Jasúé 13 - Ɓǎsɔ́ɔ̀ Báɓòɔ̀

Ɓóɖó tɔ̀ɔ̀ ɓě ɓɛ́ Éézùɖùɛ̀-nyɔ̀ ɓěɔ̀ ké toún ɖu keɛ

¹ Ti ɓɛ́ Jasúé ɖǎ ma nyɛ mìɔ kɛɛ, Bounɓoɔ̀ cɛ̃ɛ ma ɔ gbo, ké ɔ ɖá, “M̀ ɖǎ nyɛ mìɔ, ké ɓóɖó-dù ɓě sè ɓó, ɓɛ́ m̀ ké toún ɖuɛɛ vò dyí ke mìɔ.

^2-3 M̀ ɓéɖé ɓɛ́ m̀ ké Kénà-ɓòɖòɔ̀ wáká kɔ̃̀ kɔ̃ Féɖésìà-nyɔ̀ ɓěɔ̀ kè Gísù-nyɔ̀ ɓěɔ̀ cĩ́à kɛɛ toún ɖu ɖekè. Kénà-ɓòɖòɔ̀ wáká ɓɛ́ Féɖésìà-nyɔ̀ ɓěɔ̀ kè Gísù-nyɔ̀ ɓěɔ̀ cĩ́à kɔ̃ɛɛ sɔ̀ìn ɖé Síhɔ̀-nì ɓɛ́ ɔ nìà ɖé Íjè-ɓòɖòɔ̀ bã̀à, hwɔà ɖé dyóɖó-xwáɖáún-wóɖóìn-naínɔ̀ dyíɛɛ gbo, ké ɔ nyini ɖé xwía ɖé Ɛ́kɔ̀nɔ̀-hwɔ̀ɖɔ̀ɔ̀ bã̀àɔ̀ dyí. Ɖé ɓóɖó nìà kɛ múɛɛ, Féɖésìà-nyɔ̀ ɓěɔ̀ ɓéɖé ɖé hwɔɖɔ hm̀m̌, ké hwɔɖɔ hm̀m̌ ɓěɔ̀ ɓéɖé waà kã́á ɖò-ɖò. Hwɔɖɔ ɓěɔ̀ mɔ̀ Gázà kè Áɖò kè Àkéɖɔ̀ùn kè Gátì ɔ kè Ɛ́kɔ̀nɔ̀. Ké m̀ mɛ ɖu Ávà-nyɔ̀ ɓěɔ̀ toún ɖekè.

⁴ Ávà-nyɔ̀ ɓěɔ̀ cĩ́ ɖé ɓóɖóɔ̀ zɔ̃̌in ɖé wáká dyúáɖò kɔ̃̀ kɔ̃ ɓɛ́ Féɖésìà-nyɔ̀ ɓěɔ̀ kè Gísù-nyɔ̀ ɓěɔ̀ cĩ́à kɛ. Ké m̀ mɛ ɖu Kénà-ɓòɖòɔ̀ wáká hwɔà ɖé xwía dyíɛɛ toún ɖekè. Kénà-ɓòɖòɔ̀ wáká nìà kɛ sɔ̀ìn ɖé Mɛ̀áwàɖà-hwɔ̀ɖɔ̀ kɔ̃̀ mú ɓɛ́ Zíɖɔ̀ùn-nyɔ̀ ɓěɔ̀ cĩ́à kɛɛ gbo, ké ɔ nyini ɖé Áfè-hwɔ̀ɖɔ̀ hwɔà ɖé Ámɔ̀-ɓòɖòɔ̀ bã̀àɔ̀ dyíɛɛ mú.

⁵ Ké m̀ mɛ ɖu Géɓàò-nyɔ̀ ɓěɔ̀ kè Ɖɛ́ɓèɖɔ́ùn-ɓòɖò gàná hwɔà ɖé Géɓàò-hwɔ̀ɖɔ̀ɔ̀ dyóɖó-xwáɖáún-wóɖóìn-naínɔ̀ dyíɛɛ toún ɖekè. Ɖɛ́ɓèɖɔ́ùn-ɓòɖòɔ̀ sɔ̀ìn ɖé Béò-Gáà-hwɔ̀ɖɔ̀ ɓɛ́ ɔ nìà ɖé Hɛ́mɔ̀-tòɖòɔ̀ xwíɖíiɛɛ gbo, ké ɔ nyini ɖé Ɖíɓò-Hámà-hwɔ̀ɖɔ̀ɔ̀ mú.

