Ìzíkìò 45 - Ɓǎsɔ́ɔ̀ Báɓòɔ̀

Ɓóɖóɔ̀ wáká ɓɛ́ ɔ mɔ̀ Bounɓoɔ̀ nììn kɔ̃̀ɔ̀-ɖɛ̀ kɛ

¹ Ké Bounɓoɔ̀ kpa ma wuɖu dyúa, ké ɔ ɖá, “Ti ɓɛ́ ɓě mu ɓóɖóɔ̀ Éézùɖùɛ̀ɛ̀ xwéɖé-dù ɓěɔ̀ múin geìn, ɓɛ́ ɔ ké waà kɔ̃̀ɔ̀-ɖɛ̀ jǔɛɛ, nìí, ɓě mɛ po gbɛ̌ɛ̀ ɖò wáká ɓó mɔ̄ Bounɓoɔ̀ bìì, ɓɛ́ ɔ ké gbɛ̌ɛ̀ ɓɛ́ ɔ hwɛ̀ múɛɛ jǔ. Páɔ̀ tɔ̀mɔ̀-tɔ̀mɔ̀ mɛ mɔ̀ ɓáɖáa táázĩ̀ìn mɛ̀nɛ̌ìn-sɔ̃́ kè hɔ̃dɛ̀ɖɛ̀ sɔ̃́ kè kpáɖá-nyɔ sɔ̃́ ɓaɖa-bùè, ké ɔ xwíɖí-kù mɛ mɔ̀ ɓáɖáa táázĩ̀ìn hm̀m̌ kè hɔ̃dɛ̀ɖɛ̀ mɛ̀nɛ̌ìn-tã. Páɔ̀ dà séín mɛ mɔ̀ pá hwɛ̀ǐn-hwɛ̀ǐn.

² Páɔ̀ wáká kɔ̃̀ tɔ̀mɔ̀-tɔ̀mɔ̀ zià ɓáɖáa hɔ̃dɛ̀ɖɛ̀ ɖò kè kpáɖá-nyɔ sɔ̃́ sè hm̀m̌ kè jìì-ɓàɖàǎ mɛ̀nɛ̌ìn-ɖò kè ɓɛ́ìn-hwìɛ̀ kɔ̃, ké ɔ xwíɖí-kù zià ɓáɖáa hɔ̃dɛ̀ɖɛ̀ ɖò kè kpáɖá-nyɔ sɔ̃́ sè hm̀m̌ kè jìì-ɓàɖàǎ mɛ̀nɛ̌ìn-ɖò kè ɓɛ́ìn-hwìɛ̀ kɔ̃ɛɛ mɛ nì ɓó ní gbǒɔ̀ bìì. Ké ɓáɖáa ɓaɖa-bùè sè hĩinyɛ kè ɓɛ́ìn-hwìɛ̀ mɛ mɔ̀ pá ké gbǒɔ̀ kɔ̃̀pã́ùn vɛ̀nɛ̀ɔ̀ ɖei nìɛ.

³ Ké ɖé gbɛ̌ɛ̀ hwɛ̀ǐn-hwɛ̀ǐnɔ̀ múɛɛ, wa mɛ ɖàɓàìn ɓó pá kɔ̃̀ tɔ̀mɔ̀-tɔ̀mɔ̀ mɔ̀ ɓáɖáa táázĩ̀ìn mɛ̀nɛ̌ìn-sɔ̃́ kè hɔ̃dɛ̀ɖɛ̀ sɔ̃́ kè kpáɖá-nyɔ sɔ̃́ ɓaɖa-bùè, ké ɔ xwíɖí-kù mɔ̀ ɓáɖáa táázĩ̀ìn sɔ̃́ kè hɔ̃dɛ̀ɖɛ̀ mɛ̀nɛ̌ìn-hĩinyɛ kɛ, ké ɓóɛ̀ wa mɛ po ní gbǒɔ̀. Ɔ mɔ̀ pá zi mú hwɛ̀ǐn.

⁴ Ɔ mɛ mɔ̀ ɓóɖóɔ̀ nììn pá hwɛ̀ mú kɛ. Ɔ mɛ kpá wáká ɓó sáa-zà-nyɔ̀ ɓě ɓɛ́ wa xwɛ̃́ìn mɔ̄ Bounɓoɔ̀ bũ̌in, ɓɛ́ wa dyi m̀ bìì kũ̀à nyu ɖé ní gbǒɔ̀ múɛɛ bìì. Ɔ mɛ mɔ̀ pá hwɛ̀ǐn-hwɛ̀ǐn ɓó sáa-zà-nyɔ̀ ɓěɔ̀ gbǒ ɓěɔ̀ kè ní gbǒɔ̀ bìì.

