Jasúé 22 - Ɓǎsɔ́ɔ̀ Báɓòɔ̀

Jasúé ɖoɓo xwéɖé-dù ɓě sɔ̀à ɖé Jɔ́nì-nìɔ̀ dyóɖó-xwáɖáún-wóɖóìn-naínɔ̀ kɛɛ wa ɓíɖí ɖe

¹ Ti ɓɛ́ Éézùɖùɛ̀-nyɔ̀ ɓěɔ̀ ɖǎ ma Kénà-ɓòɖòɔ̀ toún ɖuɛ hwɔɛɛ, Jasúé ɖá ma gàa ɓě sɔ̀ ma ɖé Wuɖuɓíín nììn xwéɖé-dùɔ̀ kè Gáà nììn xwéɖé-dùɔ̀ ɔ kè Mànásì nììn xwéɖé-dù fáún-fáúnɔ̀ múɛ. Wa mɔ̀ nyɔ ɓě sɔ̀à ɖé Jɔ́nì-nìɔ̀ dyóɖó-xwáɖáún-wóɖóìn-naínɔ̀ kɛ.

² Ké ɔ cɛ̃ɛ ma wa gbo, kè ɔ ɖá, “Ɓě ɖǎ ɖɛ séín ɓɛ́ Mózè mɔ̀à Bounɓoɔ̀ gbo-nì-nyɔ̀ɔ̀ kɛɛ cɛ̃ ma ɓě gboɛɛ nyuɛ hwɔ, ké ɓě ɖǎ ɖɛ séín ḿ cɛ̃ ɓě gboɛɛ nyu.

³ Ɓě se Bounɓo mɔ̀à ɓěà Gèɖèpɔ́ɔ̀ kɛɛ wuɖuɔ̀ ɖùǔn dyi zàìn. Ɓě ɖǎ ɓěɛ̀ ɖíí Éézùɖùɛ̀-nyɔ̀ tɔ̀ɔ̀ ɓěɔ̀ gbo kpá tee, ké wa ɖǎà ɓóɖó gànáà dyí ɖú ɓó zɛ̃̌ɛ̀ kɛ̀.

⁴ Kàǔn wɛ̃ɛ, Bounɓoɔ̀ ɖǎa nyu ké ɓěɛ̀ ɖíí Éézùɖùɛ̀-nyɔ̀ tɔ̀ɔ̀ ɓěɔ̀ nìǎ gìɖìǐ mú cĩ́ɛń kà ɔ nyuɛ ma kà wa gbo cɛ̃ɛ kɛ. Ɔ jèɛɛ, ɓě mɛ kɔ́ìn ɓě ɓíɖí ɖe ɖé ɓóɖó ɓɛ́ Mózè nyí ma kà ɓě ɖé Jɔ́nì-nìɔ̀ dyóɖó-xwáɖáún-wóɖóìn-naínɔ̀ kɛɛ kɔ̃.

⁵ Ké ɓě mɛ kpɔ̃ gma ɓě ɓɛ́ Mózè nyíó zɔ̃̌ɔ̀ kà ɓěɛɛ dyi kóɖó-kóɖó. Gma ɓěɔ̀ mɔ̀, ɓě mɛ ɖɛ̀ɓɛ̀ Bounɓo mɔ̀à ɓěà Gèɖèpɔ́ɔ̀ kɛɛ mú, ɓɛ́ ɓě ké ɔ kpeɖe séín ɓěɔ̀ kíɖíí sí, ɓɛ́ ɓě ké ɔ gma ɓěɔ̀ dyi kpɔ̃, ɓɛ́ ɓě ké ɓó Bounɓoɔ̀ jè gboi kpɔ̃ kóɖó-kóɖó, ɓɛ́ ɓě ké ɔ ɓiè hwòɖǒɛ̀-ɖé-hwɛ̀-kà.”