⁶ Ké m̀ mɛ ɖu Zíɖɔ̀ùn-nyɔ̀ ɓě ɓɛ́ wa cĩ́à ɖé toɖo-ɓòɖò nìà ɓó Ɖɛ́ɓèɖɔ́ùn-tòɖò ɓěɔ̀ kè Mìwɛ́ɖɛ́fò-Máì-hwɔ̀ɖɔ̀ɔ̀ pṹa kɛɛ toún ɖekè. Ní muɛ nyuùn ɓɛ́ m̀ kè Éézùɖùɛ̀-dyù ɓěɔ̀ ké nyɔ séín ɓěɛ̀ toún ɖu. Ké m̀ mɛ geìn ɓóɖó ɓěɔ̀ Éézùɖùɛ̀-dyù ɓěɔ̀ múin wɛ̃́ɛ́, ɓɛ́ wa ké waà kɔ̃̀ɔ̀-ɖɛ̀ jǔ kánáá pū kà ḿ nyuɛ ma kà m̀ gbo cɛ̃ɛ kɛ.

⁷ Ɓó kàǔn wɛ̃ɛ, m̀ mɛ geìn ɓóɖó ɓěɔ̀ xwéɖé-dù ɓě séèà dyéɛɛ múin, ɓɛ́ wa ké wa nììn kɔ̃̀ɔ̀-ɖɛ̀ jǔ kánáá pū. Wa mɔ̀ xwéɖé-dù mɛ̀nɛ̌ìn-hĩinyɛ ɓěɔ̀ kè Mànásì nììn xwéɖé-dù fáún-fáún tɔ̀ɔ̀.”

Ɓóɖó ɓě nì ɖé Jɔ́nì-nìɔ̀ dyóɖó-xwáɖáún-wóɖóìn-naínɔ̀ kɛɛ geìn-geìn

⁸ Ɓó tia ɓaɖaa, Wuɖuɓíín nììn xwéɖé-dùɔ̀ kè Gáà nììn xwéɖé-dùɔ̀ ɔ kè Mànásì nììn xwéɖé-dù fáún-fáúnɔ̀ ɓéɖé ma wa nììn pá, sepóɛɖé Mózè mɔ̀à Bounɓoɔ̀ gbo-nì-nyɔ̀ɔ̀ kɛɛ geìn ma wa ɓóɖó ɓě nì ma ɖé Jɔ́nì-nìɔ̀ dyóɖó-xwáɖáún-wóɖóìn-naínɔ̀ kɛɛ múin kĩ́ín.

⁹ Ɓóɖó ɓě ɓɛ́ Mózè nyí ma kà Wuɖuɓíín nììn xwéɖé-dùɔ̀ kè Gáà nììn xwéɖé-dùɔ̀ ɔ kè Mànásì nììn xwéɖé-dù fáún-fáúnɔ̀ kɛɛ sɔ̀ìn ɖé Àwóɖóè-hwɔ̀ɖɔ̀ nìà ɖé Áánɔ̀-nìɔ̀ wĩín nyɛ kè hwɔɖɔ ɖò nì ɖé Áánɔ̀ Bɔɔ-kpàɔ̀ hwòɖǒǔn wɛ̃ɛ mú. Ké bɔɔ-kpà ɓɛ́ ɔ sɔ̀ìn ɖé Mɛ̀ɖéɓà-hwɔ̀ɖɔ̀ɔ̀ wĩín, ké ɔ nyini ɖé Díɓɔ̀ùn-hwɔ̀ɖɔ̀ɔ̀ wĩín nyɛɛ nì ɖé waà ɓóɖóɔ̀ mú.

¹⁰ Ké hwɔɖɔ séín ɓɛ́ Síhɔ̃̀ mɔ̀ ma kà Ámɔ̀-nyɔ̀ ɓěɔ̀ kã́á, ɓɛ́ ɔ cĩ́ ma kà ɖé Hɛ́ɓɔ̀ùn-hwɔ̀ɖɔ̀ɔ̀ múɛɛ kɔ̃̀ ma wuɖuíɛɛ nì waà ɓóɖóɔ̀ mú ɖekè. Hwɔɖɔ ɓě ɓɛ́ Síhɔ̃̀ kɔ̃̀ ma kà wuɖuíɛ kè Ámànà-ɓòɖòɔ̀ bã̀à nì dyúáɖò.

