Ìzíkìò 43 - Ɓǎsɔ́ɔ̀ Báɓòɔ̀

Bounɓoɔ̀ dyi ɖé ɔ gbǒɔ̀ mú ɖe

¹ Sɔ̀ìn ɓóɛ gboɛɛ, gàaɔ̀ kpa ma ḿ ɖé gmɔ-wɔ̃̀ nìà ɖé dyóɖó-xwáɖáún-wóɖóìn-naínɔ̀ kɛɛ gbo.

² Ké gmɔ̀ nɔ̄, Éézùɖùɛ̀ Gèɖèpɔ́ɔ̀ dĩ́ín-dĩ̀ìnɔ̀ sɔ̀ìn ma ɖé dyóɖó-xwáɖáún-wóɖóìn-naínɔ̀. Ɔ dyi-dyiɔ̀ jĩ̌ nì ma kà ní-tòɛ̀ jĩ̌ nìà kɛ, ké ɔ dĩ́ín-dĩ̀ìnɔ̀ nyuɛ ké ɓóɖó-kpàà fã ma.

³ Dyí-tɛ̀mɛ̀ìn-ɖɛ̀ ɓɛ́ ḿ dyéà kɛ kè dyí-tɛ̀mɛ̀ìn-ɖɛ̀ ɓɛ́ ḿ dyé zɔ̃̌ɔ̀ kà ti ɓɛ́ ɔ dyi ma hwɔɖɔɔ̀ wáɖáùn wɛ̃ɛ hwɔìn ní, ké ɔ kè dyí-tɛ̀mɛ̀ìn-ɖɛ̀ ɓɛ́ ḿ dyé zɔ̃̌ɔ̀ kà ɓó Kéɓà-nìɔ̀ wĩín nyɛɛ hwɔìn ní. Púɛɛ, ḿ jìɖǐ ma ɓó ɓíɖíi dyi.

⁴ Ké ḿ dyéɛ, ké Bounɓoɔ̀ dĩ́ín-dĩ̀ìnɔ̀ dyììn ma ɖé gmɔ-wɔ̃̀ nìà ɖé dyóɖó-xwáɖáún-wóɖóìn-naínɔ̀ kɛɛ mú, ké ɔ wáɖáìn ma ɖé ɔ gbǒɔ̀ mú.

⁵ Sɔ̀ìn ɓóɛ gboɛɛ, Gèɖèpɔ́ɔ̀ Zùùɔ̀ ɖú ma ḿ dyí, ké ɔ kpa ḿ ɖé kɔ̃̀pã́ùn nìà ɖé kɔ̃̀pã́ùn vɛ̀nɛ̀ɔ̀ xwíníín nyɛɛ mú. Ké gmɔ̀ nɔ̄, Bounɓoɔ̀ dĩ́ín-dĩ̀ìnɔ̀ dyíìn ma ɖé ɔ gbǒɔ̀ múin.

⁶ Ti ɓɛ́ gàaɔ̀ nyànà ma ɓó ḿ wáún dyiɛɛ, ḿ wɔ̃́ ma nyɔ ɖòɛ̀ wuɖu sɔ̀ìn ɖé Gèɖèpɔ́ɔ̀ gbǒɔ̀ mú. Nyɔɔ̀ nì ma ḿ gbo wùɖùɛ̌n.

⁷ Nyɔɔ̀ cɛ̃ɛ ma ḿ gbo, ké ɔ ɖá, “Gǎ-dyù, dà nìà kɛ mɔ̀ ní zèèɔ̀ pá, ké ɓó mɔ̀ ní ɓo-síìn-naín. Ɓóɛ̀ ní mu Éézùɖùɛ̀-dyù ɓěɔ̀ hwìɛ̀ cĩ́ìn ɓó sè-ná-sèɛ̀ tiín. Ké Éézùɖùɛ̀-dyù ɓěɔ̀ mɔɔ waà kã́á ɓěɔ̀ se ní nyɛ́nɛ́ hwɛ̀ǐn-hwɛ̀ǐnɔ̀ zùǔn zàǐn mu ɖe dyììn ɖé kũùn-kpò ɓiè-ɓiè mú, mɔɔ dyììn ɖé waà kã́á ɓěɔ̀ xwɛ́ ɓě dà pá nìà kɛ mú dyóɖóún zàìn-zàìn mú.

