Ìzíkìò 44 - Ɓǎsɔ́ɔ̀ Báɓòɔ̀

Nyɔ ɖò mɛ ɓɔ́ kɔ̃̀pã́ùn vɛ̀nɛ̀ɔ̀ gmɔ-wɔ̃̀ nìà ɖé dyóɖó-xwáɖáún-wóɖóìn-naínɔ̀ kɛɛ mú zĩ̀ɛ̀n

¹ Sɔ̀ìn ɓóɛ gboɛɛ, gàaɔ̀ kpa ma ḿ ɖé Gèɖèpɔ́ɔ̀ gbǒɔ̀ kɔ̃̀pã́ùn vɛ̀nɛ̀ɔ̀ gmɔ-wɔ̃̀ nìà ɖé dyóɖó-xwáɖáún-wóɖóìn-naínɔ̀ kɛɛ gbo ɖe. Gmɔ-wɔ̃̀ɔ̀ kã ma ní.

² Ké Bounɓoɔ̀ cɛ̃ɛ ma ḿ gbo, ké ɔ ɖá, “Gmɔ-wɔ̃̀ nìà kɛ mu kà kãùn kánáá pū. Ɔ se kaǎ mu, ké nyɔ ɖò se ɖéɛ mú zĩ̀ɛ̌n mu, sepóɛɖé mɔ̄ Bounɓo mɔ̀à Éézùɖùɛ̀ Gèɖèpɔ́ɔ̀ kɛɛ ɖǎ ɖéɛ mú zĩ̀ìn. Ɔ jèɛɛ, ɔ mu kãuń sèìn.

³ Nyɔ-wuɖuí-kɔ̃̀-nyɔ̀ɔ̀ ɖòùn mɔ̀ nyɔ ɓɛ́ìn ɖé dya dèɖěɛ, ɓɛ́ ɔ ké ɖɛ ɖi ɓó ḿ dyúa. Ɔ mɔ̀ nyɔ ɓɛ́ìn ɖé gmɔ-wɔ̃̀ɔ̀ gbǒɔ̀ sí-xwíníín vɛ̀nɛ̀ɔ̀ mú dyáìn, ɓɛ́ ɔ ké ɖé síìn.”

Gma ɓě ɓá Gèɖèpɔ́ɔ̀ gbǒɔ̀ mú dyá jè dyíɛ

⁴ Sɔ̀ìn ɓóɛ gboɛɛ, gàaɔ̀ kpàìn ma ḿ ɖé gmɔ-wɔ̃̀ nìà ɖé xwía kɛɛ mú, ké ɔ kpa ma ḿ ɖé Gèɖèpɔ́ɔ̀ gbǒɔ̀ dyúa. Ké ḿ gmɔ̀ ma ɖé, ké Bounɓoɔ̀ dĩ́ín-dĩ̀ìnɔ̀ dyíìn ma ɖé ɔ gbǒɔ̀ múin. Púɛɛ, ḿ jìɖǐ ma ɓó ɓíɖíi dyi.

⁵ Ké Bounɓoɔ̀ cɛ̃ɛ ma ḿ gbo, ké ɔ ɖá, “Gǎ-dyù, m̀ mɛ dè dyéɖéi, ké m̀ mɛ dè ɖùǔ dyi nɔ̀mɔ̀ dyíin, ɓɛ́ m̀ ké ɖɛ séín ɓě ní muà m̀ gbo cɛ̃ìn ɓá gma séín ɓě ɓá ní gbǒɔ̀ jè dyíɛɛ múin wɔ̃́. M̀ mɛ dèɛ̀ dyéɖé gbo nɔ̀mɔ̀ dyíin ɓá nyɔ ɓě ɓéɖé kpé wa ké ɖé ní gbǒɔ̀ mú dyáa kè nyɔ séín ɓě se kpé ɓéɖé ɓɛ́ wa ké ɖé dyáa jè dyí.

