Jasúé 11 - Ɓǎsɔ́ɔ̀ Báɓòɔ̀

Jasúé ɖu kã́á ɓě nì ɖé Kénà-ɓòɖòɔ̀ xwía kɛɛ toún

¹ Ɓó tia ɓaɖaa, Jáɓììn ɓɛ́ ɔ mɔ̀ ma Házɔ̀-hwɔ̀ɖɔ̀ɔ̀ kã́á kɛɛ wɔ̃́ɔ ma kà Éézùɖùɛ̀-nyɔ̀ ɓěɔ̀ ɖǎ ma Ámɔ̀-nyɔ̀ ɓěɔ̀ toún ɖuɛ. Ɔ jèɛɛ, ɔ ɖoɓo ma kíá, ɓɛ́ wa ké ma kã́á ɓě nì ma ɖé Kénà-ɓòɖòɔ̀ xwía kɛɛ ɖá, ɓɛ́ ɔ kè wa ké Éézùɖùɛ̀-nyɔ̀ ɓěɔ̀ gbo vɔ̃. Kã́á ɓě ɓɛ́ ɔ ɖá ma kà kɛɛ kɛà kɛ̀. Wa mɔ̀ Jóɓà ɓɛ́ ɔ mɔ̀ ma Máɖòùn-hwɔ̀ɖɔ̀ɔ̀ kã́á kɛ kè Sĩ́wɔ̀nɔ̀-hwɔ̀ɖɔ̀ɔ̀ kã́áɔ̀ kè Áásàfì-hwɔ̀ɖɔ̀ɔ̀ kã́áɔ̀

² kè kã́á ɓě ɓɛ́ wa cĩ́ ma ɖé Kénà Toɖo-ɓòɖòɔ̀ xwía kɛ kè kã́á ɓě ɓɛ́ wa cĩ́ ma ɖé Kìnɛ́wɛ̀ɖɛ̀ Dòùnɓìǎɔ̀ ɓíɖíi ɖé Jɔ́nì Bɔɔ-kpàɔ̀ kɔ̃ɛ kè kã́á ɓě ɓɛ́ wa cĩ́ ma ɖé Kénà Toɖo-ɓòɖòɔ̀ dyóɖó-dyi-kpáìn-naínɔ̀ kɛ kè kã́á ɓě ɓɛ́ wa cĩ́ ma ɖé Mɛ́ɖɛ̀tɔ̀wéɖénìà-dyòǒɔ̀ wĩin, hwɔà ɖé Dóɔ̀-hwɔ̀ɖɔ̀ɔ̀ wĩín dyíɛ

³ kè Kénà-nyɔ̀ ɓěɔ̀ kã́á ɓě ɓɛ́ wa cĩ́ ma ɖé Jɔ́nì-nìɔ̀ wĩin nyɛ kè kã́á ɓě ɓɛ́ wa cĩ́ ma ɖé Kénà Toɖo-ɓòɖòɔ̀ kɔ̃, ké wa kɔ̃̀ ma Ámɔ̀-nyɔ̀ ɓěɔ̀ kè Hítì-nyɔ̀ ɓěɔ̀ kè Pɛ́wìɖì-nyɔ̀ ɓěɔ̀ ɔ kè Jɛ́ɓù-nyɔ̀ ɓěɔ̀ wuɖuíɛ ɔ kè Hívì-nyɔ̀ ɓěɔ̀ kã́á ɓě ɓɛ́ wa cĩ́ ma ɖé Hɛ́mɔ̀-tòɖòɔ̀ xwíɖíi ɖé Mípà-ɓòɖòɔ̀ kɔ̃ɛ.

^4-5 Ké kã́á séín ɓěɛ̀ kè waà sójà séín ɓěɔ̀ poìn ma dyí, ɓɛ́ wa ké ma Éézùɖùɛ̀-nyɔ̀ ɓěɔ̀ gbo vɔ̃, ké wa nyànàìn ma waà jàɖàìn-gbò ɓě dyi ɖé Méwòɖòùn-nìɔ̀ wĩín. Wa vò ma dyí mìɔ, ké nyɔ ɖò se ma wa zɛɖɛɛ ɓɛ́ìn, ké wa ɓéɖé ma sǒ kè hwíì-sǒ pàɖǎ.

