Ìzíkìò 48 - Ɓǎsɔ́ɔ̀ Báɓòɔ̀

Ɓóɖóɔ̀ xwéɖé-dù ɓěɔ̀ múin geìn-geìn

¹ Ké Bounɓoɔ̀ kpa ma wuɖu dyúa ɖe, ké ɔ ɖá, “Xwéɖé-dù ɓěɔ̀ páɔ̀ kɛà kɛ̀. Ɓě mɛ nyí Dɛ̃́ìn nììn xwéɖé-dùɔ̀ pá ɖé ɓóɖóɔ̀ xwía. Ɔ páɔ̀ bã̀à nì ɖé xwía sɔ̀ìn ɖé dyóɖó-dyi-kpáìn-naínɔ̀ muà ɖé dyóɖó-xwáɖáún-wóɖóìn-naínɔ̀ kɛɛ mɛ síìn ɖé Mɛ́ɖɛ̀tɔ̀wéɖénìà-dyòǒɔ̀ wĩín, ɓɛ́ ɔ ké ɖé Hɛ́tòɖòùn-hwɔ̀ɖɔ̀ɔ̀ kè Ɖíɓò-Hámà-hwɔ̀ɖɔ̀ɔ̀ mú mùìn, ɓɛ́ Házà-Énà-hwɔ̀ɖɔ̀ ɓɛ́ ɔ nìà ɖé Dìmásìkɔ̀-hwɔ̀ɖɔ̀ɔ̀ xwía kè ɖé Hámà-hwɔ̀ɖɔ̀ɔ̀ zɔ̃̌in nyɛɛ kéɛ mú sè.

² Ké nyɔ mɛ kɔ ɓó Dɛ̃́ìn nììn xwéɖé-dùɔ̀ gbo dyí, hwɔ ɖé zɔ̃̌in dyí, sɔ̀ìn ɖé dyóɖó-xwáɖáún-wóɖóìn-naínɔ̀ muà ɖé dyóɖó-dyi-kpáìn-naínɔ̀ kɛɛ mɛ mɔ̀ Ásè nììn xwéɖé-dùɔ̀. Wa mɛ kɔ̃̀ ɓó páɔ̀ wáká dyúáɖò.

³ Nyɔ mɛ kɔ ɓó Ásè nììn xwéɖé-dùɔ̀ gbo dyí sɔ̀ìn ɖé dyóɖó-xwáɖáún-wóɖóìn-naínɔ̀ muà ɖé dyóɖó-dyi-kpáìn-naínɔ̀ kɛɛ mɛ mɔ̀ Náfátàɖì nììn xwéɖé-dùɔ̀. Wa mɛ kɔ̃̀ ɓó páɔ̀ wáká dyúáɖò.

⁴ Nyɔ mɛ kɔ ɓó Náfátàɖì nììn xwéɖé-dùɔ̀ gbo dyí sɔ̀ìn ɖé dyóɖó-xwáɖáún-wóɖóìn-naínɔ̀ muà ɖé dyóɖó-dyi-kpáìn-naínɔ̀ kɛɛ mɛ mɔ̀ Mànásì nììn xwéɖé-dùɔ̀. Wa mɛ kɔ̃̀ ɓó páɔ̀ wáká dyúáɖò.

⁵ Nyɔ mɛ kɔ ɓó Mànásì nììn xwéɖé-dùɔ̀ gbo dyí sɔ̀ìn ɖé dyóɖó-xwáɖáún-wóɖóìn-naínɔ̀ muà ɖé dyóɖó-dyi-kpáìn-naínɔ̀ kɛɛ mɛ mɔ̀ Ífèɖèìn nììn xwéɖé-dùɔ̀. Wa mɛ kɔ̃̀ ɓó páɔ̀ wáká dyúáɖò.

⁶ Nyɔ mɛ kɔ ɓó Ífèɖèìn nììn xwéɖé-dùɔ̀ gbo dyí sɔ̀ìn ɖé dyóɖó-xwáɖáún-wóɖóìn-naínɔ̀ muà ɖé dyóɖó-dyi-kpáìn-naínɔ̀ kɛɛ mɛ mɔ̀ Wuɖuɓíín nììn xwéɖé-dùɔ̀. Wa mɛ kɔ̃̀ ɓó páɔ̀ wáká dyúáɖò.