⁸ Kã́á ɓěɔ̀ nyu ma waà gbǒ-wɔ̃̀ ɓěɔ̀ ɓó níǐnɔ̀ wáún. Wa po ma waà xwìɖì-tɛ̃́ín ɓěɔ̀ ɓó níǐn xwìɖì-tɛ̃́ín ɓěɔ̀ wáún. Gmɔ ɖòùn nyɛ̀nɛ̀ɛ̀ mɔ̀ ɖɛ nì ma ɓó à pṹa. Wa zàìn ma ní nyɛ́nɛ́ hwɛ̀ǐn-hwɛ̀ǐnɔ̀ zùǔn dyììn ɖé waà nyuu-ɖɛ̀ ɓě ɓɛ́ wa nyàìn kà ḿ dyiɛɛ mú. Ɔ jèɛɛ, ḿ gbɔɔ̀ ma wa mú ɖé ní dyoɖoɔ̀ mú.

⁹ Ɓó kàǔn wɛ̃ɛ, wa mɛ po waà kũùn-kpò ɓiè-ɓièɔ̀ wáká, ké wa mɛ tɔmɔìn waà kã́á ɓěɔ̀ xwɛ́ ɓěɔ̀ ḿ bũ̌in. Nìí, ní mu ɖé wa hwìɛ̀ cĩ́ìn ɓó sè-ná-sèɛ̀ tiín.

¹⁰ “Gǎ-dyù, ní mɔ́ ɓɛ́ m̀ ké ní gbǒɔ̀ mɛ dè ɖé Éézùɖùɛ̀ɛ̀ gbǒ-xwíníínɔ̀ gbo, ɓá kà ɔ ké poɛ nyuɛ kè kà ɔ ké nìɛ̀ nyuɛɛ dyí, nìí ɓɛ́ dɛ̃ ké wa nyu ɓó waà nàmàǔn ɓěɔ̀ jè.

¹¹ Ɔ jǔ ké dɛ̃ ɖǎ wa nyu ɓá ɖɛ gbà ɓě ɓɛ́ wa ɖǎà nyuɛɛ jè dyí ní, nìí, m̀ mɛ zaìn wa gbo kɔ̃in ɓá kà ní gbǒɔ̀ po jè nyu dyí sɔ́ɔ kɛ, kè kà ɔ ké nìɛ̀ nyuɛ kè ɔ mú-dyáìn-naín ɓěɔ̀ kè síìn-naín ɓěɔ̀ kè kà ɔ kpóɖó-dyùà ké nìɛ̀ nyuɛ kè kà ɖɛ séín nyu sɔ́ɓɔ́ún kpáa kɛ ɔ kè gma-dù kò-kò séín ɓáa dyíɛɛ jè dyí. Céè ɖɛ séín ɓěa céè-ɖɛ̀ ɖò mú, ɓɛ́ wa kéɛ dyé kà ɖɛ séín nyu sɔ́ɓɔ́ún kpáa kɛ, nìí ɓɛ́ wa ké gma séín ɓáa dyíɛɛ dyi kpɔ̃.

¹² Gma ɓá ní gbǒɔ̀ jè dyíɛɛ kɛà kɛ̀. Pá séín nìà gbǒɔ̀ ɖei ɖé toɖoɔ̀ dyaa ɓéɖé ɓɛ́ ɔ ké pá hwɛ̀ mú mìɔ kɛɛ jǔ. Gma ɓá ní gbǒɔ̀ jè dyíɛɛ nìàǒ wɛ̀.”

