Hòzéà 9 - Ɓǎsɔ́ɔ̀ Báɓòɔ̀

Hòzéà po wuɖui ɓá gǎ mu Éézùɖùɛ̀-ɓòɖòɔ̀ kɔ̃ dyiìn nyɛɛ jè dyí

¹ Éézùɖùɛ̀-nyɔ̀ ɓě, ɓě ɓɔ́ múàǔn kpáa. Ɓě ɓɔ́ hwɔ paa kà ɓóɖó-dù kà kò ɖò ɓěɛ̀ nyɔ ɓěɔ̀ nyuà kɛ. Sepóɛɖé ɓě ɖǎ gbàɖàùn po dyììn ɖé ɓěɛ̀ Gèɖèpɔ́ɔ̀ dyi-táà-táàɔ̀ mú, ké ɓě ɖɛ̀ɓɛ̀ ɖɛ ɓě dyé ɓěɛ̀ kũùn-kpò ɓiè-ɓièɔ̀ kɔ̃ún ɖé ɓěɛ̀ mɔɔ́-dyí-síìn-naín séín ɓěɔ̀ kɛɛ mú.

² Kɛɛ ɖii-ɖɛ̀ se ɖé mɔɔ́-dyí-síìn-naín ɓěɔ̀ kè géɖéè-mú-píníìn-naín ɓěɔ̀ wóɖóɛ mu ɓó ɓě bìì ɖe. Ké ɓě se wã́ìn ɖìè ɖò dyéɛ mu.

³ Ɓě se ɖé Bounɓoɔ̀ ɓóɖóɔ̀ kɔ̃ cĩ́ɛ mu kánáá pū. Kɛɛ ɓě mu ɖé Íjè-ɓòɖòɔ̀ kɔ̃ ɖe muùn, ké ɓě mu ɖii-ɖɛ̀ se mú hwɛ̀ɛ ɖiìn ɖé Àsíwíɖíà-ɓòɖòɔ̀ kɔ̃.

⁴ Ɓě se wã́ìn-sàǎ-zàìn-ɖɛ̀ ɖò Bounɓoɔ̀ gbo dyàǎ mu, mɔɔ ké ɓěɛ̀ sáa-zàìn-ɖɛ̀ ɓěɔ̀ ɖò se Bounɓoɔ̀ hwòɖǒ dyi dèɛ̌ mu. Ɓěɛ̀ sáa-zàìn-ɖɛ̀ ɓěɔ̀ mu nììn pū kà ɖii-ɖɛ̀ ɓɛ́ wa kpa nyɔ nì xwɛ́-vòɖò kɔ̃ɛɛ jè nìà kɛ. Nyɔ kã̀ìn séín muɛ ɖiìn nyɛɛ, ɔ mu wa se-mú-hwɛ̀-nyɔ̀ mú nyuùn. Ɖii-ɖɛ̀ nì kàà kɛɛ mu ɓě mìɔùn nììn ɖii-ɖɛ̀ ké ɓě mɔ́ xwíníín zà kɛɛ jǔùn pū, kɛɛ ɔ se ɖé Bounɓoɔ̀ gbǒɔ̀ mú dyáa mu.

⁵ Ɔ ɖǎ ná nìǐn, nìí, ɖɛ́ ɓě mu nyuùn ɓó ɓěɛ̀ hwɔ-wè ɓěɔ̀ kè Bounɓoɔ̀ nììn hwɔ-wè ɓěɔ̀ ɓaɖa kɛ́?

⁶ Ti ɓɛ́ mú-gbɔɔ̀-gbɔɔ̀ mu ɓě kɔ̃ dyiìn nyɛɛ, ɓě mu dyi gbɛ̀ìn. Kɛɛ Íjè-nyɔ̀ ɓěɔ̀ mu ɓě kpɔ̃ùn, ké wa mu ɓě dyóɖóún zàùn ɖé Mɛ́fè-hwɔ̀ɖɔ̀ɔ̀ mú. Ké kpɔ̀ɔ̌ mu ɓěɛ̀ séɓàɖà-ɖɛ̀ kpa ɖɛ ɓěɔ̀ dyí ɖúùn, ké wí-gbǎ ɓě mu ɓěɛ̀ gbǒ ɓěɔ̀ dyí ɖúùn.