⁶ Ti ɓɛ́ Jasúé wɔ̃́ ma kã́á séín ɓěɛ̀ kè waà sójà ɓěɔ̀ jèɛɛ, Bounɓoɔ̀ cɛ̃ɛ ma ɔ gbo, ké ɔ ɖá, “Mɔ̀ǔn ɖá ɓɛ́ m̀ ké wa dyi fɛ̃̀ìn, sepóɛɖé ní muɛ nyuùn ɓɛ́ ɔ kéá gàɖàà ti nì kà nyuín, m̀ kè Éézùɖùɛ̀-nyɔ̀ ɓěɔ̀ ké wa séín ɖáɓáa hwɔ. Ɔ ɖǎ ná nìǐn, nìí, m̀ mɛ cɛ̃ waà sǒ ɓěɔ̀ ɓo-ɖeín-tɛ̃̀ìn ɓěɔ̀, ɓɛ́ m̀ ké waà hwíì-sǒ ɓěɔ̀ fɔ̃.”

⁷ Ɔ jèɛɛ, Jasúé kè ɔ sójà séín ɓěɔ̀ gèìn ma waà mú-nyɛ́-nyɔ̀ ɓěɔ̀ kɔ̃ún ɖé Méwòɖòùn-nìɔ̀ wĩín, ké wa ɖú ma wa gbo vɔ̃ kpàǐ.

⁸ Ké Bounɓoɔ̀ po ma wa Éézùɖùɛ̀-nyɔ̀ ɓěɔ̀ xwaún dyi. Ké Éézùɖùɛ̀-nyɔ̀ ɓěɔ̀ kpá ma wa kíɖíí, ké wa gã̀ ma wa ɖáɓáuń dyi tee, ké wa nyini ma ɖé Mìwɛ́ɖɛ́fò-Máì-hwɔ̀ɖɔ̀ɔ̀ kè Zíɖɔ̀ùn-hwɔ̀ɖɔ̀ vɛ̀nɛ̀ɔ̀ mú. Ké wa mùìn ma ɖé dyóɖó-xwáɖáún-wóɖóìn-naínɔ̀, ké wa nyini ma ɖé Mípà Bɔɔ-kpàɔ̀ kɔ̃. Wa ɖáɓá ma wa séín, ké nyɔ ɖò se ma ɓíɖíi sè fɔɔ.

⁹ Ké Jasúé nyu ma ɖɛ ɓɛ́ Bounɓoɔ̀ cɛ̃ ma kà ɔ gboɛɛ wa bũ̌. Ɔ cɛ̃ ma waà sǒ ɓěɔ̀ ɓo-ɖeín-tɛ̃̀ìn ɓěɔ̀, ké ɔ fɔ̃ ma waà hwíì-sǒ ɓěɔ̀.

¹⁰ Ti ɓɛ́ Jasúé kè ɔ sójà ɓěɔ̀ ɖǎ ma waà mú-nyɛ́-nyɔ̀ ɓěɔ̀ toún ɖuɛɛ, wa kɔ́ìn ma ɖe, ké wa mu ma, ké wa kpa ma Házɔ̀-hwɔ̀ɖɔ̀ɔ̀ to kɔ̃. Ké wa ɖáɓá ma Házɔ̀-hwɔ̀ɖɔ̀ɔ̀ kã́á ɓɛ́ ɔ mɔ̀ ma kà kã́á-ɓòɖò tɔ̀ɔ̀ ɓěɔ̀ nàìn-nyɔ̀ɔ̀ kɛɛ gàsíà dyí.

