Ìzíkìò 46 - Ɓǎsɔ́ɔ̀ Báɓòɔ̀

Nyɔ ɓěɔ̀ wuɖuí-kɔ̃̀-nyɔ̀ɔ̀ kè hwɔ-dù kò-kò ɓěɔ̀ jè

¹ Ké Bounɓo Ɖɛɓíɔ́ cɛ̃ɛ ma ɖe, ké ɔ ɖá, “Kɔ̃̀pã́ùn nìà ɖé kɔ̃̀pã́ùn vɛ̀nɛ̀ɔ̀ xwíníín nyɛɛ nììn gmɔ-wɔ̃̀ ɓɛ́ ɔ hwɔà ɖé dyóɖó-xwáɖáún-wóɖóìn-naínɔ̀ dyíɛɛ mɛ kã ti séín ɓó kũ̀à-nyùìn-wè mɛ̀nɛ̌ìn-ɖò ɓěɔ̀ xwíníín. Kɛɛ wa mɛ kaà ɔ ɓó ní fɔ̀-wèɔ̀ ɓaɖa, ɔ kè ɓó Dɛ̀nɛ̀-Ɖìè-Hwèɖè-hwɔ̀ɔ̀ ɓaɖa.

² Nyɔ ɓěɔ̀ wuɖuí-kɔ̃̀-nyɔ̀ɔ̀ mɛ sɔ̀ kɔ̃̀pã́ùn vɛ̀nɛ̀ɔ̀ xwíníín, ɓɛ́ ɔ ké ɖé gmɔ-wɔ̃̀ hwɔà ɖé dyóɖó-xwáɖáún-wóɖóìn-naínɔ̀ dyíɛɛ gbǒɔ̀ sí-xwíníín vɛ̀nɛ̀ɔ̀ mú dyá, ɓɛ́ ɔ ké ɓó kɔ̃̀pã́ùn nìà ɖé xwíníín nyɛɛ gmɔ-wɔ̃̀ɔ̀ wáún dyi nyànà. Ɔ mɛ nyànà ɓó dyi ti ɓɛ́ sáa-zà-nyɔ̀ ɓěɔ̀ nì ɔ fɔ̃ɔ-sàǎ-zàìn-ɖɛ̀ɔ̀ kè ɔ gbo-kpɔ̃ìn-sàǎ-zàìn-ɖɛ̀ ɓěɔ̀ nyuɛń nyɛ. Ɔ mɛ ɓièìn ɓó gmɔ-wɔ̃̀ɔ̀ gbo, ɓɛ́ ɔ ké píé sí ɖe. Ké gmɔ-wɔ̃̀ɔ̀ mɛ ɓɔ́ kãa, ɓɛ́ hwìo ké jǔ hwɛ̀.

³ Ké ɓóɖóɔ̀ nyɔ ɓěɔ̀ mɛ ɓiè mɔ̄ Bounɓoɔ̀ ɓó gmɔ-wɔ̃̀ɔ̀ gbo ɖekè, ɓó ní fɔ̀-wèɔ̀ kè ɓó Dɛ̀nɛ̀-Ɖìè-Hwèɖè-hwɔ̀ɔ̀ ɓaɖa.

⁴ “Fɔ̃ɔ-sàǎ-zàìn-ɖɛ̀ ɓɛ́ nyɔ ɓěɔ̀ wuɖuí-kɔ̃̀-nyɔ̀ɔ̀ kéà mɔ̄ Bounɓoɔ̀ gbo dyà ɓó ní fɔ̀-wèɔ̀ ɓaɖaa mɛ mɔ̀ ɓáɖáá mɛ̀nɛ̌ìn-ɖò kè ɓáɖáá ɓíɔ́ dyúáɖò ɓɛ́ wa se kɛɛ ɖò ɓéɖéɛ.

