Jasúé 18 - Ɓǎsɔ́ɔ̀ Báɓòɔ̀

Éézùɖùɛ̀-nyɔ̀ vɛ̀nɛ̀ ɓěɔ̀ geìn ɓóɖóɔ̀ nyɔ sè ɓóɛ

¹ Ti ɓɛ́ Éézùɖùɛ̀-nyɔ̀ ɓěɔ̀ ɖǎ ma Kénà-ɓòɖòɔ̀ toún ɖuɛɛ, wa séín poìn ma dyí ɖé Síɖò-hwɔ̀ɖɔ̀ɔ̀ wĩín, ké wa nyànàìn ma jàɖàìn-gbò kɔ̃̀ mú ɓɛ́ Bounɓoɔ̀ kè ɔ nyɔ ɓěɔ̀ dyéìn ma kɛɛ dyi.

² Ɓó tia ɓaɖaa, Éézùɖùɛ̀-nyɔ̀ ɓěɔ̀ xwéɖé-dù mɛ̀nɛ̌ìn-sɔ̃́ séè ma pá ɖò dyé ke, ɓɛ́ ɔ ké waà kɔ̃̀ɔ̀-ɖɛ̀ jǔ.

³ Ɔ jèɛɛ, Jasúé cɛ̃ɛ ma Éézùɖùɛ̀-nyɔ̀ ɓěɔ̀ gbo, ké ɔ ɖá, “Ɖɛ́ kɔ̃̀ jè ɓě nìà ti zĩ̀ɛ̌n, ké ɓě se mɔ́ ɓɛ́ ɓě kéà ɓóɖó ɓɛ́ Bounɓo mɔ̀à ɓě ɓǎ ɓěɛ̀ Gèɖèpɔ́ɔ̀ kɛɛ ɖǎà ɓě nyíɛɛ dyí ɖúɛ́?

^4-6 Ɓě mɔ̀ xwéɖé-dù mɛ̀nɛ̌ìn-sɔ̃́ séèà pá dyé keɛɛ ɖò-ɖò mɛ gã gàa tã-tã, ɓɛ́ ḿ ké wa ɖoɓo, ɓɛ́ wa ké ɓóɖóɔ̀ mɛ dè ɓó céè-ɖɛ̀ kɔ̃, ɓɛ́ wa ké ɓóɖóɔ̀ wáká ɓɛ́ wa mu mɔ́ùn ɓó waà xwéɖé-dùɔ̀ bììɛɛ gã. Wa mɛ ge ɓóɖóɔ̀ mú dú mɛ̀nɛ̌ìn-sɔ̃́, ɓɛ́ Júɖà-ɓòɖòɔ̀ ké ɖé ɓóɖóɔ̀ zɔ̃̌in sè ɔ kè ɓɛ́ Jòséɛ̀ xwéɖé-dù ɓěɔ̀ nììn ɓóɖóɔ̀ ké ɖé xwía sè. Wa ɖǎa náa nyuín, nìí, wa mɛ kɔ́ìn ḿ gbo ɖe, ɓɛ́ wa ké kà wa nyu ɓóɖóɔ̀ geɛ̀n nyɛɛ jè ḿ gbo kɔ̃in zaìn. Nìí, ní mu gbo-ɖàɓàìn-ɖɛ̀ nyuùn nɔ̄, ɓɛ́ ḿ ké Bounɓo mɔ̀à ɓěà Gèɖèpɔ́ɔ̀ kɛɛ dyi diè, ɓɛ́ à ké pá ɓɛ́ xwéɖé-dù mɛ̀nɛ̌ìn-sɔ̃́ ɓěɔ̀ ɖò-ɖò kɔ̃̀ ɓɛ́ wa ké dyéɛɛ dyí dyuò.

⁷ Kɛɛ ḿ se Ɖíìváà-nyɔ̀ ɓěɔ̀ pá ɖò nyíɛ mu, sepóɛɖé wa nììn pá mɔ̀ ɓɛ́ wa ké Bounɓoɔ̀ sáa-zà-nyɔ̀ ɓě jǔ. Ké Gáà nììn xwéɖé-dùɔ̀ kè Wuɖuɓíín nììn xwéɖé-dùɔ̀ ɔ kè Mànásì nììn xwéɖé-dù fáún-fáúnɔ̀ ɓéɖé wa nììn pá, sepóɛɖé Mózè mɔ̀à Bounɓoɔ̀ gbo-nì-nyɔ̀ɔ̀ kɛɛ nyí ma wa pá ɖé Jɔ́nì-nìɔ̀ dyóɖó-xwáɖáún-wóɖóìn-naínɔ̀.”

