Ìzíkìò 5 - Ɓǎsɔ́ɔ̀ Báɓòɔ̀

Ìzíkìò kpana ɔ mìɔùn mí dúi

¹ Ké Bounɓoɔ̀ cɛ̃ɛ ma ḿ gbo ɖe, ké ɔ ɖá, “Gǎ-dyù, ɓó kàǔn wɛ̃ɛ, ɖú gàsíà námá-námá ɖò dyí, ɓɛ́ m̀ kéɛ mí-kpànàìn-jɛ̃̀ mú nyu, ɓɛ́ m̀ ké mí séín nìà m̀ dúɛ kè nì vɛ̃̌ɔ̀ kpana. Ɔ ɖǎ ná nìǐn, ɖú pṹá ɖò dyí, ɓɛ́ m̀ ké nì míɔ̀ xwa dɔ̃̌, ɓɛ́ m̀ kéɛ mú ge wáká tã.

² Ti ɓɛ́ nì hwɔɖɔɔ̀ wɔ̃-gbǎìn-wèɔ̀ ɖǎ ɖé hwɛ̀ kɛɛ ní, nìí, m̀ mɛ fɔ̃̀ìn míɔ̀ wáká dyúáɖò ɖé hwɔɖɔɔ̀ mú. Ɔ ɖǎ ná nìǐn, ɖúɛ wáká sɔ̃́ nììnɔ̀ dyí, ɓɛ́ m̀ kéɛ dyi cɛ̃ìn ɓó hwɔɖɔɔ̀ ɖei, ɓɛ́ ɔ kéɛ dyí kɔìn. Sɔ̀ìn ɓóɛ gboɛɛ, nìí, ɖúɛ wáká tã nììnɔ̀ dyí, ɓɛ́ m̀ kéɛ dyi mɛ́nɛ́ìn, ɓɛ́ pìɔ̌ kéɛ kpa, sepóɛɖé ní mu ní nyɔ ɓěɔ̀ kíɖíí kpáùn dyììn ɖé gàsíà zà kpaɖaún mú.

³ Kɛɛ ɖú mí-wɔ́ɖɔ́ gbɛ̀ǐ-gbɛ̀ǐ dyí, ɓɛ́ m̀ kéɛ nì mú-po-ɖɔ̀ɔ̀ gã ɖò gbo sṹ.

⁴ Ɔ ɖǎ ná nìǐn, zàà ɓóɛ ɖò wè ɖe, ɓɛ́ m̀ kéɛ dyéɖé po, ɓɛ́ ɔ ké sĩ. Nyɛɔ̀ mu mí kpɔ̃ dyíɔ̀ mú sɔ̀ùn, ɓɛ́ ɔ ké dyi tee, ɓɛ́ ɔ ké Éézùɖùɛ̀ɛ̀ gbǒ-xwíníín gànáɔ̀ fɔ̃.

⁵ “Ɖɛ mɔ̄ Bounɓo Ɖɛɓíɔ́ cɛ̃ɛ kɛà kɛ̀. Jùɖúsɛ̀ɖɛ̀ìn-hwɔ̀ɖɔ̀ nìà kɛɛ, ḿ ɖǎa nyu ké ɔ mɔ̀ hwɔɖɔ kpa ɖɛ nɔ̄ ɓóɖó-kpà gànáà kɔ̃.

⁶ Kɛɛ ɔ hwòɖǒ-kɔ̃in-nyìnììn-hwòɖò-dyùàɔ̀ ɖǎa nyu ké ɔ ɖǎ ní gma ɓěɔ̀ kɛ́ɛ́ dyí po mìɔ ké ɔ zi ɓóɖó-dù ɓě nìà ɓó ɔ ɖeiɛɛ dyí. Ɔ ɖǎ ní gma ɓěɔ̀ ɓɔ́, ké ɔ se mɔ́ ɔ ké wa dyi kpɔ̃.

⁷ “Jùɖúsɛ̀ɖɛ̀ìn-nyɔ̀ ɓě, ɖɛ mɔ̄ Bounɓo Ɖɛɓíɔ́ cɛ̃ɛ kɛà kɛ̀. Ɓě kã̀ ɖùǔ mìɔ ké ɔ zi ɓóɖó-dù ɓě nìà ɓó ɓě ɖeiɛɛ dyí. Ɓě se ní gma ɓěɔ̀ ɖò dyi kpɔ̃ɔ mɔ́ fɔɔ cá. Ɓěɛ̀ kpeɖeɔ̀ ɖǎ dyíin nyìnììn mìɔ ké ɔ ɖǎ ɓóɖó-dù ɓě nìà ɓó ɓě ɖeiɛɛ dyí zi.

⁸ Ɔ jèɛɛ, gmɔ̀ nɔ̄, ḿ mìɔùn mu ɓě gbo vɔ̃ùn. Ní mu ɓě gǎ kɔ̃ tòùn ɓó ɓóɖó-dù kà kò ɖò ɓěɔ̀ dyéɖé waí.

⁹ Ní mu ɖɛ ḿ séè nyu ɖò mɔɔ ké ḿ se nyuɛ́ mu ɖeɛɛ ɓě bũ̌ nyuùn ɓó ɓěɛ̀ nyuu-ɖɛ̀ ɓě ɓɛ́ wa nyàìn kà ḿ dyi mìɔ kɛɛ jè.