⁵ Ké pá hwɛ̀ǐn-hwɛ̀ǐn kɔ̃̀ tɔ̀mɔ̀-tɔ̀mɔ̀ mɔ̀à ɓáɖáa táázĩ̀ìn mɛ̀nɛ̌ìn-sɔ̃́ kè hɔ̃dɛ̀ɖɛ̀ sɔ̃́ kè kpáɖá-nyɔ sɔ̃́ ɓaɖa-bùè, ké ɔ xwíɖí-kù mɔ̀à ɓáɖáa táázĩ̀ìn sɔ̃́ kè hɔ̃dɛ̀ɖɛ̀ mɛ̀nɛ̌ìn-hĩinyɛ kɛɛ fáún-fáún mɛ kpá wáká ɓó Ɖíìváà-nyɔ̀ ɓě ɓɛ́ wa mɔ̀à kũ̀à ɓě ɓá ní gbǒɔ̀ dyíɛɛ nyu-nyɔ̀ kɛɛ bìì, ɓɛ́ ɔ ké wa nììn kɔ̃̀ɔ̀-ɖɛ̀ jǔ, ɓɛ́ wa ké ɖé hwɔɖɔ ɓě wa ké mú cĩ́ɛɛ dè.

⁶ “Ké pá ɖò mɛ nì ɓó gbɛ̌ɛ̀ mɔ̀à pá hwɛ̀ǐn-hwɛ̀ǐnɔ̀ kɛɛ wáún ɖe. Wa mɛ dè ɓó hwɔɖɔ ɖò ɓó Éézùɖùɛ̀-dyù tɔ̀ɔ̀ séín ɓěɔ̀ bìì, ɓɛ́ nyɔ mɔ̀ nyɔ kɔ̃̀ hwòɖǒ mɔ́ ɖé cĩ́ɛ dyiɛɛ ké ɖé cĩ́. Páɔ̀ tɔ̀mɔ̀-tɔ̀mɔ̀ mɛ mɔ̀ ɓáɖáa táázĩ̀ìn mɛ̀nɛ̌ìn-sɔ̃́ kè hɔ̃dɛ̀ɖɛ̀ sɔ̃́ kè kpáɖá-nyɔ sɔ̃́ ɓaɖa-bùè, ké ɔ xwíɖí-kù mɛ mɔ̀ ɓáɖáa táázĩ̀ìn dyúáɖò kè hɔ̃dɛ̀ɖɛ̀ hĩinyɛ kè kpáɖá-nyɔ sɔ̃́ ɓaɖa-bùè.

Nyɔ-wuɖuí-kɔ̃̀-nyɔ̀ɔ̀ nììn pá

⁷ “Ké wa mɛ po pá sɔ̃́ wáká ɓó nyɔ ɓěɔ̀ wuɖuí-kɔ̃̀-nyɔ̀ɔ̀ bìì. Ɖò mɛ síìn ɖé gbɛ̌ɛ̀ mɔ̀à mú-hwɛ̀-pàɔ̀ kè hwɔɖɔɔ̀ kɛɛ bã̀à nìà ɖé dyóɖó-dyi-kpáìn-naínɔ̀ kɛɛ gbo, ɓɛ́ ɔ ké ɖé ɓóɖóɔ̀ sèìn-naín nyini. Ké wáká tɔ̀ɔ̀ mɛ síìn ɖé gbɛ̌ɛ̀ mɔ̀à mú-hwɛ̀-pàɔ̀ kè hwɔɖɔɔ̀ kɛɛ bã̀à nìà ɖé dyóɖó-xwáɖáún-wóɖóìn-naínɔ̀ kɛɛ gbo, ɓɛ́ ɔ ké ɖé ɓóɖóɔ̀ sèìn-naín nyini ɖekè. Ɔ páɔ̀ mɛ pɛ̃́ Éézùɖùɛ̀-xwèɖè-dù ɓěɔ̀ ɖò nììn pá wĩin.