⁶ “M̀ mɛ cɛ̃ɛ Éézùɖùɛ̀ɛ̀ gbǒ-xwíníín mɔ̀à ḿ kɛ́ɛ́-mú-nyu-nyɔ̀ kɛɛ gbo, ɓɛ́ m̀ ké níiń, ‘Bounɓo Ɖɛɓíɔ́ ɖá, “Éézùɖùɛ̀-dyù ɓě, kǎà ɓěɛ̀ nyuu-ɖɛ̀ séín ɓě ɓɛ́ wa nyàìn kà ḿ dyiɛɛ mɛ jĩ̀ǎ!

⁷ Ɓě dyáìn ɖíà ɓě kɔ̃̀ hwòɖǒ-dyùà kùmù ké wa se sàà mɛ́ɛ ɖé ní pá hwɛ̀ǐn-hwɛ̀ǐnɔ̀ mú, ké ɔ nyuɛ ké ɖé se mú hwɛ̀ ɖe, ti ɓɛ́ ɓě nì nyúà-ɖɛ̀-cànà kèɛ̀ nyɔmɔɔ sáa zàǐn ɓó ḿ bììɛ. Ɖé ní dyi-nyàìn-ɖɛ̀ séín ɓěa nyu-nyu múɛɛ, ɓě zà ní dèè-wùɖùɔ̀ ɓíín.

⁸ Ɓě mɔ̀ nyɔ ɓéɖé ɓě kéɔ́ má kũ̀à ɓě ɓá ní ɖɛ hwɛ̀ǐn-hwɛ̀ǐn ɓěɔ̀ kè ní pá hwɛ̀ǐn-hwɛ̀ǐnɔ̀ jè dyíɛɛ nyu, kɛɛ ɓě poɛ ɖíà ɓě xwaún dyi.

⁹ “ ‘ “Ɔ ná nì jèɛɛ, mɔ̄ Bounɓo Ɖɛɓíɔ́ cɛ̃ɛ kà ɖíà ɓě mɔ̀ nyɔ ɓě kɔ̃̀ hwòɖǒ-dyùà kùmùà ké wa seà sàà mɛ́ɛ se ɖé ní pá hwɛ̀ǐn-hwɛ̀ǐnɔ̀ mú dyáa mu, kɛbì wa mɛ cĩ́ ɖé ɓě hwìɛ̀ kɛ.” ’ ”

Gèɖèpɔ́ɔ̀ zà Ɖíìváà-nyɔ̀ ɓěɔ̀ sáa-zà-kũ̀àɔ̀ kɔ̃ún

¹⁰ Ké Bounɓoɔ̀ cɛ̃ɛ ma ḿ gbo ɖe, ké ɔ ɖá, “Ɖíìváà-nyɔ̀ ɓě ɓɛ́ wa tɔmɔìn kà ḿ bũ̌in dyììn ɖé waà kũùn-kpò ɓiè-ɓiè mú ti ɓɛ́ Éézùɖùɛ̀-dyù ɓěɔ̀ sɔ̀ ma kà ḿ bũ̌ɛɛ, wa mu waà ɖɛ gbà ɓěɔ̀ kpa dyí ɖúùn.

¹¹ Wa se sáa-zà-nyɔ̀ jǔɛ mu ɖe. Kũ̀à ɓě ɓɛ́ wa muá ḿ bìì nyuùn wɛ̃ɛ mɔ̀, wa muá ní pá hwɛ̀ǐn-hwɛ̀ǐnɔ̀ gmɔ-wɔ̃̀ ɓěɔ̀ dyí-gmɔ̀-nyɔ̀ jǔùn, ké wa muá kũ̀à tɔ̀ɔ̀ ɓě ɓá ní gbǒɔ̀ dyíɛɛ nyu-nyɔ̀ jǔùn. Wa muá nyúà-ɖɛ̀ ɓě ɓɛ́ nyɔ ɓěɔ̀ dyà ɓó fɔ̃ɔ-sàǎ-zàìn-ɖɛ̀ kè sáa-zàìn-ɖɛ̀ tɔ̀ɔ̀ ɓě jèɛɛ ɖáɓá-nyɔ̀ jǔùn, ɓɛ́ wa kéá nyɔ ɓěɔ̀ gbo-kpá-nyɔ̀ jǔ ɖòùn pū.