¹¹ Ké Gíɖèà-ɓòɖòɔ̀ kè Gísù-ɓòɖòɔ̀ kè Máákà-ɓòɖòɔ̀ kè Hɛ́mɔ̀-tòɖòɔ̀ ɔ kè Básàùn-ɓòɖòɔ̀ nì ɖé waà ɓóɖóɔ̀ mú ɖekè. Básàùn-ɓòɖòɔ̀ sèìn ɖé Sàɖékà-hwɔ̀ɖɔ̀ɔ̀ ɖeín.

¹² Ógì mɔ̀ ma Básàùn-ɓòɖòɔ̀ kã́á. Ɔ mɔ̀ ma Wɛ́ɖɛ́fà-nyɔ̀ ɓěɔ̀ xwéɖé wè sè ma ɓíɖíiɛɛ ɖò. Ɔ cĩ́ ma ɖé Àtáwòɖò-hwɔ̀ɖɔ̀ɔ̀ kè Ɛ̀dɛ́ɖɛ́ì-hwɔ̀ɖɔ̀ɔ̀ mú. Mózè kè Éézùɖùɛ̀-nyɔ̀ ɓěɔ̀ ɖu ma ɓóɖó séín ɓěɛ̀ toún, ké wa ɖáɓá ma ɓóɖó ɓěɔ̀ nyɔ ɓěɔ̀,

¹³ kɛɛ wa se ma Gísù-nyɔ̀ ɓěɔ̀ kè Máákà-nyɔ̀ ɓěɔ̀ ɖáɓáa hwɔ. Ɔ jèɛɛ, wa cĩ́ ɖé Éézùɖùɛ̀-nyɔ̀ ɓěɔ̀ hwìɛ̀ ke ɓó zɛ̃̌ɛ̀.

¹⁴ Kɛɛ ɓó tia ɓaɖaa, Ɖíìváà-nyɔ̀ ɓěɔ̀ se ma pá ɓěɔ̀ ɖò kɔ̃̀, sepóɛɖé Mózè se ma wa ɖò nyí. Ɔ nyuɛ ma náa, sepóɛɖé Bounɓo mɔ̀à Éézùɖùɛ̀ Gèɖèpɔ́ɔ̀ kɛɛ cɛ̃ɛ ma ɔ gbo, ké ɔ ɖá, “Ɖíìváà-nyɔ̀ ɓěɔ̀ nììn kɔ̃̀ɔ̀-ɖɛ̀ mu sáa-zàìn-ɖɛ̀ ɓě ɓɛ́ ɓě muà ḿ gbo dyàùn wɛ̃ɛ ɖò jǔùn.”

Pá ɓɛ́ Mózè nyí ma Wuɖuɓíín nììn xwéɖé-dùɔ̀ kɛ

¹⁵ Pá ɓɛ́ Mózè nyí ma kà Wuɖuɓíín nììn xwéɖé-dùɔ̀ gbǒ-xwíníín ɓěɔ̀ kɛɛ kɛà kɛ̀.

¹⁶ Wa nììn páɔ̀ sɔ̀ìn ɖé Àwóɖóè-hwɔ̀ɖɔ̀ nìà ɖé Áánɔ̀-nìɔ̀ wĩín nyɛ kè hwɔɖɔ nìà ɖé Áánɔ̀ Bɔɔ-kpàɔ̀ hwòɖǒǔn wɛ̃ɛ mú. Ké bɔɔ-kpà kɔ̃̀ kɔ̃ Mɛ̀ɖéɓà-hwɔ̀ɖɔ̀ɔ̀ nìà kɛɛ nì ɖé waà páɔ̀ mú ɖekè.

¹⁷ Hwɔɖɔ ɖíɛ́ ɓě nì ɖé bɔɔ-kpà dyúáɖòɛ̀ kɔ̃ɛɛ mɔ̀ Hɛ́ɓɔ̀ùn kè Díɓɔ̀ùn kè Bámɔ̀-Béò kè Bɛ̀-Béò-Méɔ̀ùn

¹⁸ kè Jáhàzì kè Kɛ̀ɖémɔ̀ kè Mèfáà

¹⁹ kè Kíjàtáìn kè Símà kè Zɛ́wɛ̀ɖɛ̀-Sáhà ɓɛ́ ɔ nì ɖé toɖo ɖò dya ɖé bɔɔ-kpàɔ̀ kɔ̃ɛ

²⁰ kè Bɛ̀-Píò ɔ kè Bɛ̀-Jɛ̀símɔ̀. Ké Pígà-tòɖòɔ̀ nì ɖé bɔɔ-kpàɔ̀ kɔ̃ ɖekè.

