Jasúé 2 - Ɓǎsɔ́ɔ̀ Báɓòɔ̀

Jasúé ɖoɓo dyéɖé-dyi-kpaìn-nyɔ̀ ɓě ɖé Jɛ́ɖèkóò-hwɔ̀ɖɔ̀ɔ̀ mú

¹ Sɔ̀ìn ɓóɛ gboɛɛ, Jasúé ɖoɓo ma dyéɖé-dyi-kpaìn-gàà sɔ̃́ sɔ̀ìn ɖé Sítììn-pàɔ̀ mú. Ɔ cɛ̃ɛ ma wa gbo, ké ɔ ɖá, “Ɓě mu, ɓɛ́ ɓě ké Kénà-ɓòɖòɔ̀ kɔ̃in gmɔìn, jɛ́ɛ́ kɛɛ Jɛ́ɖèkóò-hwɔ̀ɖɔ̀ɔ̀.” Ɔ jèɛɛ, gàa sɔ̃́ ɓěɔ̀ mu ma ɖé Jɛ́ɖèkóò-hwɔ̀ɖɔ̀ɔ̀ mú. Ti ɓɛ́ wa nyini ma ɖé hwɔɖɔɔ̀ múɛɛ, wa mu ma ɖé gbàɖàùn-màà ɖò kɔ̃̀ nyɛ́nɛ́ mɔ̀ ma Wéɖéháà kɛɛ ɓíɖí-taún, ɓɛ́ wa ké ma ɖé pɛ̃́.

² Ké nyɔ ɖò cɛ̃ɛ ma Jɛ́ɖèkóò-hwɔ̀ɖɔ̀ɔ̀ kã́áɔ̀ gbo, ké ɔ ɖá, “Dà ɓóɛ̀ m̀ kòò? Ɓó hwìɔǔn wɛ̃ɛ, Éézùɖùɛ̀-nyɔ̀ ɖíɛ́ ɓě dyi nɔ̄, ɓɛ́ wa ké ɓóɖóɛ̀ dyéɖé gboi kpaìn.”

³ Ɔ jèɛɛ, Jɛ́ɖèkóò-kã̀ǎɔ̀ tò ma Wéɖéháà gbo wuɖu, ké ɔ ɖá, “Gàa ɓě nìà ɖé m̀ ɓíɖí-taún wɛ̃ɛ dyi, ɓɛ́ wa ké ɓóɖó gàná nìà kɛ dyéɖé gboi kpaìn. Ɔ jèɛɛ, po wa píé.”

^4-6 Ké màaɔ̀ cɛ̃ɛ ma kíá ɓěɔ̀ gbo, ké ɔ ɖá, “Ǹdye, gàa ɓěɔ̀ dyiɔ́ má nɔ̄ ḿ gbo, kɛɛ ḿ se dɛ̀ wa ké sɔ̀ɛɛ dyuò. Hwɛ̀ ɓɛ́ wa kéɔ́ má gmɔ-wɔ̃̀ɔ̀ gbǎ ɓó hwìɔǔn wɛ̃ɛ, gàa ɓěɔ̀ síɔ́ má ní, ké ḿ se dyuò dɛ̀ wa ké mùìn nyɛ. Ɓě dyi wa kíɖíí sí wàɖà ní, ti ɖíɛ́ ɓě ní, ɓě mu wa dyɛ̀ìn.” Kɛɛ ɓó tia ɓaɖaa, màaɔ̀ ɖǎ ma gàa ɓěɔ̀ vǐè ɖé ɔ gbǒɔ̀ dúún. Ɔ wáɖá ma wa ɓáá-ɖɛ̀ ɖò kɔ̃̀ nyɛ́nɛ́ mɔ̀ fáɖáà ɓɛ́ ɔ po ma dyóɖóún ɖé ɔ gbǒɔ̀ dúún wɛ̃ɛ kɔ̃in.

⁷ Ti ɓɛ́ màaɔ̀ ɖǎ ma kíá ɓěɔ̀ gbo wùɖùɛ̀ hwɔɛɛ, wa kpá ma hwìè xwíníín, ɓɛ́ wa ké ma dyéɖé-dyi-kpaìn-nyɔ̀ ɓěɔ̀ kúmúìn. Wa kpá ma hwìè ɓɛ́ ɔ mùìn ma ɖé dɛ̀ nyɔ péɖéìn ma Jɔ́nì-nìɔ̀ kɛɛ xwíníín. Ti ɓɛ́ gàa ɓě ɓɛ́ wa nì ma kà dyéɖé-dyi-kpaìn-nyɔ̀ ɓěɔ̀ dyi mɔ́uń wɛ̃ɛ sí ma nyɛ̀nɛ̀ɛ̀ kɛɛ, wa gbǎ ma hwɔɖɔɔ̀ gmɔ-wɔ̃̀ɔ̀ cá.