⁸ Pá ɓěɔ̀ mɛ mɔ̀ ní nyɔ ɓě mɔ̀à Éézùɖùɛ̀-dyù ɓěɔ̀ kɛɛ wuɖuí-kɔ̃̀-nyɔ̀ɔ̀ nììn kɔ̃̀ɔ̀-ɖɛ̀ ɖé ɓóɖóɔ̀ kɔ̃. Ɔ mɛ ɓɔ́ wa dyi pĩ́àà, kɛɛ ɔ mɛ táà wa dyi, ɓɛ́ waà xwéɖé-dù ɖò-ɖò ɓěɔ̀ ké wa nììn pá wuɖuí kɔ̃̀.”

Gma ɓě ɓá nyɔ-wuɖuí-kɔ̃̀-nyɔ̀ jè dyíɛ

⁹ Ké Bounɓo Ɖɛɓíɔ́ cɛ̃ɛ ma ɖe, ké ɔ ɖá, “Kǎà ɔ mɛ jĩ̀ǎo, ɓě mɔ̀à Éézùɖùɛ̀-dyù ɓěɔ̀ wuɖuí-kɔ̃̀-nyɔ̀ ɓěɛ! Ɓě táà nyɔ-ɖɛ-gana-xwa-zàìn-zàìn kè nyɔ-dyi-pĩ́à-pĩ́à dyi. Ɓě nyu jǎà-ɖɛ̀ kè dyí-sɛ́ɖɛ́ìn-ɖɛ̀. Ɓě táà ní nyɔ ɓěɔ̀ kúmú-kúmú dyi.

¹⁰ “Ɓě mɛ nyùìn pṹá kè ɖɛ-mú-ɖàɓàìn-ɖɛ̀ jɛ́ɛ́ɔ̀ kũ̀à mú. Ɔ hwɔìn kà ífà kè báà.

¹¹ Ífàɔ̀ kè báàɔ̀ xwíníín-sɔ̀-ɖɛ̀ mɛ ɓɛ́ìn wɔ̃. Ɖɛ sɔ̀ ɖé ómɛ̀ xwíníín nyɛɛ mɛ mɔ̀ ífà-wè ɓaɖa-bùè, ké ɖɛ sɔ̀ ɖé ómɛ̀ xwíníín nyɛɛ mɛ mɔ̀ báà-wè ɓaɖa-bùè ɖekè. Ómɛ̀ɔ̀ mɛ mɔ̀ ɖɛ-mú-ɖàɓàìn-ɖɛ̀ jɛ́ɛ́ɔ̀.

¹² Kà ɓěɛ̀ wíɖíɔ̀ xwa-dɔ̃̌-dɔ̃̌ ké nìɛ̀ nyuɛɛ kɛà kɛ̀. Géwàɖà-pĩ̀à kpáɖá-nyɔ ɖò mɛ mɔ̀ cɛ́kò dyúáɖò, ké cɛ́kò kpáɖá-nyɔ tã mɛ mɔ̀ mínà dyúáɖò.

¹³ “Kà ɓě ké ɓěɛ̀ nyíí-ɖɛ̀ ɓěɔ̀ ḿ nyíɛ nyuɛɛ kɛà kɛ̀. Ɓě mɛ zà ífà-wè dyúáɖòɔ̀ wáká mɛ̀nɛ̌ìn-ɖò nììn ɖé hwítìɛ̀ ómɛ̀-wè ɖò-ɖò mú. Ké ɓě mɛ zà ífà-wè dyúáɖòɔ̀ wáká mɛ̀nɛ̌ìn-ɖò nììn ɖé báɖèɛ̀ ómɛ̀-wè ɖò-ɖò mú.

¹⁴ Ké ɓá ɔ́ɖè-cànà jè dyíɛɛ, ɓě mɛ zà báà-wè dyúáɖòɔ̀ wáká ɓaɖa-bùè nììn ɖé kóɔ̀-wè ɖò-ɖò mú. Kóɔ̀-wè dyúáɖò mɔ̀ báà-wè ɓaɖa-bùè mɔɔ ómɛ̀-wè dyúáɖò, sepóɛɖé báà-wè ɓaɖa-bùè mɔ̀ ómɛ̀-wè dyúáɖò.

