Ìzíkìò 2 - Ɓǎsɔ́ɔ̀ Báɓòɔ̀

¹ Bounɓoɔ̀ cɛ̃ɛ ma ḿ gbo, ké ɔ ɖá, “Gǎ-dyù, nyànà dyi, ɓɛ́ ḿ ké m̀ gbo wùɖù.”

² Ti Bounɓoɔ̀ nì ma ɖɛ nìà kɛ cɛ̃iń nyɛɛ, púɛɛ, ɔ Zùùɔ̀ dyi ma ɖé ḿ mú, ké ɔ nyànàìn ma ḿ dyi. Ké ḿ wɔ̃́ɔ, ké Bounɓoɔ̀ nì ma ḿ gbo wùɖùɛ̌n.

³ Ɔ ɖá, “Gǎ-dyù, ḿ nì m̀ Éézùɖùɛ̀-dyù ɓěɔ̀ gbo ɖoɓoɛń. Wa mɔ̀ ɓóɖó-dù ɓɛ́ wa mɔ̀à ḿ kɛ́ɛ́-mú-nyu-nyɔ̀ɛ. Wa kè wa ɓǎ nììn ɓǎ ɓěɔ̀ ɖúó ḿ wuɖuún jaɖauń dyíɛ. Wa gã̀à nyuɛń dyi tee, ké ɔ dyɛ̀ìn kà ɓó zɛ̃̌ɛ̀ kɛ̀.

⁴ Nyɔ ɓě kɔ̃̀ gbo ḿ nìà m̀ ɖoɓoɛń nyɛɛ mɔ̀ ɖùǔ-kã̀-nyɔ̀ kè dú-kùmù-nyɔ̀ ɓě. M̀ mɛ cɛ̃ɛ wa gbo, ɓɛ́ m̀ ké níiń, ‘Ɖɛ nìà kɛ mɔ̀ ɖɛ ɓɛ́ Bounɓo Ɖɛɓíɔ́ cɛ̃ kɛ.’

⁵ Kɛbì wa mɛ tò nì wuɖuɔ̀ ɖùǔ gbo, mɔɔ kɛbì wa mɛ seɛ ɖùǔ gbo tò sepóɛɖé waà gbǒ-xwíníínɔ̀ mɔ̀ ḿ kɛ́ɛ́-mú-nyu-nyɔ̀ ɓě jèɛɛ, wɛ̃́ɛ́ kɛɛ, wa muɛ dyuòùn kà kpáá-ɖɛ̀-cɛ̃-nyɔ̀ ɖò ɖǎ wa hwìɛ̀ dyi kɛ.

⁶ “Ké ɓá mɔ̀ùn jè dyíɛɛ, gǎ-dyù, mɔ̀ǔn ɖá ɓɛ́ m̀ ké wa mɔɔ waà wuɖu ɓěɔ̀ jè fɛ̃̀ìn. Kɛbì wa mɛ nì kà wí ɓě nìà kɛɛ ɓó m̀ ɖei, mɔɔ kɛbì ɔ mɛ nì kà m̀ cĩ́ gĩ́á ɓě hwìɛ̀ kɛɛ, mɔ̀ǔn ɖá ɓɛ́ m̀ ké fɛ̃̀ìn ɓó waà wuɖu ɓěɔ̀ jè, mɔɔ ɓɛ́ nì dyɔɔ̀ ké tɛɖɛ ɓá wa jè dyí, sepóɛɖé waà gbǒ-xwíníín gànáɔ̀ mɔ̀ ḿ kɛ́ɛ́-mú-nyu-nyɔ̀ ɓě.

⁷ Kɛbì wa mɛ tò nì wuɖuɔ̀ ɖùǔ gbo, mɔɔ kɛbì wa mɛ seɛ ɖùǔ gbo tò sepóɛɖé waà gbǒ-xwíníínɔ̀ mɔ̀ ḿ kɛ́ɛ́-mú-nyu-nyɔ̀ ɓě jèɛɛ, wɛ̃́ɛ́ kɛɛ, m̀ mɛ cɛ̃ ní wuɖuɔ̀ wa gbo.

⁸ “Kɛɛ gǎ-dyù, tò ɖɛ ḿ cɛ̃à m̀ gboɛɛ ɖùǔ gbo. M̀ mɛ ɓɔ́ ḿ kɛ́ɛ́ mú nyuɛ kà gbǒ-xwíníínɛ̀ nyuà ḿ kɛ́ɛ́ múɛ. Ɓáà wɔ̃, ɓɛ́ m̀ ké ɖɛ ní muà m̀ nyíìn nyɛɛ ɖi.”

⁹ Púɛɛ, ḿ gmɔ̀ ma ɖé, ké ḿ dyéɛ, ké sɔ̃ ɖò pɛ́ɛ̀, ké ɔ tò ma ḿ dyí, ɔ ɓéɖé ma céè-ɖɛ̀ páɖá-páɖá ɖò.

¹⁰ Ké sɔ̃ɔ̀ pɛ́ɛ̀ céè-ɖɛ̀ɔ̀ kɔ̃in ɓó ḿ dyúa, ké céè-ɖɛ̀ɔ̀ ɓéɖé ma céè-dyèɖè ɔ wáká sɔ̃́ ɓěɔ̀ kɔ̃in. Ɖɛ ɓě céè ma kà céè-ɖɛ̀ɔ̀ wáká sɔ̃́ɔ̀ kɔ̃ɛɛ mɔ̀ wìì-wùɖù kè vĩ̌-wùɖù ɔ kè hwòɛ̌-wùɖù.