Jasúé 14 - Ɓǎsɔ́ɔ̀ Báɓòɔ̀

Ɓóɖó ɓě nì ɖé Jɔ́nì-nìɔ̀ dyóɖó-dyi-kpáìn-naínɔ̀ kɛɛ geìn-geìn

¹ Ti ɓɛ́ Éézùɖùɛ̀-nyɔ̀ ɓěɔ̀ ɖǎ ma Kénà-ɓòɖòɔ̀ toún ɖuɛɛ, Ɛ̀ɖɛ̀ázà ɓɛ́ ɔ mɔ̀ ma sáa-zà-nyɔ̀ vɛ̀nɛ̀ kɛ kè Jasúé ɔ kè Éézùɖùɛ̀ɛ̀ xwéɖé-dù ɓěɔ̀ gbǒ-xwíníín ɖò-ɖò ɓěɔ̀ nàìn-nyɔ̀ ɓě geìn ma Kénà-ɓòɖòɔ̀ Éézùɖùɛ̀ɛ̀ xwéɖé-dù ɓěɔ̀ múin, ɓɛ́ ɔ ké ma waà kɔ̃̀ɔ̀-ɖɛ̀ jǔ kánáá pū.

² Wa nyu ma gbo-ɖàɓàìn-ɖɛ̀, ɓɛ́ wa ké ma ɓóɖóɔ̀ wáká ɓɛ́ Éézùɖùɛ̀ɛ̀ xwéɖé-dù mɛ̀nɛ̌ìn-hĩinyɛ kè fáún-fáún ɓěɔ̀ ɖò-ɖò kɔ̃̀ ɔ ké dyéɛɛ dyí dyuò kà Bounɓoɔ̀ nyuɛ ma kà Mózè gbo cɛ̃ɛ kɛ.

^3-4 Ɔ nì ná kɛɛ, Mózè ɖǎ ma ɓóɖó ɓě nìà ɖé Jɔ́nì-nìɔ̀ dyóɖó-xwáɖáún-wóɖóìn-naínɔ̀ kɛɛ Éézùɖùɛ̀ɛ̀ xwéɖé-dù sɔ̃́ kè fáún-fáún ɓěɔ̀ múin geìn, kɛɛ ɔ se ma Ɖíìváà-nyɔ̀ ɓěɔ̀ pá ɖò nyí, ɓɛ́ ɔ ké ma waà kɔ̃̀ɔ̀-ɖɛ̀ jǔ. Kɛɛ ɔ sè ma wuɖui kà ɓɛ́ hwɔɖɔ ɓě ɓɛ́ Ɖíìváà-nyɔ̀ ɓěɔ̀ mu mú cĩ́ìn nyɛ kè nyúà-ɖɛ̀ dyi-ɖi-naín ɓě mu hwɔɖɔ ɓěɔ̀ ɖei nììn nyɛɛ mɔ̀ waà kɔ̃̀ɔ̀-ɖɛ̀ kɛ. Ɖíìváà-nyɔ̀ ɓěɔ̀ se ma pá ɖò kɔ̃̀ dyɛo, kɛɛ nyɔ ɓě ɓɛ́ nyɔ vɛ̀nɛ̀ ɓěɔ̀ geìn ma kà ɓóɖóɔ̀ múin nyɛɛ mɔ̀ ma xwéɖé-dù ɓaɖa-bùè sè sɔ̃́ wɛ̃́ɛ́, sepóɛɖé Jòséɛ̀ dyú-gàà sɔ̃́ mɔ̀à Mànásì kè Ífèɖèìn kɛɛ mɔ̀ ma xwéɖé-dù sɔ̃́.

⁵ Kà Bounɓoɔ̀ nyuɛ ma kà Mózè gbo cɛ̃ɛ kɛɛ, kǎà Éézùɖùɛ̀-nyɔ̀ ɓěɔ̀ nyu ma ɓóɖóɔ̀ geɛ̀n.