^6-8 Hwɛ̀ ké Jasúé po ma wa mana kɔ̃, ké ɔ cɛ̃ɛ ma wa gbo, ké ɔ ɖá, “Ɓě ɖǎ nyúà-ɖɛ̀ kúɖúú kè séɓàɖà kè góò kè bàɖàsǐ kè nɛɛ̀-kpà ɔ kè ɖɔ pàɖǎ to ɓěɔ̀ gbo zà. Ɓě kpa kɔ́mɔ́-ɖɛ̀ ɓěɛ̀ ɓě ɓíɖí ɖe, ɓɛ́ ɓě kè ɓěɛ̀ ɖíí ɓě sè ma kà ɓíɖíiɛɛ ké wa geìn.” Ɔ nì ná kɛɛ, Mózè ɖǎ ma Mànásì nììn xwéɖé-dùɔ̀ fáún-fáún Básàùn-ɓòɖò nìà ɖé Jɔ́nì-nìɔ̀ dyóɖó-xwáɖáún-wóɖóìn-naínɔ̀ kɛɛ nyí, ké Jasúé mɔ̀ùn nyí ma Mànásì nììn xwéɖé-dùɔ̀ fáún-fáún tɔ̀ɔ̀ pá ɖé waà ɖíí Éézùɖùɛ̀-nyɔ̀ tɔ̀ɔ̀ ɓěɔ̀ hwìɛ̀ ɖé Jɔ́nì-nìɔ̀ dyóɖó-dyi-kpáìn-naínɔ̀.

⁹ Ti ɓɛ́ Jasúé ɖǎ ma gàa ɓě sɔ̀à ɖé Mànásì nììn xwéɖé-dù fáún-fáún sɔ̀à ɖé Básàùn-ɓòɖòɔ̀ kɔ̃ɛ kè Wuɖuɓíín nììn xwéɖé-dùɔ̀ ɔ kè Gáà nììn xwéɖé-dùɔ̀ múɛɛ gbo wùɖùɛ̀ hwɔɛɛ, wa sè ma Éézùɖùɛ̀-nyɔ̀ tɔ̀ɔ̀ ɓěɔ̀ ɖé Síɖò-hwɔ̀ɖɔ̀ nìà ɖé Kénà-ɓòɖòɔ̀ kɔ̃ɛɛ wĩín, ké wa kɔ́ìn ma wa ɓíɖí ɖe ɖé Gíɖèà-ɓòɖòɔ̀ kɔ̃. Gíɖèà-ɓòɖòɔ̀ mɔ̀ ɓóɖó ɓɛ́ wa ɖǎ ma dyí ɖú, ɓɛ́ ɔ ké waà kɔ̃̀ɔ̀-ɖɛ̀ jǔ kà Bounɓoɔ̀ nyuɛ ma kà wa gbo cɛ̃ɛ dyììn ɖé Mózè múɛ.

Wa po sáa-kɔ̃-zàìn-gbàà ɖò ɖé Jɔ́nì-nìɔ̀ wĩín

¹⁰ Ti ɓɛ́ gàa ɓě sɔ̀à ɖé Wuɖuɓíín nììn xwéɖé-dùɔ̀ kè Gáà nììn xwéɖé-dùɔ̀ ɔ kè Mànásì nììn xwéɖé-dù fáún-fáúnɔ̀ múɛɛ nì ma wa ɓíɖí ɖe kɔ́ǐn nyɛɛ, wa nyini ma ɖé Gèɖíɖò-hwɔ̀ɖɔ̀ nìà ɖé Jɔ́nì-nìɔ̀ wĩín ɖé Kénà-ɓòɖòɔ̀ kɔ̃ɛɛ mú, ké wa po ma sáa-kɔ̃-zàìn-gbàà vɛ̀nɛ̀ ɖò ɓó Jɔ́nì-nìɔ̀ wĩín.

¹¹ Ti ɓɛ́ Éézùɖùɛ̀-nyɔ̀ tɔ̀ɔ̀ ɓěɔ̀ wɔ̃́ɔ ma kà ɓɛ́ gàa ɓě sɔ̀à ɖé Wuɖuɓíín nììn xwéɖé-dùɔ̀ kè Gáà nììn xwéɖé-dùɔ̀ ɔ kè Mànásì nììn xwéɖé-dù fáún-fáúnɔ̀ múɛɛ po ma sáa-kɔ̃-zàìn-gbàà ɖò ɖé Gèɖíɖò-hwɔ̀ɖɔ̀ nìà ɖé wa nììn wáká, hwɔà ɖé Jɔ́nì-nìɔ̀ dyóɖó-dyi-kpáìn-naínɔ̀ dyíɛ múɛɛ,

¹² wa séín poìn ma dyí ɖé Síɖò-hwɔ̀ɖɔ̀ɔ̀ wĩín, ɓɛ́ wa ké ma Éézùɖùɛ̀-nyɔ̀ ɓě nì ma ɖé Jɔ́nì-nìɔ̀ dyóɖó-xwáɖáún-wóɖóìn-naínɔ̀ kɛɛ to kɔ̃ kpa.

