Jasúé 24 - Ɓǎsɔ́ɔ̀ Báɓòɔ̀

Jasúé wùɖù Éézùɖùɛ̀-nyɔ̀ ɓěɔ̀ gbo ɖé Sɛ́kɛ̃̀ìn-hwɔ̀ɖɔ̀ɔ̀ wĩín

¹ Wé ɖòɛ̀ ɓaɖaa, Jasúé poìn Éézùɖùɛ̀-nyɔ̀ séín ɓěɔ̀ dyí ɖé Sɛ́kɛ̃̀ìn-hwɔ̀ɖɔ̀ɔ̀ wĩín. Ti wa ɖǎ ma ɖé dyí poìn nyɛɛ, ɔ ɖá ma waà nyɔ vɛ̀nɛ̀ ɓěɔ̀ kè waà nàìn-nyɔ̀ ɓěɔ̀ kè waà tɔ̀ɔ̀-ɓìɔ̀ ɓěɔ̀ ɔ kè waà gɔ̌mànà-nyɔ̀ ɓěɔ̀, ké wa poìn ma dyí ɓó Gèɖèpɔ́ɔ̀ pá hwɛ̀ǐn-hwɛ̀ǐn nì ma ɓóɛɛ kɔ̃.

² Hwɛ̀ ké Jasúé cɛ̃ɛ ma nyɔ séín ɓěɔ̀ gbo, ké ɔ ɖá, “Bounɓo mɔ̀à ɓěà Gèɖèpɔ́ɔ̀ kɛɛ ɖá ɓě ɓǎ nììn ɓǎ ɓěɔ̀ cĩ́ó zɔ̃̌ɔ̀ ɖé Dyùféɖétì-nìɔ̀ dyóɖó-xwáɖáún-wóɖóìn-naínɔ̀, ké wa ɓiè zɔ̃̌ɔ̀ gèɖèpɔ́ɔ̀ kà kò ɖò ɓě. Waà dyúáɖò mɔ̀ zɔ̃̌ɔ̀ Tíwàɖà ɓɛ́ ɔ mɔ̀ zɔ̃̌ɔ̀ kà Ééɓòɖòhɛ̃́ɛ̀ kè Néhɔ̀ ɓǎ kɛ.

³ Kɛɛ ɔ zà zɔ̃̌ɔ̀ ɓě ɓǎ nììn ɓǎ mɔ̀à Ééɓòɖòhɛ̃́ɛ̀ kɛɛ ɖé Dyùféɖétì-nìɔ̀ dyóɖó-xwáɖáún-wóɖóìn-naínɔ̀, ké ɔ dyà ɔ nɔ̄ Kénà-ɓòɖòɛ̀ kɔ̃, ké ɔ nàìn zɔ̃̌ɔ̀ ɔ Kénà-ɓòɖòɛ̀ dà séín ɔ mu kɛ. Ké ɔ nyí zɔ̃̌ɔ̀ ɔ Áázè, ké dyììn ɖé Áázè múɛɛ, ɔ nyí zɔ̃̌ɔ̀ ɔ dyú ɓáún-ɓáún.

⁴ Ɔ nyí zɔ̃̌ɔ̀ Áázè mɔ̀ùn Jékɔ̀ kè Íìsɔ́ɔ̀. Ké ɔ nyí zɔ̃̌ɔ̀ Íìsɔ́ɔ̀ Séì Toɖo-ɓòɖòɔ̀, kɛɛ Jékɔ̀ kè ɔ dyú ɓěɔ̀ mu zɔ̃̌ɔ̀ ɖé Íjè-ɓòɖòɔ̀ kɔ̃.