⁷ Ké nyɔ mɛ kɔ ɓó Wuɖuɓíín nììn xwéɖé-dùɔ̀ gbo dyí sɔ̀ìn ɖé dyóɖó-xwáɖáún-wóɖóìn-naínɔ̀ muà ɖé dyóɖó-dyi-kpáìn-naínɔ̀ kɛɛ mɛ mɔ̀ Júɖà nììn xwéɖé-dùɔ̀. Wa mɛ kɔ̃̀ ɓó páɔ̀ wáká dyúáɖò ɖekè.

Pá kpa ɖɛ nì ɓó ɓóɖóɔ̀ hwòɖǒǔn wɛ̃

⁸ “Ɔ ɖǎ ná nìǐn, nìí, ɓě mɛ po pá ɖò wáká ɓó Júɖà nììn xwéɖé-dùɔ̀ páɔ̀ wáún, sɔ̀ìn ɖé dyóɖó-xwáɖáún-wóɖóìn-naínɔ̀ muà ɖé dyóɖó-dyi-kpáìn-naínɔ̀ kɛ. Páɔ̀ xwíɖí-kù mɛ mɔ̀ ɓáɖáa táázĩ̀ìn mɛ̀nɛ̌ìn-sɔ̃́ kè hɔ̃dɛ̀ɖɛ̀ sɔ̃́ kè kpáɖá-nyɔ sɔ̃́ ɓaɖa-bùè. Ké ɔ tɔ̀mɔ̀-tɔ̀mɔ̀ɔ̀ kè xwéɖé-dù ɓěɔ̀ ɖò nììn pá mɛ cɛ̃ìn sɔ̀ìn ɖé dyóɖó-xwáɖáún-wóɖóìn-naínɔ̀ muà ɖé dyóɖó-dyi-kpáìn-naínɔ̀ kɛ. Ké ní gbǒ hwɛ̀ǐn-hwɛ̀ǐnɔ̀ mɛ nì ɓóɛ hwòɖǒǔn.

⁹ “Pá ɓɛ́ ɓě kéà wáká po ɓó mɔ̄ Bounɓoɔ̀ bììɛɛ tɔ̀mɔ̀-tɔ̀mɔ̀ mɛ mɔ̀ ɓáɖáa táázĩ̀ìn mɛ̀nɛ̌ìn-sɔ̃́ kè hɔ̃dɛ̀ɖɛ̀ sɔ̃́ kè kpáɖá-nyɔ sɔ̃́ ɓaɖa-bùè, ké ɔ xwíɖí-kù mɛ mɔ̀ ɓáɖáa táázĩ̀ìn hm̀m̌ kè hɔ̃dɛ̀ɖɛ̀ mɛ̀nɛ̌ìn-tã.

¹⁰ Sáa-zà-nyɔ̀ ɓěɔ̀ mɛ kɔ̃̀ pá hwɛ̀ǐn-hwɛ̀ǐn nìà kɛ ɖò. Wa nììnɔ̀ ɖé xwía kè zɔ̃̌in tɔ̀mɔ̀-tɔ̀mɔ̀ mɛ mɔ̀ ɓáɖáa táázĩ̀ìn mɛ̀nɛ̌ìn-sɔ̃́ kè hɔ̃dɛ̀ɖɛ̀ sɔ̃́ kè kpáɖá-nyɔ sɔ̃́ ɓaɖa-bùè, ké ɔ xwíɖí-kù nì ɖé dyóɖó-dyi-kpáìn-naínɔ̀ kè dyóɖó-xwáɖáún-wóɖóìn-naínɔ̀ kɛɛ mɛ mɔ̀ ɓáɖáa táázĩ̀ìn sɔ̃́ kè hɔ̃dɛ̀ɖɛ̀ mɛ̀nɛ̌ìn-hĩinyɛ. Ní gbǒ hwɛ̀ǐn-hwɛ̀ǐnɔ̀ mɛ nì ɓóɛ hwòɖǒǔn.

