Jasúé 21 - Ɓǎsɔ́ɔ̀ Báɓòɔ̀

Éézùɖùɛ̀-nyɔ̀ vɛ̀nɛ̀ ɓěɔ̀ nyí Ɖíìváà-nyɔ̀ ɓěɔ̀ mɔ̀ùn hwɔɖɔ ɓě

^1-2 Ti ɓɛ́ Éézùɖùɛ̀-nyɔ̀ ɓěɔ̀ nì ma kà ɖé Síɖò-hwɔ̀ɖɔ̀ɔ̀ wĩín ɖé Kénà-ɓòɖòɔ̀ kɔ̃ɛɛ, Ɖíìváà-nyɔ̀ vɛ̀nɛ̀ ɓěɔ̀ dyi ma Ɛ̀ɖɛ̀ázà mɔ̀à sáa-zà-nyɔ̀ vɛ̀nɛ̀ɔ̀ kɛ kè Jasúé ɔ kè Éézùɖùɛ̀ɛ̀ xwéɖé-dù ɓěɔ̀ gbǒ-xwíníín ɖò-ɖò ɓěɔ̀ nàìn-nyɔ̀ ɓěɔ̀ gbo, ké wa ɖá, “Bounɓoɔ̀ cɛ̃ɛ zɔ̃̌ɔ̀ dyììn ɖé Mózè mú kà ɓɛ́ ɓě mɛ nyí à hwɔɖɔ ɓě, ɓɛ́ à ké mú cĩ́ɛ ɔ kè pá nì ɖé hwɔɖɔ ɓěɔ̀ ɖei, ɓɛ́ à nyúà-ɖɛ̀ ɓěɔ̀ ké wa kɔ̃ dyi ɖi.”

³ Ɔ jèɛɛ, Éézùɖùɛ̀-nyɔ̀ vɛ̀nɛ̀ ɓěɔ̀ nyu ma Bounɓoɔ̀ wuɖuɔ̀, ké wa nyí ma Ɖíìváà-nyɔ̀ ɓěɔ̀ waà hwɔɖɔ ɓěɔ̀ ɖíɛ́ ɓě kè nyúà-ɖɛ̀ dyi-ɖi-naín ɓě nì hwɔɖɔ ɓěɔ̀ ɖeiɛ.

⁴ Ɓó tia ɓaɖaa, wa nyu ma gbo-ɖàɓàìn-ɖɛ̀, ɓɛ́ wa ké hwɔɖɔ ɓě ɓɛ́ Ɖíìváà xwéɖé-dùɔ̀ gbǒ-xwíníín ɓěɔ̀ kɔ̃̀ wa ké dyéɛɛ dyí dyuò. Ké wa nyí ma Eɖóún mɔ̀ ma kà sáa-zà-nyɔ̀ vɛ̀nɛ̀ɔ̀, ké ɔ mɔ̀ ma Kóhàà nyúà-dyú kɛɛ nììn gbǒ-xwíníínɔ̀ hwɔɖɔ ɓaɖa-bùè sè tã ɖé Júɖà-ɓòɖòɔ̀ kè Símìɔ̀-ɓòɖòɔ̀ ɔ kè Bɛ̃́címà-ɓòɖòɔ̀ kɔ̃.

⁵ Ké wa nyí ma Kóhàà gbǒ-xwíníín tɔ̀ɔ̀ hwɔɖɔ ɓaɖa-bùè ɖé Ífèɖèìn-ɓòɖòɔ̀ kè Dɛ̃́ìn-ɓòɖòɔ̀ ɔ kè Mànásì-ɓòɖò nìà ɖé Jɔ́nì-nìɔ̀ dyóɖó-dyi-kpáìn-naínɔ̀ kɛɛ kɔ̃.

⁶ Ké wa nyí ma Gésɔ̀ùn nììn gbǒ-xwíníínɔ̀ hwɔɖɔ ɓaɖa-bùè sè tã ɖé Ɛ́sàkà-ɓòɖòɔ̀ kè Ásè-ɓòɖòɔ̀ kè Náfátàɖì-ɓòɖòɔ̀ ɔ kè Mànásì-ɓòɖò nìà ɖé Jɔ́nì-nìɔ̀ dyóɖó-xwáɖáún-wóɖóìn-naínɔ̀ kɛɛ kɔ̃.

⁷ Ké wa nyí ma Mɛ̀wáɖáwìɖì nììn gbǒ-xwíníínɔ̀ hwɔɖɔ ɓaɖa-bùè sè sɔ̃́ ɖé Wuɖuɓíín-ɓòɖòɔ̀ kè Gáà-ɓòɖòɔ̀ ɔ kè Zɛ́ɓíúɖɔ̀ùn-ɓòɖòɔ̀ kɔ̃.

