Jasúé 10 - Ɓǎsɔ́ɔ̀ Báɓòɔ̀

Éézùɖùɛ̀-nyɔ̀ ɓěɔ̀ ɖu Ámɔ̀-nyɔ̀ ɓěɔ̀ toún

¹ Ɓó tia ɓaɖaa, Àɖónì-Zɛ́ɖɛ̀ ɓɛ́ ɔ mɔ̀ ma Jùɖúsɛ̀ɖɛ̀ìn-hwɔ̀ɖɔ̀ɔ̀ kã́á kɛ kè ɔ nyɔ ɓěɔ̀ wɔ̃́ɔ ma kà Jasúé ɖu ma Éà-hwɔ̀ɖɔ̀ɔ̀ toún kà ɔ ɖu ma kà Jɛ́ɖèkóò-hwɔ̀ɖɔ̀ɔ̀ toún wɛ̃. Jasúé ɖáɓá ma Éà-hwɔ̀ɖɔ̀ɔ̀ kã́áɔ̀, ké ɔ wáɖá ma hwɔɖɔ gànáɔ̀. Ké wa wɔ̃́ɔ ma ɖe kà Gíɓìɔ̀ùn-nyɔ̀ ɓěɔ̀ kè Éézùɖùɛ̀-nyɔ̀ ɓěɔ̀ ɖǎ ma wuɖu ɓíín po, ɓɛ́ wa ké ɓǎto jǔ, ké wa nì ma ɖé Éézùɖùɛ̀-nyɔ̀ ɓěɔ̀ hwìɛ̀ cĩ́ɛń nyɛ.

² Ti ɓɛ́ Jùɖúsɛ̀ɖɛ̀ìn-nyɔ̀ ɓěɔ̀ wɔ̃́ ma ɖɛ ɓěɛ̀ kɛɛ, wa fɛ̃̀ìn ma mìɔ, sepóɛɖé Gíɓìɔ̀ùn-hwɔ̀ɖɔ̀ɔ̀ mɔ̀ ma hwɔɖɔ kpa ɖɛ ɖò kà hwɔɖɔ ɓě ɓéɖé ma kã́á kɛɛ nìà kɛ, ké ɔ ɓúá ma dyí ké ɔ zi Éà-hwɔ̀ɖɔ̀ɔ̀ dyí, ké ɔ gàa ɓěɔ̀ mɔ̀ ma gàa-zà-nyɔ̀ ɓě.

³ Ɔ jèɛɛ, Àɖónì-Zɛ́ɖɛ̀ cuò ma Hóhã̀ ɓɛ́ ɔ mɔ̀ ma Hɛ́bɔ̀nɔ̀-hwɔ̀ɖɔ̀ɔ̀ kã́á kɛ kè Píwàɖàùn ɓɛ́ ɔ mɔ̀ ma Jámù-hwɔ̀ɖɔ̀ɔ̀ kã́á kɛ kè Jàfíà ɓɛ́ ɔ mɔ̀ ma Ɖákì-hwɔ̀ɖɔ̀ɔ̀ kã́á kɛ ɔ kè Déɓì ɓɛ́ ɔ mɔ̀ ma Ɛ́gɔ̀nɔ̀-hwɔ̀ɖɔ̀ɔ̀ kã́á kɛɛ jè,

⁴ ké ɔ ɖá, “Gíɓìɔ̀ùn-nyɔ̀ ɓěɔ̀ kè Éézùɖùɛ̀-nyɔ̀ ɓěɔ̀ ɖǎ wuɖu ɓíín po, ɓɛ́ wa ké ɓǎto jǔ. Ɔ jèɛɛ, ɓě dyi, ɓɛ́ ɓě ké ḿ gbo kpá, ɓɛ́ ɓěà ké Gíɓìɔ̀ùn-nyɔ̀ ɓěɔ̀ gbo vɔ̃.”