⁵ Ti ɓɛ́ wa nì zɔ̃̌ɔ̀ ɖé Íjè-ɓòɖòɔ̀ kɔ̃ɛɛ, ɔ ɖoɓo ɖé Mózè kè Eɖóún, ké ɔ dyà nyɔ-gǎ-dyéìn-ɖɛ̀ ɓě Íjè-nyɔ̀ ɓěɔ̀ kɔ̃. Ké ɔ zà zɔ̃̌ɔ̀ ɓě kè ɓě ɓǎ ɓě ɖé Íjè-ɓòɖòɔ̀ kɔ̃,

⁶ ké ɔ dyà zɔ̃̌ɔ̀ ɓě ɖé Dyóó Zĩ-zãɔ̀ wĩín. Ti ɓɛ́ ɓě nì zɔ̃̌ɔ̀ ɖé Dyóó Zĩ-zãɔ̀ wĩín nyɛɛ, Íjè-sòjà ɓěɔ̀ kè waà hwíì-sǒ ɓěɔ̀ ɔ kè waà sǒ-nàìn-nyɔ̀ ɓěɔ̀ kúmúìn zɔ̃̌ɔ̀ ɓě,

⁷ ké ɓě pòìn ɔ kpéi, ɓɛ́ ɔ ké ɓě gbo kpá. Ké ɔ nyuɛ zɔ̃̌ɔ̀ ké tíe kpɔ̃ ɓó ɓě kè wa pṹa. Ké ɔ nyuɛ zɔ̃̌ɔ̀ ké dyóóɔ̀ ma, ké ɓě zĩ̀ìn zɔ̃̌ɔ̀ ɓóɖó dyɛ-dyɛ kɔ̃. Kɛɛ ti ɓɛ́ Íjè-sòjà ɓěɔ̀ sí zɔ̃̌ɔ̀ ɓě kíɖííɛɛ, ɔ nyuɛ ké dyóóɔ̀ zi zɔ̃̌ɔ̀ wa kɔ̃in, ké wa séín sè níɔ̀ kɔ̃ nyɛ̀nɛ̀ɛ̀. Ɓě mìɔùn nììn dyéɖé dyé ɖɛ ɔ nyu zɔ̃̌ɔ̀ Íjè-nyɔ̀ ɓěɔ̀ bũ̌ɛ. “Sɔ̀ìn ɓóɛ gboɛɛ, ɓě cĩ́ zɔ̃̌ɔ̀ ɖé gbǎùn-fúɖúáɔ̀ kɔ̃ ɓó zɔ̃ pàɖǎ xwíníín.

⁸ Hwɛ̀ ké ɔ dyà ma ɓě ɖé Ámɔ̀-nyɔ̀ ɓě ɓɛ́ wa cĩ́ ma kà ɖé Jɔ́nì-nìɔ̀ dyóɖó-xwáɖáún-wóɖóìn-naínɔ̀ kɛɛ ɓóɖóɔ̀ kɔ̃. Ké wa vɔ̃ ma ɓě gbo, kɛɛ ɔ po ma wa ɓě xwaún dyi. Ɔ nyuɛ ma ké ɓě gbɔɔ̀ ma wa mú, ké ɓě ɖú ma waà ɓóɖóɔ̀ dyí.

⁹ Sɔ̀ìn ɓóɛ gboɛɛ, Béɖà ɓɛ́ ɔ mɔ̀ ma kà Zípɔ̀ɛ̀ dyú-gààɔ̀, ké ɔ mɔ̀ ma kà Móà-ɓòɖòɔ̀ kã́áɔ̀ kɛɛ dyé ma ti, ɓɛ́ ɔ ké ma ɓě gbo vɔ̃, ké ɔ ɖá ma Béɖàùn ɓɛ́ ɔ mɔ̀ ma kà Bɛ́òɛ̀ dyú-gààɔ̀ kɛ, ɓɛ́ ɔ ké ma ɓě hwòɛ̌-wùɖù kɔ̃ po.

¹⁰ Kɛɛ ɔ seɛ ma gbo wɔ̃́ìn ɓɛ́ Béɖàùn ké ma ɓě hwòɛ̌-wùɖù kɔ̃ po. Ɔ nyuɛ ma ké Béɖàùn po ma ɓě mana kɔ̃, ké ɔ póìn ma ɓě sɔ̀ìn ɖé ɔ xwaún.