¹⁵ Ké sɔ̀ìn ɖé ɓáɖáá hɔ̃dɛ̀ɖɛ̀ sɔ̃́ séín hwìɛ̀ ní, ɓě mɛ zà ɖé ɓáɖáá dyúáɖò sɔ̀ìn ɖé Éézùɖùɛ̀-dyù ɓěɔ̀ nyúà-ɖɛ̀ ɓěɔ̀ hwìɛ̀. Ɖɛ ɓě nìà kɛ mɛ mɔ̀ nyíí-ɖɛ̀ ɓó ɖii-ɖɛ̀-sàǎ-zàìn-ɖɛ̀ ɓě kè fɔ̃ɔ-sàǎ-zàìn-ɖɛ̀ ɓě ɔ kè gbo-kpɔ̃ìn-sàǎ-zàìn-ɖɛ̀ ɓě bìì, ɓɛ́ wa ké nyɔ ɓěɔ̀ nàmàǔn ɓěɔ̀ kɔ̃in-ɓáìn-ɖɛ̀ jǔ.

¹⁶ Nyɔ séín ɓě nì ɖé ɓóɖóɔ̀ kɔ̃ɛɛ mɛ nyí ɖɛ nìà kɛ ɓě mɔ̀à Éézùɖùɛ̀-ɓòɖòɔ̀ wuɖuí-kɔ̃̀-nyɔ̀ ɓěɛ.

¹⁷ Kɛɛ ɓě mɔ̀ nyɔ ɓéɖé ɓɛ́ ɓě ké fɔ̃ɔ-sàǎ-zàìn-ɖɛ̀ ɓěɔ̀ kè ɖii-ɖɛ̀-sàǎ-zàìn-ɖɛ̀ ɓěɔ̀ ɔ kè náá-ɖɛ̀-sàǎ-zàìn-ɖɛ̀ ɓěɔ̀ tò ɓó hwɔ-wè ɓěɔ̀ ɓaɖa. Hwɔ-wè ɓěɔ̀ mɔ̀ Dɛ̀nɛ̀-Ɖìè-Hwèɖè-hwɔ̀ ɓěɔ̀ kè ní fɔ̀-wè ɓěɔ̀ ɔ kè hwɔ tɔ̀ɔ̀ séín ɓě ɖǎ dyi dè ɓó Éézùɖùɛ̀ɛ̀ gbǒ-xwíníínɔ̀ bììɛ. Ɓě mɔ̀ nyɔ mɛ tò nàmàǔn-sàǎ-zàìn-ɖɛ̀ ɓěɔ̀ kè ɖii-ɖɛ̀-sàǎ-zàìn-ɖɛ̀ ɓěɔ̀ kè fɔ̃ɔ-sàǎ-zàìn-ɖɛ̀ ɓěɔ̀ ɔ kè gbo-kpɔ̃ìn-sàǎ-zàìn-ɖɛ̀ ɓěɔ̀, ɓɛ́ wa ké Éézùɖùɛ̀ɛ̀ gbǒ-xwíníínɔ̀ nàmàǔn ɓěɔ̀ kɔ̃in-ɓáìn-ɖɛ̀ jǔ. Mɔ̄ Bounɓo Ɖɛɓíɔ́ mɔ̀ nyɔ cɛ̃à kɛ̀.”

Hwɔ ɓěɔ̀ jè

¹⁸ Ké Bounɓo Ɖɛɓíɔ́ cɛ̃ɛ ma, ké ɔ ɖá, “Ɓó dɛ̀nɛ̀ kĩ́ín-kĩ́ínɔ̀ wé kĩ́ín-kĩ́ínɔ̀ ɓaɖaa, ɓě mɛ ɖú ɓìɖǐ ɓíɔ́ ɓɛ́ ɔ se kɛɛ ɖò ɓéɖéɛɛ dyí, ɓɛ́ ɓě kéɛ sáa zàìn, ɓɛ́ ɔ ké ní gbǒɔ̀ mú-hwɔ-ɖɛ̀ jǔ.

¹⁹ Ké sáa-zà-nyɔ̀ vɛ̀nɛ̀ɔ̀ mɛ ɖú sáa-zàìn-ɖɛ̀ɔ̀ nyɔmɔɔ̀ ɖò dyí, ɓɛ́ ɔ kéɛ ɓóɛ ní gbǒɔ̀ xwìɖì-tɛ̃́ín ɓěɔ̀ kè sáa-kɔ̃-zàìn-gbààɔ̀ gbɛ̌ɛ̀ sɔ̃́ nììnɔ̀ gã hĩinyɛɔ̀ ɔ kè kɔ̃̀pã́ùn nìà ɖé kɔ̃̀pã́ùn vɛ̀nɛ̀ɔ̀ xwíníín nyɛɛ gmɔ-wɔ̃̀ ɓěɔ̀ cu ɓěɔ̀ bũ̌ po.