⁷ Ɓěɛ̀ gǎ-dyéìn-wè ɓěɔ̀ ɖǎ dyi. Ɓěɛ̀ pɛ́ɛ̀-tìɔ̀ ɖǎ dyi. Ɖɛ nìà kɛ dyi kpá ní, ɓě mɔ̀ Éézùɖùɛ̀-nyɔ̀ ɓěɛɛ muɛ dyuòùn. Ɓěɛ̀ nàmàǔnɔ̀ kè ɓěɛ̀ nyɛ́ín-nyɛ́ínɔ̀ ɓúá kpéín mìɔ jèɛɛ, ɓě cɛ̃ɛ kà ɓɛ́ kpáá-ɖɛ̀-cɛ̃-nyɔ̀ɔ̀ mɔ̀ zuɖuu-nyɔ̀ kɛ. Ɓě cɛ̃ɛ kà ɓɛ́ nyɔ Gèɖèpɔ́ɔ̀ Zùùɔ̀ nìà mú wùɖùɛ̌n nyɛɛ, sã̀à nyu ɔ kɛ.

⁸ Mɔ̄ mɔ̀ kpáá-ɖɛ̀-cɛ̃-nyɔ̀ɔ̀, ké ní Gèɖèpɔ́ɔ̀ ɖǎ ḿ ɖoɓo, ɓɛ́ ḿ ké ɓě mɔ̀ Éézùɖùɛ̀-nyɔ̀ ɓě mɔ̀à ɔ nyɔ ɓěɔ̀ kɛɛ dyí-gmɔ̀-nyɔ̀ jǔ. Kɛɛ wɛ̃́ɛ́ kɛɛ, ɓě gbǎ xwáɖá ɓó ḿ bìì kà nyɔ gbǎà naà jè xwáɖá kɛɛ ɖé ní hwìè séín ɓěɔ̀ dyí. Dyéɛ, ɓě mɔ̀ Gèɖèpɔ́ɔ̀ kpáá-ɖɛ̀-cɛ̃-nyɔ̀ɔ̀ mú-nyɛ́-nyɔ̀ nɔ̄ Gèɖèpɔ́ɔ̀ mìɔùn nììn ɓóɖóɛ̀ kɔ̃.

⁹ Ɓě ɖǎ ɓě mìɔùn dyíin nyìnìɛ̌n zi mìɔ cá kà wa nyuɛ zɔ̃̌ɔ̀ kà ɖé Gíɓìà-hwɔ̀ɖɔ̀ɔ̀ múɛ. Ɔ jèɛɛ, ɓěɛ̀ ɖɛ gbà ɓěɔ̀ jè mu Gèɖèpɔ́ɔ̀ hwìɖǐi nììn, ké ɔ mu ɓě gǎ kɔ̃ tòùn ɓó ɓěɛ̀ nàmàǔn ɓěɔ̀ jè.

Ɖɛ Éézùɖùɛ̀-nyɔ̀ ɓěɔ̀ nàmàǔnɔ̀ wóɖó gboɛ

¹⁰ Bounɓoɔ̀ cɛ̃ɛ, ké ɔ ɖá, “Ti ɓɛ́ ḿ dyé ma Éézùɖùɛ̀-dyù ɓěɔ̀ da kɛɛ, ɔ nì pū kà nyɔ dyéɔ́ kà géɖéè-gbǎ ɖò da ɖé gbǎùn-fúɖúá ɖò kɔ̃ɛ. Ti ɓɛ́ ḿ dyé ma ɓěɛ̀ ɓǎ ɓěɔ̀ daa, ɔ nì pū kà nyɔ dyéɔ́ kà féè-cù ɖòɛ̀ kĩ́ín-kĩ́ín-ɓò ɓɛ́ ɔ tòɖò ké ɔ boɛɛ da kɛ. Kɛɛ wa mu ma ɖé Píò-tòɖòɔ̀ gbo. Púɛɛ, wa dè ma Béò ɓièɛ̀ gbɔ. Ké wa jè nyàìn ma ḿ dyi kà ɖɛ wa ɖɛ̀ɓɛ̀ ma kà múɛɛ jè nyuà ḿ dyi nyàìn nyɛ.