¹² Mɔ̄ Bounɓo Ɖɛɓíɔ́ tò ní sɔ̃ɔ̀ dyií, ké ḿ gboò kà wa mu waà ɖɛ gbà ɓěɔ̀ kpa dyí ɖúùn wɛ̃, sepóɛɖé wa mɔ̀ nyɔ mɔ̀ ma sáa-zà-kũ̀àɔ̀ nyu-nyɔ̀ ɓó Éézùɖùɛ̀ɛ̀ gbǒ-xwíníínɔ̀ bìì ɓó waà kũùn-kpò ɓěɔ̀ dyúa, ké wa mɔ̀ ma dyí-gbǒ-ɖɛ̀ ɓó wa bìì ɓó ɖɛ gbà nyu jè.

¹³ Wa se ḿ bũ̌in xwɛ̃́ǐn mu, ɓɛ́ wa ké sáa-zà-kũ̀à nyu, mɔɔ ké wa se ní ɖɛ hwɛ̀ǐn-hwɛ̀ǐn ɓěɔ̀ kè ɖɛ zi mú hwɛ̀ǐn ɓěɔ̀ ɖò bũ̌in xwɛ̃́ǐn mu. Dɛ̃ mu wa nyuùn ɓó waà nyuu-ɖɛ̀ ɓě ɓɛ́ wa nyàìn kà ḿ dyiɛɛ jè.

¹⁴ Kɛɛ wɛ̃́ɛ́ kɛɛ, ḿ gã wa, ɓɛ́ wa ké ní gbǒɔ̀ jè gbo-gmɔ̀-nyɔ̀ jǔ, ɓɛ́ wa ké kũ̀à séín ɓáa dyíɛɛ nyu-nyɔ̀ jǔ.”

Sáa-zà-nyɔ̀ ɓěɔ̀ jè

¹⁵ Ké Bounɓo Ɖɛɓíɔ́ kpa ma wuɖu dyúa, ké ɔ ɖá, “Kɛɛ sáa-zà-nyɔ̀ ɓě mɔ̀à Ɖíìváà-nyɔ̀ ɓě ɓɛ́ wa mɔ̀à Záɖòɛ̀ xwíníín-dyù ɓě, ɓɛ́ wa gmɔ̀ ma kà ní pá hwɛ̀ǐn-hwɛ̀ǐnɔ̀ jè gbo ti ɓɛ́ Éézùɖùɛ̀-dyù tɔ̀ɔ̀ ɓěɔ̀ sɔ̀ ma kà ɓó ḿ bũ̌ɛɛ, wa mɔ̀ nyɔ mu ḿ bũ̌in xwɛ̃́ìn, ɓɛ́ wa ké ní kũ̀àɔ̀ nyu. Wa mɔ̀ nyɔ mu nyúà-ɖɛ̀-cànà kèɛ̀ nyɔmɔɔ sáa zàìn ɓó ḿ bìì.

¹⁶ Wa mɔ̀ nyɔ mu ní gbǒɔ̀ Pá Hwɛ̀ǐn-hwɛ̀ǐnɔ̀ mú dyáùn, ké wa mɔ̀ nyɔ mu ní téɓèɖèɔ̀ bũ̌in xwɛ̃́ìn, ɓɛ́ wa ké ní kũ̀àɔ̀ nyu. Wa mɔ̀ nyɔ mu ɖɛ ɓě ɓɛ́ sáa-zà-nyɔ̀ kɔ̃̀ wa ké nyu ɓó ḿ dyúa kɛɛ nyuùn.

¹⁷ Ti ɓɛ́ wa mu gmɔ-wɔ̃̀ ɓě ɓɛ́ nyɔ dyáìn kà mú ní, nyɔ dyià ɖé kɔ̃̀pã́ùn nìà ɖé kɔ̃̀pã́ùn vɛ̀nɛ̀ɔ̀ xwíníín nyɛɛ mú dyáa mú dyáùn wɛ̃ɛ, wa ɓéɖé wa ké ɖénì-ɖɔ̀ mú po. Ɓáɖáá-mì-ɖɔ̀ ɖò mɛ ɓɔ́ wa mú nìɛ̀ ti ɓɛ́ wa mu gmɔ-wɔ̃̀ ɓěɛ̀ gbo kè ɖé ní gbǒɔ̀ mú kũ̀à nyuɛń nììn nyɛ.