⁵ Ké ɖii-ɖɛ̀-sàǎ-zàìn-ɖɛ̀ ɓɛ́ ɔ kéà ɓáɖáá ɓíɔ́ɔ̀ gbo ɓéɖéìn nyɛɛ mɛ mɔ̀ fáɖáɓàà gbǎ-wĩín-wè sɔ̃́. Ké ɖii-ɖɛ̀-sàǎ-zàìn-ɖɛ̀ ɓɛ́ ɔ kéà ɓáɖáá tɔ̀ɔ̀ ɓěɔ̀ gbo ɓéɖéìn nyɛɛ mɛ mɔ̀ fáɖáɓà jĩ̀ kà ɔ mɔ́ dyàà dyiɛ. Ké ɔ mɛ dyà cánáà kópò-wè ɓaɖa-bùè sè mɛ̀nɛ̌ìn-ɖò ɓó fáɖáɓàà gbǎ-wĩín-wè sɔ̃́-sɔ̃́ bìì.

⁶ Ké ɓó Dɛ̀nɛ̀-Ɖìè-Hwèɖè-hwɔ̀ɔ̀ ɓaɖaa, ɔ mɛ tò ɓìɖǐ ɓíɔ́ ɖò ɓɛ́ ɔ se kɛɛ ɖò ɓéɖéɛ, dè ɓáɖáá mɛ̀nɛ̌ìn-ɖò kè ɓáɖáá ɓíɔ́ dyúáɖò ɓɛ́ wa se kɛɛ ɖò ɓéɖéɛɛ kɔ̃.

⁷ Ké ɖii-ɖɛ̀-sàǎ-zàìn-ɖɛ̀ ɓɛ́ ɔ kéà ɓìɖǐ ɓíɔ́ gbo ɓéɖéìn nyɛɛ mɛ mɔ̀ fáɖáɓàà gbǎ-wĩín-wè sɔ̃́, ké ɔ mɛ nyu ɖɛ dyúáɖòɔ̀ ɓó ɓáɖáá ɓíɔ́ɔ̀ bìì ɖekè. Ké ɔ mɛ dyà fáɖáɓà jĩ̀ kà ɔ mɔ́ dyàà dyiɛɛ ɓó ɓáɖáá tɔ̀ɔ̀ ɓěɔ̀ bìì. Ké ɔ mɛ dyà cánáà kópò-wè ɓaɖa-bùè sè mɛ̀nɛ̌ìn-ɖò ɓó fáɖáɓàà gbǎ-wĩín-wè sɔ̃́-sɔ̃́ bìì.

⁸ Ti ɓɛ́ nyɔ ɓěɔ̀ wuɖuí-kɔ̃̀-nyɔ̀ɔ̀ muà ɖé gmɔ-wɔ̃̀ hwɔà ɖé dyóɖó-xwáɖáún-wóɖóìn-naínɔ̀ dyíɛɛ mú dyáùn wɛ̃ɛ, ɔ mɛ dyáìn ɖé gmɔ-wɔ̃̀ɔ̀ gbǒɔ̀ sí-xwíníín vɛ̀nɛ̀ɔ̀ mú, ké ɖéɛ̀ ɔ mɛ síìn ɖe.

⁹ “Ti ɓɛ́ nyɔ ɓěɔ̀ mu mɔ̄ Bounɓoɔ̀ ɓièɛ̌n dyiìn ɓó ní hwɔ-wè ɓěɔ̀ ɓaɖaa, nyɔ mɔ̀ nyɔ ɓɛ́ ɔ mu gmɔ-wɔ̃̀ nìà ɖé xwía kɛɛ mú dyáìn, ɓɛ́ ɔ ké ḿ ɓièɛɛ mɛ síìn ɖé gmɔ-wɔ̃̀ nìà ɖé zɔ̃̌in nyɛɛ gbo. Ké nyɔ mɔ̀ nyɔ ɓɛ́ ɔ dyáìn ɖé gmɔ-wɔ̃̀ nìà ɖé zɔ̃̌in nyɛ múɛɛ mɛ síìn ɖé gmɔ-wɔ̃̀ nìà ɖé xwía kɛɛ gbo. Nyɔ ɖò ní ɖá ɔ ké gmɔ-wɔ̃̀ kɔ̃̀ mú ɔ dyáìn nyɛɛ síìn ɖe, kɛɛ nyɔ ɖò-ɖò séín mɛ mu dyúa déín cá, ɓɛ́ wa ké sí.

