Ìzíkìò 6 - Ɓǎsɔ́ɔ̀ Báɓòɔ̀

Bounɓoɔ̀ nyɛ́ kũùn-kpò ɓiè-ɓiè mú

¹ Sɔ̀ìn ɓó ɖɛ ɓěɛ̀ gboɛɛ, púɛɛ, Bounɓoɔ̀ wùɖù ma ḿ gbo ɖe, ké ɔ ɖá,

² “Gǎ-dyù, gmɔ̀ìn ɖé toɖo ɓě nìà ɖé Éézùɖùɛ̀-ɓòɖòɔ̀ kɔ̃ɛɛ gbo, ɓɛ́ m̀ ké ɖɛ gbà ɓě mu wa gbo kpáùn wɛ̃ɛ cɛ̃.

³ M̀ mɛ cɛ̃ɛ, ɓɛ́ m̀ ké níiń, ‘Óó Éézùɖùɛ̀-tòɖò ɓě, ɓě tò Bounɓo Ɖɛɓíɔ́ wuɖuɔ̀ ɖùǔ gbo. Ɖɛ Bounɓo Ɖɛɓíɔ́ cɛ̃ ɓě mɔ̀à toɖo vɛ̀nɛ̀-vɛ̀nɛ̀ kèɛ̀ mɛ́nɛ́-mɛ́nɛ́ ɓěɔ̀ kɛ kè bɔɔ-kpà ɓěɔ̀ gboɛɛ kɛà kɛ̀. Ɔ ɖá, “Ɔ sèǎ ti tííwè ɓɛ́ ḿ kéá ɓě gàsíà-tò kɔ̃ dyà. Ní mu kũùn-kpò ɓièìn-naín ɓě nìà ɖé ɓě dyaa mú gbɔɔ̀ùn.

⁴ Wa mu ɓěɛ̀ sáa-kɔ̃-zàìn-gbàà ɓěɔ̀ dyi gbaàùn, ɓɛ́ wa ké ɓěɛ̀ nyɔ́ún-nɔ̀mɔ̀-ɖɛ̀ fɔ̃̀ìn-naín ɓěɔ̀ dyi wàìn, ké ní mu ɓěɛ̀ nyɔ ɓěɔ̀ ɓó ɓěɛ̀ kũùn-kpò ɓěɔ̀ dyúa ɖáɓáìn.

⁵ Ní mu Éézùɖùɛ̀-dyù ɓěɔ̀ xwɛ́ ɓěɔ̀ ɓó waà kũùn-kpò ɓěɔ̀ dyúa dyi wáɖáìn, ké ní mu waà kpá ɓěɔ̀ ɓó waà sáa-kɔ̃-zàìn-gbàà ɓěɔ̀ ɖei wáɖáìn.

⁶ Ní mu waà hwɔɖɔ séín ɓɛ́ wa cĩ́ múɛɛ wáɖáùn, ɓɛ́ ḿ ké waà kũùn-kpò ɓièìn-naín ɓě nìà ɖé ɓě dyaa dya gba, ɓɛ́ waà sáa-kɔ̃-zàìn-gbàà ɓěɔ̀ ké wáɖá. Ké ní mu waà kũùn-kpò ɓěɔ̀ dyi wàìn, ɓɛ́ waà nyɔ́ún-nɔ̀mɔ̀-ɖɛ̀ fɔ̃̀ìn-naín ɓěɔ̀ ké wáɖá. Ké ní mu ɖɛ ɓě ɓɛ́ wa ɖǎà nyu kɛɛ ɓó dyi sámáùn.

⁷ Ké nyɔ ɓě ɓɛ́ ní mu ɖáɓáa kpaùn wɛ̃ɛ, wa mu dyi kpáuń nììn ɖé ɓě dyai. Nìí, Éézùɖùɛ̀-dyù tɔ̀ɔ̀ ɓěɔ̀ muɛ dyí dyuòùn kà mɔ̄ mɔ̀ Bounɓoɔ̀ kɛ.

⁸ “ ‘ “Kɛɛ ní mu Éézùɖùɛ̀-dyù ɓěɔ̀ ɖíɛ́ ɓě póìn, sepóɛɖé wa mu gàsíàɔ̀ xwaún póùn ti ɓɛ́ wa mu dyi gbɛ̀ìn ɖé ɓóɖó-dù kà kò ɖò ɓěɔ̀ hwìɛ̀ kɛ.

