Jasúé 17 - Ɓǎsɔ́ɔ̀ Báɓòɔ̀

Mànásìɛ̀ xwéɖé-dù fáún-fáún tɔ̀ɔ̀ nììn pá

¹ Ti ɓɛ́ Éézùɖùɛ̀-nyɔ̀ vɛ̀nɛ̀ ɓěɔ̀ ɖǎ ma Ífèɖèìn-nyɔ̀ ɓěɔ̀ nììn pá tòɛɛ, wa nyí ma Mànásìɛ̀ xwéɖé-dù fáún-fáún tɔ̀ɔ̀ pá ɖé Jɔ́nì-nìɔ̀ dyóɖó-dyi-kpáìn-naínɔ̀ ɖekè. Wa nyuɛ ma náa, sepóɛɖé Mózè ɖǎ ma Mànásì mɔ̀à Jòséɛ̀ nyíɔ́-dyùɔ̀ kɛɛ xwéɖé-dùɔ̀ fáún-fáún pá nyí ɖé Jɔ́nì-nìɔ̀ dyóɖó-xwáɖáún-wóɖóìn-naínɔ̀. Ɔ nyí ma Gíɖèà-ɓòɖòɔ̀ kè Básàùn-ɓòɖòɔ̀ Mànásìɛ̀ nyíɔ́-dyù mɔ̀à Mákì kɛɛ gbǒ-xwíníín-nyɔ̀ ɓěɔ̀ fáún-fáún, sepóɛɖé Mákì ɓɛ́ ɔ mɔ̀ ma Gíɖèà ɓǎ kɛɛ gbǒ-xwíníín-nyɔ̀ ɓěɔ̀ mɔ̀ ma gàa-zà-nyɔ̀ ɓě jè.

² Mànásìɛ̀ xwéɖé-dù fáún-fáún tɔ̀ɔ̀ gbǒ-xwíníín ɓě ɓɛ́ wa nyí ma pá ɖé Jɔ́nì-nìɔ̀ dyóɖó-dyi-kpáìn-naínɔ̀ kɛɛ mɔ̀ ma Áɓìɛ́zɛ̀ɛ̀ gbǒ-xwíníínɔ̀ kè Héɖɛ̀kìɛ̀ gbǒ-xwíníínɔ̀ kè Àsíɖíèɛ̀ gbǒ-xwíníínɔ̀ kè Sɛ́kɛ̃̀ìn gbǒ-xwíníínɔ̀ kè Héfɛ̀ɛ̀ gbǒ-xwíníínɔ̀ ɔ kè Sɛ̀míɖàà gbǒ-xwíníínɔ̀.

³ Ɔ nì ná kɛɛ, Héfɛ̀ ɓéɖé ma dyú-gàà ɖò kɔ̃̀ nyɛ́nɛ́ mɔ̀ ma Zɛ̀ɖàfɛ́hà kɛ. Zɛ̀ɖàfɛ́hà ɓǎ ɓěɛ̀ gbǒ-xwíníínɔ̀ kɛà kɛ̀. Mànásì wóɖóìn ma Mákì, ké Mákì wóɖóìn ma Gíɖèà, ké Gíɖèà wóɖóìn ma Héfɛ̀, ké Héfɛ̀ wóɖóìn ma Zɛ̀ɖàfɛ́hà. Zɛ̀ɖàfɛ́hà se ma gàa-dyù ɖò wóɖóìn, kɛɛ ɔ wóɖóìn ma màa-dyù saá-saá. Ɔ màa-dyù ɓěɔ̀ nyɛ́nɛ́ mɔ̀ ma Máhàɖà kè Nóà kè Hágàɖà kè Míókà ɔ kè Tízà.

⁴ Ti ɓɛ́ Ɛ̀ɖɛ̀ázà mɔ̀à sáa-zà-nyɔ̀ vɛ̀nɛ̀ɔ̀ kɛ kè Jasúé ɔ kè Éézùɖùɛ̀-nyɔ̀ vɛ̀nɛ̀ ɓěɔ̀ nì ma ɓóɖóɔ̀ geɛ̌n nyɛɛ, Zɛ̀ɖàfɛ́hàà dyú-màà ɓěɔ̀ dyi ma wa gbo, ké wa ɖá, “Bounɓoɔ̀ cɛ̃ɛ zɔ̃̌ɔ̀ Mózè gbo, ɓɛ́ ɔ ké à mɔ̀ùn pá nyí ɖé à ɖíí-gàà ɓěɔ̀ nììn páɔ̀ mú.” Ké Jasúé nyí ma wa pá ɖé waà ɖíí-gàà ɓěɔ̀ nììn páɔ̀ mú kà Bounɓoɔ̀ nyuɛ zɔ̃̌ɔ̀ kà cɛ̃ɛ kɛ.