Sáa-kɔ̃-zàìn-gbààɔ̀ jè

¹³ Ké ḿ dyé ma sáa-kɔ̃-zàìn-gbàà ɖò. Ní-hwɔ̀ɔ̀ nì gbààɔ̀ gbɔiɛɛ mú-tɔ̀mɔ̀-tɔ̀mɔ̀ mɔ̀ ma jìì-ɓàɖàǎ sɔ̃́ kè kɛ̀ɖɛ̀, ké ɔ xwíɖí-kù mɔ̀ ma jìì-ɓàɖàǎ sɔ̃́ kè kɛ̀ɖɛ̀ ɖekè. Ɓɔ nìɛ̀ wĩin nyɛɛ mɔ̀ ma jìì-ɓàɖàǎ dyúáɖò. Kà gbààɔ̀ nyu dya cɛ̃̀ɛ̀ kɛɛ kɛà kɛ̀.

¹⁴ Gbààɔ̀ deìn ma kɔ̃in tã. Sɔ̀ìn ɓó ní-hwɔ̀ɔ̀ nìà ɓóɛ gbɔiɛɛ gbo, dyɛ̀ìn gbɛ̌ɛ̀ kĩ́ín-kĩ́ínɔ̀ kɛɛ zi ma jìì-ɓàɖàǎ hĩinyɛ kè ɓɛ́ìn-hwìɛ̀ kɔ̃. Ké sɔ̀ìn ɓó gbɛ̌ɛ̀ kĩ́ín-kĩ́ínɔ̀ gbo, dyɛ̀ìn gbɛ̌ɛ̀ sɔ̃́ nììnɔ̀ kɛɛ mɔ̀ ma ɓáɖáa dyúáɖò kè jìì-ɓàɖàǎ dyúáɖò kè kɛ̀ɖɛ̀.

¹⁵ Ké gbààɔ̀ nyɛ-dyí-po-naínɔ̀ dya-tɔ̀mɔ̀-tɔ̀mɔ̀ mɔ̀ ma ɓáɖáa dyúáɖò kè jìì-ɓàɖàǎ dyúáɖò kè kɛ̀ɖɛ̀. Ké ɖɛ hwɔìn nimii-gmɛ̌ ɓě nì gbààɔ̀ nyɛ-dyí-po-naínɔ̀ gã hĩinyɛɔ̀ kɔ̃.

¹⁶ Gbààɔ̀ nyɛ-dyí-po-naínɔ̀ wáká hĩinyɛɔ̀ ɓɛ́ìn ma wɔ̃. Ɔ tɔ̀mɔ̀-tɔ̀mɔ̀ mɔ̀ ma ɓáɖáa tã kè ɓɛ́ìn-hwìɛ̀, ké ɔ xwíɖí-kù mɔ̀ ma ɓáɖáa tã kè ɓɛ́ìn-hwìɛ̀ ɖekè.