¹⁰ Wa dyi ɖé dyá ní, wa kè waà wuɖuí-kɔ̃̀-nyɔ̀ɔ̀ mɛ dyá. Ké wa dyi sí ní, wa kè ɔ mɛ sí.

¹¹ Ɓó ní hwɔ séín ɓěɔ̀ ɓaɖaa, ɖii-ɖɛ̀-sàǎ-zàìn-ɖɛ̀ ɓɛ́ ɓě ké ɓìɖǐ ɓíɔ́ ɖò gbo ɓéɖéìn nyɛɛ mɛ mɔ̀ fáɖáɓàà gbǎ-wĩín-wè sɔ̃́. Ké ɔ nyɔ ɓě ké ɓáɖáá ɓíɔ́ ɖò gbo ɓéɖéìn nyɛɛ mɛ mɔ̀ fáɖáɓàà gbǎ-wĩín-wè sɔ̃́ ɖekè. Ké fáɖáɓà jĩ̀ kà ɓě mɔ́ ɓáɖáá tɔ̀ɔ̀ ɓěɔ̀ gbo ɓéɖéɛ̀n dyiɛɛ, ɖéɛ̀ ɓě mɛ dyà. Ké ɓě mɛ dyà cánáà kópò-wè ɓaɖa-bùè sè mɛ̀nɛ̌ìn-ɖò ɓó fáɖáɓàà gbǎ-wĩín-wè sɔ̃́-sɔ̃́ bìì.

¹² “Ti ɓɛ́ nyɔ ɓěɔ̀ wuɖuí-kɔ̃̀-nyɔ̀ɔ̀ mu hwòɖǒ-wáɖáá-nyìǐ-ɖɛ̀ mɔ̄ Bounɓoɔ̀ gbo dyàùn wɛ̃ɛ, kɛbì ɔ mɛ mɔ̀ fɔ̃ɔ-sàǎ-zàìn-ɖɛ̀ mɔɔ gbo-kpɔ̃ìn-sàǎ-zàìn-ɖɛ̀ kɛɛ, nìí, gmɔ-wɔ̃̀ hwɔà ɖé dyóɖó-xwáɖáún-wóɖóìn-naínɔ̀ dyíɛɛ mɛ kaà ɓó ɔ bìì, ké ɔ mɛ nyu ɔ sáa-zàìn-ɖɛ̀ɔ̀ kà ɔ nyuà nyuɛ ɓó ní fɔ̀-wèɔ̀ ɓaɖa kɛ. Sɔ̀ìn ɓóɛ gboɛɛ, nìí, ɔ mɛ sí, ké ɔ ɖǎ sí ní, gmɔ-wɔ̃̀ɔ̀ mɛ kã.”

Wé séínɛ̀ sáa-zàìn-ɖɛ̀

¹³ Ké Bounɓoɔ̀ cɛ̃ɛ ma ɖe, ké ɔ ɖá, “Ɓě ɓéɖé ɓɛ́ ɓě ké ɓáɖáá ɖò ɓɛ́ ɔ nyuá zɔ̃ dyúáɖò, ɓɛ́ ɔ se kɛɛ ɖò ɓéɖéɛɛ dyà, ɓó wé kè wé xwíníín, ɓɛ́ ɔ ké fɔ̃ɔ-sàǎ-zàìn-ɖɛ̀ jǔ ɓó ḿ bìì. Ɓě mɛ nyuɛ náa ɓó gànà-kṹún ti séín.

