Ìzíkìò 4 - Ɓǎsɔ́ɔ̀ Báɓòɔ̀

Ìzíkìò nyu Jùɖúsɛ̀ɖɛ̀ìn-hwɔ̀ɖɔ̀ɔ̀ wɔ̃-gbǎìn-gbǎìnɔ̀ dyí-tɛ̀mɛ̀ìn-ɖɛ̀

¹ Sɔ̀ìn ɓóɛ gboɛɛ, Bounɓoɔ̀ cɛ̃ɛ ma ḿ gbo, ké ɔ ɖá, “Gǎ-dyù, ɖú bèɖěkè-kpò vɛ̀nɛ̀ ɖò dyí, ɓɛ́ m̀ ké Jùɖúsɛ̀ɖɛ̀ìn-hwɔ̀ɖɔ̀ɔ̀ ɓóɛ kɔ̃ mɛ.

² Ɔ ɖǎ ná nìǐn, nìí, nyuɛ ɓɛ́ ɔ ɖeiɔ̀ ké nì pū kà mú-nyɛ́-nyɔ̀ ɓě gbǎìn kà hwɔɖɔ wɔ̃ɛ. M̀ mɛ tèɛ̀ ɖɛ-dyéɖéín-dyi-dyáìn-ɖɛ̀ dyéɖéín, ɓɛ́ m̀ ké ɓóɖó-kòò ɓóɛ ɖei dyáìn. Ké m̀ mɛ poɛ jàɖàìn-gbò ɓě ɖei, ɓɛ́ m̀ kéɛ go vɛ̀nɛ̀-vɛ̀nɛ̀ ɓě mú tè.

³ Ɔ ɖǎ ná nìǐn, nìí, ɖú nɛɛ̀-kpà-pàni ɖò dyí, ɓɛ́ m̀ kéɛ ɓóɛ m̀ kè hwɔɖɔɔ̀ pṹa po, ɓɛ́ ɔ ké gmɔ jǔ, nìí ɓɛ́ m̀ ké ɖé hwɔɖɔɔ̀ gbo gmɔ̀ìn. Sɔ̀ìn ɓóɛ gboɛɛ, nìí, m̀ mɛ nyuɛ ɓɛ́ ɔ ké nì pū kà mú-nyɛ́-nyɔ̀ ɓě gbǎìn kà hwɔɖɔ wɔ̃ɛ. Ɖɛ nìà kɛ mu dyí-tɛ̀mɛ̀ìn-ɖɛ̀ jǔùn ɓó Éézùɖùɛ̀ɛ̀ gbǒ-xwíníínɔ̀ bìì.

⁴ “Ɔ ɖǎ ná nìǐn, nìí, m̀ mɛ pɛ̃́ zɔ̃ ɖé nì kunuaún-wàkáɔ̀ kɔ̃, ɓɛ́ m̀ ké Éézùɖùɛ̀ɛ̀ gbǒ-xwíníínɔ̀ nàmàǔnɔ̀ ɓó m̀ mìɔùn kɔ̃ pɛ̃́ìn. M̀ mɛ ɓéɖé waà nàmàǔnɔ̀ ɓó wé jĩ̀ kà nì muà zɔ̃ pɛ̃́ìn nyɛɛ xwíníín.

⁵ Kà zɔ̃ jĩ̀ kà ɓɛ́ waà nàmàǔnɔ̀ nyuá kɛɛ jĩ̀à kɛɛ, kǎà ní mu m̀ wé jĩ̀ náa nyíìn. Ɔ jèɛɛ, nì mu Éézùɖùɛ̀ɛ̀ gbǒ-xwíníínɔ̀ nàmàǔnɔ̀ ɓéɖéìn ɓó wé hɔ̃dɛ̀ɖɛ̀ tã kè kpáɖá-nyɔ hĩinyɛ ɓaɖa-bùè xwíníín.

⁶ Ɔ ɖǎ ná nìǐn, nìí, m̀ mɛ pɛ̃́ zɔ̃ ɖé nì ɖiaún-wàkáɔ̀ kɔ̃, ɓɛ́ m̀ ké Júɖàà gbǒ-xwíníínɔ̀ nàmàǔnɔ̀ ɓó m̀ mìɔùn kɔ̃ pɛ̃́ìn. Ní mu m̀ wé kpáɖá-nyɔ sɔ̃́ nyíìn, ɓɛ́ m̀ ké waà nàmàǔnɔ̀ ɓéɖé. Wé dyúáɖò nì ɓó zɔ̃ ɖò-ɖò bìì.

⁷ “M̀ mɛ gmɔ̀ìn ɖé Jùɖúsɛ̀ɖɛ̀ìn-hwɔ̀ɖɔ̀ ɓɛ́ ɔ nì pū kà mú-nyɛ́-nyɔ̀ ɓěɔ̀ gbǎìn kà ɔ wɔ̃ɛɛ gbo, ké m̀ mɛ dyáìn nì ɖɔɔ̀ sɔ̃ɔ̀, ɓɛ́ m̀ ké ɖɛ gbà mu ɔ gbo kpáùn wɛ̃ɛ cɛ̃.