⁵ Ké Jùɖúsɛ̀ɖɛ̀ìn-kã̀ǎɔ̀ kè Hɛ́bɔ̀nɔ̀-kã̀ǎɔ̀ kè Jámù-kã̀ǎɔ̀ kè Ɖákì-kã̀ǎɔ̀ kè Ɛ́gɔ̀nɔ̀-kã̀ǎɔ̀ ɔ kè waà sójà séín ɓěɔ̀ poìn ma dyí. Ké wa gbǎìn ma Gíɓìɔ̀ùn-hwɔ̀ɖɔ̀ɔ̀ wɔ̃, ké wa po ma Gíɓìɔ̀ùn-nyɔ̀ ɓěɔ̀ to kɔ̃. Kã́á hm̀m̌ ɓě nìà kɛ mɔ̀ ma Ámɔ̀-nyɔ̀ ɓěɔ̀ kã́á ɓě.

⁶ Ti ɓɛ́ Ámɔ̀-nyɔ̀ ɓěɔ̀ po ma Gíɓìɔ̀ùn-nyɔ̀ ɓěɔ̀ to kɔ̃ɛɛ, Gíɓìɔ̀ùn-nyɔ̀ ɓěɔ̀ tò ma wuɖu ɖé Jasúé gbo, ɖé jàɖàìn-hwɔ̀ɖɔ̀ ɓɛ́ ɔ nì ma kà ɖé Gíógàò-hwɔ̀ɖɔ̀ɔ̀ wĩín nyɛɛ mú, ké wa ɖá, “Ɓɔ̌ɔ̀, mɔ̀ǔn ɖá m̀ ké ɓó à dyi sè, kɛɛ m̀ mɛ dyi wàɖà, ɓɛ́ m̀ ké à póìn, sepóɛɖé Ámɔ̀-kã̀ǎ séín ɓě sɔ̀à ɖé Kénà Toɖo-ɓòɖòɔ̀ kɔ̃ɛɛ ɖǎ dyí poìn, ké wa ɖǎ à to kɔ̃ dyà.”

⁷ Ɔ jèɛɛ, Jasúé poìn ma ɔ gàa-zà-nyɔ̀ séín ɓěɔ̀ kè ɔ to-vɔ̃-nyɔ̀ tɔ̀ɔ̀ ɓěɔ̀ dyí, ké wa sɔ̀ ma ɖé waà jàɖàìn-hwɔ̀ɖɔ̀ nì ma kà ɖé Gíógàò-hwɔ̀ɖɔ̀ɔ̀ wĩín nyɛɛ mú.

⁸ Ké Bounɓoɔ̀ cɛ̃ɛ ma Jasúé gbo ɓó hwìèɔ̀ kɔ̃, ké ɔ ɖá, “M̀ mɛ ɓɔ́ Ámɔ̀-nyɔ̀ ɓěɔ̀ jè fã̀à peɖeɛ, sepóɛɖé ní mu wa m̀ xwaún dyi poùn, ké waà nyɔ dyúáɖò kpeé-kpeé se ɓó m̀ dyúa dyi nyànàà ɓɛ́ǐn mu.”

⁹ Ké Jasúé kè ɔ sójà ɓěɔ̀ nà ma ɓó máaún-hwùɖù gànáɔ̀ mú, ké wa gèìn ma Ámɔ̀-nyɔ̀ ɓěɔ̀ kɔ̃ún.

¹⁰ Púɛɛ, Bounɓoɔ̀ nyuɛ ké Ámɔ̀-nyɔ̀ ɓěɔ̀ kpá ma fã̀àǔn, ké wa gbǔ ma Éézùɖùɛ̀-nyɔ̀ ɓěɔ̀ dyúa. Ké Éézùɖùɛ̀-nyɔ̀ ɓěɔ̀ ɖáɓá ma wa pàɖǎ ɖé Gíɓìɔ̀ùn-hwɔ̀ɖɔ̀ɔ̀ ɖei. Ké Éézùɖùɛ̀-nyɔ̀ ɓěɔ̀ kpá ma wa kíɖíí ɖé hwìè sɔ̀à ɖé Bɛ̀-Hówɔ̀nɔ̀-hwɔ̀ɖɔ̀ɔ̀ mú, ɓɛ́ ɔ muà ɖé Àzékà-hwɔ̀ɖɔ̀ɔ̀ kè Màkéɖà-hwɔ̀ɖɔ̀ɔ̀ múɛɛ kɔ̃. Ké wa kpa ma wa ɖáɓáa tee.