¹⁸ Wa ɓéɖé wa ké ɖénì-ɖɔ̀ dúi bĩìn, ké wa ɓéɖé wa ké ɖénì-ɓɔ̀ùn-ɓɔ́ún mú po. Wa mɛ ɓɔ́ ɖɔ ɖò mu wa zu wóɖóìn nyɛɛ mú poɛ.

¹⁹ Ti ɓɛ́ wa muá ɖé kɔ̃̀pã́ùn vɛ̀nɛ̀ɔ̀ mú síɛń nììn ɖé nyɔ ɓěɔ̀ gboɛɛ, wa mɛ zà ɖɔ ɓɛ́ wa nyùìn kà kũ̀à múɛɛ mú, ɓɛ́ wa ké wa ɖé ɓí-dyù hwɛ̀ǐn-hwɛ̀ǐn ɓěɔ̀ mú po. Ké wa mɛ po ɖɔ kà kò ɖò mú, ɓɛ́ wa ní kɔ̃̀ ɖà nyɔ ɓěɔ̀ ɖɛ gbà ɖò kɔ̃ dyà dyììn ɖé waà mú-po-ɖɔ̀ hwɛ̀ǐn-hwɛ̀ǐnɔ̀ mú.

²⁰ “Sáa-zà-nyɔ̀ ɓěɔ̀ mɛ ɓɔ́ mí dú zàà, mɔɔ ké wa mɛ ɓɔ́ waà dúún-mìɔ̀ dyi táà ɓɛ́ ɔ ké tɔ̀mɔ̀, kɛɛ wa mɛ cɛ̃ waà dúún-mìɔ̀ kɔ̃in.

²¹ Wa ɖò mɛ ɓɔ́ wã́ìn ɖò náa ti ɓɛ́ ɔ mu ɖé kɔ̃̀pã́ùn nìà ɖé kɔ̃̀pã́ùn vɛ̀nɛ̀ɔ̀ xwíníín nyɛɛ mú kũ̀à nyuɛ́ muùn wɛ̃.

²² Wa ɖò mɛ ɓɔ́ jɔ̌ɔ̀-màà ɖò mɔɔ màa ɓɛ́ ɔ ɖǎ dyú-ɓǎ ɖò xwa sɔ̀ɛɛ dyi kpɔ̃ɔ, ɔ sèìn màa ɓɛ́ ɔ séè toɖo kɔ̃ jè dyuò ké ɔ mɔ̀ Éézùɖùɛ̀-dyù ɓěɔ̀ ɖòɛ mɔɔ jɔ̌ɔ̀-màà kɔ̃̀ dyú-ɓǎ mɔ̀ ma sáa-zà-nyɔ̀ ɓěɔ̀ ɖòɛ.

²³ “Sáa-zà-nyɔ̀ ɓěɔ̀ mɛ tɛ̀mɛ̀ìn ní nyɔ ɓěɔ̀ kà ɓɛ́ wa ké ɖɛ mɔ̀ ɖɛ hwɛ̀ǐn-hwɛ̀ǐn nyɛ kè ɖɛ se mú hwɛ̀ɛ zaìn gboi dyuòɛ, ɔ kè kà wa ké ɖɛ kpá wáká ɓó ḿ bììɛ kè ɖɛ se wáká kpá ɓó ḿ bììɛɛ zaìn gboi dyuòɛ.

²⁴ Zaa ɖò dyi nìǐn, wa mɛ poɛ wɔ̃ dyììn ɖé ní gma ɓěɔ̀ mú. Ké wa mɛ kpɔ̃ gma ɓě ɓá ní hwɔ-wè séín ɓěɔ̀ dyíɛɛ dyi, ké wa mɛ kpɔ̃ ní fɔ̀-wèɔ̀ jè dyi.