⁸ Ti ɓɛ́ gàa ɓě ɓɛ́ xwéɖé-dù mɛ̀nɛ̌ìn-sɔ̃́ ɓěɔ̀ gã ma kɛɛ nì ma muɛń nyɛɛ, Jasúé cɛ̃ɛ ma wa gbo, ké ɔ ɖá, “Ɓě mu, ɓɛ́ ɓě ké ɓóɖóɔ̀ mɛ dè ɓó céè-ɖɛ̀ kɔ̃, ɓɛ́ ɓě ké ḿ gbo ɖe kɔ́ìn. Nìí, ní mu gbo-ɖàɓàìn-ɖɛ̀ nyuùn nɔ̄ Síɖò-hwɔ̀ɖɔ̀ɛ̀ wĩín, ɓɛ́ ḿ ké Bounɓoɔ̀ dyi diè, ɓɛ́ à ké pá ɓɛ́ xwéɖé-dù mɛ̀nɛ̌ìn-sɔ̃́ ɓěɔ̀ ɖò-ɖò kɔ̃̀ ɓɛ́ wa ké dyéɛɛ dyí dyuò.”

⁹ Ké gàa ɓěɔ̀ mu ma, ké wa zĩ̀ìn ma ɓóɖóɔ̀ dà séín dyi. Ké wa ge ma ɓóɖóɔ̀ mú dú mɛ̀nɛ̌ìn-sɔ̃́, ké wáká ɖò-ɖò séín ɓéɖé ma waà hwɔɖɔ ɓě. Ké wa dèɛ̀ ma mɛ ɓó céè-ɖɛ̀ kɔ̃. Hwɛ̀ ké wa kɔ́ìn ma ɖe, ké wa dyi ma Jasúé gbo ɖé jàɖàìn-hwɔ̀ɖɔ̀ nì ma kà ɖé Síɖò-hwɔ̀ɖɔ̀ɔ̀ wĩín nyɛɛ mú.

¹⁰ Ké Jasúé diè ma Bounɓoɔ̀ dyi, ɓɛ́ ɔ ké pá ɓɛ́ xwéɖé-dù mɛ̀nɛ̌ìn-sɔ̃́ ɓěɔ̀ ɖò-ɖò kɔ̃̀ ɓɛ́ wa ké dyéɛɛ dyí dyuò, ké ɔ nyu ma gbo-ɖàɓàìn-ɖɛ̀ ɖé Síɖò-hwɔ̀ɖɔ̀ɔ̀ wĩín. Ké ɔ geìn ma ɓóɖóɔ̀ Éézùɖùɛ̀ɛ̀ xwéɖé-dù mɛ̀nɛ̌ìn-sɔ̃́ tɔ̀ɔ̀ ɓěɔ̀ múin.

Bɛ̃́címàà xwéɖé-dùɔ̀ nììn pá

¹¹ Ti ɓɛ́ Jasúé nyu ma gbo-ɖàɓàìn-ɖɛ̀ɔ̀ kɛɛ, xwéɖé-dù kĩ́ín ɓɛ́ ɔ nyí ma páa mɔ̀ Bɛ̃́címàà xwéɖé-dùɔ̀ gbǒ-xwíníín ɓěɔ̀. Waà páɔ̀ nì ma ɓó Júɖà-ɓòɖòɔ̀ kè Jòsé nììn xwéɖé-dù ɓěɔ̀ ɓóɖóɔ̀ pṹa.