¹¹ Ké wa ɖáɓá ma hwɔɖɔɔ̀ nyɔ séín ɓěɔ̀ gàsíà dyí, ké nyɔ ɖò se ma ɓíɖíi sè. Ké wa fɔ̃ ma hwɔɖɔɔ̀.

¹² Ɓó tia ɓaɖaa, Jasúé kè ɔ sójà ɓěɔ̀ ɖú ma kã́á ɓěɔ̀ hwɔɖɔ séín ɓěɔ̀ dyí, ké wa ɖáɓá ma kã́á séín ɓěɔ̀ kè waà nyɔ ɓěɔ̀ gàsíà dyí kà Mózè mɔ̀à Bounɓoɔ̀ gbo-nì-nyɔ̀ɔ̀ kɛɛ nyuɛ ma kà cɛ̃ɛ kɛ.

¹³ Kɛɛ Jasúé kè Éézùɖùɛ̀-nyɔ̀ ɓěɔ̀ se ma hwɔɖɔ ɓě ɓɛ́ wa dè ma hwùɖùǎ kɔ̃ɛɛ ɖò fɔ̃, ɔ sèìn ma Házɔ̀-hwɔ̀ɖɔ̀ ɓɛ́ wa fɔ̃ ma kà kɛɛ ɖòùn.

¹⁴ Ké Éézùɖùɛ̀-nyɔ̀ ɓěɔ̀ zà ma hwu-ɖɛ̀ kúɖúú kè nyúà-ɖɛ̀ pàɖǎ hwɔɖɔ ɓěɔ̀ mú, ɓɛ́ wa ké ma waà kɔ̃̀ɔ̀-ɖɛ̀ ɓě jǔ. Kɛɛ wa ɖáɓá ma hwɔɖɔ ɓěɔ̀ nyɔ séín ɓěɔ̀ gàsíà dyí nyɛ̀nɛ̀ɛ̀, ké waà nyɔ dyúáɖò se ma ɓíɖíi sè.

¹⁵ Kǎà Jasúé nyu ma ɖɛ séín ɓɛ́ Bounɓoɔ̀ cɛ̃ ma kà Mózè gbo, ké Mózè cɛ̃ ma kà ɔ mɔ̀ùn gboɛɛ nyuɛ nyɛ̀nɛ̀ɛ̀. Ɔ se ma ɖɛ séín ɓɛ́ Bounɓoɔ̀ cɛ̃ ma kà Mózè gboɛɛ ɖò ɓíɖíi sè.

Ɓóɖó ɓě ɓɛ́ Jasúé ɖu ma toún wɛ̃

¹⁶ Jasúé kè ɔ sójà ɓěɔ̀ ɖu ma Kénà-ɓòɖò gànáɔ̀ toún. Wa ɖu ma Kénà Toɖo-ɓòɖòɔ̀ kè Nɛ́gà-ɓòɖòɔ̀ kè Gósɛ̃̀ìn-ɓòɖòɔ̀ kè bɔɔ-ɓòɖò hwɔ ma ɖé Kénà Toɖo-ɓòɖòɔ̀ dyóɖó-dyi-kpáìn-naínɔ̀ dyíɛ ɔ kè Jɔ́nì Bɔɔ-kpàɔ̀ toún.

^17-18 Ɓóɖóɔ̀ gbɛ̌ɛ̀ sɔ̀ìn ma ɖé Háɖɛ̀-tòɖò ɓɛ́ ɔ xwɛ̃́ìn ma Séì-ɓòɖòɔ̀ bũ̌in nyɛɛ gbo, ké ɔ nyini ma ɖé Béò-Gáà-hwɔ̀ɖɔ̀ ɓɛ́ ɔ nì ma ɖé Ɖɛ́ɓèɖɔ́ùn Bɔɔ-kpàɔ̀ kɔ̃, ké ɔ nì ma ɖé Hɛ́mɔ̀-tòɖòɔ̀ xwíɖíiɛɛ gbo. To nì ma kà Éézùɖùɛ̀-nyɔ̀ ɓěɔ̀ kè ɓóɖóɔ̀ kã́á ɓěɔ̀ pṹa kɛɛ ɖú ma ti tɔ̀mɔ̀ǔn-tɔ̀mɔ̀ǔn dyí dyɛo, kɛɛ Éézùɖùɛ̀-nyɔ̀ ɓěɔ̀ kpɔ̃ ma wa séín, ké wa ɖáɓá ma wa nyɛ̀nɛ̀ɛ̀.