^5-6 Ɔ nyí ma Mànásìɛ̀ gbǒ-xwíníín-gàà hm̀m̌ ɓěɔ̀ kè ɔ gbǒ-xwíníín-màà-dyù hm̀m̌ ɓěɔ̀ pá. Ɔ jèɛɛ, Mànásìɛ̀ xwéɖé-dù fáún-fáúnɔ̀ kɔ̃̀ ma pá-dù ɓaɖa-bùè ɖé Jɔ́nì-nìɔ̀ dyóɖó-dyi-kpáìn-naínɔ̀. Ké Mànásìɛ̀ xwéɖé-dù fáún-fáún tɔ̀ɔ̀ kɔ̃̀ ma Gíɖèà-ɓòɖò kè Básàùn-ɓòɖò nìà ɖé Jɔ́nì-nìɔ̀ dyóɖó-xwáɖáún-wóɖóìn-naínɔ̀ kɛɛ wuɖuí.

⁷ Kǎà Mànásìɛ̀ xwéɖé-dù fáún-fáún nìà ɖé Jɔ́nì-nìɔ̀ dyóɖó-dyi-kpáìn-naínɔ̀ kɛɛ páɔ̀ bã̀à nyu kà nìɛ̀. Bã̀àɔ̀ sɔ̀ìn ɖé Ásè nììn páɔ̀ bã̀à dyí, ké ɔ mùìn ɖé Mìmɛ́fà-hwɔ̀ɖɔ̀ ɓɛ́ ɔ nì ɖé Sɛ́kɛ̃̀ìn-hwɔ̀ɖɔ̀ɔ̀ dyóɖó-xwáɖáún-wóɖóìn-naínɔ̀ kɛɛ mú. Sɔ̀ìn ɖé Mìmɛ́fà-hwɔ̀ɖɔ̀ɔ̀ múɛɛ, ɔ mùìn ɖé ɓóɖóɔ̀ zɔ̃̌in, ké ɔ nyini ɖé Ètàpúà-hwɔ̀ɖɔ̀ɔ̀ ɖeín.

⁸ Ètàpúà-hwɔ̀ɖɔ̀ɔ̀ nì ɓó Mànásì nììn páɔ̀ kè Ífèɖèìn nììn páɔ̀ bã̀à dyí. Ké Mànásì-nyɔ̀ ɓěɔ̀ mɔ̀ nyɔ kɔ̃̀ pá séín nì Ètàpúà-hwɔ̀ɖɔ̀ɔ̀ ɖeiɛ, kɛɛ Ífèɖèìn-nyɔ̀ ɓěɔ̀ mɔ̀ nyɔ kɔ̃̀ Ètàpúà-hwɔ̀ɖɔ̀ɔ̀.

⁹ Sɔ̀ìn ɓó Ètàpúà-hwɔ̀ɖɔ̀ɔ̀ ɖeín nyɛɛ, bã̀àɔ̀ mùìn ɖé ɓóɖóɔ̀ zɔ̃̌in tee, ké ɔ zĩ̀ìn ɖé Kánà-nìɔ̀ wĩín, ké ɔ sèìn Mɛ́ɖɛ̀tɔ̀wéɖénìà-dyòǒɔ̀ wĩín. Hwɔɖɔ ɖíɛ́ ɓě nì ɖé Mànásì nììn páɔ̀ múɛɛ mɔ̀ Ífèɖèìn-nyɔ̀ ɓěɔ̀ kɔ̃̀ɔ̀-ɖɛ̀.

¹⁰ Ífèɖèìn nììn páɔ̀ hwɔ ɖé Mànásì nììn páɔ̀ bã̀àɔ̀ zɔ̃̌in dyí, ké pá sɔ̃́ɔ̀ bã̀à nì ɖé dyóɖó-dyi-kpáìn-naínɔ̀ kɛɛ mɔ̀ Mɛ́ɖɛ̀tɔ̀wéɖénìà-dyòǒɔ̀. Ásè nììn páɔ̀ hwɔ ɖé Mànásì nììn páɔ̀ bã̀àɔ̀ xwía dyí, ké Ɛ́sàkà nììn páɔ̀ hwɔ ɖé Mànásì nììn páɔ̀ bã̀àɔ̀ dyóɖó-xwáɖáún-wóɖóìn-naínɔ̀ dyí.

¹¹ Ké Mànásì nììn xwéɖé-dùɔ̀ ɓéɖé ma hwɔɖɔ ɖíɛ́ ɓě ɖé Ásè nììn páɔ̀ kè Ɛ́sàkà nììn páɔ̀ mú. Hwɔɖɔ ɓěɔ̀ mɔ̀ Bɛ́sàùn kè Ìɓéɖéàùn kè Dóɔ̀ ɓɛ́ ɔ nìà ɖé Mɛ́ɖɛ̀tɔ̀wéɖénìà-dyòǒɔ̀ wĩín nyɛ kè Ɛ̃́ɖɔ̀ kè Táánà kè Mɛ̀gíɖò ɔ kè waà hwɔɖɔ-kpàǎ ɓě.

