Jasúé 12 - Ɓǎsɔ́ɔ̀ Báɓòɔ̀

Kã́á ɓě ɓɛ́ Mózè ɖu ma toún wɛ̃

¹ Hwɛ̀ ɓɛ́ Éézùɖùɛ̀-nyɔ̀ ɓěɔ̀ ké ma kà Jɔ́nì-nìɔ̀ péɖéɛɛ, wa kè Mózè ɖáɓá ma kã́á sɔ̃́ ɓě nì ma ɖé Jɔ́nì-nìɔ̀ dyóɖó-xwáɖáún-wóɖóìn-naínɔ̀ kɛ, ké wa ɖú ma waà ɓóɖó ɓěɔ̀ dyí. Ɓóɖó ɓěɔ̀ bã̀à sɔ̀ìn ma ɖé Áánɔ̀ Bɔɔ-kpàɔ̀ kɔ̃, ké ɔ nyini ma ɖé Hɛ́mɔ̀-tòɖòɔ̀ gbo. Ɓóɖó ɓě nìà kɛ nì ma ɖé Jɔ́nì-nìɔ̀ dyóɖó-xwáɖáún-wóɖóìn-naínɔ̀.

² Síhɔ̃̀ mɔ̀ ma kã́á sɔ̃́ ɓě ɓɛ́ wa ɖáɓá ma kà kɛɛ dyúáɖò. Ɔ mɔ̀ ma Ámɔ̀-nyɔ̀ ɓěɔ̀ kã́á, ké ɔ cĩ́ ma ɖé Hɛ́ɓɔ̀ùn-hwɔ̀ɖɔ̀ɔ̀ mú. Ɓóɖó ɓɛ́ ɔ kɔ̃̀ ma wuɖuíɛɛ mɔ̀ ma Gíɖèà-ɓòɖòɔ̀ fáún-fáún, ké ɔ sɔ̀ìn ma Áánɔ̀-nì kɔ̃̀ wĩín ɓɛ́ Àwóɖóè-hwɔ̀ɖɔ̀ɔ̀ nì ma kɛɛ gbo, ké ɔ nyini ma ɖé Jáɓò-nì ɓɛ́ ɔ nì ma ɖé Ámànà-ɓòɖòɔ̀ bã̀à dyíɛɛ wĩín.

³ Síhɔ̃̀ɛ̀ ɓóɖóɔ̀ bã̀à ɓɛ́ ɔ nì ma ɖé dyóɖó-dyi-kpáìn-naínɔ̀ kɛɛ mɔ̀ ma Jɔ́nì-nìɔ̀, ké bã̀àɔ̀ sɔ̀ìn ma ɖé Kìnɛ́wɛ̀ɖɛ̀ Dòùnɓìǎɔ̀ gbo, ké ɔ nyini ma ɖé Tɔ̃́ Dòùnɓìǎ nìà ɖé Àwáɖáɓà Bɔɔ-kpàɔ̀ kɔ̃ɛɛ wĩín. Bɛ̀-Jɛ̀símɔ̀-hwɔ̀ɖɔ̀ ɓɛ́ ɔ nì ma ɖé Tɔ̃́ Dòùnɓìǎɔ̀ dyóɖó-xwáɖáún-wóɖóìn-naínɔ̀ kɛɛ nì ma ɔ ɓóɖóɔ̀ mú, ké Pígà-tòɖòɔ̀ nì ma ɖé ɔ ɓóɖóɔ̀ zɔ̃̌in.

⁴ Ógì mɔ̀ ma kã́á sɔ̃́ ɓě ɓɛ́ wa ɖáɓá ma kà kɛɛ ɖò. Ógì ɓɛ́ ɔ mɔ̀ ma kà Wɛ́ɖɛ́fà-nyɔ̀ ɓěɔ̀ xwéɖé wè sè ma ɓíɖíiɛ ɖòɛɛ mɔ̀ ma Básàùn-ɓòɖòɔ̀ kã́á, ké ɔ cĩ́ ma ɖé Àtáwòɖò-hwɔ̀ɖɔ̀ɔ̀ kè Ɛ̀dɛ́ɖɛ́ì-hwɔ̀ɖɔ̀ɔ̀ mú.

⁵ Ɓóɖó ɓě ɓɛ́ ɔ kɔ̃̀ ma wuɖuíɛɛ mɔ̀ ma Básàùn-ɓòɖòɔ̀ ɔ kè Gíɖèà-ɓòɖòɔ̀ fáún-fáún. Hɛ́mɔ̀-tòɖòɔ̀ kè Sàɖékà-hwɔ̀ɖɔ̀ɔ̀ nì ma ɖé ɔ ɓóɖóɔ̀ mú. Ɔ ɓóɖóɔ̀ sɔ̀ìn ma ɖé Gísù-ɓòɖòɔ̀ kè Máákà-ɓòɖòɔ̀ bã̀à dyí, ké ɔ nyini ma ɖé Síhɔ̃̀ ɓɛ́ ɔ mɔ̀ ma kà Hɛ́ɓɔ̀ùn-hwɔ̀ɖɔ̀ɔ̀ kã́áɔ̀ kɛɛ ɓóɖóɔ̀ bã̀à dyí.

⁶ Mózè mɔ̀à Bounɓoɔ̀ gbo-nì-nyɔ̀ɔ̀ kɛ kè Éézùɖùɛ̀-nyɔ̀ ɓěɔ̀ ɖu ma kã́á sɔ̃́ ɓěɛ̀ toún, ké Mózè geìn ma waà ɓóɖó ɓěɔ̀ Wuɖuɓíín nììn xwéɖé-dùɔ̀ kè Gáà nììn xwéɖé-dùɔ̀ ɔ kè Mànásì nììn xwéɖé-dù fáún-fáúnɔ̀ múin, ɓɛ́ ɓóɖó ɓěɔ̀ ké waà kɔ̃̀ɔ̀-ɖɛ̀ jǔ kánáá pū.