¹⁹ Ké Éézùɖùɛ̀-nyɔ̀ ɓěɔ̀ ɖu ma ɓóɖóɔ̀ hwɔɖɔ séín ɓěɔ̀ toún, kɛɛ wa se ma Gíɓìɔ̀ùn-hwɔ̀ɖɔ̀ kɔ̃̀ mú ɓɛ́ Hívì-nyɔ̀ ɓěɔ̀ cĩ́ ma kà kɛɛ gbo vɔ̃, sepóɛɖé wa kè Gíɓìɔ̀ùn-nyɔ̀ ɓěɔ̀ ɖǎ ma wuɖu ɓíín po, ɓɛ́ wa ké ɓǎto jǔ jè.

²⁰ Ɓóɖóɔ̀ kã́á ɓěɔ̀ vɔ̃ ma Éézùɖùɛ̀-nyɔ̀ ɓěɔ̀ gbo, sepóɛɖé Bounɓoɔ̀ nyuɛ ké Éézùɖùɛ̀-nyɔ̀ ɓěɔ̀ gbo-vɔ̃-tò nyu ma kã́á ɓěɔ̀ xwéé. Ɔ nyuɛ ma náa, ɓɛ́ Éézùɖùɛ̀-nyɔ̀ ɓěɔ̀ ké ma wa kànàǎ-kà kpɔ̃, ɓɛ́ wa ké ma wa mú gbɔɔ̀ hwɔ nyɛ̀nɛ̀ɛ̀. Bounɓoɔ̀ cɛ̃ó zɔ̃̌ɔ̀ ɖɛ nìà kɛ Mózè gbo.

²¹ Ɓó tia ɓaɖaa, Jasúé kè ɔ sójà ɓěɔ̀ gbɔɔ̀ ma Ánàkì-nyɔ̀ ɓěɔ̀ kè waà hwɔɖɔ ɓěɔ̀ mú ɖekè. Ánàkì-nyɔ̀ ɓěɔ̀ cĩ́ ma ɖé Kénà Toɖo-ɓòɖòɔ̀ kɔ̃. Hwɔɖɔ ɖíɛ́ ɓě ɓɛ́ wa cĩ́ ma múɛɛ mɔ̀ ma Hɛ́bɔ̀nɔ̀ kè Déɓì ɔ kè Ánàɓì.

²² Éézùɖùɛ̀-nyɔ̀ ɓěɔ̀ ɖáɓá ma Ánàkì-nyɔ̀ séín nì ma ɖé ɓóɖóɔ̀ múɛɛ nyɛ̀nɛ̀ɛ̀, ɔ sèìn ma waà xwéɖé wè ɓɛ́ wa cĩ́ ma ɖé Gázà-hwɔ̀ɖɔ̀ɔ̀ kè Gátì-hwɔ̀ɖɔ̀ɔ̀ ɔ kè Áɖò-hwɔ̀ɖɔ̀ɔ̀ múɛɛ ɖòùn.

²³ Kǎà Jasúé ɖu ma ɓóɖó gànáɔ̀ toún kà Bounɓoɔ̀ nyuɛ ma kà Mózè gbo cɛ̃ɛ kɛ. Ké ɔ geìn ma ɓóɖóɔ̀ Éézùɖùɛ̀ɛ̀ xwéɖé-dù ɖò-ɖò ɓěɔ̀ múin, ɓɛ́ ɔ ké waà kɔ̃̀ɔ̀-ɖɛ̀ jǔ kánáá pū. Púɛɛ, to jè dè ma dyi ke ɖé ɓóɖóɔ̀ kɔ̃.