¹¹ Ti ɓɛ́ Ámɔ̀-nyɔ̀ ɓěɔ̀ nì ma Éézùɖùɛ̀-nyɔ̀ ɓěɔ̀ dyúa gbǔɛń sɔ̀ìn ɖé Bɛ̀-Hówɔ̀nɔ̀-hwɔ̀ɖɔ̀ɔ̀ gbo, muà ɖé Àzékà-hwɔ̀ɖɔ̀ɔ̀ gboɛɛ, Bounɓoɔ̀ nyuɛ ké sɔ̃̀ɔ̀-kpò vɛ̀nɛ̀-vɛ̀nɛ̀ ɓě wáɖá ma Ámɔ̀-nyɔ̀ ɓěɔ̀ kɔ̃, ké sɔ̃̀ɔ̀-kpò ɓěɔ̀ ɖáɓá ma wa pàɖǎ ké ɔ zi waà nyɔ jĩ̀ kà ɓɛ́ Éézùɖùɛ̀-nyɔ̀ ɓěɔ̀ ɖáɓá ma gàsíà dyíɛɛ dyí.

¹² Wé kɔ̃̀ ɓaɖa ɓɛ́ Bounɓoɔ̀ po ma kà Ámɔ̀-nyɔ̀ ɓěɔ̀ Éézùɖùɛ̀-nyɔ̀ ɓěɔ̀ xwaún dyiɛɛ, Jasúé ɓaà ma ɓó Éézùɖùɛ̀-nyɔ̀ ɓěɔ̀ dyúa, ké ɔ ɖá, “Bounɓo, nyuɛ ɓɛ́ dyóɖóɔ̀ ké se daí sɔ̀ìn ɓó Gíɓìɔ̀ùn-hwɔ̀ɖɔ̀ɔ̀ kɔ̃in, ɓɛ́ dɛ̀nɛ̀ɔ̀ ké se daí sɔ̀ìn ɓó Àjáɖɔ̀ùn Bɔɔ-kpàɔ̀ kɔ̃in.”

¹³ Ɔ jèɛɛ, Bounɓoɔ̀ nyuɛ ké dyóɖóɔ̀ kè dɛ̀nɛ̀ɔ̀ se ma daí sɔ̀ìn tee, ké Éézùɖùɛ̀-nyɔ̀ ɓěɔ̀ hwɔ ma waà mú-nyɛ́-nyɔ̀ ɓěɔ̀ toún ɖuɛ hwɛ̀. Ɖɛ ɓě nìà kɛ céè ɖé Jásà-cèè-ɖɛ̀ɔ̀ mú. Dyóɖóɔ̀ se ma daí sɔ̀ìn. Ɔ dè ma dú-hwìɛ̀ tee, ké wé gàná ɖò zi ma hwɛ̀.

¹⁴ Bounɓoɔ̀ séè kàa ná nyɔ ɖòɛ̀ ɓaà-wùɖù gɔ̃̌ jǔ ɖò kĩ́ín, ké sɔ̀ìn ɓó wé nìà kɛ gboɛɛ, ɔ séè ná ɓaà-wùɖù gɔ̃̌ jǔ ɖò ɖe. Bounɓoɔ̀ mɔ̀ nyɔ nì ma Éézùɖùɛ̀-nyɔ̀ ɓěɔ̀ bìì vɔ̃uń jǎà.

¹⁵ Ti ɓɛ́ Jasúé kè Éézùɖùɛ̀-nyɔ̀ ɓěɔ̀ ɖǎ ma Ámɔ̀-nyɔ̀ ɓěɔ̀ toún ɖuɛɛ, wa mu ma ɖé waà jàɖàìn-hwɔ̀ɖɔ̀ɔ̀ mú ɖe ɖé Gíógàò-hwɔ̀ɖɔ̀ɔ̀ wĩín.

Jasúé ɖáɓá Ámɔ̀-nyɔ̀ ɓěɔ̀ kã́á hm̀m̌ ɓěɔ̀

¹⁶ Ti ɓɛ́ Éézùɖùɛ̀-nyɔ̀ ɓěɔ̀ kè Ámɔ̀-nyɔ̀ ɓěɔ̀ nì ma toɔ̀ vɔ̃uń wɛ̃ɛ, Ámɔ̀-kã̀ǎ hm̀m̌ ɓěɔ̀ kpá ma xwáɖáún, ké wa vǐè ma ɖé wɔ-ɓì ɖò nì ma ɖé Màkéɖà-hwɔ̀ɖɔ̀ɔ̀ ɖeín nyɛɛ mú.