¹² Bɛ̃́címàà xwéɖé-dùɔ̀ páɔ̀ bã̀à nì ɖé xwía kɛɛ dèìn ɖé Jɔ́nì-nìɔ̀ wĩín gbɔ, ké ɔ mùìn ɖé toɖo ɖò nì ɖé Jɛ́ɖèkóò-hwɔ̀ɖɔ̀ɔ̀ xwía kɛɛ dya. Sɔ̀ìn ɓóɛɛ, ɔ mùìn ɖé toɖo-ɓòɖò ɓɛ́ ɔ nì ɖé dyóɖó-dyi-kpáìn-naínɔ̀ kɛɛ mú, ké ɔ nyini ɖé Bɛ̀-Ávɛ̃̀ Gbǎùn-fúɖúáɔ̀ kɔ̃.

¹³ Sɔ̀ìn ɓóɛɛ, bã̀àɔ̀ mùìn ɖé toɖo ɖò nì ɖé Ɖúzì-hwɔ̀ɖɔ̀ kɔ̃̀ nyɛ́nɛ́ ɖò mɔ̀à Bɛ́fèò kɛɛ zɔ̃̌in nyɛɛ gbo, ké ɔ mu ɓíɖíi, ké ɔ nyini ɖé Àtáwɔ̀ɖɔ̀-Áɖɔ̀-hwɔ̀ɖɔ̀ ɓɛ́ ɔ nì ɖé toɖo ɖò xwíɖíiɛɛ gbo. Toɖoɔ̀ nì ɖé Bɛ̀-Hówɔ̀nɔ̀-hwɔ̀ɖɔ̀ɔ̀ ɓíɖíi.

¹⁴ Sɔ̀ìn ɓó toɖoɔ̀ wáká hwɔà ɖé dyóɖó-dyi-kpáìn-naínɔ̀ dyíɛ gboɛɛ, bã̀àɔ̀ kíɖí, ké ɔ mùìn ɖé ɓóɖóɔ̀ zɔ̃̌in ɖé Kíjà-Béò-hwɔ̀ɖɔ̀ kɔ̃̀ nyɛ́nɛ́ ɖò mɔ̀à Kíjà-Jáwìɖììn kɛɛ gbo. Júɖà-nyɔ̀ ɓěɔ̀ mɔ̀ nyɔ kɔ̃̀ ma Kíjà-Béò-hwɔ̀ɖɔ̀ɔ̀. Bɛ̃́címà nììn páɔ̀ bã̀à nì ɖé dyóɖó-dyi-kpáìn-naínɔ̀ kɛɛ sɔ̀ìn ɖé toɖo nìà ɖé Bɛ̀-Hówɔ̀nɔ̀-hwɔ̀ɖɔ̀ɔ̀ ɓíɖíiɛɛ gbo, ké ɔ kɔ Kíjà-Béò-hwɔ̀ɖɔ̀ɔ̀ dyí.

¹⁵ Ké bã̀à nì ɖé Bɛ̃́címà nììn páɔ̀ zɔ̃̌in nyɛɛ dèìn ɓó Kíjà-Jáwìɖììn-hwɔ̀ɖɔ̀ɔ̀ wĩín gbɔ, ké ɔ mùìn ɖé Nɛ̀tóà-nì-dù ɓɛ́ ɔ nì ɖé dyóɖó-xwáɖáún-wóɖóìn-naínɔ̀ kɛɛ gbo.

¹⁶ Ké ɔ zĩ̀ìn ɖé toɖo nìà ɖé Hĩ́nɔ̀ Bɔɔ-kpàɔ̀ dyóɖó-dyi-kpáìn-naínɔ̀ kɛɛ xwíɖíi. Toɖoɔ̀ nì ɖé Wɛ̀ɖɛ̀fáìn Bɔɔ-kpàɔ̀ xwía. Sɔ̀ìn ɓó toɖoɔ̀ xwíɖíiɛɛ, ɔ mùìn ɖé Hĩ́nɔ̀ Bɔɔ-kpà ɓɛ́ ɔ nì ɖé toɖo kɔ̃̀ dya ɓɛ́ Jɛ́ɓù-nyɔ̀ ɓěɔ̀ cĩ́à kɛɛ zɔ̃̌in nyɛɛ kɔ̃, ké ɔ nyini ɖé Èwóɖógèò-nì-dùɔ̀ gbo.