²¹ Hwɔɖɔ séín ɓě nìà ɖé bɔɔ-kpàɔ̀ kɔ̃ɛɛ nì ɖé Wuɖuɓíín nììn xwéɖé-dùɔ̀ páɔ̀ mú. Síhɔ̃̀ mɔ̀ ma kà Ámɔ̀-nyɔ̀ ɓěɔ̀ kã́á, ɓɛ́ ɔ cĩ́ ma kà ɖé Hɛ́ɓɔ̀ùn-hwɔ̀ɖɔ̀ɔ̀ múɛɛ kɔ̃̀ ma bɔɔ-kpà nìà kɛ wuɖuí. Mózè ɖu ma Síhɔ̃̀ kè Míɖìàùn-nyɔ̀ ɓěɔ̀ wuɖuí-kɔ̃̀-nyɔ̀ ɓě kɔ̃̀ nyɛ́nɛ́ mɔ̀ ma Ɛ́vì kè Wɛ́ɖɛ́kɛ̃̀ìn kè Zúɔ̀ kè Húɔ̀ ɔ kè Wɛ́ɖɛ́ɓà kɛɛ toún. Míɖìàùn-ɓòɖòɔ̀ nàìn-nyɔ̀ ɓěɛ̀ nì ma Síhɔ̃̀ xwíɖíi.

²² Mózè kè Éézùɖùɛ̀-nyɔ̀ ɓěɔ̀ ɖáɓá ma nyɔ séín ɓěɛ̀ gàsíà dyí, ké wa ɖáɓá ma Béɖàùn ɓɛ́ ɔ mɔ̀ ma Bɛ́òɛ̀ dyú-gàà, ké ɔ mɔ̀ ma sɛ̀ɛ̀-po-nyɔ̀ kɛɛ ɖekè.

²³ Wuɖuɓíín nììn xwéɖé-dùɔ̀ páɔ̀ bã̀à nì ɖé dyóɖó-dyi-kpáìn-naínɔ̀ kɛɛ mɔ̀ Jɔ́nì-nìɔ̀. Pá nìà kɛ kè hwɔɖɔ ɓě nì ɖé páɔ̀ múɛ ɔ kè waà hwɔɖɔ-kpàǎ ɓěɔ̀ mɔ̀ ma Wuɖuɓíín nììn xwéɖé-dùɔ̀ gbǒ-xwíníín ɓěɔ̀ kɔ̃̀ɔ̀-ɖɛ̀ kánáá pū.

Pá ɓɛ́ Mózè nyí ma Gáà nììn xwéɖé-dùɔ̀ kɛ

²⁴ Pá ɓɛ́ Mózè nyí ma kà Gáà nììn xwéɖé-dùɔ̀ gbǒ-xwíníín ɓěɔ̀ kɛɛ kɛà kɛ̀.

²⁵ Ámànà-ɓòɖòɔ̀ fáún-fáún kè Jázè-hwɔ̀ɖɔ̀ɔ̀ ɔ kè hwɔɖɔ séín ɓě nì ɖé Gíɖèà-ɓòɖòɔ̀ kɔ̃ɛɛ nì ɖé waà páɔ̀ mú. Waà páɔ̀ wáká nìà ɖé Ámànà-ɓòɖòɔ̀ kɔ̃ɛɛ nyini ɖé Àwóɖóè-hwɔ̀ɖɔ̀ ɓɛ́ ɔ nìà ɖé Wáɖáɓà-hwɔ̀ɖɔ̀ɔ̀ wĩín nyɛɛ mú. Ké Síhɔ̃̀ɛ̀ kã́á-ɓòɖòɔ̀ fáún-fáún tɔ̀ɔ̀ nì ɖé waà páɔ̀ mú.