²⁵ “Sáa-zà-nyɔ̀ ɓěɔ̀ mɛ ɓɔ́ xwɛ́ ɖò bũ̌in xwɛ̃́ìn, ɓɛ́ wa ní kɔ̃̀ ɖà se-mú-hwɛ̀-nyɔ̀ jǔ. Kɛɛ wɛ̃́ɛ́ kɛɛ, ɔ dyi nyɔɔ̀ xwíníín-zà-ɖè mɔɔ ɔ xwíníín-zà-ɓǎ mɔɔ ɔ dyú-gàà mɔɔ ɔ dyú-màà mɔɔ ɔ ɖíí-gàà mɔɔ ɔ ɖíí-màà ɓɛ́ ɔ se dyú-ɓǎ dyi kpɔ̃ɛɛ jè jǔǐn, nìí, ɔ ɓɛ́ìn ɔ mìɔùn se-mú-hwɛ̀-nyɔ̀ mú nyuɛ.

²⁶ Ti ɓɛ́ ɔ ɖǎ ɔ mìɔùn mú hwɔɛɛ, nìí, ɔ mɛ fòìn ɓɛ́ wé mɛ̀nɛ̌ìn-sɔ̃́ ké zi, hwɛ̀ ɓɛ́ ɔ ké ɖé ní gbǒɔ̀ mú kũ̀à nyu ɖe.

²⁷ Ké wé kɔ̃̀ ɓaɖa ɓɛ́ ɔ muà ɖé pá hwɛ̀ǐn-hwɛ̀ǐnɔ̀ mú muùn ɖé kɔ̃̀pã́ùn nìà ɖé kɔ̃̀pã́ùn vɛ̀nɛ̀ɔ̀ xwíníín nyɛɛ mú, ɓɛ́ ɔ ké ɖé kũ̀à nyu ɖeɛɛ, ɔ ɓéɖé ɓɛ́ ɔ ké nàmàǔn-sàǎ-zàìn-ɖɛ̀ tò.

²⁸ “Sáa-zà-nyɔ̀ ɓěɔ̀ mɛ ɓɔ́ dúí-sè-ɖɛ̀ ɖò kɔ̃̀ɔ̀. Mɔ̄ Bounɓoɔ̀ mɔ̀ wa nììn dúí-sè-ɖɛ̀. Ɓě mɛ ɓɔ́ wa pá ɖò nyíɛ ɖé Éézùɖùɛ̀-ɓòɖòɔ̀ kɔ̃. Mɔ̄ mɔ̀ waà kɔ̃̀ɔ̀-ɖɛ̀.

²⁹ Wa mɛ ɖi ɖii-ɖɛ̀-sàǎ-zàìn-ɖɛ̀ ɓěɔ̀ kè nàmàǔn-sàǎ-zàìn-ɖɛ̀ ɓěɔ̀ ɔ kè kpa-pɛ́ɛ̀ìn-sàǎ-zàìn-ɖɛ̀ ɓěɔ̀. Ké ɖɛ séín kpá wáká ɓó ḿ bìì ɖé Éézùɖùɛ̀-ɓòɖòɔ̀ kɔ̃ɛɛ mɔ̀ waà kɔ̃̀ɔ̀-ɖɛ̀.

³⁰ Ké ɓáá-ɖɛ̀ séín kĩ́ín-kĩ́ín-ɓò ɓěɔ̀ kè nyíí-ɖɛ̀ kpa ɖɛ kã̀ìn séín ɓɛ́ ɓě dyà ḿ gboɛɛ mɔ̀ sáa-zà-nyɔ̀ ɓěɔ̀ kɔ̃̀ɔ̀-ɖɛ̀. Bɛɖɛɛ̀ séín ɓɛ́ ɓě mu pĩìn nyɛɛ, ɔ kpo kĩ́ín-kĩ́ínɔ̀ ɓě mɛ nyíɛ sáa-zà-nyɔ̀ ɓěɔ̀, nìí ɓɛ́ mana ké ɓěɛ̀ taàɔ̀ kɔ̃ nì.

³¹ Sáa-zà-nyɔ̀ ɓěɔ̀ mɛ ɓɔ́ naà mɔɔ nimii ɖò ɓɛ́ ɔ mɛ́ìn ɓíɖíi, mɔɔ ɓɛ́ nimii ɖò kpɔ̃ɛɛ ɖò tàà. Mɔ̄ Bounɓo Ɖɛɓíɔ́ mɔ̀ nyɔ cɛ̃à kɛ̀.”