¹³ Ti ɓɛ́ Éézùɖùɛ̀-nyɔ̀ ɓěɔ̀ poìn ma dyí ɖé Síɖò-hwɔ̀ɖɔ̀ɔ̀ wĩín nyɛɛ, wa ɖoɓo ma Fíníhà ɓɛ́ ɔ mɔ̀ ma Ɛ̀ɖɛ̀ázà mɔ̀à sáa-zà-nyɔ̀ vɛ̀nɛ̀ɔ̀ kɛɛ dyú-gàà kɛɛ ɖé Wuɖuɓíín nììn nyɔ ɓěɔ̀ kè Gáà nììn nyɔ ɓěɔ̀ ɔ kè Mànásìɛ̀ xwéɖé-dù fáún-fáúnɔ̀ nyɔ ɓěɔ̀ gbo ɖé Gíɖèà-ɓòɖòɔ̀ kɔ̃.

¹⁴ Ké wa gã ma nyɔ vɛ̀nɛ̀ ɓaɖa-bùè, ɓɛ́ wa kè Fíníhà ké ma mu. Nyɔ vɛ̀nɛ̀ ɖò-ɖò sɔ̀ ma xwéɖé-dù ɓaɖa-bùè ɓě nìà ɖé Jɔ́nì-nìɔ̀ dyóɖó-dyi-kpáìn-naínɔ̀ kɛɛ mú, ké wa ɖò-ɖò mɔ̀ ma gbǒ-xwíníín-nàìn-nyɔ̀.

¹⁵ Ti ɓɛ́ wa nyini ma ɖé Gíɖèà-ɓòɖòɔ̀ kɔ̃ ɖé Wuɖuɓíín nììn nyɔ ɓěɔ̀ kè Gáà nììn nyɔ ɓěɔ̀ ɔ kè Mànásìɛ̀ xwéɖé-dù fáún-fáúnɔ̀ nyɔ ɓěɔ̀ gboɛɛ, Fíníhà kè nyɔ vɛ̀nɛ̀ ɓěɔ̀ cɛ̃ɛ ma wa gbo, ké wa ɖá,

¹⁶ “À nì wùɖùɛ̌n ɓó Bounɓoɔ̀ nyɔ ɓěɔ̀ bìì. Ɖɛ́ kɔ̃̀ jè ɓě zàìn ɓěà Gèɖèpɔ́ɔ̀ wuɖu ɖùǔn dyi, ɓɛ́ ɓě dyià sáa-kɔ̃-zàìn-gbàà ɖò po ɓó ɓě mìɔùn bììɛ́? Ɖɛ́ kɔ̃̀ jè ɓě pòàìn Bounɓoɔ̀ kɔ̃ín, ɓɛ́ ɓě dyià ɖɛ gbà nìà kɛ nyuɛ́?

¹⁷ Nàmàǔn ɓɛ́ ɓěà nyu ma kà Bounɓoɔ̀ bũ̌ ɖé Píò-tòɖòɔ̀ xwíɖíiɛɛ se ma ɓě fã̀àǔn poe? Bounɓoɔ̀ dyéìn ma à nyɔ ɓěɔ̀ gǎ, ké nàmàǔnɔ̀ kpa nì à ɖɔ ke ɓó zɛ̃̌ɛ̀.

¹⁸ Ɓě nìǎ Bounɓoɔ̀ kɔ̃ín pòɛ̌n ɖeè? Ɔ jǔ ké ɓě dyi Bounɓoɔ̀ wuɖu ɖùǔn dyi zàìn ɓó zɛ̃̌ɛ̀ ní, nìí, ɔ mu Éézùɖùɛ̀-nyɔ̀ séín ɓěɔ̀ dyoɖoún kpáìn ɓó gàɖàà.