Jasúé nyí Kéɖɛ̀ Hɛ́bɔ̀nɔ̀-hwɔ̀ɖɔ̀ɔ̀

⁶ Ti ɓɛ́ Éézùɖùɛ̀-nyɔ̀ ɓěɔ̀ nì ma ɖé Gíógàò-hwɔ̀ɖɔ̀ɔ̀ gbɔ keɛɛ, Júɖà-nyɔ̀ ɖíɛ́ ɓě dyi ma Jasúé gbo. Wa ɖòɛ̀ nyɛ́nɛ́ mɔ̀ ma Kéɖɛ̀. Ɔ mɔ̀ ma Jɛ̀fúnɛ̀ɛ̀ dyú-gàà. Jɛ̀fúnɛ̀ mɔ̀ ma Kɛ́nà-nyɔ̀ ɖò. Ké Kéɖɛ̀ cɛ̃ɛ ma Jasúé gbo, ké ɔ ɖá, “M̀ dyuò ɖɛ ɓɛ́ Bounɓoɔ̀ cɛ̃ó zɔ̃̌ɔ̀ ɔ gbo-nì-nyɔ̀ Mózè gbo ɖé Káɖɛ̀-Bànéà-hwɔ̀ɖɔ̀ɔ̀ mú ɓá ḿ kè mɔ̀ dyíɛ.

⁷ Ɓó tia ɓaɖaa, ḿ nyuá ma zɔ̃ kpáɖá-nyɔ sɔ̃́. Ké Mózè ɖoɓoó zɔ̃̌ɔ̀ à nììn sɔ̀ìn ɖé Káɖɛ̀-Bànéà-hwɔ̀ɖɔ̀ɔ̀ mú, ɓɛ́ à kéó zɔ̃̌ɔ̀ ɓóɖóɛ̀ múin gmɔìn. Ti ɓɛ́ à kɔ́ìn zɔ̃̌ɔ̀ ɖeɛɛ, ḿ cɛ̃ zɔ̃̌ɔ̀ kà ḿ nyu ɖɛ ɓě dyéɛ kɛɛ jè Mózè gbo.

⁸ À mǔè ɓě ɓɛ́ à kè wa dyió kà kɛɛ nììn bɔ̃̌ ɓɛ́ wa kpaó zɔ̃̌ɔ̀ kɛɛ nyuɛ ké hwòɖǒ ɖò se zɔ̃̌ɔ̀ nyɔ ɓěɔ̀ xwíníín nì ɖe, kɛɛ mɔ́ún se zɔ̃̌ɔ̀ fã̀à ɖò peɖe. Ḿ dè zɔ̃̌ɔ̀ Bounɓo mɔ̀à ní Gèɖèpɔ́ɔ̀ kɛɛ hwòɖǒ kɔ̃ kóɖó-kóɖó.

⁹ Ɔ jèɛɛ, Mózè ɖi zɔ̃̌ɔ̀ wuɖu ɓó ḿ dyúa ɓó wéa ɓaɖa, ké ɔ ɖá, ‘Pá ɓɛ́ m̀ ɖǎà kɔ̃in nà ɖé Kénà-ɓòɖòɔ̀ múɛɛ mu m̀ kè nì xwíníín-dyù ɓěɛ̀ kɔ̃̀ɔ̀-ɖɛ̀ jǔùn kánáá pū, sepóɛɖé m̀ ɖǎ Bounɓo mɔ̀à ní Gèɖèpɔ́ɔ̀ kɛɛ kíɖíí sí hwòɖǒɛ̀-ɖé-hwɛ̀-kà.’