¹⁷ Ti wa nì ma ɖé wɔ-ɓìɔ̀ mú pauń wɛ̃ɛ, nyɔ ɖò dyé ma wa, ké ɔ cɛ̃ ma dɛ̀ wa vǐè kà kɛɛ jè Jasúé gbo.

¹⁸ Ɔ jèɛɛ, Jasúé cɛ̃ɛ ma ɔ gàa ɓěɔ̀ gbo, ké ɔ ɖá, “Ɓě kiɖiò sɔ́ɔ́-kpò vɛ̀nɛ̀ ɓě, ɓɛ́ ɓě ké wa ɓó ɓíɔ̀ wĩín jìɖǐ, ɓɛ́ ɓě ké gàa ɖíɛ́ ɓě ɓó sè, ɓɛ́ wa ké ɓíɔ̀ dyí gmɔ̀.

¹⁹ Kɛɛ ɓěǐn ɖá ɓɛ́ ɓě ké ɓo dɔ̀. Ɓě mɛ kpá ɓěà mú-nyɛ́-nyɔ̀ ɓěɔ̀ kíɖíí, ɓɛ́ ɓě ké wa ɖáɓá, wa ní kɔ̃̀ ɖà waà hwɔɖɔ ɓéɖé gmɔ ɓěɔ̀ mú dyá ɖe. Bounɓo mɔ̀à ɓěà Gèɖèpɔ́ɔ̀ kɛɛ ɖǎ wa ɓěà xwaún dyi po.”

²⁰ Ké Jasúé kè Éézùɖùɛ̀-nyɔ̀ ɓěɔ̀ ɖáɓá ma Ámɔ̀-nyɔ̀ ɓěɔ̀, ké ɔ sè ɖɛ tííwè ɓɛ́ wa ké Ámɔ̀-nyɔ̀ ɓěɔ̀ ɖáɓáa hwɔ. Ámɔ̀-nyɔ̀ ɓěɔ̀ ɖíɛ́ ɓě dyá ma waà hwɔɖɔ ɓéɖé gmɔ ɓěɔ̀ mú.

²¹ Hwɛ̀ ké Éézùɖùɛ̀-sòjà séín ɓěɔ̀ kɔ́ìn ma ɖe ɖé Jasúé gbo, ɖé waà jàɖàìn-hwɔ̀ɖɔ̀ nì ma ɖé Màkéɖà-hwɔ̀ɖɔ̀ɔ̀ wĩín nyɛɛ mú. Sɔ̀ìn ɓó to nìà kɛ gboɛɛ, nyɔ ɓě nì ma ɖé ɓóɖóɔ̀ kɔ̃ɛɛ ɖò se ma wɔ̃ ɓáà ɓɛ́ìn, ɓɛ́ wa ké ma ɖɛ ɖò Éézùɖùɛ̀-nyɔ̀ ɓěɔ̀ kɔ̃ún cɛ̃.

²² Ti ɓɛ́ Éézùɖùɛ̀-sòjà ɓěɔ̀ ɖǎ ma ɖé Jasúé gbo ɖe dyiɛɛ, ɔ cɛ̃ɛ ma wa gbo, ké ɔ ɖá, “Ɓě mu, ɓɛ́ ɓě ké wɔ-ɓìɔ̀ kaà, ɓɛ́ ɓě ké kã́á hm̀m̌ ɓěɔ̀ nɔ̄ ḿ gbo dyà.”

²³ Ké wa dyà ma Jùɖúsɛ̀ɖɛ̀ìn-kã̀ǎɔ̀ kè Hɛ́bɔ̀nɔ̀-kã̀ǎɔ̀ kè Jámù-kã̀ǎɔ̀ kè Ɖákì-kã̀ǎɔ̀ ɔ kè Ɛ́gɔ̀nɔ̀-kã̀ǎɔ̀ Jasúé gbo.

