Ìzíkìò 47 - Ɓǎsɔ́ɔ̀ Báɓòɔ̀

Ní-dyù sɔ̀ ɖé Gèɖèpɔ́ɔ̀ gbǒɔ̀ múɛ

¹ Sɔ̀ìn ɓóɛ gboɛɛ, gàaɔ̀ kpa ma ḿ ɖé Gèɖèpɔ́ɔ̀ gbǒɔ̀ wĩín ɖe. Ké ḿ dyéɛ, ké ní nì ma ɓó Gèɖèpɔ́ɔ̀ gbǒɔ̀ wɔ̃ɔ̀ xwíɖíi sɔ̀ǔn, hwɔ ɖé dyóɖó-xwáɖáún-wóɖóìn-naínɔ̀ dyí, sepóɛɖé Gèɖèpɔ́ɔ̀ gbǒɔ̀ wɔ̃ gmɔ̀ìn ma ɖé dyóɖó-xwáɖáún-wóɖóìn-naínɔ̀. Níɔ̀ nì ma gbǒ-wɔ̃̀ɔ̀ wáká ɓɛ́ ɔ hwɔ ɖé zɔ̃̌in dyíɛɛ xwíɖíi sɔ̀ǔn, hwɔ ɖé sáa-kɔ̃-zàìn-gbààɔ̀ zɔ̃̌in dyí.

² Hwɛ̀ ké ɔ kpàìn ma ḿ gmɔ-wɔ̃̀ nìà ɖé xwía kɛɛ mú, ké ɔ síìn ma ḿ kɔ̃̀pã́ùn vɛ̀nɛ̀ɔ̀ píé, ké ɔ kpa ma ḿ gmɔ-wɔ̃̀ nìà ɖé dyóɖó-xwáɖáún-wóɖóìn-naínɔ̀ kɛɛ gbo. Ké ḿ dyéɛ, ké níɔ̀ nì ma gmɔ-wɔ̃̀ɔ̀ wáká ɓɛ́ ɔ hwɔ ɖé zɔ̃̌in dyíɛɛ mú sɔ̀ǔn.

³ Ké gàaɔ̀ mùìn ma ɖé dyóɖó-xwáɖáún-wóɖóìn-naínɔ̀. Ɔ ɖɛ-ɖàɓàìn-ɖùǔɔ̀ nì ma ɔ xwaún, ké ɔ ɖàɓàìn ma ɓó níɔ̀ ɓáɖáa hɔ̃dɛ̀ɖɛ̀ sɔ̃́ kè kpáɖá-nyɔ hĩinyɛ ɓaɖa-bùè. Hwɛ̀ ké ɔ kpàìn ma ḿ níɔ̀ gbo. Níɔ̀ sèìn ma ní kɔ̀ɖɔ̀-gbɛ̌ɛ̀ dyí.

⁴ Ké ɔ ɖàɓàìn ma ɓó ɓáɖáa hɔ̃dɛ̀ɖɛ̀ sɔ̃́ kè kpáɖá-nyɔ hĩinyɛ ɓaɖa-bùè ɖò ɖe, ké ɔ kpàìn ma ḿ níɔ̀ gbo ɖe. Púɛɛ, níɔ̀ sèìn ma ḿ kɔ́-dùǐ. Ké ɔ ɖàɓàìn ma ɓáɖáa hɔ̃dɛ̀ɖɛ̀ sɔ̃́ kè kpáɖá-nyɔ hĩinyɛ ɓaɖa-bùè ɖò ɖe, ké ɔ kpàìn ma ḿ níɔ̀ gbo ɖe. Púɛɛ, níɔ̀ sèìn ma ḿ gbe-zèɖè.

⁵ Ké ɔ ɖàɓàìn ma ɓáɖáa hɔ̃dɛ̀ɖɛ̀ sɔ̃́ kè kpáɖá-nyɔ hĩinyɛ ɓaɖa-bùè ɖò ɖe. Ké ɔ mɔ̀ǎ ní vɛ̀nɛ̀ ɖò ɓɛ́ ḿ se gboi nàà ɓɛ́ìn nyɛ, sepóɛɖé níɔ̀ ɖǎ ma dyá mìɔ cá. Níɔ̀ tɔ̀mɔ̀ mú mìɔ, ké ɔ mɔ̀ǎ ní ɓɛ́ nyɔ ɓɛ́ìn kɔ̃ kpáa kɛ. Ɔ mɔ̀ ní ɓɛ́ nyɔ ɖò se gboi nàà ɓɛ́ìn nyɛ.