¹⁴ Ké ɓě mɛ tò ɓáɖááɔ̀ kè ɖii-ɖɛ̀-sàǎ-zàìn-ɖɛ̀ ɓó gànà-kṹún ti séín. Ɖii-ɖɛ̀-sàǎ-zàìn-ɖɛ̀ɔ̀ mɛ mɔ̀ fáɖáɓàà kópò-wè ɓaɖa-bùè sè tã kè gbɔ ɔ kè cánáà kópò-wè hm̀m̌, ɓɛ́ cánáɔ̀ ké fáɖáɓàɔ̀ tèìn. Ɖɛ nìà kɛ mɔ̀ ɖii-ɖɛ̀-sàǎ-zàìn-ɖɛ̀ ɓɛ́ ɓě ɓéɖé ɓě ké nyu kánáá pū ɓó mɔ̄ Bounɓoɔ̀ bììɛ.

¹⁵ Kǎà ɓě ɓéɖé ɓɛ́ ɓě ké ɓáɖáá mɔ̀à fɔ̃ɔ-sàǎ-zàìn-ɖɛ̀ɔ̀ kɛ kè ɖii-ɖɛ̀-sàǎ-zàìn-ɖɛ̀ɔ̀ tò ɓó gànà-kṹún ti séín.”

Nyɔ ɓěɔ̀ wuɖuí-kɔ̃̀-nyɔ̀ɔ̀ kè ɓóɖóɔ̀ jè

¹⁶ Ké Bounɓo Ɖɛɓíɔ́ cɛ̃ɛ ma ɖe, ké ɔ ɖá, “Ɔ jǔ ké ɓěɛ̀ wuɖuí-kɔ̃̀-nyɔ̀ ɖò dyi ɔ nììn páɔ̀ ɖò ɖé zà, ké ɔ dyiɛ ɔ dyú-gàà ɖò nyí ní, nìí, ɔ mɔ̀ ɔ dyú-gààɔ̀ kɔ̃̀ɔ̀-ɖɛ̀ ɖé ɔ dúí-sè-ɖɛ̀ɔ̀ hwìɛ̀.

¹⁷ Kɛɛ ɔ dyiɛ ɔ gbo-nì-nyɔ̀ ɖò nyí ní, nìí, ɔ mɛ mɔ̀ gbo-nì-nyɔ̀ɔ̀ kɔ̃̀ɔ̀-ɖɛ̀ tee ɓɛ́ ɔ ké ɖɛ-séín-ɖe-tò-zɔ̃̀ɔ̀ dyɛ̀ìn. Sɔ̀ìn ɓóɛ gboɛɛ, nìí, ɔ mɔ̀ nyɔ-wuɖuí-kɔ̃̀-nyɔ̀ɔ̀ kɔ̃̀ɔ̀-ɖɛ̀ ɖe. Ɔ dyú-gàà ɖòùn mɔ̀ nyɔ dúí-sè-ɖɛ̀ɔ̀ ɓɛ́ìn xwa sèɛ̀.

¹⁸ Ɓěɛ̀ wuɖuí-kɔ̃̀-nyɔ̀ ɖò ní ɖá ɔ ké nyɔ ɖò nììn pá ɔ gana xwa zàìn. Pá ɓɛ́ ɔ nyí ɔ dyú-gàà ɓěɛɛ mɛ mɔ̀ ɔ mìɔùn nììn páɔ̀ ɖò. Ɔ mɛ ɓɔ́ ní nyɔ ɓěɔ̀ ɖò nììn pá ɔ xwa zàà.”