⁸ Kǎà Éézùɖùɛ̀-nyɔ̀ vɛ̀nɛ̀ ɓěɔ̀ nyu ma gbo-ɖàɓàìn-ɖɛ̀, ké wa nyí ma Ɖíìváà gbǒ-xwíníín ɓěɔ̀ hwɔɖɔ ɓěɛ̀ kè nyúà-ɖɛ̀ dyi-ɖi-naín ɓě nì hwɔɖɔ ɓěɛ̀ ɖeiɛ kà Bounɓoɔ̀ nyuɛ zɔ̃̌ɔ̀ kà cɛ̃ɛ dyììn ɖé Mózè múɛ.

^9-10 Gbǒ-xwíníín kĩ́ín-kĩ́ín ɓɛ́ wa nyí ma hwɔɖɔ ɓěɛɛ mɔ̀ Eɖóún mɔ̀ ma kà Kóhàà nyúà-dyúɔ̀ kɛɛ nììn gbǒ-xwíníínɔ̀. Hwɔɖɔ ɓě ɓɛ́ wa nyí ma Eɖóún nììn gbǒ-xwíníínɔ̀ ɖé Júɖà-ɓòɖòɔ̀ kè Símìɔ̀-ɓòɖòɔ̀ kɔ̃ɛɛ kɛà kɛ̀.

^11-12 Wa nyí ma wa Kíjà-Áɓà-hwɔ̀ɖɔ̀ kɔ̃̀ nyɛ́nɛ́ ɖò mɔ̀à Hɛ́bɔ̀nɔ̀ kɛ kè nyúà-ɖɛ̀ dyi-ɖi-naín ɓě nì hwɔɖɔɔ̀ ɖeiɛ. Kɛɛ Kéɖɛ̀ mɔ̀à Jɛ̀fúnɛ̀ɛ̀ dyú-gààɔ̀ kɛɛ mɔ̀ nyɔ kɔ̃̀ ma geɖe ɓě kè hwɔɖɔ-kpàǎ ɓě nì ma Kíjà-Áɓà-hwɔ̀ɖɔ̀ɔ̀ ɖeiɛ. Kíjà-Áɓà-hwɔ̀ɖɔ̀ɔ̀ nì ma ɖé Júɖà Toɖo-ɓòɖòɔ̀ kɔ̃, ké ɔ mùìn ma Áɓà ɓɛ́ ɔ mɔ̀ ma kà Ánàkì-nyɔ̀ ɓěɔ̀ ɓǎ nììn ɓǎɔ̀ kɛɛ nyɛ́nɛ́ín.

¹³ Ké ɔ mɔ̀ ma hwɔɖɔ ɓě ɓɛ́ nyɔ ɓě mu kú ɖáɓáùn seó-ɖei-dyé-kà kɛɛ ké mú pèɖèìn nyɛɛ ɖò. Hwɔɖɔ ɓěɛ̀ kè waà nyúà-ɖɛ̀ dyi-ɖi-naín ɓěɔ̀ kɔ ma ɓó Hɛ́bɔ̀nɔ̀-hwɔ̀ɖɔ̀ɔ̀ gbo dyí. Wa mɔ̀ Ɖínà

¹⁴ kè Játì kè Ɛ̀tèmɔ́à

¹⁵ kè Hóɖɔ̀ùn kè Déɓì

¹⁶ kè Ádyììn kè Jútà ɔ kè Bɛ̀-Sɛ́mɛ̀. Hwɔɖɔ ɓě ɓɛ́ wa nyí ma Eɖóún nììn gbǒ-xwíníínɔ̀ ɖé Júɖà-ɓòɖòɔ̀ kè Símìɔ̀-ɓòɖòɔ̀ kɔ̃ɛɛ mɔ̀ ma hwɔɖɔ mɛ̀nɛ̌ìn-hĩinyɛ.

¹⁷ Ké ɖé Bɛ̃́címà-ɓòɖòɔ̀ kɔ̃ɛɛ, wa nyí ma Eɖóún nììn gbǒ-xwíníínɔ̀ hwɔɖɔ ɓěɛ̀ kè nyúà-ɖɛ̀ dyi-ɖi-naín ɓě nì ma wa ɖeiɛ. Wa mɔ̀ Gíɓìɔ̀ùn kè Géɓà

¹⁸ kè Ànáfò ɔ kè Áámɔ̀. Hwɔɖɔ ɓě ɓɛ́ wa nyí ma Eɖóún nììn gbǒ-xwíníínɔ̀ ɖé Bɛ̃́címà-ɓòɖòɔ̀ kɔ̃ɛɛ mɔ̀ ma hwɔɖɔ hĩinyɛ.