¹¹ Pá nìà kɛ mɛ nì ɓó sáa-zà-nyɔ̀ ɓě ɓɛ́ wa kpáà wáká ɓó ḿ bììɛɛ bìì. Wa mɔ̀ Záɖòɛ̀ xwíníín-dyù ɓě ɓɛ́ wa kpɔ̃ ma kà ḿ ɓiè jè gboi kóɖó-kóɖó, ké wa se ma kà hwìǐ sɔ̀ìn ti ɓɛ́ Ɖíìváà-nyɔ̀ ɓěɔ̀ kè Éézùɖùɛ̀-dyù tɔ̀ɔ̀ ɓěɔ̀ sɔ̀ìn ma kà hwìǐɛ.

¹² Ɔ mɛ mɔ̀ waà kɔ̃̀ɔ̀-ɖɛ̀ mɔ̀à pá hwɛ̀ǐn-hwɛ̀ǐnɔ̀ wáká ɖòɛ. Ɔ mɔ̀ pá zi mú hwɛ̀ǐn ɓɛ́ ɔ kè Ɖíìváà-nyɔ̀ ɓěɔ̀ nììn páɔ̀ deìn dyí kɛ.

¹³ Ɓó sáa-zà-nyɔ̀ ɓěɔ̀ nììn páɔ̀ wáún hwɔ ɖé xwía dyíɛɛ, Ɖíìváà-nyɔ̀ ɓěɔ̀ nììn pá mɛ kɔ ɓó dyí. Waà páɔ̀ tɔ̀mɔ̀-tɔ̀mɔ̀ mɛ mɔ̀ ɓáɖáa táázĩ̀ìn mɛ̀nɛ̌ìn-sɔ̃́ kè hɔ̃dɛ̀ɖɛ̀ sɔ̃́ kè kpáɖá-nyɔ sɔ̃́ ɓaɖa-bùè, ké ɔ xwíɖí-kù mɛ mɔ̀ ɓáɖáa táázĩ̀ìn sɔ̃́ kè hɔ̃dɛ̀ɖɛ̀ mɛ̀nɛ̌ìn-hĩinyɛ.

¹⁴ Ɖíìváà-nyɔ̀ ɓěɔ̀ ní ɖá ɓɛ́ wa ké pá kpa ɖɛ nìà kɛ ɖò peɖe, mɔɔ ké wa ní ɖá ɓɛ́ wa kéɛ gboi zĩàìn, mɔɔ ké wa ní ɖá ɓɛ́ wa kéɛ ɖò nyɔ kà kò ɖò nyí fɔɔ cá, sepóɛɖé ɔ kpá wáká ɓó mɔ̄ Bounɓoɔ̀ bìì.

¹⁵ “Sɔ̀ìn ɓóɛ gboɛɛ, nìí, ɓě mɛ po pá ɖò wáká ɖe hwɔ ɖé pá hwɛ̀ǐn-hwɛ̀ǐnɔ̀ zɔ̃̌in dyí. Ɔ tɔ̀mɔ̀-tɔ̀mɔ̀ mɛ mɔ̀ ɓáɖáa táázĩ̀ìn mɛ̀nɛ̌ìn-sɔ̃́ kè hɔ̃dɛ̀ɖɛ̀ sɔ̃́ kè kpáɖá-nyɔ sɔ̃́ ɓaɖa-bùè, ké ɔ xwíɖí-kù mɛ mɔ̀ ɓáɖáa táázĩ̀ìn ɖò kè hɔ̃dɛ̀ɖɛ̀ hĩinyɛ kè kpáɖá-nyɔ sɔ̃́ ɓaɖa-bùè. Páɔ̀ mɛ mɔ̀ Éézùɖùɛ̀-dyù tɔ̀ɔ̀ ɓěɔ̀ hwɔɖɔ-dè-naín kè waà nyúà-ɖɛ̀ dyi-ɖi-naín. Hwɔɖɔɔ̀ mɛ nì ɓóɛ hwòɖǒǔn.

