Jasúé 20 - Ɓǎsɔ́ɔ̀ Báɓòɔ̀

Mú-vǐè-hwɔ̀ɖɔ̀ ɓě

¹ Ti ɓɛ́ wa ɖǎ ma ɓóɖóɔ̀ geɛ̀n hwɔɛɛ, Bounɓoɔ̀ cɛ̃ɛ ma Jasúé gbo, ké ɔ ɖá,

² “Cɛ̃ɛ Éézùɖùɛ̀-dyù ɓěɔ̀ gbo, ɓɛ́ wa ké mú-vǐè-hwɔ̀ɖɔ̀ ɓě gã kà ḿ nyuɛ zɔ̃̌ɔ̀ kà wa gbo cɛ̃ɛ dyììn ɖé Mózè múɛ.

³ Wa mɛ gã hwɔɖɔ ɓěɛ̀, ɓɛ́ ɔ jǔ ké nyɔ ɖò seó ɖei dyé, ké ɔ dyi kú ɖáɓá ní, nìí, ɔ ké ɖé hwɔɖɔ ɓěɛ̀ ɖò mú pèɖèìn, ɓɛ́ nyɔ mɔ̀ nyɔ mɔ́ nyɔ ɖǎà mɛ́ɛ kpa zàà dyiɛɛ ní kɔ̃̀ ɖà ɔ ɖáɓá.

⁴ Ɔ jǔ ké nyɔ ɖáɓáà kúɔ̀ kɛɛ dyi hwɔɖɔ ɓěɛ̀ ɖò dyá ní, nìí, ɔ mɛ nyànà ɓó hwɔɖɔɔ̀ gmɔ-wɔ̃̀ɔ̀ gbo dyi, ɓɛ́ ɔ ké ɖɛ ɔ ɖǎà nyuɛɛ kɔ̃in zaìn ɖé hwɔɖɔɔ̀ nyɔ vɛ̀nɛ̀ ɓěɔ̀ gbo. Ɔ ɖǎa kɔ̃in zaìn hwɔ ní, nìí, wa mɛ dyáìn ɔ hwɔɖɔɔ̀ mú, ɓɛ́ wa ké ɔ pá nyí, ɓɛ́ ɔ ké ɖé wa hwìɛ̀ cĩ́.

⁵ Ké nyɔ mɔ̀ nyɔ mɔ́à nyɔ ɖǎà mɛ́ɛ kpa zàà dyiɛɛ dyi ɔ kíɖíí kpá, ké ɔ dyi ɖé hwɔɖɔɔ̀ mú nyiniín, nìí, wa ní zàìn nyɔ ɖáɓáà kúɔ̀ kɛɛ ɔ xwáɖáún. Wa mɛ gmɔ̀ nyɔɔ̀ dyí, sepóɛɖé ɔ ɖáɓá ɔ mǔèɔ̀ seó-ɖei-dyé-kà, ké ɔ se ma ɔ mǔèɔ̀ hwòɖǒ gbà ɖò ɓéɖé kĩ́ín.

⁶ Ké nyɔ ɖáɓáà kúɔ̀ kɛɛ mɛ cĩ́ ɖé hwɔɖɔɔ̀ mú tee, ɓɛ́ zaa-wɔ̃-po-nyɔ̀ ɓěɔ̀ ké ɔ zaaɔ̀ wɔ̃ po ɔ kè ɓɛ́ sáa-zà-nyɔ̀ vɛ̀nɛ̀ kɔ̃̀ kũ̀à-tìǐn ɔ ɖáɓáà kúɔ̀ kɛɛ ké mɛ́ hwɛ̀. Ɔ ɖǎ ná nìǐn, nìí, ɔ ɓɛ́àǐn ɔ mìɔùn nììn ɓíɖí-hwɔ̀ɖɔ̀ kɔ̃̀ mú ɔ sɔ̀ ma kà, ɓɛ́ ɔ dyi ma kà xwáɖáún kpáa ɖe kɔ́ìn.”

⁷ Ɔ jèɛɛ, Éézùɖùɛ̀-nyɔ̀ ɓěɔ̀ gã ma hwɔɖɔ tã hwɔ ɖé Jɔ́nì-nìɔ̀ dyóɖó-dyi-kpáìn-naínɔ̀ dyí. Hwɔɖɔ ɓěɔ̀ mɔ̀ Kɛ́ɖɛ̀ ɓɛ́ ɔ nì ma ɖé Gáɖàɖíì-ɓòɖòɔ̀ kɔ̃ ɖé Náfátàɖì Toɖo-ɓòɖòɔ̀ kɔ̃ɛ kè Sɛ́kɛ̃̀ìn ɓɛ́ ɔ nì ma ɖé Ífèɖèìn Toɖo-ɓòɖòɔ̀ kɔ̃ɛ ɔ kè Kíjà-Áɓà kɔ̃̀ nyɛ́nɛ́ ɖò mɔ̀à Hɛ́bɔ̀nɔ̀, ɓɛ́ ɔ nì ma ɖé Júɖà Toɖo-ɓòɖòɔ̀ kɔ̃ kɛ.

⁸ Ké ɖé Jɔ́nì-nì kɔ̃̀ wĩín Jɛ́ɖèkóò-hwɔ̀ɖɔ̀ɔ̀ nìà kɛɛ dyóɖó-xwáɖáún-wóɖóìn-naínɔ̀ kɛɛ, wa gã ma ɖé hwɔɖɔ tã ɖekè. Hwɔɖɔ ɓěɔ̀ mɔ̀ Bɛ́zɔ̀ ɓɛ́ ɔ nì ma ɖé gbǎùn-fúɖúáɔ̀ kɔ̃ ɖé Wuɖuɓíín nììn xwéɖé-dùɔ̀ ɓóɖóɔ̀ kɔ̃ɛ kè Wáɖámɔ̀ ɓɛ́ ɔ nì ma ɖé Gíɖèà-ɓòɖòɔ̀ kɔ̃ ɖé Gáà nììn xwéɖé-dùɔ̀ ɓóɖóɔ̀ kɔ̃ɛ ɔ kè Góɖàùn ɓɛ́ ɔ nì ma ɖé Básàùn-ɓòɖòɔ̀ kɔ̃ ɖé Mànásì nììn xwéɖé-dùɔ̀ ɓóɖóɔ̀ kɔ̃ɛ.

⁹ Éézùɖùɛ̀-nyɔ̀ ɖò mɔɔ ɖíà ɓě cĩ́à ɖé wa hwìɛ̀ kɛɛ ɖò dyi kú ɖáɓá seó-ɖei-dyé-kà ní, nìí, ɔ ɓɛ́ìn ma ɖé hwɔɖɔ ɓěɛ̀ ɖò mú pèɖèɛ̀n. Ɔ jǔ ké nyɔɔ̀ ɖǎ ɖé hwɔɖɔɔ̀ mú pèɖèìn ní, nìí, nyɔ mɔ̀ nyɔ mɔ́à nyɔ ɖǎà mɛ́ɛ kpa zàà dyiɛɛ se ɔ ɖáɓáa ɓɛ́ìn, ɔ sèìn dyɛ zaa kpɔ̃ dyɛ nyɔɔ̀ hwɛ̀.