¹² Kɛɛ Mànásì-nyɔ̀ ɓěɔ̀ se ma Kénà-nyɔ̀ ɓěɔ̀ hwɔɖɔ ɓěɛ̀ múin kúmúɛ ɓɛ́ìn. Ɔ jèɛɛ, Kénà-nyɔ̀ ɓěɔ̀ cĩ́ ma ɖé hwɔɖɔ ɓěɛ̀ mú.

¹³ Hwɛ̀ ḿ po níiń, ti ɓɛ́ Éézùɖùɛ̀-nyɔ̀ ɓěɔ̀ ɖǎ ma gmɛ̀nɛ̀ɛ̀ kpa kóɖó-kóɖóɛɛ, wa se ma Kénà-nyɔ̀ ɓěɔ̀ ɖé ɓóɖóɔ̀ múin kúmú gàná cá, kɛɛ wa nyu ma Kénà-nyɔ̀ ɓěɔ̀ pɔ́ɖɔ́sɔ́ mú.

Ífèɖèìn kè Mànásì mɔ́ waà páɔ̀ ké kɔ̃ kpá

¹⁴ Ti ɓɛ́ Éézùɖùɛ̀-nyɔ̀ vɛ̀nɛ̀ ɓěɔ̀ ɖǎ ma Mànásì kè Ífèɖèìn mɔ̀à Jòséɛ̀ dyú-gàà ɓěɔ̀ kɛɛ xwéɖé-dù ɓěɔ̀ nììn pá tòɛɛ, Mànásì nììn nyɔ ɓěɔ̀ kè Ífèɖèìn nììn nyɔ ɓěɔ̀ cɛ̃ɛ ma Jasúé gbo, ké wa ɖá, “Bounɓoɔ̀ ɖǎ à mana kɔ̃ po, ké à ɖǎ dúún zaìn. Ɖɛ́ kɔ̃̀ jè m̀ nyíà à pá tííwè nìà kɛ kɛ́?”

¹⁵ Ké Jasúé jǔ ma wa gɔ̃̌, ké ɔ ɖá, “Ɔ jǔ ké ɓě dyi dyí vò, ké Ífèɖèìn Toɖo-ɓòɖòɔ̀ dyi dyí ɓíè ɓó ɓě bìì ní, nìí, ɓě mɛ mu ɖé Pɛ́wìɖì-nyɔ̀ ɓěɔ̀ kè Wɛ́ɖɛ́fà-nyɔ̀ ɓěɔ̀ xwáɖá-kpòòɔ̀ mú, ɓɛ́ ɓě kéɛ ɖaɓa, ɓɛ́ ɔ ké ɓěɛ̀ páɔ̀ kɔ̃ kpá.”

¹⁶ Ké Jòséɛ̀ xwéɖé-dù ɓěɔ̀ jǔ ma ɔ gɔ̃̌, ké wa ɖá, “Toɖo-ɓòɖòɔ̀ ɓíè dyí mìɔ ɓó à bìì, ké Kénà-nyɔ̀ ɓě cĩ́à ɖé à bɔɔ-kpà ɓěɔ̀ kɔ̃ɛɛ, waà hwíì-sǒ ɓěɔ̀ mɔ̀ nɛɛ̀-kpà nyɛ̀nɛ̀ɛ̀. Kénà-nyɔ̀ ɓěɔ̀ ɖíɛ́ ɓě cĩ́ ɖé Bɛ́sàùn-hwɔ̀ɖɔ̀ɔ̀ kè ɔ hwɔɖɔ-kpàǎ ɓěɔ̀ kɔ̃, ké ɖíɛ́ ɓě cĩ́ ɖé Jìzéɖéò Bɔɔ-kpàɔ̀ kɔ̃.”

¹⁷ Kɛɛ Jasúé cɛ̃ɛ ma wa gbo, ké ɔ ɖá, “Sepóɛɖé ɓě vò dyí, ké ɓě mɔ̀ gana-nyɔ̀ ɓě jèɛɛ, ḿ poà ɓě páɔ̀ kɔ̃ɛ̀.

¹⁸ Ḿ ɖǎ ɓě xwáɖá-kpòò nìà ɖé toɖo-ɓòɖòɔ̀ múɛɛ nyí. Ɓě mɛ ɖaɓaa séín, ɓɛ́ ɓě ké páɔ̀ dyí ɖú, ɓɛ́ ɔ ké ɓěɛ̀ kɔ̃̀ɔ̀-ɖɛ̀ jǔ. Ɓó kɔ̃in ɖeɛɛ, ɓě mu Kénà-nyɔ̀ ɓěɔ̀ ɓěɛ̀ páɔ̀ kɔ̃ dyi kúmúùn, kɛbì wa mɛ ku dyi, ɓɛ́ waà hwíì-sǒ ɓěɔ̀ ké nɛɛ̀-kpà jǔɛ.”