¹⁶ Kà hwɔɖɔɔ̀ ké ɓɛ́ɛ kɛà kɛ̀. Ɔ wáká hwɔ ɖé xwía dyíɛɛ mɛ mɔ̀ ɓáɖáa táázĩ̀ìn ɖò kè hɔ̃dɛ̀ɖɛ̀ tã kè hm̀m̌. Ɔ wáká hwɔ ɖé zɔ̃̌in dyíɛɛ mɛ mɔ̀ ɓáɖáa táázĩ̀ìn ɖò kè hɔ̃dɛ̀ɖɛ̀ tã kè hm̀m̌. Ɔ wáká hwɔ ɖé dyóɖó-xwáɖáún-wóɖóìn-naín dyíɛɛ mɛ mɔ̀ ɓáɖáa táázĩ̀ìn ɖò kè hɔ̃dɛ̀ɖɛ̀ tã kè hm̀m̌. Ké ɔ wáká hwɔ ɖé dyóɖó-dyi-kpáìn-naín dyíɛɛ mɛ mɔ̀ ɓáɖáa táázĩ̀ìn ɖò kè hɔ̃dɛ̀ɖɛ̀ tã kè hm̀m̌ ɖekè.

¹⁷ Ké nyúà-ɖɛ̀ dyi-ɖi-naín mɛ nì hwɔɖɔɔ̀ ɖei. Nyúà-ɖɛ̀ dyi-ɖi-naínɔ̀ wáká hwɔ ɖé xwía dyíɛɛ mɛ mɔ̀ ɓáɖáa kpáɖá-nyɔ tã ɓaɖa-bùè sè sɔ̃́ kè fá-kɛ́ín. Ɔ zɔ̃̌in-wàkáɔ̀ mɛ mɔ̀ ɓáɖáa kpáɖá-nyɔ tã ɓaɖa-bùè sè sɔ̃́ kè fá-kɛ́ín. Ɔ wáká hwɔ ɖé dyóɖó-xwáɖáún-wóɖóìn-naín dyíɛɛ mɛ mɔ̀ ɓáɖáa kpáɖá-nyɔ tã ɓaɖa-bùè sè sɔ̃́ kè fá-kɛ́ín. Ké ɔ wáká hwɔ ɖé dyóɖó-dyi-kpáìn-naín dyíɛɛ mɛ mɔ̀ ɓáɖáa kpáɖá-nyɔ tã ɓaɖa-bùè sè sɔ̃́ kè fá-kɛ́ín ɖekè.

¹⁸ Páɔ̀ wáká tɔ̀ɔ̀ sèà ɓó ɓɛ́ ɔ pɛ̃́à pá hwɛ̀ǐn-hwɛ̀ǐnɔ̀ wĩin nyɛɛ tɔ̀mɔ̀-tɔ̀mɔ̀ mɛ mɔ̀ ɓáɖáa táázĩ̀ìn sɔ̃́ kè hɔ̃dɛ̀ɖɛ̀ mɛ̀nɛ̌ìn-hĩinyɛ hwɔ ɖé dyóɖó-xwáɖáún-wóɖóìn-naínɔ̀ dyí, ké ɔ tɔ̀mɔ̀-tɔ̀mɔ̀ mɛ mɔ̀ ɓáɖáa táázĩ̀ìn sɔ̃́ kè hɔ̃dɛ̀ɖɛ̀ mɛ̀nɛ̌ìn-hĩinyɛ hwɔ ɖé dyóɖó-dyi-kpáìn-naínɔ̀ dyí. Ɓáá-ɖɛ̀ ɓɛ́ ɔ mu ɓó páɔ̀ kɔ̃ sɔ̀ùn wɛ̃ɛ mɛ mɔ̀ nyɔ ɓě ɓɛ́ wa nì ɖé hwɔɖɔɔ̀ mú kũ̀à nyuɛń nyɛɛ ɖii-ɖɛ̀.