¹⁹ Ɔ jǔ ké ɓě dyiɛ hwìɖǐi poìn kà ɓóɖó ɓɛ́ ɓě cĩ́à múɛɛ se dyíin nɔ̀mɔ̀ ɓó Bounɓoɔ̀ ɓiè jèɛɛ ní, nìí, ɓě mɛ dyi ɖé Bounɓoɔ̀ ɓóɖóɔ̀ kɔ̃ dɛ̀ ɓɛ́ ɔ jàɖàìn-gbòɔ̀ nìà kɛ, ɓɛ́ à kè ɓě ké ɖé cĩ́. Kɛɛ ɓě ɓɔ́ sáa-kɔ̃-zàìn-gbàà kà kò ɖò poɛ, ɔ sèìn Bounɓo mɔ̀à ɓěà Gèɖèpɔ́ɔ̀ kɛɛ sáa-kɔ̃-zàìn-gbààɔ̀ ɖòùn, ɓɛ́ ɓě ní kɔ̃̀ ɖà à kè Bounɓoɔ̀ wuɖu ɖùǔn dyi zàìn.

²⁰ Má, Gèɖèpɔ́ɔ̀ kpáìn ma Éézùɖùɛ̀-nyɔ̀ séín ɓěɔ̀ dyoɖoún, ti ɓɛ́ Ékɛ̃̀ mɔ̀à Zɛ́wàɖàà dyú-gààɔ̀ kɛɛ se ma Gèɖèpɔ́ɔ̀ wuɖu nyu, ké ɔ ɖú ma ɖɛ ɓě ɓɛ́ Gèɖèpɔ́ɔ̀ ɖá ɓěà mɛ gbɔɔ̀ ma kà múɛɛ ɖò dyíɛe? Ɔ ɖòùn se ma mɛ́ ɓó ɔ nàmàǔnɔ̀ jè.”

²¹ Hwɛ̀ ké Wuɖuɓíín nììn nyɔ ɓěɔ̀ kè Gáà nììn nyɔ ɓěɔ̀ ɔ kè Mànásìɛ̀ xwéɖé-dù fáún-fáúnɔ̀ nyɔ ɓěɔ̀ jǔ ma Fíníhà kè nyɔ vɛ̀nɛ̀ ɓěɔ̀ gɔ̃̌, ké wa ɖá,

²² “Bounɓoɔ̀ mɔ̀ kpé-séín-ɓéɖé-Gèɖèpɔ́ɔ̀. Bounɓo mɔ̀à kpé-séín-ɓéɖé-Gèɖèpɔ́ɔ̀ kɛɛ mɔ̀ à zàse, ké ɔ dyuò ɖɛ kɔ̃̀ jè à poà sáa-kɔ̃-zàìn-gbààɔ̀ kɛ, ké à mɔ́ ɓě mɔ̀ùn kéɛ dyuò ɖekè. Ɔ jǔ ké à dyi ɖɛ nìà kɛ nyu, ɓɛ́ à ké Bounɓoɔ̀ wuɖu ɖùǔn dyi zàìn, ɓɛ́ à ké se ɔ wuɖu nyu jè ní, nìí, ɓě mɛ ɖáɓá à ɓó zɛ̃̌ɛ̀.

²³ Ɔ jǔ ké à dyi à mìɔùn nììn sáa-kɔ̃-zàìn-gbàà po, ɓɛ́ à kéá Bounɓoɔ̀ kɔ̃ín pòìn, ɓɛ́ à ké ɓó fɔ̃ɔ-sàǎ-zàìn-ɖɛ̀ ɓě kè ɖii-ɖɛ̀-sàǎ-zàìn-ɖɛ̀ ɓě ɔ kè gbo-kpɔ̃ìn-sàǎ-zàìn-ɖɛ̀ ɓě nyùìn ní, nìí, Bounɓoɔ̀ mìɔùn mɛ kpɔ̃ à dyi ɓóɛ jè.

²⁴ À se sáa-kɔ̃-zàìn-gbààɔ̀ po, ɓɛ́ à ké Bounɓoɔ̀ kɔ̃ín pòìn, kɛɛ à poɛ, sepóɛɖé à fɛ̃̀ìn ɓɛ́ ɓěɛ̀ dyú ɓě ní kɔ̃̀ɔ̀ ɖà à nììn dyú ɓě gbo cɛ̃ ɖé dyúa, ɓɛ́ wa ní kɔ̃̀ ɖà níiń, ‘Kpéɔ̀ nyɛ́ ɓě mɔ̀à Wuɖuɓíín nììn nyɔ ɓěɔ̀ kè Gáà nììn nyɔ ɓěɔ̀ kɛɛ ɓéɖé Bounɓo mɔ̀à Éézùɖùɛ̀ Gèɖèpɔ́ɔ̀ kɛɛ gbo kɛ́?

