Hòzéà 8 - Ɓǎsɔ́ɔ̀ Báɓòɔ̀

Bounɓoɔ̀ wáɖá Éézùɖùɛ̀-nyɔ̀ ɓěɔ̀ zaa dúún ɓó wa kũùn-kpò ɓiè jè

¹ Bounɓoɔ̀ cɛ̃ɛ ɖe, ké ɔ ɖá, “Ɓě ɓaɖa ɖɔ-kpaɔ̀. Mú-nyɛ́-nyɔ̀ ɓě mu dyiìn kà ke dyià ɓíɖíiɛ. Wa mu ní nyɔ ɓěɔ̀ gbo vɔ̃uń dyiìn, sepóɛɖé wa ɖǎ ní dèè-wùɖùɔ̀ mú jaɖa, ké wa ɖǎ ní gmaɔ̀ wáɖá.

² Éézùɖùɛ̀-dyù ɓěɔ̀ mu ḿ kpé dyi pòìn, ɓɛ́ wa ké níiń, ‘À Gèɖèpɔ́ɔ̀, à dyuò m̀ dyí.’

³ Kɛɛ Éézùɖùɛ̀-dyù ɓěɔ̀ ɖǎ dyí-sɛ́ɖɛ́ìn-ɖɛ̀ ɓɔ́. Ɔ jèɛɛ, waà mú-nyɛ́-nyɔ̀ ɓěɔ̀ mu wa kíɖíí kpáùn.

⁴ “Wa ɖǎ waà kã́á ɓě gã, ké wa seɛ ḿ dyí po. Wa ɖǎ waà gɔ̌mànà-nyɔ̀ ɓě gã, ké wa se ḿ dyi diè. Wa ɖú waà séɓàɖà kè góò ɓěɔ̀ dyí, ké wa nyuɛ kũùn-kpò ɓě mú ɓó wa mìɔùn mú gbɔɔ̀ jè.

⁵ Ḿ nyɛ́ Sɛ̀mɛ́ɖìà-nyɔ̀ ɓěɔ̀ ɓìɖǐ-dyù-kũ̀ùn-kpò ɓɛ́ wa ɓièà kɛɛ mú. Ḿ kpáìn wa dyoɖoún mìɔ. Tiɔ̀ nyɛ́ hwɛ̀ wa ké mú hwɛ̀ kɛ́?

⁶ Éézùɖùɛ̀-dyù ɓěɔ̀ sɛ́ɖɛ́-nyɔ̀ ɖò mɔ̀ nyɔ mɛ kũùn-kpòɔ̀. Ɔ se Gèɖèpɔ́ɔ̀ fɔɔ cá. Ní mu ɓìɖǐ ɓɛ́ wa ɓièà ɖé Sɛ̀mɛ́ɖìà-hwɔ̀ɖɔ̀ɔ̀ múɛɛ dyi wàìn, ɓɛ́ ɔ ké pĩ́á mɛ́nɛ́-mɛ́nɛ́ jǔ.

⁷ Pìɔ̌ mɔ̀ ɓáá-ɖɛ̀-dyùà ɓɛ́ wa ɓá kɛ, ké ɖɛ wa muɛ dya kpã́ùn wɛ̃ɛ mɔ̀ dìì. Ɔ nì kà mɔɔ́-gɔ̃̀ se bùè nìà kɛ. Ɔ jèɛɛ, ɔ se dyɔ́ ɖò dú nìɛ̌ mu. Ɔ jǔ ké ɔ dyiɔ́ dyɔ́ ɖò dú nìǐn, nìí, ɖíà ɓě muɛ ɖiìn.

⁸ Ɓóɖó-dù kà kò ɖò ɓě ɖǎ Éézùɖùɛ̀-ɓòɖòɔ̀ mana. Ɓó kàǔn wɛ̃ɛ, Éézùɖùɛ̀-dyù ɓěɔ̀ ɖǎ dyi gbɛ̀ìn ɖé ɓóɖó-dù kà kò ɖò ɓěɛ̀ nyɔ ɓěɔ̀ hwìɛ̀, ké wa nì kà ɖɛ-fùù gbà ɓɛ́ nyɔ ɖò se ɖɛ ɖò mú nyùɛ̀n ɓɛ́ìn nyɛɛ nìà kɛ.

⁹ Éézùɖùɛ̀-dyù ɓěɔ̀ ku ɖùǔn kà xwáɖá-xwíɖíi-jǎkasì nìà kɛ, sepóɛɖé wa ɖǎ Àsíwíɖíà-nyɔ̀ ɓěɔ̀ pĩ́ín kpá. Wa ɖǎ ɓóɖó-dù kà kò ɖò ɓě pɛ́ɛ̀, ɓɛ́ wa ké wa gbo kpá.

¹⁰ Wa ɖǎ wa mìɔùn ɓóɖó-dù ɓěɔ̀ gbo pèɖèìn dyɛo, kɛɛ ɓó kàǔn wɛ̃ɛ, ní mu wa dyí poìn, ɓɛ́ Àsíwíɖíà-ɓòɖòɔ̀ kã́á vɛ̀nɛ̀ɔ̀ ké wa dyi pĩ́à.

¹¹ “Éézùɖùɛ̀-dyù ɓěɔ̀ po sáa-kɔ̃-zàìn-gbàà pàɖǎ, ɓɛ́ wa ké ɓó sáa-zàìn-ɖɛ̀ ɓá nàmàǔn kɔ̃in zĩ̀ìn jè dyíɛɛ nyùìn. Kɛɛ sáa-kɔ̃-zàìn-gbàà ɓěɔ̀ kɔ̃ mɔ̀ǎ waà nàmàǔn-nyùìn-naín.

¹² Ḿ ɖǎ ní gma ɓáún-ɓáún ɓě tò, kɛɛ wa ɖúɛ ma dyí, ɓɛ́ ɔ ké ɖɛ kĩà dyí ɖò jǔ.

¹³ Wa zàìn nyúà-ɖɛ̀ ɓě sáa ɖé ḿ gbo, ké wa ɖiɛ suaɖɛ̀ɔ̀. Kɛɛ ní hwòɖǒ se wa múin dèìn. Ɔ jèɛɛ, ɓó kàǔn wɛ̃ɛ, waà nàmàǔnɔ̀ jè mu ḿ hwìɖǐi dyiìn, ɓɛ́ ḿ ké wa gǎ kɔ̃ dyà. Ní mu wa ɖé Íjè-ɓòɖòɔ̀ kɔ̃ tòùn ɖe.

¹⁴ “Nyɔ mɛ ma Éézùɖùɛ̀-dyù ɓěɔ̀ kɛɛ jè ɖǎ wa hwìɖǐi sɔ̀, ké wa ɖǎ kã́á-gbò ɓě po. Ké Júɖà-nyɔ̀ ɓěɔ̀ ɖǎ toún-pèɖèìn-hwɔ̀ɖɔ̀ ɓáún-ɓáún dè. Kɛɛ ní mu waà toún-pèɖèìn-hwɔ̀ɖɔ̀ ɓěɔ̀ nyɛ kɔ̃ tòùn, ké nyɛɔ̀ mu waà nyɔ-dyí-gmɔ̀ìn-naín ɓěɔ̀ séín fɔ̃ùn.”