¹¹ Éézùɖùɛ̀-dyù ɓěɔ̀ nììn dĩ́ín-dĩ̀ìnɔ̀ mu wa mú wãùn kà naà wãà kɛ. Wa ɖò se dyú ɖò wóɖóɛ̌n mu ɖe, ké waà màa ɓěɔ̀ ɖò se zùù kɔ̃ nìɛ̌ mu ɖe. Wa mu ɖààǔn sèìn.

¹² Kɛbì wa mɛ ɓéɖé gmɛ̀ìn-dyù ɓěɛɛ, ní muɛ nyuùn ɓɛ́ wa ké wa xwa sɔ̀ séín. Gboò-wùɖù mu wa kɔ̃ nììn ti ní mu wa dyi táàùn wɛ̃.

¹³ Ḿ dyé ma Éézùɖùɛ̀-dyù ɓěɔ̀ kà Táà-nyɔ̀ ɓěɔ̀ nìà kɛ. Wa nì ma kà cu-gɔ̃̀ ɓɛ́ ɔ mɛ ɓó pá nɔ̀mɔ̀ dyíin ɖò múɛɛ nìà kɛ. Kɛɛ ɓó kàǔn wɛ̃ɛ, Éézùɖùɛ̀-dyù ɓěɔ̀ ɓéɖé wa kéá waà dyú ɓěɔ̀ kú-ɖáɓá-nyɔ̀ ɓěɔ̀ xwáɖáún zàìn.”

¹⁴ Óó Bounɓo, ɖɛ́ nì mu nyɔ ɓěɛ̀ bũ̌ nyuùn wɛ̃́? Ɖɛ m̀ mɛ nyu wa bũ̌ɛɛ kɛà kɛ̀. Nyuɛ ɓɛ́ wa ké ɖààǔn sè. Waà nɛɛ̀ mɛ ɓɔ́ níín dyiɛ fɔɔ.

Bounɓoɔ̀ wáɖá Éézùɖùɛ̀-nyɔ̀ ɓěɔ̀ zaa dúún

¹⁵ Bounɓoɔ̀ cɛ̃ɛ ɖe, ké ɔ ɖá, “Ḿ nyɛ́ Éézùɖùɛ̀-dyù ɓěɔ̀ mú ɓó hwòɖǒ-kɔ̃in-nyìnììn-ɖɛ̀ séín ɓě ɓɛ́ wa nyu ma kà ɖé Gíógàò-hwɔ̀ɖɔ̀ɔ̀ múɛɛ jè. Ní mu wa ní ɓóɖóɔ̀ kɔ̃ dyi kúmúùn ɓó hwòɖǒ-kɔ̃in-nyìnììn-ɖɛ̀ ɓě ɓɛ́ wa nyuà kɛɛ jè. Ḿ se wa mú ɖɛ̀ɓɛ̀ɛ̌ mu ɖe. Waà wuɖuí-kɔ̃̀-nyɔ̀ séín ɓěɔ̀ mɔ̀ ní gbo-vɔ̃-nyɔ̀.

¹⁶ Éézùɖùɛ̀-dyù ɓěɔ̀ nì kà ɓáá-ɖɛ̀ kɔ̃̀ gmɛ̀nɛ̀ɛ̀ dyɛ, ké ɔ se ɓo ɖò tòɖòɛɛ nìà kɛ. Kɛbì wa mɛ wóɖóìn dyú ɖòɛɛ, ní mu waà dyú ɓě ɓɛ́ wa ɖɛ̀ɓɛ̀à múɛɛ ɖáɓáùn.”

Ɖɛ Hòzéà cɛ̃ ɓá Éézùɖùɛ̀-nyɔ̀ ɓěɔ̀ jè dyíɛ

¹⁷ Ní Gèɖèpɔ́ɔ̀ mu wa jè dyi táàùn, sepóɛɖé wa se ɔ wuɖuɔ̀ ɖùǔ gbo tò. Ké wa muá ɓee-ɓee-nyɔ̀ jǔùn ɖé ɓóɖó-dù kà kò ɖò ɓěɔ̀ hwìɛ̀.