¹¹ Sɔ̀ìn ɓóɛ gboɛɛ, ɓě péɖé ma Jɔ́nì-nìɔ̀, ké ɓě dyi ma ɖé Jɛ́ɖèkóò-hwɔ̀ɖɔ̀ɔ̀ wĩín. Ké Jɛ́ɖèkóò-nyɔ̀ ɓěɔ̀ vɔ̃ ma ɓě gbo, kɛɛ ɔ po ma wa ɓě xwaún dyi. Kà dyúáɖòɔ̀ kǎà Ámɔ̀-nyɔ̀ ɓěɔ̀ kè Pɛ́wìɖì-nyɔ̀ ɓěɔ̀ kè Kénà-nyɔ̀ ɓěɔ̀ kè Hítì-nyɔ̀ ɓěɔ̀ kè Gígà-nyɔ̀ ɓěɔ̀ kè Hívì-nyɔ̀ ɓěɔ̀ ɔ kè Jɛ́ɓù-nyɔ̀ ɓěɔ̀ vɔ̃ ma ɓě gbo, kɛɛ ɔ po ma wa mɔ̀ùn ɓě xwaún dyi ɖekè.

¹² Ɔ nyuɛ ma ké dyɔɔ̀ tɛɖɛ ma Ámɔ̀-kã̀ǎ sɔ̃́ ɓěɔ̀ kè waà sójà ɓěɔ̀ gbɔi, ké ɓě kúmú ma wa sɔ̀ìn ɓó waà ɓóɖóɔ̀ kɔ̃ dyi. Ɓěɛ̀ gàsíà ɓěɔ̀ kè ɓěɛ̀ pɔnɔ ɓěɔ̀ mɔ̀ ɖɛ se ma wa kúmú.

¹³ Ti ɓɛ́ ɓě ɖǎ ma ɓěɛ̀ mú-nyɛ́-nyɔ̀ ɓěɔ̀ toún ɖuɛɛ, ɔ nyí ma ɓě geɖe ɓě ɓɛ́ ɓě se nyuɛ kè hwɔɖɔ ɓě ɓɛ́ ɓě se dèɛ. Kàǔn wɛ̃ɛ, ɓě cĩ́ ɖé hwɔɖɔ ɓěɛ̀ mú, ké ɓě nìǎ géɖéè-gbǎ kè ɔ́ɖè-gbǎ ɓě ɓɛ́ ɓě se ɓáa ɓo ɖiɛń.

¹⁴ “Sepóɛɖé Bounɓoɔ̀ ɖǎ ɓě bìì ɖɛ ɓě nìà kɛ nyu jèɛɛ, ɓě mɛ fɛ̃̀ìn ɔ dyi, ɓɛ́ ɓě ké ɔ ɖòùn ɓiè hwòɖǒɛ̀-ɖé-hwɛ̀-kà. Ɓě mɛ táà gèɖèpɔ́ɔ̀ ɓě ɓɛ́ ɓě ɓǎ nììn ɓǎ ɓěɔ̀ ɓiè zɔ̃̌ɔ̀ kà ɖé Dyùféɖétì-nìɔ̀ dyóɖó-xwáɖáún-wóɖóìn-naínɔ̀ kè ɖé Íjè-ɓòɖòɔ̀ kɔ̃ɛɛ dyi, ɓɛ́ ɓě ké Bounɓoɔ̀ ɖòùn ɓiè.