⁶ Ké gàaɔ̀ cɛ̃ɛ ma ḿ gbo, ké ɔ ɖá, “Gǎ-dyù, má, m̀ dyé ɖɛ nìà kɛ níe?” Hwɛ̀ ké ɔ kpa ma ḿ ɖé níɔ̀ kpóóɔ̀ kɔ̃ ɖe.

⁷ Ti ɓɛ́ ḿ nì ma níɔ̀ kpóóɔ̀ kɔ̃ ɖe muɛń nyɛɛ, ḿ dyé ma cu-gɔ̃̀ kúɖúú ɖé níɔ̀ kpóó sɔ̃́ɔ̀ kɔ̃.

⁸ Ké gàaɔ̀ cɛ̃ɛ ma ḿ gbo, ké ɔ ɖá, “Ní vɛ̀nɛ̀ nìà kɛ mùìn ɖé ɓóɖóɔ̀ dyóɖó-xwáɖáún-wóɖóìn-naínɔ̀, ké ɔ mùìn ɖé Jɔ́nì-nìɔ̀ Bɔɔ-kpàɔ̀ kɔ̃, ké ɔ wáɖá Tɔ̃́ Dòùnɓìǎɔ̀ mú. Ti ɓɛ́ ɔ wáɖá dòùnɓìǎɔ̀ múɛɛ, tɔ̃́-nìɔ̀ zɛ̃̀ìn ní pɛ̀ɛ̀ mú.

⁹ Ké dɛ̀ séín ɓɛ́ níɔ̀ mùìn nyɛɛ, fɔ̀ɔ̀-ɖɛ̀ ɓáún-ɓáún mu ɖé nììn. Zimii ɓáún-ɓáún mu ɖé nììn, sepóɛɖé níɔ̀ zɛ̃̀ìn dòùnɓìǎɔ̀ tɔ̃́-nìɔ̀ ní pɛ̀ɛ̀ mú. Dɛ̀ séín níɔ̀ mùìn nyɛɛ, ɖɛ séín nì ɖéɛɛ cĩ́ ní.

¹⁰ Zimii-ɖáɓá-nyɔ̀ ɓě mu níɔ̀ wĩin dyi nyanaìn. Sɔ̀ìn ɖé Ègáɖì-hwɔ̀ɖɔ̀ɔ̀ mú muà ɖé Ènɛ̀gáɖáìn-hwɔ̀ɖɔ̀ɔ̀ múɛɛ mu kpéɖé-wáɖá-naín jǔùn. Zimii kã̀ìn séín mu ɖé nììn kà ɔ nyuà Mɛ́ɖɛ̀tɔ̀wéɖénìà-dyòǒɔ̀ kɔ̃ nìɛ̀ kɛ.

¹¹ Kɛɛ ní nì ɖé ɔ bàɖà ɓěɔ̀ gbo kè ɖé ɔ ní-dìě ɓěɔ̀ kɔ̃ɛɛ se ní pɛ̀ɛ̀ jǔɛ mu. Ɖé mu tɔ̃́-nì-naín jǔùn.

¹² Ké ɖii-cù kã̀ìn séín mu níɔ̀ kpóó sɔ̃́ɔ̀ kɔ̃ mɛìn. Wa se mí wáɖáa mu, mɔɔ ké waà tòɖò-tì se dyíin zĩ̀ɛ̌n mu. Kɛɛ wa mu ɓo ɖìè tòɖòùn ɓó dɛ̀nɛ̀ séín xwíníín, sepóɛɖé ní dyià wa gboɛɛ sɔ̀ ɖé gbǒ hwɛ̀ǐn-hwɛ̀ǐnɔ̀ mú. Ɓo ɓɛ́ wa tòɖòɛɛ mu ɖii-ɖɛ̀ jǔùn, ké waà mí mu nyɔ-dyi-kánáìn-ɖɛ̀ jǔùn.”