⁸ Hwɛ̀ ɓɛ́ dyéɖé-dyi-kpaìn-nyɔ̀ ɓěɔ̀ ké ma dyi pɛ̃́ ɓó máaún-hwùɖùɔ̀ múɛɛ, màaɔ̀ mu ma ɖé gbǒɔ̀ dúún,

⁹ ké ɔ cɛ̃ɛ ma gàa ɓěɔ̀ gbo, ké ɔ ɖá, “Ḿ dyuòɛ̀ kà ɓɛ́ Bounɓoɔ̀ ɖǎ ɓě ɓóɖó nìà kɛ nyíɛ, ké fã̀à nì à nyuɛń mìɔ ɓá ɓě jè dyí. Fã̀à ɓá ɓě jè dyíɛɛ nyuɛ ké hwòɖǒ ɖò se nyɔ séín cĩ́ nɔ̄ ɓóɖóɛ̀ kɔ̃ɛɛ xwíníín nì ɖe.

¹⁰ Sepóɛɖé à ɖǎa wɔ̃́ kà ɓɛ́ Bounɓoɔ̀ nyuɛ ma ké Dyóó Zĩ-zãɔ̀ ma ma ɓó ɓě bìì, ti ɓɛ́ ɓě sɔ̀ ma kà ɖé Íjè-ɓòɖòɔ̀ kɔ̃ɛ ɔ kè kà ɓɛ́ ɓě ɖáɓá ma Ámɔ̀-nyɔ̀ ɓěɔ̀ kã́á sɔ̃́ ɓě mɔ̀à Síhɔ̃̀ kè Ógì kɛ. Wa mɔ̀ kã́á sɔ̃́ ɓě nì ma kà ɖé Jɔ́nì-nìɔ̀ dyóɖó-xwáɖáún-wóɖóìn-naínɔ̀ kɛ.

¹¹ Ti ɓɛ́ à wɔ̃́ ma ɖɛ ɓěɛ̀ kɛɛ, à hwòɖǒ-dyùà kpá ma fã̀àǔn mìɔ cá, ké hwòɖǒ ɖò se nyɔ ɖò xwíníín nì ɖe ɓó ɓě jè. À dyuòɛ̀ kà Bounɓo mɔ̀à ɓěɛ̀ Gèɖèpɔ́ɔ̀ kɛɛ kɔ̃̀ ɖɛ séín nì ɖé dyɔún kè nɔ̄ ɓóɖó-kpàà kɔ̃ɛɛ wuɖuíɛ.

¹² Ɔ jèɛɛ, ɓó kàǔn wɛ̃ɛ, ní ɓaà ɓě ní, ɓě ɖi wuɖu ɓó Bounɓoɔ̀ dyúa ɓó ní jè kà ɓɛ́ ɓě mu ḿ kè ní gbǒ-xwíníín-nyɔ̀ ɓěɔ̀ nɔ̀mɔ̀ dyíin dyí nyuùn kà dyúáɖò kà ḿ ɖǎà ɓě nɔ̀mɔ̀ dyíin dyí nyuɛ. Ɓě mɛ nyí ḿ ɓěɛ̀ xwa-ɖɛ̀ ɖò, ɓɛ́ ɔ kéɛ ḿ dyí tɛ̀mɛ̀ìn kà ɓě mu ḿ kè ní gbǒ-xwíníín-nyɔ̀ ɓěɔ̀ nɔ̀mɔ̀ dyíin dyí nyuùn wɛ̃.

¹³ Ní mɔ́ ɓɛ́ ɓě ké ḿ ɖe kè ḿ ɓǎ kè ḿ ɖíí-gàà ɓě kè ḿ ɖíí-màà ɓě kè nyɔ séín ɓá wa dyíɛɛ póìn, ɓɛ́ à ké se mɛ́.”

¹⁴ Ɔ jèɛɛ, gàa ɓěɔ̀ ɖi ma wuɖu, ké wa ɖá, “Ɔ jǔ ké m̀ se ɖɛ à nìà nyuɛń nyɛɛ bɔ̃̌ píé po ní, nìí, à mu m̀ nɔ̀mɔ̀ dyíin dyí nyuùn tee, ti ɓɛ́ Bounɓoɔ̀ mu à ɓóɖóɛ̀ nyíìn nyɛ. Gèɖèpɔ́ɔ̀ mɛ zà ɖé à fɛ̀ɛ̀ɔ̀, ɔ jǔ ké à se ɖɛ à cɛ̃à kɛɛ nyu ní.”

¹⁵ Ɓó tia ɓaɖaa, gbǒ ɓɛ́ Wéɖéháà cĩ́ ma kà múɛɛ nì ma hwɔɖɔɔ̀ gmɔɔ̀ wáká ɖò mú. Ɔ jèɛɛ, ɔ ɓá ma ɖúú ɖò ɖé gmɔɔ̀ wúɖɛ̀-wɔ̃̀ ɖò gbo, ké gàa ɓěɔ̀ dèɖěìn ma ɖúúɔ̀ dyi, ké wa sí ma ɓíɖíi ɖé gmɔɔ̀ ɖeín.

