Jasúé 23 - Ɓǎsɔ́ɔ̀ Báɓòɔ̀

Jasúé sèìn Éézùɖùɛ̀-nyɔ̀ ɓěɔ̀ wuɖui

¹ Ti ɓɛ́ Bounɓoɔ̀ ɖǎa ma nyu ké Éézùɖùɛ̀-nyɔ̀ ɓěɔ̀ ɖǎ ma waà mú-nyɛ́-nyɔ̀ ɓěɔ̀ toún ɖuɛ hwɔɛɛ, wa cĩ́ ma gìɖìǐ mú ɖé ɓóɖó gànáɔ̀ kɔ̃, ɓó zɔ̃ pàɖǎ xwíníín, ké Jasúé ɖǎ ma nyɛ mìɔ.

² Wé ɖòɛ̀ ɓaɖaa, Jasúé poìn ma Éézùɖùɛ̀-nyɔ̀ séín ɓěɔ̀ nyɔ vɛ̀nɛ̀ ɓěɔ̀ kè waà nàìn-nyɔ̀ ɓěɔ̀ kè waà tɔ̀ɔ̀-ɓìɔ̀ ɓěɔ̀ ɔ kè waà gɔ̌mànà-nyɔ̀ ɓěɔ̀ dyí, ké ɔ cɛ̃ɛ ma wa gbo, ké ɔ ɖá, “Ḿ ɖǎ hwèɖèìn, ké ḿ ɖǎ nyɛ mìɔ.

³ Ké ɓě mìɔùn dyé ma ɖɛ séín ɓɛ́ Bounɓo mɔ̀à ɓěà Gèɖèpɔ́ɔ̀ kɛɛ nyu ma ɓóɖó-dù séín ɓě nìà ɓóɖóɛ̀ múɛɛ bũ̌ ɓó ɓěà jèɛɛ ní. Bounɓoɔ̀ mɔ̀ nyɔ vɔ̃ ma kà ɓěà bìì kɛ̀.

⁴ Ké ɔ mɛ nì ɓě hwìɖǐi kà ɓɛ́ ḿ geìn ma ɓěɛ̀ xwéɖé-dù ɓěɔ̀ ɓóɖó sɔ̀àìn ɖé Jɔ́nì-nìɔ̀ wĩín, muà ɖé Mɛ́ɖɛ̀tɔ̀wéɖénìà-dyòǒ nìà ɖé dyóɖó-dyi-kpáìn-naínɔ̀ kɛɛ wĩín nyɛɛ múin, ɓɛ́ ɔ ké ɓěɛ̀ kɔ̃̀ɔ̀-ɖɛ̀ jǔ kánáá pūɛ. Ḿ nyí ma ɓě ɓóɖó-dù ɓě ɓɛ́ ɓěà ɖu ma toún wɛ̃ kè ɖíɛ́ ɓě ɓɛ́ ɓěà séè toún ɖu keɛɛ ní.

⁵ Bounɓo mɔ̀à ɓěà Gèɖèpɔ́ɔ̀ kɛɛ mìɔùn muɛ nyuùn ɓɛ́ ɓě ké ɓóɖó-dù ɓě ɓɛ́ ɓě séèà toún ɖu keɛɛ toún ɖu, ɓɛ́ wa ké ɓě dyúa gbǔ, ké ɓě mu waà ɓóɖóɔ̀ dyí ɖúùn, ɓɛ́ ɔ ké ɓěɛ̀ kɔ̃̀ɔ̀-ɖɛ̀ jǔ kà Bounɓoɔ̀ nyuɛ ma kà ɓě gbo cɛ̃ɛ kɛ.

⁶ Ɔ jèɛɛ, ɓě mɛ ma mú, ɓɛ́ ɓě ké ɖɛ séín ɓɛ́ Mózè céèà ɖé gma-cèè-ɖɛ̀ɔ̀ múɛɛ dyi kpɔ̃ kóɖó-kóɖó. Ɓěǐn ɖá ɓɛ́ ɓě ké ɖé ɖiaún mɔɔ kunuaún kpáìn.

⁷ Ɓěǐn ɖá ɓɛ́ ɓě ké ɓóɖó-dù ɓě ɓɛ́ ɓě séèà toún ɖu ke, ké wa cĩ́à nɔ̄ ɓě hwìɛ̀ kɛɛ múin kpá, ké ɓěǐn ɖá ɓɛ́ ɓě ké waà gèɖèpɔ́ɔ̀ ɓěɔ̀ dyúa dú hwuɖu taɓa, ɓɛ́ ɓě ké wa ɓiè. Ɓěǐn ɖá ɓɛ́ ɓě ké waà gèɖèpɔ́ɔ̀ ɓěɔ̀ ɓaà mɔɔ ɓɛ́ ɓě ké wa dyí gboò.

⁸ Ɓě mɛ kpɔ̃ ɓó Bounɓo mɔ̀à ɓěà Gèɖèpɔ́ɔ̀ kɛɛ jè gboi kóɖó-kóɖó kà ɓě nyuà nyuɛ kĩ́ín teeɛ.