⁸ Gmɔ̀ nɔ̄, ní mu m̀ ɖúú sã̀ìn, ɓɛ́ mɔ̀ǔn kɔ̃̀ ɖà xwa cɛ́ɛ̀ ɓɛ́ìn, ɓɛ́ nì Jùɖúsɛ̀ɖɛ̀ìn-hwɔ̀ɖɔ̀ɔ̀ wɔ̃-gbǎìn-wèɔ̀ ké ɖé hwɛ̀ hwɛ̀.

⁹ “Ti nì muà náa nyuɛń nììn nyɛɛ, m̀ mɛ ɖú hwítì-dù kò-kò ɓě kè báɖè kè deɖe-dù kò-kò ɓě ɔ kè sì dyí, ɓɛ́ m̀ ké wa bɛɖɛɛ̀-mú-nyùìn-ɖɛ̀ vɛ̀nɛ̀ ɖò mú po, ɓɛ́ m̀ ké wa bɛɖɛɛ̀ mú nyu. Ɖɛ nìà kɛ mu nì ɖii-ɖɛ̀ jǔùn ɓó wé hɔ̃dɛ̀ɖɛ̀ tã kè kpáɖá-nyɔ hĩinyɛ ɓaɖa-bùè kɔ̃̀ xwíníín nì muà zɔ̃ pɛ̃́ìn ɖé nì kunuaún-wàkáɔ̀ kɔ̃ɛ.

¹⁰ M̀ mɛ ɖàɓàìn ɖii-ɖɛ̀ nì mu ɖiìn wé séín nyɛ. Ɔ mɛ mɔ̀ kópò-wè dyúáɖò. M̀ mɛ ɖiɛ ɓó ti déín ɖò ɓaɖa ɓó wé séín.

¹¹ Ké m̀ mɛ ɖàɓàìn ní-kòpò-wè sɔ̃́, ɓɛ́ m̀ kéɛ ná ɓó ti déín ɖò ɓaɖa ɓó wé séín.

¹² M̀ mɛ nyuɛ kà nyɔ nyuà báɖè-bɛ̀ɖɛ̀ɛ̀-kpò kɛ. Ti nì mu bɛɖɛɛ̀ɔ̀ nyuùn wɛ̃ɛ, m̀ mɛ nyu nyɔǔn-dyùɛ̀ xwáɖáún-kpa-ɖɛ̀ nyɛ mú, ké m̀ mɛ nyùɛ̀n ɓóɛ nyɔ ɓěɔ̀ dyéɖé waí.

¹³ Kǎà Éézùɖùɛ̀-dyù ɓěɔ̀ mu ɖii-ɖɛ̀ se mú hwɛ̀ kɛɛ ɖiìn ɖé ɓóɖó-dù ɓě kɔ̃̀ kɔ̃ ɓɛ́ ní muà wa dyi gbɛ̀ìn nyɛɛ nyɔ ɓěɔ̀ hwìɛ̀.”

¹⁴ Hwɛ̀ ké ḿ ɖá, “Bounɓo Ɖɛɓíɔ́, ɔ mɛ ɓɔ́ ná nìɛ̀o, sepóɛɖé ḿ séè ḿ mìɔùn se-mú-hwɛ̀-nyɔ̀ mú nyu ɖò. Sɔ̀ìn ɖé ní dyú-gbɔ́ɔ́-tìǐn kéà zɛ̃̌ɛ̀ dyɛ̀ìn nyɛɛ, ḿ séè ɖɛ mɛ́ìn ɓíɖíiɛ mɔɔ ɖɛ ɓɛ́ xwáɖá-xwíɖíi-nìmìì ɖò kpɔ̃ɛɛ ɖi ɖò. Suaɖɛ̀ se mú hwɛ̀ ɖò séè ní wɔ̃ɛ̀ mú kpá ɖò.”

¹⁵ Ké Bounɓoɔ̀ cɛ̃ɛ ma ḿ gbo, ké ɔ ɖá, “Ɖɛ m̀ cɛ̃à kɛɛ mɔ̀ jǎà. Ɔ jèɛɛ, ní mu wɔ̃́ùn ɓɛ́ m̀ ké ɓìɖǐ-nyíníí nyɛ mú nyu ɓó nì bɛɖɛɛ̀ɔ̀ pĩ jè, ɓɛ́ ɔ ké se nyɔǔn-dyùɛ̀ xwáɖáún-kpa-ɖɛ̀ jǔ ɖe.

¹⁶ Gǎ-dyù, ní muɛ nyuùn ɓɛ́ ɖii-ɖɛ̀ ɖò ké se Jùɖúsɛ̀ɖɛ̀ìn-hwɔ̀ɖɔ̀ɔ̀ mú dyi ɖe. Ké nyɔ ɓěɔ̀ muá waà ɖii-ɖɛ̀ ɓěɔ̀ sóɖóùn ɖé hwòɖǒ-dyií-gbǎìn-gbǎìn mú, ké wa muá waà náá-nì ɓěɔ̀ sóɖóùn ɖé hwòɖǒɛ̀-ɖé-ɖei-kpá-kpá mú,

¹⁷ sepóɛɖé ɖii-ɖɛ̀ kè ní gǎ mu kpáùn. Wa dyi wa mǔè ɖò dyéɖé kɔ̃ po ní, wa mu dyi giniìn, sepóɛɖé wa kè wa mǔèɔ̀ mu kpá dyáùn ɓó waà nàmàǔnɔ̀ jè.”