, ɓɛ́ wa ké ma Jɔ́nì-nìɔ̀ péɖéɛ mu, ké sáa-zà-nyɔ̀ ɓě ɓɛ́ wa ɓéɖé ma kà gma-gbɔ̀ɖɔ̀ɔ̀ kɛɛ nì ma wa dyúa.

¹⁵ Ɔ mɔ̀ ma wa nììn mɔɔ́-kɔ́-ɓàɖà, ké ɓó ti nìà kɛ múɛɛ, Jɔ́nì-nìɔ̀ dyí ma ní. Kɛɛ ti ɓɛ́ sáa-zà-nyɔ̀ ɓě ɓɛ́ wa ɓéɖé ma kà gma-gbɔ̀ɖɔ̀ɔ̀ kɛɛ ɓo tìnììn ma níɔ̀ dyi nyɛ̀nɛ̀ɛ̀ kɛɛ,

¹⁶ púɛɛ, ní sɔ̀ìn ɖé ní-xwìà kɛɛ ɓɔ́ ma ziɛ. Ɔ dyá ma dyí, ké ní-kpóɖóɔ̀ nyini ma ɖéé ɖé ní-xwìà ɖé Áɖɔ̀ùn-hwɔ̀ɖɔ̀ ɓɛ́ ɔ nì ma ɖé Zàwɛ́ɖɛ́fàùn-hwɔ̀ɖɔ̀ɔ̀ wáún wɛ̃ɛ gbo. Sɔ̀ìn ɓó dɛ̀ níɔ̀ cɛ̃̀àìn kpó, muà ní-ɓìɖìì ɖé Tɔ̃́ Dòùnɓìǎ nìà ɖé Àwáɖáɓà Bɔɔ-kpàɔ̀ kɔ̃ɛ gboɛɛ, ní ɖò se ma ziɛń nì. Ti ɓɛ́ níɔ̀ ɖǎ ma kpó cɛ̃̀ɛ, nyɔ ɓěɔ̀ péɖéìn ma níɔ̀ ɓó Jɛ́ɖèkóò-hwɔ̀ɖɔ̀ɔ̀ wĩín.

¹⁷ Ɓó tia ɓaɖaa, sáa-zà-nyɔ̀ ɓě ɓɛ́ wa ɓéɖé ma kà Bounɓoɔ̀ gma-gbɔ̀ɖɔ̀ɔ̀ kɛɛ nyànà ma ɓóɖó dyɛ-dyɛɔ̀ kɔ̃ dyi ɓó Jɔ́nì-nìɔ̀ hwòɖǒǔn, ké wa gã̀ ma ɓó dyi nyànàǔn dyi tee, ké Éézùɖùɛ̀ɛ̀ ɓóɖó-dù gànáɔ̀ hwɔ ma péɖéɛ.