⁹ Sɔ̀ìn ɓóɛ gboɛɛ, nìí, ní jè mu Éézùɖùɛ̀-dyù ɓě póà gàsíàɔ̀ xwaún, ɓɛ́ wa mɔ̀à toɛ̀-kpɔ̃-nyɔ̀ ɓě ɖé ɓóɖó-dù kà kò ɖò ɓěɔ̀ kɔ̃ɛɛ hwìɖǐi dyiìn. Wa muɛ dyuòùn kà ní hwòɖǒ kpá ma ɖé ɖei mìɔ ɓá waà gbàɖàùn-po-hwòɖò ɓɛ́ wa ɓéɖéà kɛ kè waà dyéɖé ɓɛ́ ɔ ɖǎà waà kũùn-kpò ɓěɔ̀ dya nì kɛɛ jè dyíɛ. Ɔ mɔ̀ hwòɖǒ-dyùà nyuà ké wa ɖǎà ḿ kɔ̃in pòìn nyɛ. Ké wa hwòɖǒ mu wa mìɔùn mú nyɛ́ìn ɓó ɖɛ gbà ɓě wa nyuà kɛ kè waà nyuu-ɖɛ̀ séín ɓɛ́ wa nyàìn ḿ dyiɛɛ jè.

¹⁰ Ɔ ɖǎ ná nìǐn, nìí, wa muɛ dyuòùn kà mɔ̄ Bounɓoɔ̀ se wa mú pɔ́, kɛɛ ní mu wa ɖɛ gbà nìà kɛ kɔ̃ dyàùn wɛ̃.” ’

¹¹ “Ɖɛ ɓɛ́ mɔ̄ Bounɓo Ɖɛɓíɔ́ cɛ̃ mɔ̀ Ìzíkìò gboɛɛ kɛà kɛ̀. Ɓó Éézùɖùɛ̀ɛ̀ gbǒ-xwíníínɔ̀ hwòɖǒ-kɔ̃in-nyìnììn-ɖɛ̀ ɓě ɓɛ́ wa nyàìn kà ḿ dyiɛ jèɛɛ, taɓa kpá hwòɖǒ, ɓɛ́ m̀ ké ɓo ɓíɖíí ɓaɖa, ɓɛ́ m̀ ké níiń, ‘Ééɓàa,’ sepóɛɖé gàsíà kè mɔ́ ɔ kè wɛ́ nyìnììn dyíin mu wa ɖáɓáùn.

¹² Nyɔ mɔ̀ nyɔ ɓɛ́ ɔ nì ɖé dà vɛ̃in nyɛɛ, wɛ́ mu ɔ ɖáɓáùn, ké nyɔ mɔ̀ nyɔ ɓɛ́ ɔ nì dà xwɛ̃́ìn dyiɛɛ, gàsíà mu ɔ ɖáɓáùn, ké nyɔ mɔ̀ nyɔ mu ɖɛ ɓěɛ̀ xwaún póùn wɛ̃ɛ, mɔ́ mu ɔ ɖáɓáùn. Kǎà ní mu kà ɓó ní dyoɖoɔ̀ wa kɔ̃ dyàà nyuùn.

¹³ Ɔ ɖǎ ná nìǐn, nìí, wa muɛ dyuòùn kà mɔ̄ mɔ̀ Bounɓoɔ̀ kɛ, ti ɓɛ́ ní mu waà nyɔ ɓěɔ̀ ɖáɓáùn, ɓɛ́ waà xwɛ́ ɓěɔ̀ ké waà kũùn-kpò ɓěɔ̀ hwìɛ̀ dyi pɛ̃́ ɖé waà sáa-kɔ̃-zàìn-gbàà ɓě nìà ɖé toɖo mɛ́nɛ́ɛ́ séín ɓěɔ̀ kèɛ̀ vɛ̀nɛ̀ séín ɓěɔ̀ dya, kè ɖé cu zà ɖɔ́ séín kè cu gùsùù séín kɔ̃̀ xwíɖíi ɓɛ́ wa fɔ̃̀ìn nyɔ́ún-nɔ̀mɔ̀-ɖɛ̀ ɓó waà kũùn-kpò séín ɓěɔ̀ bììɛɛ ɖeiɛ.

¹⁴ Ní mu ní sɔ̃ɔ̀ pɛ́ɛ̀ìn, ɓɛ́ ḿ ké waà ɓóɖóɔ̀ dɛ̀ kã̀ìn séín wa cĩ́ɛɛ pá fóɖóún mú nyu sɔ̀ìn ɖé gbǎùn-fúɖúáɔ̀ kɔ̃, muà ɖé Díɓàɖà-hwɔɖɔɔ̀ múɛ. Ɔ ɖǎ ná nìǐn, nìí, wa muɛ dyuòùn kà mɔ̄ mɔ̀ Bounɓoɔ̀ kɛ.”