Ìzíkìò 3 - Ɓǎsɔ́ɔ̀ Báɓòɔ̀

¹ Ké Bounɓoɔ̀ ɖá, “Gǎ-dyù, ɖi céè-ɖɛ̀ ɓɛ́ m̀ dyéà kɛ. Ɔ ɖǎ ná nìǐn, nìí, mu, ɓɛ́ m̀ ké Éézùɖùɛ̀ɛ̀ gbǒ-xwíníínɔ̀ gbo wùɖù.”

² Ɔ jèɛɛ, ḿ ɓáà ma wɔ̃, ké ɔ nyí ḿ céè-ɖɛ̀ páɖá-páɖáɔ̀, ɓɛ́ ḿ kéɛ ɖi.

³ Ké ɔ cɛ̃ɛ ma ḿ gbo, ké ɔ ɖá, “Gǎ-dyù, ɖi céè-ɖɛ̀ páɖá-páɖá ḿ nìà m̀ nyíɛń nyɛ, ɓɛ́ ɔ ké m̀ dyí ɖoɓo.” Ɔ jèɛɛ, ḿ ɖiɛ ma. Ɔ ɖéè ma ɖé ḿ wɔ̃ún pū kà ɖo ɖéèà kɛ.

⁴ Hwɛ̀ ké ɔ cɛ̃ɛ ma ḿ gbo, ké ɔ ɖá, “Gǎ-dyù, muá ɖé Éézùɖùɛ̀ɛ̀ gbǒ-xwíníínɔ̀ gbo, ɓɛ́ m̀ ké ní wuɖuɔ̀ wa gbo cɛ̃.

⁵ Ḿ se m̀ ɓóɖó-dù kà kò ɖòɛ̀ nyɔ ɓě kɔ̃̀ wuɖu kàmà múin wɔ̃́uń wɛ̃ɛ gbo ɖoɓoɛń nì, kɛɛ ḿ nì m̀ Éézùɖùɛ̀ɛ̀ gbǒ-xwíníínɔ̀ gbo ɖoɓoɛń.

⁶ Wa se ɓóɖó-dù kà kò ɖòɛ̀ nyɔ ɓě kɔ̃̀ wuɖu kàmà mú, ké m̀ se wa wĩín-wùɖù múin wɔ̃́ɔ ɓɛ́ìn nyɛ. Ɔ jǔ ké ḿ dyiɔ́ má m̀ ɓóɖó-dù nì náa gbo ɖoɓo ní, nìí, wa muɔ́ má nì wuɖuɔ̀ ɖùǔ gbo tòùn.

⁷ Kɛɛ Éézùɖùɛ̀ɛ̀ gbǒ-xwíníínɔ̀ se nì wuɖuɔ̀ ɖùǔ gbo tòɛ̌ mu, sepóɛɖé wa se wɔ̃́ ɓɛ́ wa ké ní wuɖuɔ̀ ɖùǔ gbo tò jè. Éézùɖùɛ̀ɛ̀ gbǒ-xwíníín gànáɔ̀ mɔ̀ ɖùǔ-kã̀-nyɔ̀ kè dú-kùmù-nyɔ̀ ɓě.

⁸ Ɔ jèɛɛ, ní muɛ nyuùn ɓɛ́ nììn dúɔ̀ ké kùmù, ɓɛ́ m̀ ké ɖùǔ kã̀ ɖekè.

⁹ Ní muɛ nyuùn ɓɛ́ nì dúɔ̀ ké kùmù kà sɔ́ɔ́-kpò ɓɛ́ ɔ kùmù ɖé sɔ́ɔ́ séín hwìɛ̀ kɛɛ nìà kɛ. Mɔ̀ǔn ɖá ɓɛ́ m̀ ké wa dyi fɛ̃̀ìn, mɔɔ ɓɛ́ nì dyɔɔ̀ ké tɛɖɛ ɓá wa jè dyí, sepóɛɖé waà gbǒ-xwíníín gànáɔ̀ mɔ̀ ḿ kɛ́ɛ́-mú-nyu-nyɔ̀ ɓě.”

¹⁰ Ké ɔ cɛ̃ɛ ma ḿ gbo ɖe, ké ɔ ɖá, “Gǎ-dyù, tò ɖɛ séín ní muà m̀ gbo cɛ̃ìn nyɛɛ gbo ɖùǔ nɔ̀mɔ̀ dyíin, ɓɛ́ m̀ kéɛ hwòɖǒ bũ̌ ɓéɖéìn.

¹¹ Ɓó kàǔn wɛ̃ɛ, sɔ̀ dyí, ɓɛ́ m̀ ké ɖé m̀ mìɔùn nììn ɓíɖí-nyɔ̀ ɓě mɔ̀à toɛ̀-kpɔ̃-nyɔ̀ ɓěɔ̀ kɛɛ gbo mu, ɓɛ́ m̀ ké níiń, ‘Ɖɛ nìà kɛ mɔ̀ ɖɛ ɓɛ́ Bounɓo Ɖɛɓíɔ́ cɛ̃ kɛ.’ Kɛbì wa mɛ tò nì wuɖuɔ̀ ɖùǔ gbo, mɔɔ kɛbì wa mɛ seɛ ɖùǔ gbo tòɛɛ, m̀ mɛ cɛ̃ɛ wɛ̃́ɛ́ pū.”