¹⁹ Nyɔ ɓě ɓɛ́ wa sɔ̀ Éézùɖùɛ̀ɛ̀ xwéɖé-dù ɖò-ɖò séín ɓěɔ̀ múin, ké wa mɔ̀ hwɔɖɔɔ̀ mú-kũ̀à-nyu-nyɔ̀ ɓěɛɛ mɔ̀ nyɔ mɛ ɓá ɓó páɔ̀ kɔ̃ ɖɛ.

²⁰ “Pá hwɛ̀ǐn-hwɛ̀ǐn kè hwɔɖɔɔ̀ nììn pá ɓɛ́ ɓě kéà wáká po ɖé ɓóɖóɔ̀ hwòɖǒǔn wɛ̃ɛ mɛ mɔ̀ ɓáɖáa táázĩ̀ìn mɛ̀nɛ̌ìn-sɔ̃́ kè hɔ̃dɛ̀ɖɛ̀ sɔ̃́ kè kpáɖá-nyɔ sɔ̃́ ɓaɖa-bùè ɖéɛ wáká ɖò-ɖò séín kɔ̃.

²¹ “Sɔ̀ìn ɓóɛ gboɛɛ, nìí, ɓě mɛ po pá sɔ̃́ wáká ɓó ɓěɛ̀ wuɖuí-kɔ̃̀-nyɔ̀ɔ̀ bìì. Ɖò mɛ síìn ɖé gbɛ̌ɛ̀ mɔ̀à pá hwɛ̀ǐn-hwɛ̀ǐnɔ̀ kè hwɔɖɔɔ̀ nììn páɔ̀ kɛɛ bã̀à nìà ɖé dyóɖó-xwáɖáún-wóɖóìn-naínɔ̀ kɛɛ gbo, ɓɛ́ ɔ ké ɖé ɓóɖóɔ̀ sèìn-naín nyini. Ɔ xwíɖí-kù mɛ mɔ̀ ɓáɖáa táázĩ̀ìn mɛ̀nɛ̌ìn-sɔ̃́ kè hɔ̃dɛ̀ɖɛ̀ sɔ̃́ kè kpáɖá-nyɔ sɔ̃́ ɓaɖa-bùè. Ké wáká tɔ̀ɔ̀ mɛ síìn ɖé gbɛ̌ɛ̀ mɔ̀à pá hwɛ̀ǐn-hwɛ̀ǐnɔ̀ kè hwɔɖɔɔ̀ nììn páɔ̀ kɛɛ bã̀à nìà ɖé dyóɖó-dyi-kpáìn-naínɔ̀ kɛɛ gbo, ɓɛ́ ɔ ké ɖé ɓóɖóɔ̀ sèìn-naín nyini. Ɔ xwíɖí-kù mɛ mɔ̀ ɓáɖáa táázĩ̀ìn mɛ̀nɛ̌ìn-sɔ̃́ kè hɔ̃dɛ̀ɖɛ̀ sɔ̃́ kè kpáɖá-nyɔ ɓaɖa-bùè ɖekè. Ɔ páɔ̀ mɛ pɛ̃́ Éézùɖùɛ̀-xwèɖè-dù ɓěɔ̀ ɖò nììn pá wĩin. Ɔ mɔ̀ ɓěɛ̀ wuɖuí-kɔ̃̀-nyɔ̀ɔ̀ nììn kɔ̃̀ɔ̀-ɖɛ̀. Pá hwɛ̀ǐn-hwɛ̀ǐn kɔ̃̀ hwòɖǒǔn ɓɛ́ ní gbǒ hwɛ̀ǐn-hwɛ̀ǐnɔ̀ nìà kɛ

²² kè Ɖíìváà-nyɔ̀ ɓěɔ̀ nììn páɔ̀ ɔ kè hwɔɖɔɔ̀ nììn páɔ̀ mɛ nì ɓó ɓěɛ̀ wuɖuí-kɔ̃̀-nyɔ̀ɔ̀ nììn páɔ̀ hwòɖǒǔn. Ɓěɛ̀ wuɖuí-kɔ̃̀-nyɔ̀ɔ̀ nììn páɔ̀ mɛ nì ɓó Júɖà nììn xwéɖé-dùɔ̀ kè Bɛ̃́címà nììn xwéɖé-dùɔ̀ nììn páɔ̀ pṹa.

