Jasúé 16 - Ɓǎsɔ́ɔ̀ Báɓòɔ̀

Pá ɓɛ́ Éézùɖùɛ̀-nyɔ̀ ɓěɔ̀ nyí ma Ífèɖèìn kè Mànásìɛ̀ xwéɖé-dù ɓěɔ̀ kɛ

¹ Pá ɓɛ́ Éézùɖùɛ̀-nyɔ̀ vɛ̀nɛ̀ ɓěɔ̀ nyí ma Jòséɛ̀ xwíníín-dyù ɓěɔ̀ kɛɛ dèìn ɖé ní-dù ɓě nì ɖé Jɛ́ɖèkóò-hwɔ̀ɖɔ̀ɔ̀ dyóɖó-xwáɖáún-wóɖóìn-naín, hwɔà ɖé Jɔ́nì-nìɔ̀ wĩín dyíɛɛ gbo gbɔ, ké ɔ mùìn ɖé gbǎùn-fúɖúá ɖò nì ɖé Jɛ́ɖèkóò-hwɔ̀ɖɔ̀ɔ̀ xwía kɛɛ kɔ̃, ké ɔ mùìn ɖé Kénà Toɖo-ɓòɖòɔ̀ mú tee, ké ɔ nyini ɖé Bɛ́fèò-hwɔ̀ɖɔ̀ɔ̀ wĩín.

² Sɔ̀ìn ɖé Bɛ́fèò-hwɔ̀ɖɔ̀ kɔ̃̀ nyɛ́nɛ́ ɖò mɔ̀ Ɖúzì kɛɛ wĩín nyɛɛ, bã̀àɔ̀ zĩ̀ìn ɖé Àtáwɔ̀ɖɔ̀-Áɖɔ̀-hwɔ̀ɖɔ̀ kɔ̃̀ mú Ákì-nyɔ̀ ɓěɔ̀ cĩ́ ma kɛ.

³ Ké ɔ mùìn ɖé Jáfèɖè-nyɔ̀ ɓěɔ̀ ɓóɖó hwɔ ɖé dyóɖó-dyi-kpáìn-naínɔ̀ dyíɛɛ mú, ké ɔ nyini ɖé Bɛ̀-Hówɔ̀nɔ̀-hwɔ̀ɖɔ̀ɔ̀ ɓíɖíi. Sɔ̀ìn ɖé Bɛ̀-Hówɔ̀nɔ̀-hwɔ̀ɖɔ̀ɔ̀ ɓíɖíiɛɛ, ɔ mùìn ɖé Gézɛ̀-hwɔ̀ɖɔ̀ɔ̀ mú, ké ɔ sèìn ɖé Mɛ́ɖɛ̀tɔ̀wéɖénìà-dyòǒɔ̀ wĩín.

⁴ Pá nìà kɛɛ, ɖéɛ̀ wa nyí ma Mànásì kè Ífèɖèìn mɔ̀à Jòséɛ̀ dyú-gàà ɓěɔ̀ kɛɛ xwéɖé-dù ɓěɔ̀, ɓɛ́ ɔ ké waà kɔ̃̀ɔ̀-ɖɛ̀ jǔ kánáá pū.

Ífèɖèìn xwéɖé-dùɔ̀ nììn pá

⁵ Pá ɓɛ́ wa nyí ma Ífèɖèìn xwéɖé-dùɔ̀ gbǒ-xwíníín ɓěɔ̀ kɛɛ kɛà kɛ̀. Ɔ sɔ̀ìn ɖé Àtáwɔ̀ɖɔ̀-Áɖɔ̀-hwɔ̀ɖɔ̀ nìà ɖé dyóɖó-xwáɖáún-wóɖóìn-naínɔ̀ kɛɛ mú, ké ɔ mùìn ɖé Bɛ̀-Hówɔ̀nɔ̀-hwɔ̀ɖɔ̀ɔ̀ xwía,

⁶ ké ɔ zĩ̀ìn ɖé Mɛ́ɖɛ̀tɔ̀wéɖénìà-dyòǒɔ̀ wĩín. Waà bã̀à nì ɖé waà páɔ̀ xwía kɛɛ sɔ̀ìn ɖé Mìmɛ́fà-hwɔ̀ɖɔ̀ɔ̀ mú, ké ɔ kíɖí, ké ɔ mùìn ɖé Táánɔ̀-Síɖò-hwɔ̀ɖɔ̀ nì ɖé dyóɖó-xwáɖáún-wóɖóìn-naínɔ̀ kɛɛ mú. Ké ɔ mu tee, ké ɔ nyini ɖé Jànóà-hwɔ̀ɖɔ̀ɔ̀ mú.

⁷ Sɔ̀ìn ɖé Jànóà-hwɔ̀ɖɔ̀ɔ̀ múɛɛ, ɔ mùìn ɖé ɓíɖíi ɖé Àtáwɔ̀ɖɔ̀-hwɔ̀ɖɔ̀ɔ̀ kè Nááwàɖà-hwɔ̀ɖɔ̀ɔ̀ mú. Ké ɔ zĩ̀ìn ɖé Jɛ́ɖèkóò-hwɔ̀ɖɔ̀ɔ̀ gbɔ, ké ɔ sèìn ɖé Jɔ́nì-nìɔ̀ wĩín.

⁸ Sɔ̀ìn ɖé Mìmɛ́fà-hwɔ̀ɖɔ̀ɔ̀ mú ɖeɛɛ, waà bã̀àɔ̀ zĩ̀ìn ɖé dyóɖó-dyi-kpáìn-naínɔ̀ ɖé Tàpúà-hwɔ̀ɖɔ̀ɔ̀ mú, ké ɔ mùìn ɖé Kánà-nìɔ̀ wĩín, ké ɔ sèìn ɖé Mɛ́ɖɛ̀tɔ̀wéɖénìà-dyòǒɔ̀ wĩín. Pá nìà kɛ mɔ̀ ma Ífèɖèìn nììn xwéɖé-dùɔ̀ gbǒ-xwíníín ɓěɔ̀ kɔ̃̀ɔ̀-ɖɛ̀ kánáá pū.

⁹ Ɓó kɔ̃in ɖeɛɛ, Éézùɖùɛ̀-nyɔ̀ vɛ̀nɛ̀ ɓěɔ̀ nyí ma Ífèɖèìn-nyɔ̀ ɓěɔ̀ hwɔɖɔ ɖíɛ́ ɓě kè waà hwɔɖɔ-kpàǎ ɓě nì ɖé Mànásì nììn páɔ̀ kɔ̃ɛ, ɓɛ́ wa ké waà kɔ̃̀ɔ̀-ɖɛ̀ jǔ ɖekè.

¹⁰ Kɛɛ Ífèɖèìn-nyɔ̀ ɓěɔ̀ se ma Kénà-nyɔ̀ ɓěɔ̀ ɖé Gézɛ̀-hwɔ̀ɖɔ̀ɔ̀ mú dyi kúmú. Ɔ jèɛɛ, Kénà-nyɔ̀ ɓěɔ̀ cĩ́ ɖé Ífèɖèìn-nyɔ̀ ɓěɔ̀ hwìɛ̀ ke ɓó zɛ̃̌ɛ̀, kɛɛ wa mɔ̀ pɔ́ɖɔ́sɔ́ ɓě ɓó Ífèɖèìn-nyɔ̀ ɓěɔ̀ bìì.