Kã́á ɓě ɓɛ́ Jasúé ɖu ma toún wɛ̃

⁷ Ti ɓɛ́ Éézùɖùɛ̀-nyɔ̀ ɓěɔ̀ ɖǎ ma Jɔ́nì-nìɔ̀ péɖéɛɛ, wa kè Jasúé ɖu ma kã́á séín nì ma ɖé Jɔ́nì-nìɔ̀ dyóɖó-dyi-kpáìn-naínɔ̀ kɛɛ toún. Ɓóɖó ɓě ɓɛ́ kã́á ɓěɛ̀ kɔ̃̀ ma kà wuɖuíɛɛ bã̀à sɔ̀ìn ma ɖé Béò-Gáà-hwɔ̀ɖɔ̀ nìà ɖé Ɖɛ́ɓèɖɔ́ùn Bɔɔ-kpàɔ̀ kɔ̃ɛɛ mú, ké ɔ nyini ma ɖé Háɖɛ̀-tòɖò ɓɛ́ ɔ xwɛ̃́àìn Séì-ɓòɖòɔ̀ bũ̌in nyɛɛ gbo. Jasúé geìn ma waà ɓóɖó ɓěɔ̀ Éézùɖùɛ̀ɛ̀ xwéɖé-dù ɓěɔ̀ múin, ɓɛ́ ɓóɖó ɓěɔ̀ ké ma waà kɔ̃̀ɔ̀-ɖɛ̀ jǔ kánáá pū.

⁸ Ɓóɖó ɓě ɓɛ́ Jasúé geìn ma kà Éézùɖùɛ̀-nyɔ̀ ɓěɔ̀ múin nyɛɛ mɔ̀ Kénà Toɖo-ɓòɖòɔ̀ kè bɔɔ-ɓòɖò hwɔà ɖé Kénà Toɖo-ɓòɖòɔ̀ dyóɖó-dyi-kpáìn-naínɔ̀ dyíɛ kè Jɔ́nì Bɔɔ-kpàɔ̀ kè bɔɔ-ɓòɖò hwɔà ɖé Kénà Toɖo-ɓòɖòɔ̀ dyóɖó-xwáɖáún-wóɖóìn-naínɔ̀ dyíɛ kè Kénà Gbǎùn-fúɖúá-ɓòɖòɔ̀ ɔ kè Nɛ́gà-ɓòɖòɔ̀. Nyɔ ɓě ɓɛ́ wa cĩ́ ma ɖé ɓóɖó ɓěɛ̀ mú kĩ́ín nyɛɛ mɔ̀ ma Hítì-nyɔ̀ ɓěɔ̀ kè Ámɔ̀-nyɔ̀ ɓěɔ̀ kè Kénà-nyɔ̀ ɓěɔ̀ kè Pɛ́wìɖì-nyɔ̀ ɓěɔ̀ kè Hívì-nyɔ̀ ɓěɔ̀ ɔ kè Jɛ́ɓù-nyɔ̀ ɓěɔ̀.

⁹ Hwɔɖɔ ɓě kɔ̃̀ kã́á ɖò-ɖò ɓɛ́ Jasúé kè Éézùɖùɛ̀-nyɔ̀ ɓěɔ̀ ɖu ma kà toún wɛ̃ɛ kɛà kɛ̀: Jɛ́ɖèkóò kè Éà ɓɛ́ ɔ xwɛ̃́ìn ma kà Bɛ́fèò-hwɔ̀ɖɔ̀ɔ̀ bũ̌in nyɛ

¹⁰ kè Jùɖúsɛ̀ɖɛ̀ìn kè Hɛ́bɔ̀nɔ̀

¹¹ kè Jámù kè Ɖákì

¹² kè Ɛ́gɔ̀nɔ̀ kè Gézɛ̀

¹³ kè Déɓì kè Géɖɛ̀

¹⁴ kè Hɔ́mà kè Áwɔ̀ɖɔ̀

¹⁵ kè Ɖínà kè Àdúɖàùn

¹⁶ kè Màkéɖà kè Bɛ́fèò

¹⁷ kè Tàpúà kè Héfɛ̀

¹⁸ kè Áfè kè Ɖàsáwɔ̀nɔ̀

¹⁹ kè Máɖòùn kè Házɔ̀

²⁰ kè Sĩ́wɔ̀nɔ̀-Méwɔ̀ɖɔ̀ùn kè Áásàfì

²¹ kè Táánà kè Mɛ̀gíɖò

²² kè Kɛ́ɖɛ̀ kè Jòníà ɓɛ́ ɔ nì ma ɖé Kámɛ̀-tòɖòɔ̀ xwíɖíiɛ

²³ kè Dóɔ̀ ɓɛ́ ɔ nìà ɖé Mɛ́ɖɛ̀tɔ̀wéɖénìà-dyòǒɔ̀ wĩín nyɛ kè Gódyììn ɓɛ́ ɔ nì ma ɖé Gáɖàɖíì-ɓòɖòɔ̀ kɔ̃ɛ

²⁴ ɔ kè Tízà. Kã́á séín ɓɛ́ Jasúé kè Éézùɖùɛ̀-nyɔ̀ ɓěɔ̀ ɖu ma kà toún wɛ̃ɛ mɔ̀ ma kã́á kpáɖá-nyɔ ɓaɖa-bùè sè dyúáɖò.