Ɓóɖóɔ̀ bã̀à ɓě

¹³ Ké Bounɓo Ɖɛɓíɔ́ cɛ̃ɛ ma, ké ɔ ɖá, “Ti ɓě mu ɓóɖóɔ̀ Éézùɖùɛ̀ɛ̀ xwéɖé-dù ɓaɖa-bùè sè sɔ̃́ ɓěɔ̀ múin geìn, ɓɛ́ ɔ kéá waà kɔ̃̀ɔ̀-ɖɛ̀ jǔ kánáá pūɛɛ, bã̀à ɓě ɓɛ́ ɓě ɓéɖé ɓě ké cɛ̃ɛ kɛà kɛ̀. Jòsé nììn páɔ̀ mɛ mɔ̀ dú sɔ̃́.

¹⁴ Ɓě mɛ geɛ̀n, ɓɛ́ ɔ ké wɔ̃ ɓɛ́ìn. Ḿ ɖǎa ma ɓě ɓǎ nììn ɓǎ ɓěɔ̀ nyɛ́nɛ́ín ɖáìn, ké ɔ mu ɓěɛ̀ kɔ̃̀ɔ̀-ɖɛ̀ jǔùn kánáá pū.

¹⁵ “Ɓóɖóɔ̀ bã̀àɔ̀ kɛà kɛ̀. Bã̀à ɓɛ́ ɔ nì ɖé xwía kɛɛ mɛ síìn ɖé Mɛ́ɖɛ̀tɔ̀wéɖénìà-dyòǒɔ̀ wĩín, ɓɛ́ ɔ ké ɖé Hɛ́tòɖòùn-hwɔ̀ɖɔ̀ɔ̀ mú mùìn. Sɔ̀ìn ɓóɛɛ, nìí, ɔ mɛ mùìn ɖé Ɖíɓò-Hámà-hwɔ̀ɖɔ̀ɔ̀ mú, ɓɛ́ ɔ ké Zɛ́ɖà-hwɔ̀ɖɔ̀ɔ̀ dyɛ̀ìn.

¹⁶ Sɔ̀ìn ɓó Zɛ́ɖà-hwɔ̀ɖɔ̀ɔ̀ gboɛɛ, ɔ mɛ mùìn ɖé Bèwóɖófà-hwɔ̀ɖɔ̀ɔ̀ kè Sìɓáɖáìn-hwɔ̀ɖɔ̀ɔ̀ mú. Wa mɔ̀ hwɔɖɔ ɓě ɓɛ́ wa nì ɓó Dìmásìkɔ̀-hwɔ̀ɖɔ̀ɔ̀ kè Hámà-hwɔ̀ɖɔ̀ɔ̀ pṹa kɛ. Ké bã̀àɔ̀ mɛ mu, ɓɛ́ ɔ ké Házè-Hàtíkòùn-hwɔ̀ɖɔ̀ ɓɛ́ ɔ kè Hàdyúwàɖàùn-ɓòɖòɔ̀ deìn kà bũ̌ɛɛ dyɛ̀ìn.

¹⁷ Bã̀àɔ̀ mɛ síìn ɖé dyóóɔ̀ wĩín, ɓɛ́ Házà-Énà-hwɔ̀ɖɔ̀ ɓɛ́ ɔ nìà ɖé Dìmásìkɔ̀-hwɔ̀ɖɔ̀ɔ̀ xwía kè ɖé Hámà-hwɔ̀ɖɔ̀ɔ̀ zɔ̃̌in nyɛɛ kéɛ mú sè. Kǎà bã̀à nì ɖé xwía kɛɛ mɛ nyu nìɛ̀.