^26-27 Síhɔ̃̀ɛ̀ kã́á-ɓòɖòɔ̀ fáún-fáún nìà ɖé waà páɔ̀ múɛɛ sɔ̀ìn ɖé Hɛ́ɓɔ̀ùn-hwɔ̀ɖɔ̀ɔ̀ wĩín, ké ɔ nyini ɖé Wáɖámàà-Mípà-hwɔ̀ɖɔ̀ɔ̀ kè Bɛ̀tónì-hwɔ̀ɖɔ̀ɔ̀ mú. Ké ɔ zi Máhànáì-hwɔ̀ɖɔ̀ɔ̀ dyíin, ké ɔ nyini ɖé Ɖòdíɓà-hwɔ̀ɖɔ̀ɔ̀ mú. Ké hwɔɖɔ ɓě nì ɖé Jɔ́nì Bɔɔ-kpàɔ̀ kɔ̃, ɓɛ́ Síhɔ̃̀ kɔ̃̀ ma wuɖuíɛɛ nì ɖé waà páɔ̀ mú ɖekè. Hwɔɖɔ ɓěɔ̀ mɔ̀ Bɛ̀-Háwɔ̀ɖɔ̀ùn kè Bɛ̀-Níwàɖà kè Súkò ɔ kè Záfɔ̀ùn. Waà páɔ̀ bã̀à nì ɖé dyóɖó-dyi-kpáìn-naínɔ̀ kɛɛ mɔ̀ Jɔ́nì-nìɔ̀, ké ɔ nyini ɖé Kìnɛ́wɛ̀ɖɛ̀ Dòùnɓìǎɔ̀ wĩín.

²⁸ Pá nìà kɛ kè hwɔɖɔ ɓě nì ɖé páɔ̀ múɛ ɔ kè waà hwɔɖɔ-kpàǎ ɓěɔ̀ mɔ̀ ma Gáà nììn xwéɖé-dùɔ̀ gbǒ-xwíníín ɓěɔ̀ kɔ̃̀ɔ̀-ɖɛ̀ kánáá pū.

Pá ɓɛ́ Mózè nyí ma Mànásì nììn xwéɖé-dù fáún-fáúnɔ̀ kɛ

²⁹ Pá ɓɛ́ Mózè nyí ma kà Mànásì nììn xwéɖé-dù fáún-fáúnɔ̀ gbǒ-xwíníín ɓěɔ̀ kɛɛ kɛà kɛ̀.

³⁰ Waà páɔ̀ bã̀à kɔ Máhànáì-hwɔ̀ɖɔ̀ɔ̀ dyí, ké Básàùn-ɓòɖò gàná ɓɛ́ Ógì kɔ̃̀ ma kà wuɖuíɛ kè hwɔɖɔ kpáɖá-nyɔ tã ɓɛ́ Jáwìɖì kɔ̃̀ ma wuɖuí ɖé Básàùn-ɓòɖòɔ̀ kɔ̃ɛɛ sè ma ɖé waà páɔ̀ mú.

³¹ Gíɖèà-ɓòɖòɔ̀ fáún-fáún kè Àtáwòɖò-hwɔ̀ɖɔ̀ɔ̀ kè Ɛ̀dɛ́ɖɛ́ì-hwɔ̀ɖɔ̀ɔ̀ nì ma ɖé Básàùn-ɓòɖòɔ̀ mú, ké Ógì cĩ́ ma ɖé Àtáwòɖò kè Ɛ̀dɛ́ɖɛ́ì-hwɔ̀ɖɔ̀ ɓěɔ̀ mú. Pá nìà kɛ mɔ̀ ma Mákì mɔ̀ ma Mànásìɛ̀ dyú-gàà kɛɛ nììn gbǒ-xwíníín ɓěɔ̀ fáún-fáún ɖòɛ̀ kɔ̃̀ɔ̀-ɖɛ̀ kánáá pū.

³² Kǎà Mózè nyu ma ɓóɖó ɓě hwɔà ɖé Jɔ́nì-nì kɔ̃̀ wĩín Jɛ́ɖèkóò-hwɔ̀ɖɔ̀ɔ̀ nìà kɛɛ dyóɖó-xwáɖáún-wóɖóìn-naínɔ̀ dyíɛɛ geɛ̀n, ti ɓɛ́ ɔ nì ma ɖé Móà Bɔɔ-kpàɔ̀ kɔ̃ɛ.

³³ Kɛɛ Mózè se ma Ɖíìváà-nyɔ̀ ɓěɔ̀ mɔ̀ùn pá ɖò nyí, sepóɛɖé Bounɓo mɔ̀à Éézùɖùɛ̀ Gèɖèpɔ́ɔ̀ kɛɛ cɛ̃ɛ ma ɔ gbo, ké ɔ ɖá, “Ɖíìváà-nyɔ̀ ɓěɔ̀ nììn kɔ̃̀ɔ̀-ɖɛ̀ mɔ̀ kpé ɓɛ́ ḿ nyíà wa, ɓɛ́ wa kéà ní sáa-zà-nyɔ̀ ɓě jǔɛ.”