²⁴ Ti ɓɛ́ wa ɖǎ ma kã́á ɓěɛ̀ ɓó Jasúé dyúa dyà kɛɛ, ɔ poìn ma Éézùɖùɛ̀-sòjà séín ɓěɔ̀ dyí, ké ɔ cɛ̃ɛ ma sójà-nàìn-nyɔ̀ ɓě ɓɛ́ wa kè ɔ mu ma kà toɔ̀ gboɛɛ gbo, ké ɔ ɖá, “Ɓě dyi, ɓɛ́ ɓě ké kã́á hm̀m̌ ɓěɛ̀ bùnù kɔ̃ sí.” Ké wa dyi ma, ké wa sí ma kã́á ɓěɔ̀ bùnù ɓěɔ̀ kɔ̃.

²⁵ Ké Jasúé cɛ̃ɛ ma sójà-nàìn-nyɔ̀ ɓěɔ̀ gbo, ké ɔ ɖá, “Ɓě mɛ ɓɔ́ fɛ̃̀ìn, ké ɓěɛ̀ hwòɖǒ mɛ ɓɔ́ ɖé ɖei kpáa. Ɓě mɛ ku dyi, ɓɛ́ ɓě ké hwòɖǒ ku, sepóɛɖé kǎà Bounɓoɔ̀ mu ɓěɛ̀ mú-nyɛ́-nyɔ̀ séín ɓě ɓɛ́ ɓě muà gbo vɔ̃ùn wɛ̃ɛ nyuùn.”

²⁶ Hwɛ̀ ké Jasúé ɖáɓá ma kã́á hm̀m̌ ɓěɔ̀, ké ɔ ɓá ma waà xwɛ́ ɓěɔ̀ cu hm̀m̌ ɓě dyai. Ké waà xwɛ́ ɓěɔ̀ gã̀ ma ɓó dyií dyi tee, ké dyóɖó zi ma.

²⁷ Ti ɓɛ́ dyóɖó ɖǎ ma dyi kpáa, Jasúé cɛ̃ɛ ma, ké wa zà ma xwɛ́ ɓěɔ̀ cu ɓěɔ̀ dya. Ké wa po ma xwɛ́ ɓěɔ̀ ɖé wɔ-ɓì kɔ̃̀ mú kã́á ɓěɔ̀ vǐè ma kà kɛ. Ké wa jìɖǐ ma sɔ́ɔ́-kpò vɛ̀nɛ̀ ɓě ɓó ɓíɔ̀ wĩín, ké ɓóɛ̀ sɔ́ɔ́-kpò ɓěɔ̀ nì ke ɓó zɛ̃̌ɛ̀.

Jasúé ɖu Ámɔ̀-nyɔ̀ ɓěɔ̀ hwɔɖɔ ɓěɔ̀ toún

²⁸ Ɓó wé dyúáɖòɔ̀ ɓaɖaa, Jasúé kè ɔ sójà ɓěɔ̀ vɔ̃ ma Màkéɖà-hwɔ̀ɖɔ̀ɔ̀ gbo. Ké wa ɖáɓá ma hwɔɖɔɔ̀ nyɔ séín ɓěɔ̀ kè waà kã́áɔ̀ gàsíà dyí. Wa se ma nyɔ ɖò ɓíɖíi sè fɔɔ. Wa nyu ma Màkéɖà-hwɔ̀ɖɔ̀ɔ̀ kã́áɔ̀ kà wa nyu ma kà Jɛ́ɖèkóò-hwɔ̀ɖɔ̀ɔ̀ kã́áɔ̀ nyuɛ kɛ.

²⁹ Ti ɓɛ́ Jasúé kè Éézùɖùɛ̀-sòjà séín ɓěɔ̀ ɖǎ ma Màkéɖà-hwɔ̀ɖɔ̀ɔ̀ toún ɖuɛɛ, wa kpa ma Ɖínà-hwɔ̀ɖɔ̀ɔ̀ to kɔ̃.

³⁰ Ké Bounɓoɔ̀ po ma Ɖínà-hwɔ̀ɖɔ̀ɔ̀ kè ɔ kã́áɔ̀ wa xwaún dyi ɖekè. Ké wa ɖáɓá ma nyɔ séín nì ma ɖé hwɔɖɔɔ̀ múɛɛ gàsíà dyí. Wa se ma nyɔ ɖò ɓíɖíi sè fɔɔ. Wa nyu ma Ɖínà-hwɔ̀ɖɔ̀ɔ̀ kã́áɔ̀ kà wa nyu ma kà Jɛ́ɖèkóò-hwɔ̀ɖɔ̀ɔ̀ kã́áɔ̀ nyuɛ kɛ.