¹² Sɔ̀ìn ɓóɛ gboɛɛ, púɛɛ, Zùùɔ̀ ɖú ma ḿ dyií, ké ḿ wɔ̃́ ma jĩ̌ vɛ̀nɛ̀ ɖò ɖé ḿ ɖeín. Jĩ̌ɔ̀ wuɖu ɖá, “Bounɓoɔ̀ dĩ́ín-dĩ̀ìnɔ̀ mɛ ɓéɖé ɓàìn-ɓàìn ɖé ɔ cĩ́-naínɔ̀.”

¹³ Ké mɛɛ-ɖɛ̀ nì cĩ́ɛń ɓěɔ̀ pìɔ̌-kpà dyí-ɓaɖaìn-jĩ̀ kè hwíì ɓě nìà ɓó wa wáún wɛ̃ɛ jĩ̌ mɔ̀ ma kuɖu-kuɖu vɛ̀nɛ̀ cá.

¹⁴ Ti ɓɛ́ Zùùɔ̀ ɖú ma ḿ dyií, ké ɔ zà ma ḿ ɓó páɔ̀ múɛɛ, púɛɛ, ní hwòɖǒɔ̀ kpá ma ɖé ɖei, ké dyoɖo dyí ma ḿ mú mìɔ cá, kɛɛ Bounɓoɔ̀ kpé vɛ̀nɛ̀ɔ̀ dyi ma ḿ kɔ̃.

¹⁵ Púɛɛ, ḿ dyi ma ɖé toɛ̀-kpɔ̃-nyɔ̀ ɓě ɓɛ́ wa cĩ́ ma ɖé Tèò-Áɓì-hwɔ̀ɖɔ̀ nì ma ɖé Kéɓà-nìɔ̀ wĩín nyɛ múɛɛ gbo. Ké ḿ kò ma ɓó wa hwìɛ̀ dyi ɓó wé mɛ̀nɛ̌ìn-sɔ̃́ xwíníín, ké dĩin-dɔ̃ kpɔ̃ ma ḿ kɔ̃.

Bounɓoɔ̀ nyu Ìzíkìò Éézùɖùɛ̀-nyɔ̀ ɓěɔ̀ dyí-gmɔ̀-nyɔ̀ mú

¹⁶ Ti ɓɛ́ wé mɛ̀nɛ̌ìn-sɔ̃́ ɖǎ ma ziɛɛ, púɛɛ, Bounɓoɔ̀ wùɖù ma ḿ gbo, ké ɔ ɖá,

¹⁷ “Gǎ-dyù, ḿ ɖǎ m̀ nyɔ-dyí-gmɔ̀-nyɔ̀ mú nyu ɓó Éézùɖùɛ̀ɛ̀ gbǒ-xwíníínɔ̀ bìì. Ɔ jèɛɛ, m̀ mɛ tò ɖɛ ní muà cɛ̃ìn nyɛɛ gbo ɖùǔ, ɓɛ́ m̀ ké ní ná-wùɖùɔ̀ wa dyí nyìnììn.

¹⁸ Ɔ jǔ ké ḿ dyiɛ hwòɖǒ-kɔ̃in-nyìnììn-nyɔ̀ ɖò gbo cɛ̃, ké ḿ dyi níiń ɔ ɓéɖé ɔ ké mɛ́ wɛ̃́ɛ́, ké m̀ se ɔ náún po, mɔɔ ké m̀ se ɔ wɔ̃ ɓàɖàìn, ɓɛ́ ɔ ké ɔ kpeɖe gbàɔ̀ dyi táà, ɓɛ́ dyììn ɖéɛ múɛɛ, m̀ ké ɔ fɛ̀ɛ̀ɔ̀ póìn ní, nìí, hwòɖǒ-kɔ̃in-nyìnììn-nyɔ̀ɔ̀ mu mɛ́ìn ɓó ɔ nàmàǔnɔ̀ jè dyɛo, kɛɛ ní mu m̀ zaa kpɔ̃̀ìn ɓó ɔ nyɔmɔɔ̀ jè.

¹⁹ Kɛɛ ɔ jǔ ké m̀ dyi hwòɖǒ-kɔ̃in-nyìnììn-nyɔ̀ɔ̀ náún po, ké ɔ se ɔ hwòɖǒ-kɔ̃in-nyìnììn-nyìnììnɔ̀ mɔɔ ɔ kpeɖe gbàɔ̀ dyi táà ní, nìí, ɔ mu ɔ nàmàǔnɔ̀ jè mɛ́ìn dyɛo, kɛɛ nìí, mɔ̀ùn ɖǎ buɛ̀.