¹⁵ Kɛɛ ɔ jǔ ké ɓěɛ̀ hwòɖǒ se Bounɓoɔ̀ ɓièɛ̀ mɔ́ ní, nìí, ɓě mɛ gã gèɖèpɔ́ɔ̀ nyɔ ɓě mɔ́ ɓièɛ̀ dyiɛɛ ɓó zɛ̃̌ɛ̀, kɛbì ɔ mɔ̀ gèɖèpɔ́ɔ̀ ɓě ɓɛ́ ɓě ɓǎ nììn ɓǎ ɓěɔ̀ ɓiè zɔ̃̌ɔ̀ kà ɖé Dyùféɖétì-nìɔ̀ dyóɖó-xwáɖáún-wóɖóìn-naínɔ̀ kɛ mɔɔ Ámɔ̀-nyɔ̀ ɓě kɔ̃̀ ɓóɖó ɓɛ́ ɓě cĩ́à múɛɛ nììn gèɖèpɔ́ɔ̀ ɓěɔ̀ kɛ. Kɛɛ ɔ dyi ḿ kè ḿ níǐn gbǒ-xwíníín-nyɔ̀ ɓěɔ̀ jè jǔǐn, à mu Bounɓoɔ̀ ɓièìn.”

¹⁶ Hwɛ̀ ké nyɔ ɓěɔ̀ zà ma ɖé wuɖu, ké wa ɖá, “Ɔ se ná nìɛ̌ mu. À se Bounɓoɔ̀ dyi táǎ mu, ɓɛ́ à ké gèɖèpɔ́ɔ̀ kà kò ɖò ɓiè.

¹⁷ Sepóɛɖé Bounɓo mɔ̀à à Gèɖèpɔ́ɔ̀ kɛɛ mɔ̀ nyɔ zà zɔ̃̌ɔ̀ à kè à ɓǎ ɓě gǐì-kũ̀àɔ̀ mú ɖé Íjè-ɓòɖòɔ̀ kɔ̃. Ké ɔ mɔ̀ nyɔ nyu ma ɖàɓàìn-ɖɛ̀ vɛ̀nɛ̀ ɓěɔ̀ ɓó à dyéɖé waí. Ké ti à nì ma nɔ̄ ɓóɖóɛ̀ kɔ̃ dyiɛń nyɛɛ, à zĩ̀ìn ma ɓóɖó-dù ɓáún-ɓáún hwìɛ̀, ké Bounɓoɔ̀ mɔ̀ nyɔ gmɔ̀ ma à nììn dyí.

¹⁸ Ké ɔ mɔ̀ nyɔ nyuɛ ké à kúmú ma Ámɔ̀-nyɔ̀ ɓěɔ̀ kè ɓóɖó-dù tɔ̀ɔ̀ ɓě cĩ́ ma nɔ̄ ɓóɖóɛ̀ múɛɛ nɔ̄ dyi. Ɔ jèɛɛ, à mɔ̀ùn mu Bounɓoɔ̀ ɓièìn ɖekè, sepóɛɖé ɔ ɖòùn mɔ̀ à Gèɖèpɔ́ɔ̀.”

¹⁹ Ké Jasúé cɛ̃ɛ ma nyɔ ɓěɔ̀ gbo, ké ɔ ɖá, “Ɓě mɛ ɓɔ́ɔ hwìɖǐi poɛ̀n kà Bounɓoɔ̀ ɓiè-ɓiè mɔ̀ ɖɛ fɛ̃́ìn xwa kɛ, sepóɛɖé ɔ mɔ̀ mú-hwɛ̀-Gèɖèpɔ́ɔ̀, ké ɔ mɔ̀ hwɛ̀nɛ̌ Gèɖèpɔ́ɔ̀. Ɔ se ɓěɛ̀ wuɖuún-jaɖa-jaɖa kè ɓěɛ̀ nàmàǔn tɔ̀ɔ̀ ɓě kɔ̃in zĩ̀ɛ̌n mu.

²⁰ Ɔ jǔ ké ɓě dyi Bounɓoɔ̀ kɔ̃ín pòìn, ké ɓě dyi gèɖèpɔ́ɔ̀ kà kò ɖò ɓiè ní, nìí, Bounɓoɔ̀ ɖǎ ɓě nɔ̀mɔ̀ dyíin dyí nyu dyɛo, kɛɛ ɔ mu ɓě kɔ̃ín pòìn, ɓɛ́ ɔ ké ɓě gǎ kɔ̃ tò, ɓɛ́ ɓě ké mú gbɔɔ̀ hwɔ nyɛ̀nɛ̀ɛ̀.”