Gèɖèpɔ́ɔ̀ gbǒɔ̀ ɖɛ-pĩ̀ìn-naínɔ̀ jè

¹⁹ Sɔ̀ìn ɓóɛ gboɛɛ, gàaɔ̀ kpa ma ḿ ɓó sáa-zà-nyɔ̀ ɓěɔ̀ ɓí-dyù ɓě nìà ɖé kɔ̃̀pã́ùn nìà ɖé kɔ̃̀pã́ùn vɛ̀nɛ̀ɔ̀ xwíníín nyɛɛ mú-dyáìn-naínɔ̀ gbo. Ɔ mɔ̀ hwɔ ɓó gmɔ-wɔ̃̀ nìà ɖé zɔ̃̌in nyɛɛ wáún dyí. Ké hwɔ ɖé ɓí-dyù ɓěɔ̀ dyóɖó-dyi-kpáìn-naínɔ̀ dyíɛɛ, ḿ dyé ma ɖé pá ɖò.

²⁰ Ké gàaɔ̀ cɛ̃ɛ ma ḿ gbo, ké ɔ ɖá, “Dà nìà kɛ mɔ̀ pá kɔ̃̀ mú ɓɛ́ sáa-zà-nyɔ̀ ɓěɔ̀ ké kpa-pɛ́ɛ̀ìn-sàǎ-zàìn-ɖɛ̀ ɓěɔ̀ kè nàmàǔn-sàǎ-zàìn-ɖɛ̀ ɓěɔ̀ suaɖɛ̀ɔ̀ pĩ̀ìn nyɛ, ké ɖéɛ̀ wa ké ɖii-ɖɛ̀-sàǎ-zàìn-ɖɛ̀ ɓěɔ̀ bɛɖɛɛ̀ɔ̀ nyùìn, ɓɛ́ wa ní kɔ̃̀ ɖà ɖɛ hwɛ̀ǐn-hwɛ̀ǐn ɓěa ɖò ɖé kɔ̃̀pã́ùn vɛ̀nɛ̀ɔ̀ mú síìn ɖé nyɔ ɓěɔ̀ gbo, ɓɛ́ ɖɛ gbà ɖò ní kɔ̃̀ ɖà nyɔ ɓěɔ̀ gbo kpá.”

²¹ Sɔ̀ìn ɓóɛ gboɛɛ, gàaɔ̀ síìn ma ḿ ɖé kɔ̃̀pã́ùn vɛ̀nɛ̀ɔ̀ mú, ké ɔ kpa ma ḿ ɖé kɔ̃̀pã́ùnɔ̀ gã hĩinyɛɔ̀ gbo. Ké kɔ̃̀pã́ùn mɛ́nɛ́ɛ́ ɓě nì ma ɖé kɔ̃̀pã́ùn vɛ̀nɛ̀ɔ̀ gã hĩinyɛɔ̀ gbo.

²² Wa ɖò-ɖòɛ̀ tɔ̀mɔ̀-tɔ̀mɔ̀ mɔ̀ ma ɓáɖáa ɓaɖa-bùè sè dyúáɖò kè jìì-ɓàɖàǎ hm̀m̌ kè kɛ̀ɖɛ̀, ké ɖò-ɖòɛ̀ xwíɖí-kù mɔ̀ ma ɓáɖáa mɛ̀nɛ̌ìn-tã kè jìì-ɓàɖàǎ mɛ̀nɛ̌ìn-ɖò. Wa hĩinyɛɔ̀ ɓɛ́ìn ma wɔ̃ nyɛ̀nɛ̀ɛ̀.

²³ Ké sɔ́ɔ́-dè-dè nì ma kɔ̃̀pã́ùn hĩinyɛɔ̀ wĩin, ké nyɛ-dyí-po-naín ɓě nì ma ɓó sɔ́ɔ́-dè-dèɔ̀ xwíɖíi.

²⁴ Ké gàaɔ̀ ɖá, “Dà nìà kɛ mɔ̀ ɖɛ-pĩ̀ìn-naín ɓě ɓɛ́ nyɔ ɓě ɓɛ́ wa nyuà Gèɖèpɔ́ɔ̀ gbǒɔ̀ mú kũ̀à kɛɛ mɛ pĩ̀ìn sáa-zàìn-ɖɛ̀ ɓě ɓɛ́ nyɔ ɓěɔ̀ dyà kɛ.”