³¹ Ké ti ɓɛ́ wa ɖǎ ma Ɖínà-hwɔ̀ɖɔ̀ɔ̀ toún ɖuɛɛ, wa gbǎìn ma Ɖákì-hwɔ̀ɖɔ̀ɔ̀ wɔ̃, ké wa po ma hwɔɖɔɔ̀ to kɔ̃.

³² Ké Bounɓoɔ̀ po ma Ɖákì-hwɔ̀ɖɔ̀ɔ̀ Éézùɖùɛ̀-nyɔ̀ ɓěɔ̀ xwaún dyi. Ké wa ɖu ma hwɔɖɔɔ̀ toún ɓó wéɔ̀ sɔ̃́ nììnɔ̀ ɓaɖa. Ké wa ɖáɓá ma hwɔɖɔɔ̀ nyɔ séín ɓěɔ̀ gàsíà dyí kà wa nyu ma kà Ɖínà-hwɔ̀ɖɔ̀ɔ̀ nyuɛ kɛ.

³³ Ɓó tia ɓaɖaa, Hówàɖàùn ɓɛ́ ɔ mɔ̀ ma Gézɛ̀-hwɔ̀ɖɔ̀ɔ̀ kã́á kɛɛ dyi ma, ɓɛ́ ɔ ké ma Ɖákì-hwɔ̀ɖɔ̀ɔ̀ nyɔ ɓěɔ̀ gbo kpá. Kɛɛ Jasúé kè ɔ sójà ɓěɔ̀ ɖu ma Kã́á Hówàɖàùn kè ɔ sójà ɓěɔ̀ toún, ké wa ɖáɓá ma wa séín nyɛ̀nɛ̀ɛ̀.

³⁴ Ti ɓɛ́ wa ɖǎ ma Ɖákì-hwɔ̀ɖɔ̀ɔ̀ toún ɖuɛɛ, wa gbǎìn ma Ɛ́gɔ̀nɔ̀-hwɔ̀ɖɔ̀ɔ̀ wɔ̃ ɖekè, ké wa po ma hwɔɖɔɔ̀ to kɔ̃.

³⁵ Ké wa ɖu ma hwɔɖɔɔ̀ toún ɓó wé dyúáɖòɔ̀ mú, ké wa ɖáɓá ma hwɔɖɔɔ̀ nyɔ séín ɓěɔ̀ gàsíà dyí kà wa nyu ma kà Ɖákì-hwɔ̀ɖɔ̀ɔ̀ nyuɛ kɛ.

³⁶ Ti ɓɛ́ wa ɖǎ ma Ɛ́gɔ̀nɔ̀-hwɔ̀ɖɔ̀ɔ̀ toún ɖuɛɛ, wa kpa ma Hɛ́bɔ̀nɔ̀-hwɔ̀ɖɔ̀ɔ̀ to kɔ̃ ɖekè,

³⁷ ké wa ɖu ma hwɔɖɔɔ̀ toún. Ké wa ɖáɓá ma hwɔɖɔɔ̀ kã́áɔ̀ kèɛ̀ nyɔ séín ɓěɔ̀ ɔ kè nyɔ séín nì ma hwɔɖɔ-kpàǎ ɓě nì ma Hɛ́bɔ̀nɔ̀-hwɔ̀ɖɔ̀ɔ̀ ɖeiɛ múɛɛ gàsíà dyí. Wa se ma nyɔ ɖò ɓíɖíi sè fɔɔ. Wa wáɖá ma hwɔɖɔ gànáɔ̀, ké wa ɖáɓá hwɔɖɔɔ̀ nyɔ séín ɓěɔ̀ kà wa nyu ma kà Ɛ́gɔ̀nɔ̀-hwɔ̀ɖɔ̀ɔ̀ nyuɛ kɛ.

³⁸ Ké ti ɓɛ́ wa ɖǎ ma Hɛ́bɔ̀nɔ̀-hwɔ̀ɖɔ̀ɔ̀ toún ɖuɛɛ, wa kɔ́ìn ma ɖe, ké wa mu ma, ké wa po ma Déɓì-hwɔ̀ɖɔ̀ɔ̀ to kɔ̃.