Xwéɖé-dù tɔ̀ɔ̀ ɓěɔ̀ nììn páɔ̀ jè

²³ “Ɓá xwéɖé-dù tɔ̀ɔ̀ ɓěɔ̀ nììn pá jè dyíɛɛ, Bɛ̃́címà nììn xwéɖé-dùɔ̀ mɛ kɔ̃̀ ɓó páɔ̀ wáká dyúáɖò. Wa nììn páɔ̀ mɛ síìn ɖé dyóɖó-xwáɖáún-wóɖóìn-naínɔ̀, ɓɛ́ ɔ ké ɖé dyóɖó-dyi-kpáìn-naínɔ̀ nyini.

²⁴ Nyɔ mɛ kɔ ɓó Bɛ̃́címà nììn xwéɖé-dùɔ̀ gbo dyí sɔ̀ìn ɖé dyóɖó-xwáɖáún-wóɖóìn-naín muà ɖé dyóɖó-dyi-kpáìn-naín nyɛɛ mɛ mɔ̀ Símìɔ̀ nììn xwéɖé-dùɔ̀. Wa mɛ kɔ̃̀ ɓó páɔ̀ wáká dyúáɖò.

²⁵ Nyɔ mɛ kɔ ɓó Símìɔ̀ nììn xwéɖé-dùɔ̀ gbo dyí sɔ̀ìn ɖé dyóɖó-xwáɖáún-wóɖóìn-naín muà ɖé dyóɖó-dyi-kpáìn-naín nyɛɛ mɛ mɔ̀ Ɛ́sàkà nììn xwéɖé-dùɔ̀. Wa mɛ kɔ̃̀ ɓó páɔ̀ wáká dyúáɖò.

²⁶ Nyɔ mɛ kɔ ɓó Ɛ́sàkà nììn xwéɖé-dùɔ̀ gbo dyí sɔ̀ìn ɖé dyóɖó-xwáɖáún-wóɖóìn-naín muà ɖé dyóɖó-dyi-kpáìn-naín nyɛɛ mɛ mɔ̀ Zɛ́ɓíúɖɔ̀ùn nììn xwéɖé-dùɔ̀. Wa mɛ kɔ̃̀ ɓó páɔ̀ wáká dyúáɖò.

²⁷ Ké nyɔ mɛ kɔ ɓó Zɛ́ɓíúɖɔ̀ùn nììn xwéɖé-dùɔ̀ gbo dyí sɔ̀ìn ɖé dyóɖó-xwáɖáún-wóɖóìn-naín muà ɖé dyóɖó-dyi-kpáìn-naín nyɛɛ mɛ mɔ̀ Gáà nììn xwéɖé-dùɔ̀. Wa mɛ kɔ̃̀ ɓó páɔ̀ wáká dyúáɖò ɖekè.

²⁸ “Gáà nììn xwéɖé-dùɔ̀ bã̀à ɓɛ́ ɔ nì ɖé zɔ̃̌in nyɛɛ mɛ síìn ɖé Támà-hwɔ̀ɖɔ̀ɔ̀ mú, ɓɛ́ ɔ ké ɖé Mɛ̀wíɖíɓà-nì nìà ɖé Káɖɛ̀-hwɔ̀ɖɔ̀ɔ̀ múɛɛ wĩín mùìn, ɓɛ́ ɔ ké Íjè-nìɔ̀ wĩin pɛ̃́, ɓɛ́ ɔ ké ɖé Mɛ́ɖɛ̀tɔ̀wéɖénìà-dyòǒɔ̀ wĩín sèìn.

²⁹ “Kǎà ɓě mɛ nyu ɓóɖó nìà kɛ Éézùɖùɛ̀ɛ̀ xwéɖé-dù ɓěɔ̀ múin geɛ̀n, ɓɛ́ ɔ ké waà kɔ̃̀ɔ̀-ɖɛ̀ jǔ kánáá pū. Mɔ̄ Bounɓo Ɖɛɓíɔ́ mɔ̀ nyɔ cɛ̃à kɛ̀.