⁹ Sepóɛɖé Bounɓoɔ̀ ɖǎa nyu ké ɓě ɖǎ ɓóɖó-dù vɛ̀nɛ̀ kui-kui ɓě kúmú, ké waà dyúáɖò séè ɓó ɓě dyúa dyi nyànàà ɓɛ́ìn ke.

¹⁰ Ɓěɛ̀ nyɔ-kpò dyúáɖò ɓɛ́ìn gàa táázĩ̀ìn toún ɖuɛ, sepóɛɖé Bounɓo mɔ̀à ɓěà Gèɖèpɔ́ɔ̀ kɛɛ vɔ̃ ɓě bìì kà ɔ nyuɛ ma kà ɓě gbo cɛ̃ɛ kɛ.

¹¹ Ɔ jèɛɛ, ɓě mɛ dè hwòɖǒ xwíníín dyi, ɓɛ́ ɓě ké Bounɓoɔ̀ mú ɖɛ̀ɓɛ̀.

¹² Kɛɛ ɔ jǔ ké ɓě dyi Bounɓoɔ̀ kɔ̃ín pòìn, ké ɓě kè ɓóɖó-dù ɓě ɓɛ́ ɓě séèà toún ɖu keɛɛ dyi múin kpáìn, ké ɓě dyi dyi kpɔ̃ìn kpɔ̃̀ìn ní,

¹³ nìí, ɓě mɛ dyuòɛ̀ dyí jɛ́ɛ́ kà Bounɓo mɔ̀à ɓěà Gèɖèpɔ́ɔ̀ kɛɛ se ɓě gbo kpáa mu, ɓɛ́ ɓě ké ɓóɖó-dù ɓěɛ̀ kúmú kɛ. Kɛɛ wa mu nììn kà xwáɖá-gbǎ-mú nìà kɛ ɓó ɓě bìì, ké wa mu ɓà-cù jǔùn, ɓɛ́ wa ké ɓě kɔ̃ún nì, ké wa mu wí jǔùn, ɓɛ́ wa ké ɓě dyéɖé ɖeín nì. Ké kǎà ɔ mu nììn tee ɓɛ́ ɓě ké mú gbɔɔ̀ hwɔ nɔ̄ ɓóɖó nɔ̀mɔ̀ dyíin ɓɛ́ Bounɓo mɔ̀à ɓěà Gèɖèpɔ́ɔ̀ kɛɛ nyíà ɓěɛɛ kɔ̃ hwɛ̀.

¹⁴ “Ɓó kàǔn wɛ̃ɛ, ḿ nìǎ à ɓǎ ɓě gbo muɛń. Ɔ ní ɖá ɓɛ́ ɔ ké ɓě hwìɖǐi sɔ̀ kà Bounɓo mɔ̀à ɓěà Gèɖèpɔ́ɔ̀ kɛɛ ɖǎ ɖɛ nɔ̀mɔ̀ kɔ̃in séín ɓɛ́ ɔ ɖáìn ma ɓěà nyɛ́nɛ́ín nyɛɛ nyu nyɛ̀nɛ̀ɛ̀ kɛ. Ɖɛ séín ɓɛ́ ɔ ɖáìn ma ɓěà nyɛ́nɛ́ín nyɛɛ ɖǎ kpáa hwɔ nyɛ̀nɛ̀ɛ̀, ké dyúáɖò kpeé-kpeé se ɓíɖíi sè dyɛ mɔ̀ùn.

¹⁵ Kɛɛ ɔ jǔ ké ɓě se Bounɓoɔ̀ wuɖu nyuín, nìí, ɔ mu ɓě ɖɛ gbà séín ɓɛ́ ɔ ɖá ɔ muà ɓě kɔ̃ dyàùn wɛ̃ɛ kɔ̃ dyàùn nyɛ̀nɛ̀ɛ̀ kà dyúáɖò ɔ nyuà ɖɛ nɔ̀mɔ̀ kɔ̃in séín ɓɛ́ ɔ ɖáìn ɓě nyɛ́nɛ́ín nyɛɛ nyuɛ kɛ. Ɔ mu ɓě ɖɛ gbà kɔ̃ dyàùn tee, ɓɛ́ ɓě ké mú gbɔɔ̀ hwɔ nɔ̄ ɓóɖó nɔ̀mɔ̀ dyíin ɓɛ́ ɔ nyíà ɓěɛɛ kɔ̃ hwɛ̀.

¹⁶ Ɔ jǔ ké ɓě dyi dèè-wùɖù nìà ɓó ɓě kè Bounɓo mɔ̀à ɓěà Gèɖèpɔ́ɔ̀ kɛɛ pṹa kɛɛ mú jaɖa, ké ɓě dyi gèɖèpɔ́ɔ̀ kà kò ɖò ɓě dyúa dú hwuɖu taɓa, ké ɓě dyi wa ɓiè ní, nìí, Bounɓoɔ̀ mu ɓě dyoɖoún kpáìn mìɔ, ɓɛ́ ɔ ké ɓě mú gbɔɔ̀ wàɖà nɔ̄ ɓóɖó nɔ̀mɔ̀ dyíin ɓɛ́ ɔ nyíà ɓěɛɛ kɔ̃.”