¹⁷ Sɔ̀ìn ɓó Èwóɖógèò-nì-dùɔ̀ gboɛɛ, bã̀àɔ̀ kíɖí, ké ɔ mùìn ɖé xwía ɖé Èsɛ́mɛ̀-nì-dùɔ̀ gbo, ké ɔ zĩ̀ìn ɖé Gèɖíɖò-hwɔ̀ɖɔ̀ nìà ɖé Àdúmì-tòɖò ɓěɔ̀ wáún wɛ̃ɛ mú. Ké ɔ mùìn ɖé sɔ́ɔ́-kpò ɓɛ́ wa ɖáìn Wuɖuɓíín dyú-gàà mɔ̀ ma kà Bóhã̀ kɛɛ nyɛ́nɛ́ín nyɛɛ gbo.

¹⁸ Sɔ̀ìn ɓó sɔ́ɔ́-kpòɔ̀ gboɛɛ, ɔ mùìn ɖé Bɛ̀-Àwáɖáɓà-hwɔ̀ɖɔ̀ ní ɖé toɖo ɖò dyaa xwía, ké ɔ sí ɖé Jɔ́nì Bɔɔ-kpàɔ̀ kɔ̃.

¹⁹ Sɔ̀ìn ɓóɛɛ, ɔ mùìn ɖé Bɛ̀-Hágàɖà-hwɔ̀ɖɔ̀ nì ɖé toɖo ɖò dyaa xwía, ké ɔ sèìn ɖé dɛ̀ Jɔ́nì-nìɔ̀ wáɖáà Tɔ̃́ Dòùnɓìǎɔ̀ múɛ. Kǎà bã̀à nì ɖé Bɛ̃́címà nììn páɔ̀ zɔ̃̌in nyɛɛ nyu nìɛ̀.

²⁰ Ké Bɛ̃́címà nììn páɔ̀ bã̀à nì ɖé dyóɖó-xwáɖáún-wóɖóìn-naínɔ̀ kɛɛ mɔ̀ Jɔ́nì-nìɔ̀. Kǎà Bɛ̃́címà nììn xwéɖé-dùɔ̀ gbǒ-xwíníín ɓěɔ̀ páɔ̀ bã̀àɔ̀ nyu nìɛ̀.

²¹ Hwɔɖɔ ɓě nì ɖé Bɛ̃́címà nììn xwéɖé-dùɔ̀ gbǒ-xwíníín ɓěɔ̀ páɔ̀ múɛɛ kɛà kɛ̀: Jɛ́ɖèkóò kè Bɛ̀-Hágàɖà kè Émɛ̀-Kɛ́zì

²² kè Bɛ̀-Àwáɖáɓà kè Zɛ̀mánáì kè Bɛ́fèò

²³ kè Ávììn kè Páwàɖà kè Áfàɖà

²⁴ kè Kɛ́fà-Àmɔ́nì kè Ónì ɔ kè Géɓà. Hwɔɖɔ ɓěɛ̀ mɔ̀ dìɓà-hwɔ̀ɖɔ̀ ɓaɖa-bùè sè sɔ̃́, ké wa ɓéɖé hwɔɖɔ-kpàǎ ɓě.

²⁵ Hwɔɖɔ ɓě kɔ ɓó dyíɛɛ mɔ̀ Gíɓìɔ̀ùn kè Wáɖámà kè Bééwòɖò

²⁶ kè Mípà kè Kɛ̀fíwàɖà kè Mózà

²⁷ kè Wɛ́ɖɛ́kɛ̃̀ìn kè Ìpéò kè Tàwáɖáɖà

²⁸ kè Zéɖà kè Hàɛ́ɖɛ̀ kè Jɛ́ɓù-nyɔ̀ ɓěɔ̀ hwɔɖɔ mɔ̀à Jùɖúsɛ̀ɖɛ̀ìn kɛ kè Gíɓìà ɔ kè Kíjà. Hwɔɖɔ ɓěɛ̀ mɔ̀ dìɓà-hwɔ̀ɖɔ̀ ɓaɖa-bùè sè hĩinyɛ, ké wa ɓéɖé hwɔɖɔ-kpàǎ ɓě. Pá nìà kɛ mɔ̀ Bɛ̃́címà nììn xwéɖé-dùɔ̀ gbǒ-xwíníín ɓěɔ̀ kɔ̃̀ɔ̀-ɖɛ̀ kánáá pū.