¹⁹ Kǎà wa nyu ma Eɖóún nììn gbǒ-xwíníín-nyɔ̀ ɓě mɔ̀à sáa-zà-nyɔ̀ ɓěɔ̀ kɛɛ hwɔɖɔ ɓaɖa-bùè sè tã kè nyúà-ɖɛ̀ dyi-ɖi-naín ɓě nì ma hwɔɖɔ ɓěɔ̀ ɖeiɛɛ nyíɛ.

²⁰ Ɓó Eɖóún nììn gbǒ-xwíníínɔ̀ ɖeín nyɛɛ, wa nyí ma Kóhàà gbǒ-xwíníín tɔ̀ɔ̀ hwɔɖɔ ɓě ɖé Ífèɖèìn-ɓòɖòɔ̀ kɔ̃.

²¹ Wa nyí ma wa Sɛ́kɛ̃̀ìn-hwɔ̀ɖɔ̀ɔ̀ kè nyúà-ɖɛ̀ dyi-ɖi-naín ɓě nì ma hwɔɖɔɔ̀ ɖeiɛ. Sɛ́kɛ̃̀ìn-hwɔ̀ɖɔ̀ɔ̀ nì ma ɖé Ífèɖèìn Toɖo-ɓòɖòɔ̀ kɔ̃, ké ɔ mɔ̀ ma mú-vǐè-hwɔ̀ɖɔ̀ ɓě ɓɛ́ nyɔ ɓě mu kú ɖáɓáùn seó-ɖei-dyé-kà kɛɛ ké mú pèɖèìn nyɛɛ ɖò. Hwɔɖɔ ɓěɛ̀ kè waà nyúà-ɖɛ̀ dyi-ɖi-naín ɓěɔ̀ kɔ ma ɓó Sɛ́kɛ̃̀ìn-hwɔ̀ɖɔ̀ɔ̀ gbo dyí. Wa mɔ̀ Gézɛ̀

²² kè Kìzáìn ɔ kè Bɛ̀-Hówɔ̀nɔ̀. Hwɔɖɔ ɓě ɓɛ́ wa nyí ma Kóhàà gbǒ-xwíníín tɔ̀ɔ̀ ɖé Ífèɖèìn-ɓòɖòɔ̀ kɔ̃ɛɛ mɔ̀ ma hwɔɖɔ hĩinyɛ.

^23-24 Ké ɖé Dɛ̃́ìn-ɓòɖòɔ̀ kɔ̃ɛɛ, wa nyí ma Kóhàà gbǒ-xwíníín tɔ̀ɔ̀ hwɔɖɔ hĩinyɛ kè nyúà-ɖɛ̀ dyi-ɖi-naín ɓě nì ma hwɔɖɔ ɓěɔ̀ ɖeiɛ. Hwɔɖɔ ɓěɔ̀ mɔ̀ Ɛ̀tékè kè Gìɓɛ́fɔ̀ùn kè Àjáɖɔ̀ùn ɔ kè Gátì-Wíɖímɔ̀.

²⁵ Ké ɖé Mànásì-ɓòɖò nìà ɖé Jɔ́nì-nìɔ̀ dyóɖó-dyi-kpáìn-naínɔ̀ kɛ kɔ̃ɛɛ, wa nyí ma Kóhàà gbǒ-xwíníín tɔ̀ɔ̀ hwɔɖɔ sɔ̃́ kè nyúà-ɖɛ̀ dyi-ɖi-naín ɓě nì ma hwɔɖɔ ɓěɔ̀ ɖeiɛ. Hwɔɖɔ ɓěɔ̀ mɔ̀ Táánà kè Gátì-Wíɖímɔ̀.

²⁶ Kǎà wa nyu ma Kóhàà gbǒ-xwíníín tɔ̀ɔ̀ hwɔɖɔ ɓaɖa-bùè kè nyúà-ɖɛ̀ dyi-ɖi-naín ɓě nì ma hwɔɖɔ ɓěɔ̀ ɖeiɛɛ nyíɛ.