¹⁰ Ti ɓɛ́ Mózè cɛ̃ó zɔ̃̌ɔ̀ ɖɛ nìà kɛ ḿ gboɛɛ ɖǎ zɔ̃ kpáɖá-nyɔ sɔ̃́ sè hm̀m̌ zĩ̀ìn. Ké dyéɛ, ḿ nì cĩ́ɛń ke. Ḿ nyuá zɔ̃ kpáɖá-nyɔ hĩinyɛ sè hm̀m̌. Ti jĩ̀ kà ɓɛ́ à nyuà ɖé gbǎùn-fúɖúáɔ̀ kɔ̃ɛɛ, ḿ se mɛ́, sepóɛɖé Bounɓoɔ̀ kpá ḿ gbo kà ɔ nyuɛ ma kà Mózè gbo cɛ̃ɛ kɛɛ jè.

¹¹ Ḿ ku dyi ke ɓó zɛ̃̌ɛ̀ kà ḿ kuó zɔ̃̌ɔ̀ kà dyi ti ɓɛ́ Mózè ɖoɓoó zɔ̃̌ɔ̀ kà ḿ wɛ̃. Ké ḿ ɓɛ́ìn to vɔ̃ɔ ke ɓó zɛ̃̌ɛ̀ kà dyúáɖò kà ḿ ɓɛ́ìnǒ kà to vɔ̃ɔ ɓó tia ɓaɖaa.

¹² Ɔ jèɛɛ, nyí ḿ toɖo-ɓòɖò ɓɛ́ Bounɓoɔ̀ ɖáìnǒ zɔ̃̌ɔ̀ kà ḿ nyɛ́nɛ́ín ɓó wéa ɓaɖaa. M̀ mìɔùn wɔ̃́ɔ zɔ̃̌ɔ̀ kà Ánàkì-nyɔ̀ ɓě nì ɖé ɓóɖóɔ̀ múɛɛ cĩ́ ɖé toún-pèɖèìn-hwɔ̀ɖɔ̀ vɛ̀nɛ̀ ɓě múɛ. Kɛɛ Bounɓoɔ̀ dyi wɔ̃́ín, ní mu wa ɓóɖóɔ̀ kɔ̃in kúmúùn kà ɔ nyuɛ zɔ̃̌ɔ̀ kà cɛ̃ɛ kɛ.”

¹³ Ti ɓɛ́ Kéɖɛ̀ ɖǎ ma wùɖùɛ̀ hwɔɛɛ, Jasúé po ma ɔ mana kɔ̃, ké ɔ nyí ma ɔ Hɛ́bɔ̀nɔ̀-hwɔ̀ɖɔ̀ɔ̀, ɓɛ́ ɔ ké ɔ kɔ̃̀ɔ̀-ɖɛ̀ jǔ kánáá pū.

¹⁴ Ɔ jèɛɛ, sɔ̀ìn ɓó wéa gboɛɛ, Hɛ́bɔ̀nɔ̀-hwɔ̀ɖɔ̀ɔ̀ mɔ̀ ma Kéɖɛ̀ mɔ̀à Jɛ̀fúnɛ̀ mɔ̀à Kɛ́nà-nyɔ̀ɔ̀ kɛɛ dyú-gààɔ̀ kɛɛ kɔ̃̀ɔ̀-ɖɛ̀ kánáá pū, sepóɛɖé ɔ taɓa ma Bounɓo mɔ̀à Éézùɖùɛ̀ Gèɖèpɔ́ɔ̀ kɛɛ hwìɖǐǐ kóɖó-kóɖó jè.

¹⁵ Hwɛ̀ ɓɛ́ Kéɖɛ̀ ké ma Hɛ́bɔ̀nɔ̀-hwɔ̀ɖɔ̀ɔ̀ toún ɖuɛɛ, hwɔɖɔɔ̀ nyɛ́nɛ́ mɔ̀ ma Kíjà-Áɓà. Ɔ mùìn ma Áɓà ɓɛ́ ɔ mɔ̀ ma Ánàkì-nyɔ̀ ɓěɔ̀ nyɔ vɛ̀nɛ̀ kɛɛ nyɛ́nɛ́ín. Ɓó tia ɓaɖaa, to jè zi ma dyi ke ɖé Kénà-ɓòɖòɔ̀ kɔ̃.