¹⁶ Hwɛ̀ ɓɛ́ gàa ɓěɔ̀ ké ma síɛɛ, màaɔ̀ cɛ̃ɛ ma wa gbo, ké ɔ ɖá, “Ɓě mu, ɓɛ́ ɓě ké vǐè ɖé toɖo ɓěɔ̀ gbo, ɓɛ́ nyɔ ɓě nìà ɓě dyi mɔ́uń wɛ̃ɛ ní kɔ̃̀ ɖà ɓě dyé. Ɓě mɛ gã̀ vǐè-xwàɖàǔn dyi ɓɛ́ wé tã ké zi, ɓɛ́ ɓěɛ̀ dyi-mɔ́-nyɔ̀ ɓěɔ̀ ké ɖe kɔ́ìn, hwɛ̀ ɓɛ́ ɓě ké hwìǐ sí, ɓɛ́ ɓě ké mu.”

¹⁷ Ké gàa ɓěɔ̀ cɛ̃ɛ ma ɔ gbo, ké wa ɖá, “À se wuɖu ɓɛ́ à kè mɔ̀ ɖǎà dèɛɛ mú jaɖaá mu.

¹⁸ Kɛɛ ɖɛ m̀ mɛ nyuɛɛ kɛà kɛ̀. Ti à mu ɓěɛ̀ ɓóɖóɛ̀ to kɔ̃ dyàùn wɛ̃ɛ, m̀ mɛ ɓá ɖúú zĩ-zã nìà kɛ dyií ɖé wúɖɛ̀-wɔ̃̀ kɔ̃̀ gbo ɓɛ́ à nìà síɛń nyɛ. Ké m̀ mɛ dyà m̀ ɖe kè m̀ ɓǎ kè nì ɖíí-gàà ɓěɔ̀ ɔ kè nì gbǒ-xwíníín-nyɔ̀ séín ɓěɔ̀ nɔ̄ m̀ ɓíɖí-gbǒǔn.

¹⁹ Ɔ jǔ ké nyɔ ɖò dyi nì gbǒɔ̀ mú sɔ̀, ké ɔ dyi píé sí ní, nìí, ɔ mu ɔ mìɔùn nììn nyɔmɔɔ̀ kpa dyí ɖúùn, ké à se ɔ kpa dyí ɖúɛ mu. Kɛɛ ɔ jǔ ké à dyi nyɔ ɓě nì ɖé m̀ ɓíɖí-gbǒǔn wɛ̃ɛ ɖò sɔ̃ dya po ní, nìí, ɔ nyɔmɔɔ̀ kpa mu à kɔ̃ dyiìn.

²⁰ Kɛɛ ɔ jǔ ké m̀ dyi ɖɛ à nìà nyuɛń nyɛɛ bɔ̃̌ píé po ní, nìí, à mɔ̀ùn se wuɖu ɓɛ́ à ɖǎà ɖi ɓó m̀ dyúa kɛɛ nyuɛ́ mu.”

²¹ Ké màaɔ̀ ɖá, “Ḿ wɔ̃́ ní. Kà ɓě nyuà cɛ̃ɛ kɛɛ, kǎà ɔ mɛ nì.” Ké ɔ cuò ma wa, ké wa mu ma. Ti ɓɛ́ gàa ɓěɔ̀ ɖǎ ma muɛɛ, màaɔ̀ ɓá ma ɖúú zĩ-zãɔ̀ dyií ɖé wúɖɛ̀-wɔ̃̀ɔ̀ gbo.

²² Ké gàa ɓěɔ̀ mùìn ma ɖé toɖo ɓěɔ̀ gbo, ké wa vǐè ma ɖé ɓó wé tã xwíníín, ké waà dyi-mɔ́-nyɔ̀ ɓěɔ̀ gmɔìn ma dà séín dyi, kɛɛ wa se ma gàa ɓěɔ̀ dyé. Ɔ jèɛɛ, wa kɔ́ìn ma ɖe.

²³ Hwɛ̀ ké gàa ɓěɔ̀ sɔ̀ ma ɖé toɖo ɓěɔ̀ gbo, ké wa péɖé ma Jɔ́nì-nìɔ̀, ké wa mu ma ɖé Jasúé gbo. Ké wa zaìn ma ɖɛ séín kpá ma kà wa gboɛɛ Jasúé gbo kɔ̃in.

²⁴ Wa cɛ̃ɛ ma ɔ gbo, ké wa ɖá, “Bounɓoɔ̀ ɖǎ ɓóɖó gànáɔ̀ à xwaún dyi po jǎà jɛ́ɛ́, sepóɛɖé fã̀à nyuɛ ké hwòɖǒ ɖò se nyɔ séín ɓě nì ɖé ɓóɖóɔ̀ kɔ̃ɛɛ xwíníín nì ɖe ɓó ɓěà jè.”