²⁵ Bounɓoɔ̀ nyu Jɔ́nì-nìɔ̀ bã̀à mú ɓó à kè ɓě pṹa. Ɔ jèɛɛ, ɓě se Bounɓoɔ̀ kpé ɖò gbo ɓéɖé.’ Ɔ dyi ná nìǐn, nìí, ɓěɛ̀ dyú ɓěɔ̀ muɛ nyuùn ɓɛ́ à nììn dyú ɓěɔ̀ ké se Bounɓoɔ̀ dyi fɛ̃̀ìn.

²⁶ À se mɔ́ ɓɛ́ ɖɛ nìà kɛ ké kpá jèɛɛ, à poà sáa-kɔ̃-zàìn-gbààɔ̀ kɛ̀. À seɛ po, ɓɛ́ à ké ɓó fɔ̃ɔ-sàǎ-zàìn-ɖɛ̀ ɓě kè sáa-zàìn-ɖɛ̀ kà kò ɖò ɓě nyùìn.

²⁷ Kɛɛ à poɛ, ɓɛ́ ɔ ké zàse jǔ ɓó à nììn nyɔ ɓěɔ̀ kè ɓě nììn nyɔ ɓěɔ̀ bìì kánáá pū kà à mu à fɔ̃ɔ-sàǎ-zàìn-ɖɛ̀ ɓě kè à gbo-kpɔ̃ìn-sàǎ-zàìn-ɖɛ̀ ɓě ɔ kè à sáa-zàìn-ɖɛ̀ kà kò ɖò ɓě dyàùn ɖé Bounɓoɔ̀ gbǒɔ̀ múɛ. À nyuɛ náa, ɓɛ́ ɖé dyúa ní ɓěɛ̀ dyú ɓě ní kɔ̃̀ɔ̀ ɖà à nììn dyú ɓě gbo cɛ̃, ɓɛ́ wa ní kɔ̃̀ ɖà níiń, ‘Ɓě se Bounɓoɔ̀ kpé ɖò gbo ɓéɖé.’

²⁸ Ɔ jǔ ké ɓěɛ̀ dyú ɓěɔ̀ dyiɛ náa cɛ̃ ní, nìí, à nììn dyú ɓěɔ̀ ɓɛ́ìn cɛ̃ɛ, ɓɛ́ wa ké níiń, ‘Gmɔ̀ nɔ̄, à ɓǎ ɓě po ma sáa-kɔ̃-zàìn-gbàà nìà kɛ, ké ɔ kè Bounɓoɔ̀ sáa-kɔ̃-zàìn-gbààɔ̀ hwɔìn ní. Wa seɛ ma po, ɓɛ́ wa ké ɓó fɔ̃ɔ-sàǎ-zàìn-ɖɛ̀ ɓě kè sáa-zàìn-ɖɛ̀ kà kò ɖò ɓě nyùìn, kɛɛ ɔ mɔ̀ ɓɛ́ ɔ ké zàse jǔ ɓó à kè ɓě bìì kà à mɔ̀ùn mɔ̀ Bounɓoɔ̀ nyɔ ɓě ɖekèɛ.’ ”

²⁹ Wa cɛ̃ɛ ɖe, ké wa ɖá, “À se sáa-kɔ̃-zàìn-gbààɔ̀ po, ɓɛ́ à ké Bounɓoɔ̀ wuɖu ɖùǔn dyi zàìn, ɓɛ́ à ké ɔ kɔ̃ín pòìn. À se sáa-kɔ̃-zàìn-gbàà kà kò ɖò poɛ́ mu, ɓɛ́ à ké ɓó fɔ̃ɔ-sàǎ-zàìn-ɖɛ̀ ɓě kè ɖii-ɖɛ̀-sàǎ-zàìn-ɖɛ̀ ɓě ɔ kè sáa-zàìn-ɖɛ̀ kà kò ɖò ɓě nyùìn, ɔ sèìn Bounɓo mɔ̀à ɓěà Gèɖèpɔ́ɔ̀ kɛɛ sáa-kɔ̃-zàìn-gbàà nìà ɖé ɔ jàɖàìn-gbòɔ̀ dyúa kɛɛ ɖòùn kɔ̃. À seɛ náa nyuɛ́ mu fɔɔ.”