²¹ Kɛɛ nyɔ ɓěɔ̀ cɛ̃ɛ ma Jasúé gbo, ké wa ɖá, “Hée, à se Bounɓoɔ̀ dyi táǎ mu. À mu ɔ ɓièìn.”

²² Hwɛ̀ ké Jasúé cɛ̃ɛ ma wa gbo, ké ɔ ɖá, “Ɓě mɔ̀ ɓě mìɔùn nììn zàse kà ɓě ɖǎa gã, ɓɛ́ ɓě ké Bounɓoɔ̀ ɓièɛ.” Ké wa ɖá, “Ǹdye, à mɔ̀ zàse.”

²³ Ké Jasúé ɖá, “Kà ɔ ɖǎà ná nìɛɛ, nìí, ɓě mɛ táà ɓěɛ̀ gèɖèpɔ́ɔ̀ kà kò ɖò ɓěɔ̀ ɓiè-ɓiè dyi, ɓɛ́ ɓě ké ɓěɛ̀ hwòɖǒ-dyùà ɓěɔ̀ Bounɓo mɔ̀à ɓěà Gèɖèpɔ́ɔ̀ kɛɛ xwáɖáún zàìn.”

²⁴ Ké nyɔ ɓěɔ̀ cɛ̃ɛ ma ɔ gbo, ké wa ɖá, “À mu Bounɓo mɔ̀à à Gèɖèpɔ́ɔ̀ kɛɛ ɖòùn ɓièìn, ké à mu ɔ wuɖu nyuùn.”

²⁵ Ɔ jèɛɛ, ɓó wéa ɓaɖaa, Jasúé nyuɛ ké Éézùɖùɛ̀-nyɔ̀ ɓěɔ̀ kè Gèɖèpɔ́ɔ̀ dè ma wuɖu ɖe ɖie ɖé Sɛ́kɛ̃̀ìn-hwɔ̀ɖɔ̀ɔ̀ wĩín, ké ɔ po ma gma-dù kò-kò ɓě ɓó wa bìì.

²⁶ Ké ɔ céè ma gma ɓěɔ̀ ɓíɖíi ɖé Gèɖèpɔ́ɔ̀ gma-cèè-ɖɛ̀ɔ̀ mú. Hwɛ̀ ké ɔ ɖú ma sɔ́ɔ́-kpò vɛ̀nɛ̀ ɖò dyí, ké ɔ nyànàìn ma ɓóɛ óò-cù vɛ̀nɛ̀ ɖò nì ma ɓó Bounɓoɔ̀ pá hwɛ̀ǐn-hwɛ̀ǐnɔ̀ múɛɛ xwíɖíi dyi.

²⁷ Ké ɔ cɛ̃ɛ ma nyɔ séín ɓěɔ̀ gbo, ké ɔ ɖá, “Ɓě gmɔ̀ nɔ̄, sɔ́ɔ́-kpò nìà kɛ mɔ̀ ɓěà zàse. Ɔ ɖǎ wuɖu séín ɓɛ́ Bounɓoɔ̀ cɛ̃à ɓěà gboɛɛ wɔ̃́. Ɔ jǔ ké ɓě se ɓěɛ̀ Gèɖèpɔ́ɔ̀ jǎà gbo nyu ní, nìí, sɔ́ɔ́-kpò nìà kɛ mu ɓě zaa dúún wáɖáùn.”

²⁸ Ti ɓɛ́ Jasúé ɖǎ ma nyɔ ɓěɔ̀ gbo wùɖùɛ̀ hwɔɛɛ, ɔ ɖoɓo ma wa ɖé wa ɓíɖí ɖe.