²⁷ Ɓó Kóhà nììn gbǒ-xwíníínɔ̀ ɖeín nyɛɛ, wa nyí ma Gésɔ̀ùn nììn gbǒ-xwíníínɔ̀ hwɔɖɔ sɔ̃́ kè nyúà-ɖɛ̀ dyi-ɖi-naín ɓě nì ma hwɔɖɔ ɓěɔ̀ ɖeiɛɛ ɖé Mànásì-ɓòɖò nìà ɖé Jɔ́nì-nìɔ̀ dyóɖó-xwáɖáún-wóɖóìn-naínɔ̀ kɛɛ kɔ̃. Hwɔɖɔ ɓěɔ̀ mɔ̀ Góɖàùn kè Bè-Ɛ̀téwàɖà. Góɖàùn-hwɔ̀ɖɔ̀ɔ̀ nì ma ɖé Básàùn-ɓòɖòɔ̀ kɔ̃, ké ɔ mɔ̀ ma mú-vǐè-hwɔ̀ɖɔ̀ ɓě ɓɛ́ nyɔ ɓě mu kú ɖáɓáùn seó-ɖei-dyé-kà kɛɛ ké mú pèɖèìn nyɛɛ ɖò.

^28-29 Ké ɖé Ɛ́sàkà-ɓòɖòɔ̀ kɔ̃ɛɛ, wa nyí ma Gésɔ̀ùn nììn gbǒ-xwíníínɔ̀ hwɔɖɔ hĩinyɛ kè nyúà-ɖɛ̀ dyi-ɖi-naín ɓě nì ma hwɔɖɔ ɓěɔ̀ ɖeiɛ. Hwɔɖɔ ɓěɔ̀ mɔ̀ Kísìɔ̀ùn kè Dàɓɛ́wàɖà kè Jámù ɔ kè Ègánì.

^30-31 Ké ɖé Ásè-ɓòɖòɔ̀ kɔ̃ɛɛ, wa nyí ma Gésɔ̀ùn nììn gbǒ-xwíníínɔ̀ hwɔɖɔ hĩinyɛ kè nyúà-ɖɛ̀ dyi-ɖi-naín ɓě nì ma hwɔɖɔ ɓěɔ̀ ɖeiɛ. Hwɔɖɔ ɓěɔ̀ mɔ̀ Mísàò kè Ɛ́bɔ̀nɔ̀ kè Hɛ́kà ɔ kè Wíɖíhɔ̀.

³² Ké ɖé Náfátàɖì-ɓòɖòɔ̀ kɔ̃ɛɛ, wa nyí ma Gésɔ̀ùn nììn gbǒ-xwíníínɔ̀ hwɔɖɔ tã kè nyúà-ɖɛ̀ dyi-ɖi-naín ɓě nì ma hwɔɖɔ ɓěɔ̀ ɖeiɛ. Hwɔɖɔ ɓěɔ̀ mɔ̀ Kɛ́ɖɛ̀ kè Hã́mɔ̀-Dóɔ̀ ɔ kè Kátàùn. Kɛ́ɖɛ̀ nì ma ɖé Gáɖàɖíì-ɓòɖòɔ̀ kɔ̃, ké ɔ mɔ̀ ma mú-vǐè-hwɔ̀ɖɔ̀ ɓě ɓɛ́ nyɔ ɓě mu kú ɖáɓáùn seó-ɖei-dyé-kà kɛɛ ké mú pèɖèìn nyɛɛ ɖò.

³³ Kǎà wa nyu ma Gésɔ̀ùn nììn gbǒ-xwíníínɔ̀ hwɔɖɔ ɓaɖa-bùè sè tã kè nyúà-ɖɛ̀ dyi-ɖi-naín ɓě nì ma hwɔɖɔ ɓěɔ̀ ɖeiɛɛ nyíɛ.

^34-35 Ɖíìváà-nyɔ̀ ɓěɔ̀ hwɛ̀ìn-gbɔ ɓɛ́ wa nyí ma hwɔɖɔ ɓěɛɛ mɔ̀ Mɛ̀wáɖáwìɖì nììn gbǒ-xwíníínɔ̀. Wa nyí ma wa hwɔɖɔ hĩinyɛ kè nyúà-ɖɛ̀ dyi-ɖi-naín ɓě nì ma hwɔɖɔ ɓěɔ̀ ɖeiɛɛ ɖé Zɛ́ɓíúɖɔ̀ùn-ɓòɖòɔ̀ kɔ̃. Hwɔɖɔ ɓěɔ̀ mɔ̀ Jòníà kè Káátà kè Dĩ́nà ɔ kè Nàháɖàò.