¹⁷ Ké gbààɔ̀ gbɛ̌ɛ̀ sɔ̃́ nììnɔ̀ wáká ɓěɔ̀ ɓɛ́ìn ma wɔ̃ ɖekè. Ɔ tɔ̀mɔ̀-tɔ̀mɔ̀ mɔ̀ ma ɓáɖáa hĩinyɛ kè kɛ̀ɖɛ̀, ké ɔ xwíɖí-kù mɔ̀ ma ɓáɖáa hĩinyɛ kè kɛ̀ɖɛ̀ ɖekè. Ké gbààɔ̀ gbɛ̌ɛ̀ kĩ́ín-kĩ́ínɔ̀ wáká ɓěɔ̀ ɓɛ́ìn ma wɔ̃ ɖekè. Ɔ tɔ̀mɔ̀-tɔ̀mɔ̀ mɔ̀ ma ɓáɖáa hĩinyɛ kè jìì-ɓàɖàǎ hm̀m̌ kè kɛ̀ɖɛ̀, ké ɔ xwíɖí-kù mɔ̀ ma ɓáɖáa hĩinyɛ kè jìì-ɓàɖàǎ hm̀m̌ kè kɛ̀ɖɛ̀ ɖekè. Ké ní-hwɔ̀ɔ̀ nìà gbààɔ̀ gbɔiɛɛ mú-tɔ̀mɔ̀-tɔ̀mɔ̀ mɔ̀ ma jìì-ɓàɖàǎ sɔ̃́ kè kɛ̀ɖɛ̀, ké ɔ xwíɖí-kù mɔ̀ ma jìì-ɓàɖàǎ sɔ̃́ kè kɛ̀ɖɛ̀ ɖekè. Ɓɔ nìɛ̀ wĩin nyɛɛ mɔ̀ ma jìì-ɓàɖàǎ dyúáɖò. Ké gbààɔ̀ kɔ̃-dyáìn-ɖɛ̀ɔ̀ gmɔ̀ìn ɖé dyóɖó-xwáɖáún-wóɖóìn-naín.

Sáa-kɔ̃-zàìn-gbààɔ̀ Gèɖèpɔ́ɔ̀ xwáɖáún-zàìn-zàìn

¹⁸ Hwɛ̀ ké gàaɔ̀ cɛ̃ɛ ma ḿ gbo, ké ɔ ɖá, “Gǎ-dyù, ɖɛ ɓɛ́ Bounɓo Ɖɛɓíɔ́ cɛ̃ɛ kɛà kɛ̀. Ɔ ɖá, ‘Ɖɛ ɓě m̀ ké nyu ɓá sáa-kɔ̃-zàìn-gbààɔ̀ jè dyíɛɛ kɛà kɛ̀. Ti ɓɛ́ wa mu gbààɔ̀ dyi nyànàìn ɓó fɔ̃ɔ-sàǎ-zàìn-ɖɛ̀ nyu jè, ɔ kè ɓóɛ nyɔmɔɔ bũ̌in mɛ́nɛ́ìn jèɛɛ,

¹⁹ nìí, m̀ mɛ nyí sáa-zà-nyɔ̀ ɓě mɔ̀à Ɖíìváà-nyɔ̀ ɓě ɓɛ́ wa mɔ̀à Záɖòɛ̀ xwíníín-dyù ɓěɛɛ ɓìɖǐ ɓíɔ́ ɖò, ɓɛ́ ɔ ké nàmàǔn-sàǎ-zàìn-ɖɛ̀ jǔ. Wa mɔ̀ nyɔ ɓě ɓɛ́ wa xwɛ̃́ìn ḿ bũ̌in ɓó ní kũ̀àɔ̀ nyu jèɛ.

²⁰ Ké m̀ mɛ ɖú ɓìɖǐɔ̀ nyɔmɔɔ̀ ɖò dyí, ɓɛ́ m̀ kéɛ ɖɛ hwɔìn nimii-gmɛ̌ ɓě nìà gbààɔ̀ nyɛ-dyí-po-naínɔ̀ gã hĩinyɛɔ̀ kɔ̃ɛ kè ɓó gbààɔ̀ gbɛ̌ɛ̀ sɔ̃́ nììnɔ̀ gã hĩinyɛɔ̀ ɔ kè ɓɔ nìà gbààɔ̀ ní-hwɔ̀ɔ̀ wĩin nyɛɛ kɔ̃ po. Kǎà nì mu kà ɓó gbààɔ̀ se-mú-hwɛ̀-ɖɛ̀ɔ̀ kɔ̃in-ɓáìn-ɖɛ̀ nyuùn, ké ɔ mu mú hwɛ̀ìn.