Jasúé kè Ɛ̀ɖɛ̀ázàà mɛ́ jè

²⁹ Sɔ̀ìn ɓó ɖɛ ɓěɛ̀ gboɛɛ, Jasúé mɔ̀à Núùnɛ̀ dyú-gàà, ɓɛ́ ɔ mɔ̀à Bounɓoɔ̀ gbo-nì-nyɔ̀ɔ̀ kɛɛ mɛ́ ma ní. Ɔ nyu ma zɔ̃ hɔ̃dɛ̀ɖɛ̀ ɖò kè ɓaɖa-bùè.

³⁰ Ké wa zàìn ma ɔ dyóɖóún ɖé ɔ mìɔùn nììn páɔ̀ mú. Wa zàìn ma ɔ dyóɖóún ɖé Tímínɔ̀-Sɛ́wàɖà-hwɔ̀ɖɔ̀ nìà ɖé Ífèɖèìn Toɖo-ɓòɖòɔ̀ kɔ̃, ké ɔ hwɔà ɖé Gáásì-tòɖòɔ̀ xwía dyíɛɛ mú.

³¹ Éézùɖùɛ̀-nyɔ̀ ɓěɔ̀ ɓiè ma Bounɓoɔ̀ ɖé Jasúéɛ̀ fɛ̀ɛ̀-wè séín ɓěɔ̀ mú. Ké ti ɓɛ́ Jasúé ɖǎ ma mɛ́ɛ, nyɔ ɓěɔ̀ mu ma dyúa, ké wa ɓiè ma Bounɓoɔ̀ ke kánáá pū ɖé nyɔ vɛ̀nɛ̀ ɓě nì ma toɖo kɔ̃ keɛɛ nììn fɛ̀ɛ̀-wè séín ɓěɔ̀ mú. Wa mɔ̀ nyɔ vɛ̀nɛ̀ ɓě gã̀ ma ɖɛ séín ɓě ɓɛ́ Bounɓoɔ̀ nyu ma Éézùɖùɛ̀-nyɔ̀ ɓěɔ̀ bììɛɛ múin nyɛ.

³² Ɓó tia ɓaɖaa, Éézùɖùɛ̀-nyɔ̀ ɓěɔ̀ zà ma Jòséɛ̀ kpá ɓě ɓɛ́ wa zà zɔ̃̌ɔ̀ kà ɖé Íjè-ɓòɖòɔ̀ kɔ̃ɛɛ dyóɖóún ɖé Sɛ́kɛ̃̀ìn-hwɔ̀ɖɔ̀ɔ̀ wáún. Wa zà ma Jòséɛ̀ kpá ɓěɔ̀ dyóɖóún ɖé pá ɓɛ́ Jékɔ̀ dɔ̃ó zɔ̃̌ɔ̀ Hámɔ̀ ɓɛ́ ɔ mɔ̀ ma kà Sɛ́kɛ̃̀ìn ɓǎ kɛɛ dyú-gàà ɓěɔ̀ gboɛɛ mú. Ɔ dɔ̃̀ìn zɔ̃̌ɔ̀ páɔ̀ wíɖí-pĩ̀à hɔ̃dɛ̀ɖɛ̀ ɖò mú. Pá nìà kɛ mɔ̀ ma Jòséɛ̀ gbǒ-xwíníín-dyù ɓěɛ̀ kɔ̃̀ɔ̀-ɖɛ̀ kánáá pū.

³³ Ké Ɛ̀ɖɛ̀ázà mɔ̀à Eɖóún dyú-gààɔ̀ kɛɛ mɔ̀ùn mɛ́ ma ɖekè, ké wa zàìn ma ɔ dyóɖóún ɖé Gíɓìà-hwɔ̀ɖɔ̀ ɓɛ́ wa nyí ma ɔ dyú-gàà Fíníhà kɛɛ mú. Gíɓìà-hwɔ̀ɖɔ̀ɔ̀ nì ma ɖé Ífèɖèìn Toɖo-ɓòɖòɔ̀ kɔ̃.