²⁰ “Ɔ jǔ ké dyí-sɛ́ɖɛ́ìn-nyɔ̀ ɖò dyi ɔ dyí-sɛ́ɖɛ́ìn-kpèɖèɔ̀ dyi táà, ké ɔ dyi ɖɛ gbà nyu, ké m̀ se ɔ náún po ní, nìí, ní mu ɖɛ ké ɔ gĩɔ kɔ̃ dyàa ɓó ɔ dyúa poùn, ké ɔ mu mɛ́ìn ɓó ɔ nàmàǔnɔ̀ jè. Dyí-sɛ́ɖɛ́ìn-ɖɛ̀ ɓě ɓɛ́ ɔ nyu ma kɛɛ jè mu ḿ hwìɖǐi sɔ̀ùn, ké ní mu m̀ zaa kpɔ̃̀ìn ɓó ɔ nyɔmɔɔ̀ jè.

²¹ Kɛɛ m̀ dyi dyí-sɛ́ɖɛ́ìn-nyɔ̀ ɓɛ́ ɔ nyu nàmàǔn wɛ̃ɛ náún po, ɓɛ́ ɔ ké ɔ nàmàǔnɔ̀ dyi táà, ké ɔ dyiɛ nyu ké ɔ dyi ɔ nàmàǔnɔ̀ dyi táà ní, nìí, ɔ mu cĩ́ìn, sepóɛɖé ɔ kpɔ̃ nì ná-wùɖùɔ̀ dyi. Ɔ dyi ná nìǐn, nìí, mɔ̀ùn ɖǎ buɛ̀.”

Ìzíkìò se wùɖùɛ̀ ɓɛ́ǐn mu

²² Sɔ̀ìn ɓóɛ gboɛɛ, Bounɓoɔ̀ kpéɔ̀ dyi ma ḿ kɔ̃, ké ɔ cɛ̃ɛ ma ḿ gbo, ké ɔ ɖá, “Sɔ̀ dyí, ɓɛ́ m̀ ké ɖé bɔɔ̀ kɔ̃ mu, ké ɖéɛ̀ ní mu m̀ gbo wùɖùìn.”

²³ Ɔ jèɛɛ, ḿ sɔ̀ ma dyí, ké ḿ mu ma ɖé bɔɔ̀ kɔ̃. Ti ḿ nyini ma ɖéɛɛ, púɛɛ, ḿ dyéɛ, ké Bounɓoɔ̀ dĩ́ín-dĩ̀ìnɔ̀ nì ma ɖé. Ɔ nì kà dĩ́ín-dĩ̀ìn ɓɛ́ ḿ dyé ma kà ɖé Kéɓà-nìɔ̀ wĩín nyɛɛ nìà kɛ. Púɛɛ, ḿ jìɖǐ ma ɓó ɓíɖíi dyi.

²⁴ Hwɛ̀ ké Zùùɔ̀ dyi ma ɖé ḿ mú, ké ɔ nyànàìn ma ḿ dyi. Ké Bounɓoɔ̀ wùɖù ma ḿ gbo, ké ɔ ɖá, “Mu ɖé nì gbǒɔ̀ mú, ɓɛ́ m̀ kéɛ m̀ mìɔùn dyíin gbǎìn.

²⁵ Ɔ ɖǎ ná nìǐn, gǎ-dyù, wa mu m̀ ɖúú sã̀ìn, ké m̀ se nyɔ ɓěɔ̀ hwìɛ̀ síɛ ɓɛ́ǐn mu.

²⁶ Ké ní muɛ nyuùn ɓɛ́ nì miɔɔ̀ ké m̀ wɔ̃-xwìà dyi nɛ́ìn, ké m̀ se wùɖùɛ̀ ɓɛ́ǐn mu, ɓɛ́ m̀ ké wa náún poɛ ɓɛ́ìn, sepóɛɖé waà gbǒ-xwíníínɔ̀ mɔ̀ ḿ kɛ́ɛ́-mú-nyu-nyɔ̀ ɓě.

²⁷ Kɛɛ ḿ dyi m̀ gbo wùɖù ní, ní mu nì wɔ̃ɔ̀ ɓáàùn, ɓɛ́ m̀ kéɛ nyɔ ɓěɔ̀ gbo cɛ̃, ɓɛ́ m̀ ké níiń, ‘Ɖɛ nìà kɛ mɔ̀ ɖɛ ɓɛ́ Bounɓo Ɖɛɓíɔ́ cɛ̃ kɛ.’ Nyɔ dyi ɖùǔ tòɛ̀ mɔ́ùn wɛ̃ɛ, ɔ mɛ tò ɖùǔ, ké nyɔ se ɖùǔ tòɛ̀ mɔ́ùn wɛ̃ɛ, ɔ mɛ ɓɔ́ ɖùǔ tòɛ̀, sepóɛɖé waà gbǒ-xwíníínɔ̀ mɔ̀ ḿ kɛ́ɛ́-mú-nyu-nyɔ̀ ɓě.”