³⁰ Ti ɓɛ́ Fíníhà mɔ̀à Ɛ̀ɖɛ̀ázà mɔ̀à sáa-zà-nyɔ̀ vɛ̀nɛ̀ɔ̀ kɛɛ dyú-gààɔ̀ kɛ kè nyɔ vɛ̀nɛ̀ ɓě sɔ̀à ɖé xwéɖé-dù ɓaɖa-bùè ɓěɔ̀ múɛɛ wɔ̃́ ma ɖɛ ɓɛ́ Wuɖuɓíín nììn nyɔ ɓěɔ̀ kè Gáà nììn nyɔ ɓěɔ̀ ɔ kè Mànásìɛ̀ xwéɖé-dù fáún-fáúnɔ̀ nyɔ ɓěɔ̀ cɛ̃ ma kà kɛɛ, waà hwòɖǒ dè ma dyi.

³¹ Ké Fíníhà cɛ̃ɛ ma Wuɖuɓíín nììn nyɔ ɓěɔ̀ kè Gáà nììn nyɔ ɓěɔ̀ ɔ kè Mànásìɛ̀ xwéɖé-dù fáún-fáúnɔ̀ nyɔ ɓěɔ̀ gbo, ké ɔ ɖá, “Ɓó zɛ̃̌ɛ̀ kɛɛ, à dyuòɛ̀ dyí kà Bounɓoɔ̀ nì ɓó ɓěà gboɛ, sepóɛɖé ɓě se Bounɓoɔ̀ ɖɛ gbà ɖò bũ̌ nyu dyììn ɖé ɓěɛ̀ sáa-kɔ̃-zàìn-gbààɔ̀ po-po mú. Ɔ jèɛɛ, Bounɓoɔ̀ se ɓěà nyɔ ɓěɔ̀ gǎ kɔ̃ tòɛ̌ mu.”

³² Ti ɓɛ́ Fíníhà ɖǎ ma wùɖùɛ̀ hwɔɛɛ, ɔ kè nyɔ vɛ̀nɛ̀ ɓěɔ̀ sɔ̀ ma ɖé Gíɖèà-ɓòɖòɔ̀ kɔ̃, ké wa kɔ́ìn ma ɖé Kénà-ɓòɖòɔ̀ kɔ̃ ɖe, ké wa zaìn ma ɖɛ séín ɓě ɓɛ́ wa wɔ̃́ ma kɛɛ Éézùɖùɛ̀-nyɔ̀ tɔ̀ɔ̀ ɓěɔ̀ gbo kɔ̃in.

³³ Ti ɓɛ́ Éézùɖùɛ̀-nyɔ̀ tɔ̀ɔ̀ ɓěɔ̀ wɔ̃́ ma ɖɛ ɓɛ́ Fíníhà kè nyɔ vɛ̀nɛ̀ ɓěɔ̀ zaìn ma kɔ̃in nyɛɛ, waà hwòɖǒ dè ma dyi, ké wa po ma Gèɖèpɔ́ɔ̀ zùo. Sɔ̀ìn ɓóɛ gboɛɛ, wa seɛ ma gbɔ po ɖe, ɓɛ́ wa ké Wuɖuɓíín nììn nyɔ ɓěɔ̀ kè Gáà nììn nyɔ ɓěɔ̀ to kɔ̃ po, ɓɛ́ wa ké waà ɓóɖóɔ̀ mú gbɔɔ̀.

³⁴ Ké Wuɖuɓíín nììn nyɔ ɓěɔ̀ kè Gáà nììn nyɔ ɓěɔ̀ jǔìn ma sáa-kɔ̃-zàìn-gbààɔ̀ Zàse-nyɛ̀nɛ̀, sepóɛɖé wa cɛ̃ɛ ma, ké wa ɖá, “Gbàà nìà kɛ mɔ̀ zàse ɓó à kè Éézùɖùɛ̀-nyɔ̀ tɔ̀ɔ̀ ɓěɔ̀ bìì kà Bounɓoɔ̀ mɔ̀ à kè waà Gèɖèpɔ́ɔ̀ kɛ.”