Hwɔɖɔɔ̀ gmɔ-wɔ̃̀ ɓěɔ̀ jè

³⁰ “Nyɔ ɓě ɓɛ́ wa nì ɖé hwɔɖɔɔ̀ múɛɛ síìn-naín ɓě kɛà kɛ̀. Hwɔɖɔɔ̀ wáká hwɔà ɖé xwía dyí, ɓɛ́ ɔ mɔ̀à ɓáɖáa táázĩ̀ìn ɖò kè hɔ̃dɛ̀ɖɛ̀ tã kè hm̀m̌ wɛ̃ɛ mɛ ɓéɖé gmɔ-wɔ̃̀ tã.

³¹ Gmɔ-wɔ̃̀ ɓěɔ̀ mɛ mùìn Éézùɖùɛ̀ɛ̀ xwéɖé-dù ɓěɔ̀ nyɛ́nɛ́ín. Wa mɛ mɔ̀ Wuɖuɓíín-gmɔ̀-wɔ̃̀ kè Júɖà-gmɔ̀-wɔ̃̀ ɔ kè Ɖíìváà-gmɔ̀-wɔ̃̀.

³² Ké hwɔɖɔɔ̀ wáká hwɔà ɖé dyóɖó-xwáɖáún-wóɖóìn-naínɔ̀ dyí, ɓɛ́ ɔ mɔ̀à ɓáɖáa táázĩ̀ìn ɖò kè hɔ̃dɛ̀ɖɛ̀ tã kè hm̀m̌ wɛ̃ɛ mɛ ɓéɖé gmɔ-wɔ̃̀ tã. Wa mɛ mɔ̀ Jòsé-gmɔ̀-wɔ̃̀ kè Bɛ̃́címà-gmɔ̀-wɔ̃̀ ɔ kè Dɛ̃́ìn-gmɔ̀-wɔ̃̀.

³³ Ké hwɔɖɔɔ̀ wáká hwɔà ɖé zɔ̃̌in dyí, ɓɛ́ ɔ mɔ̀à ɓáɖáa táázĩ̀ìn ɖò kè hɔ̃dɛ̀ɖɛ̀ tã kè hm̀m̌ wɛ̃ɛ mɛ ɓéɖé gmɔ-wɔ̃̀ tã. Wa mɛ mɔ̀ Símìɔ̀-gmɔ̀-wɔ̃̀ kè Ɛ́sàkà-gmɔ̀-wɔ̃̀ ɔ kè Zɛ́ɓíúɖɔ̀ùn-gmɔ̀-wɔ̃̀.

³⁴ Ké hwɔɖɔɔ̀ wáká hwɔà ɖé dyóɖó-dyi-kpáìn-naínɔ̀ dyí, ɓɛ́ ɔ mɔ̀à ɓáɖáa táázĩ̀ìn ɖò kè hɔ̃dɛ̀ɖɛ̀ tã kè hm̀m̌ wɛ̃ɛ mɛ ɓéɖé gmɔ-wɔ̃̀ tã ɖekè. Wa mɛ mɔ̀ Gáà-gmɔ̀-wɔ̃̀ kè Ásè-gmɔ̀-wɔ̃̀ ɔ kè Náfátàɖì-gmɔ̀-wɔ̃̀.

³⁵ Ké gbɛ̌ɛ̀ hìɖìì nì hwɔɖɔɔ̀ ɖeiɛɛ mɛ mɔ̀ ɓáɖáa táázĩ̀ìn hm̀m̌ kè hɔ̃dɛ̀ɖɛ̀ sɔ̃́ kè kpáɖá-nyɔ. Ké sɔ̀ìn dà ké dyúa muɛɛ, hwɔɖɔɔ̀ nyɛ́nɛ́ mɛ mɔ̀ ‘Bounɓoɔ̀ Nì Dà.’ ”