¹⁰ Ɓó tia ɓaɖaa, wóɖóìn-nyɔ̀ ɓě mu waà dyú ɓě tàùn, ké dyú ɓě mu waà wóɖóìn-nyɔ̀ ɓě tàùn. Ní mu ɓě gǎ kɔ̃ tòùn, ké ní mu ɓě nyɔ séín sè ɓóɛɛ dyi gbɛ̀ìn ɖé ɓóɖó-gã̀ hĩinyɛɔ̀ gbo.

¹¹ “Ɖɛ mɔ̄ Bounɓo Ɖɛɓíɔ́ cɛ̃ ɖeɛɛ kɛà kɛ̀. Ɓě ɖǎa nyu ké ní gbǒ hwɛ̀ǐn-hwɛ̀ǐnɔ̀ se mú hwɛ̀ ɖe ɓó ɓěɛ̀ kũùn-kpò séín ɓě ɓɛ́ ḿ nyɛ́à múɛ kè ɓěɛ̀ nyuu-ɖɛ̀ séín ɓě ɓɛ́ wa nyàìn kà ḿ dyiɛ jèɛɛ, mɔ̄ Bounɓo Ɖɛɓíɔ́ gboò ḿ mìɔùn dyí kà ní mu ɓě dyi táàùn wɛ̃. Ḿ se ɓě wìǐn dyéɛ mu ɖe, mɔɔ ké ḿ se ɓě ɖò dyi táǎ mu.

¹² Ní mu ɓě mú geìn dú tã. Wɛ́ mɔɔ mɔ́ mu ɓěɛ̀ dú dyúáɖò mú gbɔɔ̀ùn ɖé ɓěɛ̀ hwɔɖɔɔ̀ mú. Ké ɓěɛ̀ dú sɔ̃́ nììnɔ̀ mu mú gbɔɔ̀ùn dyììn ɖé gàsíà mú, ɖé ɓěɛ̀ hwɔɖɔɔ̀ ɖei. Ké ní mu ɓěɛ̀ dú tã nììnɔ̀ dyi gbɛ̀ìn ɖé ɓóɖó-gã̀ hĩinyɛɔ̀ gbo. Ní mu wa gàsíà zà kpaɖaún kíɖíí kpáìn.

¹³ “Ɔ ɖǎ ná nìǐn, ní dyoɖo-hwòɖòɔ̀ mu ɓɔ́í kpáùn, ké ḿ se ɓě dyoɖoún kpáǐn mu ɖe, sepóɛɖé ní mu ɓě kpa kɔ̃in zàìn. Ti ɓɛ́ ní muà ɓě kpa kɔ̃in zàìn ɖé ní dyoɖoɔ̀ múɛɛ, nìí, ɓě muɛ dyuòùn kà mɔ̄ Bounɓoɔ̀ ɖǎ ɖɛ nìà kɛ cɛ̃ ɖé ní dyoɖoɔ̀ múɛ.

¹⁴ Ní muɛ nyuùn ɓɛ́ ɓěɛ̀ hwɔɖɔɔ̀ ké hwùɖùǎ jǔ, ɓɛ́ ɓě ké dyɔ́-cù jǔ ɖé ɓóɖó-dù ɓě nìà ɓó ɓě ɖeiɛ kè nyɔ séín ɓě mu ɓě dyíin ziìn nyɛɛ gbo.

¹⁵ Ti ní mu ɓě dyoɖoún kpáìn, ɓɛ́ ḿ ké ɓě dyí ɓàɖàìn ɖé ní dyoɖo ku wɔ̃ɔ̀ mú, ɓɛ́ ḿ ké ɓě gǎ kɔ̃ tòɛɛ, nìí, ɓě mu dyɔ́-cù kè nɔ́ɔ́-dyi-pòìn-ɖɛ̀ kè nyɔ-náún-pòìn-ɖɛ̀ ɔ kè nyɔ-fã̀àǔn-po-ɖɛ̀ jǔùn ɖé ɓóɖó-dù ɓě nìà ɓó ɓě ɖeiɛɛ gbo. Mɔ̄ Bounɓoɔ̀ mɔ̀ nyɔ cɛ̃à kɛ̀.

¹⁶ Ní mu ní sé mɔ̀à nyɔ-mú-gbɔɔ̀-ɖɛ̀ɛ ɓě pòìn dyììn ɖé mɔ́ mú, ɓɛ́ ḿ ké ɓěɛ̀ ɖii-ɖɛ̀ ɓěɔ̀ ɓɔ́í po. Ní muɛ nyuùn ɓɛ́ mɔ́ɔ̀ ké wɔ̃ ku mìɔ cá.

¹⁷ Ní mu ɓě mɔ́ vɛ̀nɛ̀ kè kpɔ̃ɔ-nìmìì kɔ̃ tòùn, ké wa mu ɓěɛ̀ dyú ɓěɔ̀ ɖáɓáa hwɔùn. Wɛ́ kè nyɔmɔɔ-dyi-wáɖáìn-wáɖáìn mu ɖé ɓě hwìɛ̀ dyiìn, ké ní mu ɓě gàsíà-tò kɔ̃ dyàùn. Mɔ̄ Bounɓoɔ̀ mɔ̀ nyɔ cɛ̃à kɛ̀.”