²¹ Ké m̀ mɛ ɖú ɓìɖǐ ɓíɔ́ mɔ̀à nàmàǔn-sàǎ-zàìn-ɖɛ̀ɔ̀ kɛɛ dyí, ɓɛ́ m̀ kéɛ ɖé pá ní muà da zàùn wɛ̃ɛ mú fɔ̃̀ìn, ɖé ní gbǒɔ̀ kɔ̃̀pã́ùnɔ̀ píé, ɖé pá hwɛ̀ǐn-hwɛ̀ǐn ɖò mú.

²² Ké ɓó wéɔ̀ sɔ̃́ nììnɔ̀ ɓaɖaa, m̀ mɛ zàìn vã́á ɓɛ́ ɔ se kɛɛ ɖò ɓéɖéɛɛ sáa, ɓɛ́ ɔ ké nàmàǔn-sàǎ-zàìn-ɖɛ̀ jǔ. Ké m̀ mɛ hwɔ gbààɔ̀ mú kà dyúáɖò kà m̀ nyuɛ ma kà mú hwɔɔ dyììn ɖé ɓìɖǐ ɓíɔ́ɔ̀ nyɔmɔɔ̀ múɛ.

²³ Ti ɓɛ́ m̀ ɖǎa mú hwɔɛɛ, nìí, m̀ mɛ ɖú ɓìɖǐ ɓíɔ́ ɖò kè ɓáɖáá ɓíɔ́ ɖò ɓɛ́ wa se kɛɛ ɖò ɓéɖéɛɛ dyí, ɓɛ́ m̀ kéɛ sáa zàìn.

²⁴ M̀ mɛ dyà wa ɓó mɔ̄ Bounɓoɔ̀ dyúa, ké sáa-zà-nyɔ̀ ɓěɔ̀ mɛ mɛ́nɛ́ìn wa tɔ̃́ kɔ̃in, ɓɛ́ wa ké wa fɔ̃ɔ-sàǎ-zàìn-ɖɛ̀ mú nyu ɓó ḿ bìì.

²⁵ M̀ mɛ zàìn vã́á ɖò kè ɓìɖǐ ɓíɔ́ ɖò ɔ kè ɓáɖáá ɓíɔ́ ɖò sáa, ɓó wé kè wé xwíníín, ɓɛ́ wa ké nàmàǔn-sàǎ-zàìn-ɖɛ̀ jǔ. Wa mɛ ɓɔ́ kɛɛ ɖò ɓéɖéɛ. Kǎà m̀ mɛ nyuɛ ɓó wé mɛ̀nɛ̌ìn-sɔ̃́ xwíníín.

²⁶ Wa mɛ nyu kɔ̃in-ɓáìn-ɖɛ̀ ɓó gbààɔ̀ se-mú-hwɛ̀-ɖɛ̀ɔ̀ jè, ɓó wé mɛ̀nɛ̌ìn-sɔ̃́ xwíníín, ɓɛ́ ɔ ké mú hwɛ̀, ɓɛ́ dyììn ɖéɛ múɛɛ, ɔ ké wáká kpá ɓó ḿ bìì.

²⁷ Ti ɓɛ́ wé ɓěa ɖǎ ɖé hwɛ̀ɛ, nìí, sɔ̀ìn ɓó wéɔ̀ mɛ̀nɛ̌ìn-tã nììnɔ̀ gbo ké dyúa muɛɛ, sáa-zà-nyɔ̀ ɓěɔ̀ mɛ zàìn ɓěɛ̀ fɔ̃ɔ-sàǎ-zàìn-ɖɛ̀ ɓěɔ̀ kè ɓěɛ̀ gbo-kpɔ̃ìn-sàǎ-zàìn-ɖɛ̀ ɓěɔ̀ sáa ɓó gbààɔ̀ kɔ̃. Nìí, ní mu ɓě jè dyi kpɔ̃ùn. Mɔ̄ Bounɓo Ɖɛɓíɔ́ mɔ̀ nyɔ cɛ̃à kɛ̀.’ ”