²⁰ Ké ɓě mɛ nyu ɖɛ dyúáɖòɔ̀ ɓó dɛ̀nɛ̀ɔ̀ wé mɛ̀nɛ̌ìn-sɔ̃́ nììnɔ̀ ɓaɖa, ɓó nyɔ mɔ̀ nyɔ ɓɛ́ ɔ ɖǎ nàmàǔn nyu dyììn ɖé ɖɛ-xwa-bĩ-bĩ mɔɔ seó ɖei dyé-dyé múɛɛ bìì, ɓɛ́ dyììn ɖéɛ múɛɛ, ɓě ké se-mú-hwɛ̀-ɖɛ̀ kɔ̃in-ɓáìn-ɖɛ̀ nyu ɓó ní gbǒɔ̀ jè.

²¹ “Ké ɓó dɛ̀nɛ̀ kĩ́ín-kĩ́ínɔ̀ wé ɓaɖa-bùè sè hĩinyɛ nììnɔ̀ ɓaɖaa, ɓě mɛ pa Zĩ̀ìn-Kɔ̃in-hwɔ̀ɔ̀. Ɓě mɛ ɖi bɛɖɛɛ̀ se dyáìn-ɖɛ̀ gbo nìɛɛ ɓó wé mɛ̀nɛ̌ìn-sɔ̃́ xwíníín.

²² Ké ɓó wé kĩ́ín-kĩ́ínɔ̀ ɓaɖaa, ɓěɛ̀ wuɖuí-kɔ̃̀-nyɔ̀ɔ̀ mɛ zàìn ɓìɖǐ ɓíɔ́ ɖò sáa ɓó ɔ mìɔùn kè ɓěɛ̀ nàmàǔn jè.

²³ Ké ɓó hwɔ-wè mɛ̀nɛ̌ìn-sɔ̃́ ɓěa ɖò-ɖò ɓaɖaa, ɔ mɛ zàìn ɓìɖǐ ɓíɔ́ mɛ̀nɛ̌ìn-sɔ̃́ kè ɓáɖáá ɓíɔ́ mɛ̀nɛ̌ìn-sɔ̃́ sáa ɖé mɔ̄ Bounɓoɔ̀ gbo, ɓɛ́ wa ké fɔ̃ɔ-sàǎ-zàìn-ɖɛ̀ jǔ. Wa mɛ ɓɔ́ kɛɛ ɖò ɓéɖéɛ. Ké ɔ mɛ zàìn vã́á dyúáɖò sáa ɓó wé séín, ɓɛ́ ɔ ké nàmàǔn-sàǎ-zàìn-ɖɛ̀ jǔ.

²⁴ Ké ɔ mɛ tò fáɖáɓàà gbǎ-wĩín-wè sɔ̃́ ɓó ɓìɖǐ ɓíɔ́ ɓěɔ̀ kè ɓáɖáá ɓíɔ́ ɓěɔ̀ ɖò-ɖò bìì, ɔ kè ɔ́ɖè-cànàà kópò-wè ɓaɖa-bùè sè mɛ̀nɛ̌ìn-ɖò ɓó fáɖáɓàà gbǎ-wĩín-wè sɔ̃́-sɔ̃́ bìì, ɓɛ́ ɔ ké ɖii-ɖɛ̀-sàǎ-zàìn-ɖɛ̀ jǔ.

²⁵ “Ké ɓó dɛ̀nɛ̀ɔ̀ mɛ̀nɛ̌ìn-sɔ̃́ nììnɔ̀ wé ɓaɖa-bùè sè hm̀m̌ nììn mɔ̀à Ɓeè-Dyù-hwɔ̀ɔ̀ pa-tìɛɛ, ɔ mɛ tò hwɔìn-ɖɛ̀ dyúáɖòɔ̀ ɖò ɓó nàmàǔn-sàǎ-zàìn-ɖɛ̀ kè fɔ̃ɔ-sàǎ-zàìn-ɖɛ̀ ɔ kè ɖii-ɖɛ̀-sàǎ-zàìn-ɖɛ̀ ɓěɔ̀ bìì, ɓó wé mɛ̀nɛ̌ìn-sɔ̃́ xwíníín.”