Ìzíkìò 7 - Ɓǎsɔ́ɔ̀ Báɓòɔ̀

Éézùɖùɛ̀-ɓòɖòɔ̀ mánáín-hwɛ̀-tìɔ̀ ɖǎ dyi xwɛ̃́ìn

¹ Hwɛ̀ ké Bounɓoɔ̀ wùɖù ma ḿ gbo ɖe, ké ɔ ɖá,

² “Gǎ-dyù, ɖɛ mɔ̄ Bounɓo Ɖɛɓíɔ́ cɛ̃ Éézùɖùɛ̀-ɓòɖòɔ̀ gboɛɛ, ɔ kɛà kɛ̀. Ḿ ɖá, ‘Mánáín-hwɛ̀-tì! Éézùɖùɛ̀-ɓòɖò gànáɔ̀ mánáín-hwɛ̀-tìɔ̀ ɖǎ ɓó nyini.

³ “ ‘Éézùɖùɛ̀-dyù ɓě, ɓěɛ̀ mánáín-hwɛ̀-tìɔ̀ ɖǎ ɓó nyini. Ní muá ní dyoɖoɔ̀ ɓě kɔ̃ púèìn. Kà ɓěɛ̀ kpeɖe ɓěɔ̀ nyu nìɛ̀ kɛɛ, kǎà ní mu ɓěɛ̀ zaa wɔ̃ poɛ nyuùn. Ní mu ɓě gǎ kɔ̃ tòùn ɓó ɓěɛ̀ nyuu-ɖɛ̀ ɓě ɓɛ́ wa nyàìn kà ḿ dyiɛɛ jè.

⁴ Ḿ se ɓě wìǐn dyéɛ mu ɖe, mɔɔ ké ḿ se ɓě ɖò dyi táǎ mu, kɛɛ ní mu ɓě gǎ kɔ̃ tòùn wɛ̃́ɛ́ ɓó ɓěɛ̀ kpeɖe ɓěɔ̀ kè ɓěɛ̀ nyuu-ɖɛ̀ ɓě ɓɛ́ wa nyàìn kà ḿ dyiɛɛ jè. Ɔ ɖǎ ná nìǐn, nìí, ɓě muɛ dyuòùn kà mɔ̄ mɔ̀ Bounɓoɔ̀ kɛ.’

⁵ “Ɖɛ mɔ̄ Bounɓo Ɖɛɓíɔ́ cɛ̃ Éézùɖùɛ̀-dyù ɓěɔ̀ gbo ɖeɛɛ kɛà kɛ̀. Ḿ ɖá, ‘Mú-gbɔɔ̀-gbɔɔ̀ vɛ̀nɛ̀ ɖò nì ɓě kɔ̃ dyiɛń. Ɔ mɔ̀ mú-gbɔɔ̀-gbɔɔ̀ kɔ̃̀ jè ɓɛ́ nyɔ ɖò séè wɔ̃́ ɖò kĩ́ín nyɛ.

⁶ Mánáín-hwɛ̀-tìɔ̀ ɖǎ dyi. Gmɔ̀ nɔ̄, ɔ ɖǎ dyi. Ɓěɛ̀ tiɔ̀ ɖǎ ɖé hwɛ̀. Ɓě muá mɛ́ìn.

⁷ Mú-gbɔɔ̀-gbɔɔ̀ ɖǎ ɓě mɔ̀ nyɔ ɓě cĩ́à ɖé ɓóɖóɔ̀ kɔ̃ɛɛ kɔ̃ dyi. Wéɔ̀ ɖǎ dyi xwɛ̃́ìn. Tiɔ̀ ɖǎ ɓó nyini. Fã̀à-kùɖǔ-kuɖu nì ɖé toɖo ɓěɔ̀ dya, ké múà ɖò se ɖé nì.

⁸ “ ‘Ḿ nìǎ ní dyoɖoɔ̀ ɓě kɔ̃ púèɛ̌n dyiɛń. Ní mu ɓěɛ̀ zaa wɔ̃ poùn dyììn ɖé kà ɓěɛ̀ kpeɖe ɓěɔ̀ nyu nìɛ̀ kɛɛ mú, ɓɛ́ ḿ ké ɓě gǎ kɔ̃ tò ɓó ɓěɛ̀ nyuu-ɖɛ̀ séín ɓě ɓɛ́ wa nyàìn kà ḿ dyiɛɛ jè.

⁹ Ḿ se ɓě wìǐn dyéɛ mu ɖe, mɔɔ ké ḿ se ɓě ɖò dyi táǎ mu, kɛɛ ní mu ɓě gǎ kɔ̃ tòùn ɓó ɓěɛ̀ kpeɖe ɓěɔ̀ kè ɓěɛ̀ nyuu-ɖɛ̀ ɓě ɓɛ́ wa nyàìn kà ḿ dyiɛɛ jè. Ɔ ɖǎ ná nìǐn, nìí, ɓě muɛ dyuòùn kà mɔ̄ Bounɓoɔ̀ mɔ̀ nyɔ tĩ́à ɓě kɛ̀.’