^36-37 Ké ɖé Wuɖuɓíín-ɓòɖòɔ̀ kɔ̃ɛɛ, wa nyí ma Mɛ̀wáɖáwìɖì nììn gbǒ-xwíníínɔ̀ hwɔɖɔ hĩinyɛ kè nyúà-ɖɛ̀ dyi-ɖi-naín ɓě nì ma hwɔɖɔ ɓěɔ̀ ɖeiɛ. Hwɔɖɔ ɓěɔ̀ mɔ̀ Bɛ́zɔ̀ kè Jáhàzì kè Kɛ̀ɖémɔ̀ ɔ kè Mèfáà.

^38-39 Ké ɖé Gáà-ɓòɖòɔ̀ kɔ̃ɛɛ, wa nyí ma Mɛ̀wáɖáwìɖì nììn gbǒ-xwíníínɔ̀ hwɔɖɔ hĩinyɛ kè nyúà-ɖɛ̀ dyi-ɖi-naín ɓě nì ma hwɔɖɔ ɓěɔ̀ ɖeiɛ. Hwɔɖɔ ɓěɔ̀ mɔ̀ Wáɖámɔ̀ kè Máhànáì kè Hɛ́ɓɔ̀ùn ɔ kè Jázè. Wáɖámɔ̀ nì ma ɖé Gíɖèà-ɓòɖòɔ̀ kɔ̃, ké ɔ mɔ̀ ma mú-vǐè-hwɔ̀ɖɔ̀ ɓě ɓɛ́ nyɔ ɓě mu kú ɖáɓáùn seó-ɖei-dyé-kà kɛɛ ké mú pèɖèìn nyɛɛ ɖò.

⁴⁰ Kǎà wa nyu ma Ɖíìváà-nyɔ̀ ɓěɔ̀ hwɛ̀ìn-gbɔ mɔ̀à Mɛ̀wáɖáwìɖì nììn gbǒ-xwíníínɔ̀ kɛɛ hwɔɖɔ ɓaɖa-bùè sè sɔ̃́ nyíɛ.

^41-42 Hwɔɖɔ ɓě ɓɛ́ Éézùɖùɛ̀-nyɔ̀ vɛ̀nɛ̀ ɓěɔ̀ nyí ma Ɖíìváà-nyɔ̀ ɓěɔ̀ sɔ̀ìn ɖé waà hwɔɖɔ ɓěɔ̀ hwìɛ̀ kɛɛ mɔ̀ ma hwɔɖɔ kpáɖá-nyɔ sɔ̃́ sè mɛ̀nɛ̌ìn-tã. Ké nyúà-ɖɛ̀ dyi-ɖi-naín ɓě nì ma hwɔɖɔ ɓěɛ̀ ɖò-ɖò ɖei. Nyúà-ɖɛ̀ dyi-ɖi-naín ɓěɔ̀ mɔ̀ ma Ɖíìváà-nyɔ̀ ɓěɔ̀ kɔ̃̀ɔ̀-ɖɛ̀ ɖekè.

⁴³ Kǎà Bounɓoɔ̀ nyu ma Éézùɖùɛ̀-nyɔ̀ ɓěɔ̀ Kénà-ɓòɖò gàná ɓɛ́ ɔ ɖáìnǒ zɔ̃̌ɔ̀ kà wa ɓǎ nììn ɓǎ ɓěɔ̀ nyɛ́nɛ́ín nyɛɛ nyíɛ. Ké wa ɖú ma ɓóɖóɔ̀ dyí, ké wa cĩ́ ma ɖé.

⁴⁴ Ké Bounɓoɔ̀ nyuɛ ké wa cĩ́ ma gìɖìǐ mú ɖé ɓóɖó gànáɔ̀ mú kà ɓɛ́ ɔ nyuɛ zɔ̃̌ɔ̀ kà wa ɓǎ nììn ɓǎ ɓěɔ̀ nyɛ́nɛ́ín ɖáìn nyɛ, sepóɛɖé ɔ po ma waà mú-nyɛ́-nyɔ̀ ɓěɔ̀ wa xwaún dyi, ké waà mú-nyɛ́-nyɔ̀ ɓěɔ̀ dyúáɖò se ma ɓó wa dyúa dyi nyànàà ɓɛ́ìn.

⁴⁵ Bounɓoɔ̀ nyu ma ɖɛ nɔ̀mɔ̀ kɔ̃in séín ɓɛ́ ɔ ɖáìn zɔ̃̌ɔ̀ kà Éézùɖùɛ̀-nyɔ̀ ɓěɔ̀ nyɛ́nɛ́ín nyɛɛ nyɛ̀nɛ̀ɛ̀. Ɔ se ma ɖò ɓíɖíi sè fɔɔ.