³⁹ Ké wa ɖu ma hwɔɖɔɔ̀ toún, ké wa ɖáɓá ma hwɔɖɔɔ̀ kã́áɔ̀ kèɛ̀ nyɔ séín ɓěɔ̀ ɔ kè nyɔ séín nì ma hwɔɖɔ-kpàǎ ɓě nì ma Déɓì-hwɔ̀ɖɔ̀ɔ̀ ɖeiɛ múɛɛ gàsíà dyí. Wa se ma nyɔ ɖò ɓíɖíi sè fɔɔ. Wa nyu ma Déɓì-hwɔ̀ɖɔ̀ɔ̀ kè ɔ kã́áɔ̀ kà wa nyu ma kà Ɖínà-hwɔ̀ɖɔ̀ɔ̀ kè ɔ kã́áɔ̀ ɔ kè Hɛ́bɔ̀nɔ̀-hwɔ̀ɖɔ̀ɔ̀ nyuɛ kɛ.

⁴⁰ Kǎà Jasúé kè ɔ sójà ɓěɔ̀ nyu ma ɓóɖó séín nì ma ɖé Kénà-ɓòɖòɔ̀ zɔ̃̌in nyɛɛ toún ɖuɛ. Ɓóɖó ɓěɔ̀ mɔ̀ ma Kénà Toɖo-ɓòɖòɔ̀ kè Nɛ́gà-ɓòɖòɔ̀ kè bɔɔ-ɓòɖò hwɔ ma ɖé toɖo-ɓòɖòɔ̀ dyóɖó-dyi-kpáìn-naínɔ̀ dyíɛ ɔ kè bɔɔ-ɓòɖò hwɔ ma ɖé toɖo-ɓòɖòɔ̀ dyóɖó-xwáɖáún-wóɖóìn-naínɔ̀ dyíɛ. Wa ɖáɓá ma nyɔ séín ɓě nì ma ɖé ɓóɖó ɓěɛ̀ kɔ̃ɛ kè waà kã́á séín ɓěɔ̀ nyɛ̀nɛ̀ɛ̀. Wa se ma nyɔ ɖò ɓíɖíi sè. Wa ɖáɓá ma nyɔ séín ɓěɔ̀ kà Bounɓo mɔ̀à Éézùɖùɛ̀ Gèɖèpɔ́ɔ̀ kɛɛ nyuɛ ma kà wa gbo cɛ̃ɛ kɛ.

⁴¹ Jasúé kè ɔ sójà ɓěɔ̀ ɖu ma nyɔ ɓěɔ̀ toún sɔ̀ìn ɖé Káɖɛ̀-Bànéà-hwɔ̀ɖɔ̀ nì ma ɖé Kénà-ɓòɖòɔ̀ zɔ̃̌in nyɛɛ wĩín, ɓɛ́ ɔ kéà ɖé Gázà-hwɔ̀ɖɔ̀ɔ̀ wĩín nyiniɛ, ké wa ɖu ma wa toún sɔ̀ìn ɖé Gósɛ̃̀ìn-hwɔ̀ɖɔ̀ɔ̀ wĩín, ɓɛ́ ɔ kéà ɖé Gíɓìɔ̀ùn-hwɔ̀ɖɔ̀ɔ̀ wĩín nyiniɛ.

⁴² Ɓó ti xwã́ún-xwã́ún nìà kɛ múɛɛ, Jasúé kè ɔ sójà ɓěɔ̀ ɖu ma kã́á séín ɓěɛ̀ kè waà nyɔ ɓěɔ̀ toún, sepóɛɖé Bounɓo mɔ̀à Éézùɖùɛ̀ Gèɖèpɔ́ɔ̀ kɛɛ vɔ̃ ma wa bìì jè.

⁴³ Ti ɓɛ́ Jasúé kè Éézùɖùɛ̀-sòjà séín ɓěɔ̀ ɖǎ ma Ámɔ̀-nyɔ̀ ɓěɔ̀ toún ɖuɛ hwɔɛɛ, wa kɔ́ìn ma ɖe ɖé waà jàɖàìn-hwɔ̀ɖɔ̀ nì ma kà ɖé Gíɓìɔ̀ùn-hwɔ̀ɖɔ̀ɔ̀ wĩín nyɛɛ mú.