¹⁰ “Gmɔ̀ nɔ̄, wéɔ̀ ɖǎ nyini. Gmɔ̀ nɔ̄, ɔ ɖǎ dà nì. Mú-gbɔɔ̀-gbɔɔ̀ ɖǎ Éézùɖùɛ̀-dyù ɓěɔ̀ kɔ̃ dyi. Se-dyí-sɛ́ɖɛ́ìn-ɖɛ̀ nyu-nyu kè nyɔ-mìɔùn-dyí-ɓúáìn-ɓúáìn nì dà séín.

¹¹ Nyɔ-ɖɛ-gana-xwa-zàìn-zàìn ɖǎ ɓúá, ké ɔ ɖǎ ɓà-cù nyu, ɓɛ́ ɔ ké hwòɖǒ-kɔ̃in-nyìnììn-nyìnììn ɓaɖa. Nyɔ ɓěɔ̀ ɖò se ɓó sèɛ̌ mu. Nyɔ kúɖúú ɓěɔ̀ ɖò kè waà kɔ́mɔ́-ɖɛ̀ ɓěɔ̀ ɖò mɔɔ ɖɛ kpa ɖɛ ɖò se ɓó sèɛ̌ mu.

¹² “Wéɔ̀ ɖǎ dyi xwɛ̃́ìn. Tiɔ̀ ɖǎ ɓó nyini. Ɖɛ-dɔ̃-nyɔ̀ɔ̀ mɛ ɓɔ́ múàǔn kpáa, ké ɖɛ-peɖe-nyɔ̀ɔ̀ hwòɖǒ mɛ ɓɔ́ ɖé ɖei kpáa, sepóɛɖé ḿ kpáìn wa séín dyoɖoún.

¹³ Ɖɛ-peɖe-nyɔ̀ɔ̀ se pá ɓɛ́ ɔ peɖeà kɛɛ ɖe dyéɛ mu ɖe ti ɓɛ́ ɔ kè nyɔ dɔ̃à páɔ̀ kɛɛ nì toɖo kɔ̃ keɛ, sepóɛɖé ɖɛ ḿ nìà m̀ dyí tɛ̀mɛ̀ǐn ɓá wa séín dyíɛɛ se dyí zàǐn mu. Waà nyɔ dyúáɖò fóɖóún se ɔ fɛ̀ɛ̀ɔ̀ póɛ̀n ɓɛ́ǐn mu ɓó waà nàmàǔn ɓěɔ̀ jè.

¹⁴ Kɛbì wa mɛ ɓaɖa ɖɔ-kpaɔ̀, ɓɛ́ wa ké ɖɛ séín ti dyéìn nyɛɛ, nyɔ ɖò se toɔ̀ gbo muɛ ɓɛ́ǐn mu, sepóɛɖé ḿ kpáìn wa séín dyoɖoún.

Gǎ dyi Éézùɖùɛ̀-nyɔ̀ ɓěɔ̀ kɔ̃ ɓó waà nàmàǔn ɓěɔ̀ jèɛ

¹⁵ “Gàsíà nì hwɔɖɔɔ̀ ɖei, ké wɛ́ kè mɔ́ nì ɖé hwɔɖɔɔ̀ mú. Nyɔ ɓě ɓɛ́ wa nì ɖé xwáɖá xwíɖíiɛɛ, wa mu gàsíà dyí mɛ́ìn. Ké nyɔ ɓě ɓɛ́ wa nì ɖé hwɔɖɔɔ̀ múɛɛ, mɔ́ kè wɛ́ mu wa ɖáɓáùn.

¹⁶ Nyɔ ɓě ɓɛ́ wa sè ɓó ké wa mu xwáɖáún kpáùn wɛ̃ɛ mu ɖé toɖo ɓěɔ̀ gbo nììn, ké waà vĩ̌-wùɖù ɓěɔ̀ mu dyiìn kà gbúɛ́ wuɖu dyià kɛ. Wa ɖò-ɖò séín mu vĩ̌ìn ɓó waà nàmàǔn ɓěɔ̀ jè.

¹⁷ Hwòɖǒ mu wa séín xwíníín dyi ɓaɖaùn, ɓɛ́ wa ké ɓoi dɔ̀ìn.

¹⁸ Wa mu ɖɔ-zɔ̃̀ mú poùn, ɓɛ́ fã̀à ké wa mú dyí. Dɛ̃ mu wa nyuùn mìɔ, ké wa mu dúi kpanaùn.

¹⁹ Wa mu waà séɓàɖàɔ̀ hwìè gbà dyi wáɖáìn, ké waà góòɔ̀ mu zɛ̀nɛ̌-ɖɛ̀ jǔùn. Wé kɔ̃̀ ɓaɖa mɔ̄ Bounɓoɔ̀ muà wa dyoɖoún kpáìn nyɛɛ, waà séɓàɖàɔ̀ kè waà góòɔ̀ se wa póɛ̀n ɓɛ́ǐn mu. Ɔ se wa mɔ́-hwòɖòɔ̀ ɓɔ́í poɛ́ mu, hwɛ̀ ḿ po níiń, ɔ ké wa dyí ɖoɓoɛ ɓɛ́ìn. Sepóɛɖé ɔ ɖǎ dyí-gbǒ-ɖɛ̀ jǔ, ké ɔ ɖǎa nyu ké wa ɖǎ nàmàǔn mú kpá.