¹⁸ “Bã̀à ɓɛ́ ɔ nì ɖé dyóɖó-xwáɖáún-wóɖóìn-naínɔ̀ kɛɛ mɛ síìn ɖé Házà-Énà-hwɔ̀ɖɔ̀ ɓɛ́ ɔ nìà ɓó Dìmásìkɔ̀-hwɔ̀ɖɔ̀ɔ̀ kè Hàdyúwàɖàùn-ɓòɖòɔ̀ pṹa kɛɛ mú, ɓɛ́ ɔ ké Jɔ́nì-nì ɓɛ́ ɔ nìà ɓó Gíɖèà-ɓòɖòɔ̀ kè Éézùɖùɛ̀-ɓòɖòɔ̀ pṹa kɛɛ wĩin pɛ̃́, ɓɛ́ ɔ ké ɖé Tɔ̃́ Dòùnɓìǎɔ̀ wĩín mùìn, ɓɛ́ Támà-hwɔ̀ɖɔ̀ɔ̀ kéɛ mú sè. Kǎà bã̀à ɓɛ́ ɔ nì ɖé dyóɖó-xwáɖáún-wóɖóìn-naínɔ̀ kɛɛ mɛ nyu nìɛ̀.

¹⁹ “Bã̀à ɓɛ́ ɔ nì ɖé ɓóɖóɔ̀ zɔ̃̌in nyɛɛ mɛ síìn ɖé Támà-hwɔ̀ɖɔ̀ɔ̀ mú, ɓɛ́ ɔ ké ɖé Mɛ̀wíɖíɓà-nì nìà ɖé Káɖɛ̀-hwɔ̀ɖɔ̀ɔ̀ múɛɛ wĩín mùìn, ɓɛ́ ɔ ké Íjè-nìɔ̀ wĩin pɛ̃́, ɓɛ́ ɔ ké ɖé Mɛ́ɖɛ̀tɔ̀wéɖénìà-dyòǒɔ̀ wĩín sèìn. Kǎà bã̀à ɓɛ́ ɔ nì ɖé ɓóɖóɔ̀ zɔ̃̌in nyɛɛ mɛ nyu nìɛ̀.

²⁰ “Ké bã̀à ɓɛ́ ɔ nì ɖé dyóɖó-dyi-kpáìn-naínɔ̀ kɛɛ mɛ pɛ̃́ Mɛ́ɖɛ̀tɔ̀wéɖénìà-dyòǒɔ̀ wĩin. Ɔ mɛ mu tee, ɓɛ́ ɔ ké bã̀à zĩ̀ìn kà ɖé Ɖíɓò-Hámà-hwɔ̀ɖɔ̀ɔ̀ múɛɛ dyí sí. Kǎà bã̀à ɓɛ́ ɔ nì ɖé dyóɖó-dyi-kpáìn-naínɔ̀ kɛɛ mɛ nyu nìɛ̀.

²¹ “Kà ɓě mɛ nyu kà ɓóɖóɔ̀ Éézùɖùɛ̀ɛ̀ xwéɖé-dù ɓěɔ̀ múin geɛ̀n.

²² Ɓě mɛ geɛ̀n, ɓɛ́ ɔ ké ɓě kè ɓóɖó-dù kà kò ɖò ɓěɛ̀ nyɔ ɓě ɓɛ́ wa cĩ́ ɖé ɓě hwìɛ̀ ké wa ɖǎ ɖé dyú wóɖóìn nyɛɛ kɔ̃̀ɔ̀-ɖɛ̀ jǔ kánáá pū. Ɓě mɛ kpɔ̃ wa kà ɓě nyuà Éézùɖùɛ̀-ɓòɖòɔ̀ wóɖóìn-dyù kpɔ̃ɔ kɛ. Wa mɔ̀ùn mɛ dyé pá ɖé Éézùɖùɛ̀ɛ̀ xwéɖé-dù ɓěɔ̀ hwìɛ̀ ɖekè.

²³ Xwéɖé-dùɔ̀ nyɔ kɔ̃̀ mú ɓɛ́ ɓóɖó-dù kà kò ɖòɛ̀ nyɔɔ̀ mu nììn nyɛɛ, ɖéɛ̀ ɔ mɛ dyé ɔ nììn páɔ̀. Mɔ̄ Bounɓo Ɖɛɓíɔ́ mɔ̀ nyɔ cɛ̃à kɛ̀.”