²⁰ Wa ɓɔ́ɖɔ́ìn waà bɛ̃̀ìn-ɖɛ̀ nɔ̀mɔ̀ kɔ̃in ɓěɔ̀ dyí, ké wa ɖúɛ dyí, ké wa nyuɛ kũùn-kpò ɓě ɓɛ́ wa nyàìn kà ḿ dyiɛɛ mú. Ɔ jèɛɛ, ní mu ɖɛ ɓěɛ̀ zɛ̀nɛ̌-ɖɛ̀ mú zɛ̃̀ìn ɓó wa bìì.

²¹ Ké ní mu ɖɛ ɓěɛ̀ ɓóɖó-dù kà kò ɖòɛ̀ nyɔ ɓěɔ̀ to-gbo-zà-ɖɛ̀ mú nyuùn, ké wa mu hwu-ɖɛ̀ jǔùn ɓó hwòɖǒ-kɔ̃in-nyìnììn-nyɔ̀ ɓě nì ɓóɖó-kpàɔ̀ kɔ̃ɛɛ bìì, ké wa mu ɖɛ ɓěɛ̀ se-mú-hwɛ̀-ɖɛ̀ mú nyuùn.

²² Ní mu wa dyi táàùn, ɓɛ́ wa ké ní pá kpa ɖɛɔ̀ pá se mú hwɛ̀ɛ mú nyu. Sṹún-gɔ̀-nyɔ̀ ɓě mu ɖé páɔ̀ mú dyáìn, ɓɛ́ wa kéɛ nyu ɓɛ́ ɔ ké se mú hwɛ̀ ɖe.

²³ “Ɓě dyéìn dyɔ̀ɔ̌ ɓě ti ɓó ní nyɔ ɓěɔ̀ jè, sepóɛɖé nyɔmɔɔ-dyi-wáɖáìn-wáɖáìn dyíìn ɖé ɓóɖóɔ̀ kɔ̃ dyi, ké nyɔ-ɖɛ-gana-xwa-zàìn-zàìn dyíìn ɖé hwɔɖɔɔ̀ múin.

²⁴ Ní mu ɓóɖó-dù ɓě ɓɛ́ wa nyìnììn hwòɖǒ kɔ̃in mìɔ kɛɛ dyàùn, ɓɛ́ wa ké waà gbǒ ɓěɔ̀ dyí ɖú. Ké ní mu waà to-pèɖèìn-naín kui-kui ɓě kɔ̃̀ jè wa ɓɔ́ɖɔ́ìn kà dyíɛɛ jè dyi zĩ̀ìn, ké mú-nyɛ́-nyɔ̀ ɓěɔ̀ mu waà pá hwɛ̀ǐn-hwɛ̀ǐn ɓěɔ̀ se-mú-hwɛ̀-pà mú nyuùn.

²⁵ Ti ɓɛ́ waà fã̀àǔn-po-ɖɛ̀ mu dyiìn nyɛɛ, wa mu gìɖìǐ dyi mɔ́ùn, kɛɛ gìɖìǐ ɖò se nìɛ̌ mu ɓó wa bìì.

²⁶ Ɖɛ gbà deìn ɖɛ gbà kɔ̃in mu wa kɔ̃ dyiìn, ké wa mu bɔ̃̌ gbà deìn bɔ̃̌ gbà kɔ̃in wɔ̃́ùn. Ké wa mu dyí-tɛ̀mɛ̀ìn-ɖɛ̀ ɖò dyéɛ mɔ́ùn sɔ̀ìn ɖé kpáá-ɖɛ̀-cɛ̃-nyɔ̀ ɓěɔ̀ gbo. Ké sáa-zà-nyɔ̀ ɓěɔ̀ gmaɔ̀ nyɔ tɛ̀mɛ̀ìn jè kè nyɔ vɛ̀nɛ̀ ɓěɔ̀ ná-wùɖùɔ̀ mu dyi ziìn.

²⁷ Ké kã́áɔ̀ mu wìì-ɓò kòùn, ké hwòɖǒɛ̀-ɖé-ɖei-kpá-kpá mu ɖɔ jǔùn, ɓɛ́ kã́áɔ̀ dyú-gààɔ̀ kéɛ mú po, ké ɓóɖóɔ̀ nyɔ ɓěɔ̀ sɔ̃ mu tɛɖɛìn. Kà waà kpeɖe ɓěɔ̀ nyu nìɛ̀ kɛɛ, kǎà ní mu wa ɖɛ bũ̌ nyuɛ nyuùn. Ké ní mu waà zaa wɔ̃ poùn kà wa nyuà nyɔ tɔ̀ɔ̀ ɓě nììn zaa wɔ̃ poɛ kɛ. Ɔ ɖǎ ná nìǐn, nìí, wa muɛ dyuòùn kà mɔ̄ mɔ̀ Bounɓoɔ̀ kɛ.”