Hòzéà 7 - Ɓǎsɔ́ɔ̀ Báɓòɔ̀

¹ “Ti ɓɛ́ ḿ mɔ́á ní nyɔ ɓě mɔ̀à Éézùɖùɛ̀-dyù ɓěɔ̀ kɛɛ dyi kánáìn dyi, ɓɛ́ ḿ kéɛ nyu ɓɛ́ wa kéá dúún zaìn nyɛ̀nɛ̀ɛ̀ kɛɛ ní, nìí, ɖɛ ḿ dyé nyɛ̀nɛ̀ɛ̀ kɛɛ mɔ̀ wa nììn nàmàǔn ɓěɔ̀ kè hwòɖǒ-kɔ̃in-nyìnììn-nyìnììnɔ̀. Wa nyuìn nyùìn gbá-gbá mú, ké wa wa nyɔǔn ɓěɛ̀ gbǒ ɓě, ké wa dyíɖí ɖé. Wa dyíɖí nyɔǔn ɓě bũ̌ ɖé píé.

² Waà hwòɖǒ seɛ dyi tó kà waà ɖɛ gbà séín ɓěɔ̀ jè nì ḿ hwìɖǐiɛ. Kɛɛ waà nàmàǔn ɓěɔ̀ ɖǎ wa gba-gba mú po, ké waà nàmàǔn ɓěɔ̀ nì ɓó ḿ dyúa kánáá pū.

Sɔ́-sɔ́ nì ɖé kã́á-gbòɔ̀ múɛ

³ “Éézùɖùɛ̀-dyù ɓěɔ̀ hwòɖǒ-kɔ̃in-nyìnììn-ɖɛ̀ nyu-nyuɔ̀ po kã́áɔ̀ múàǔn. Ké waà se-tɔ́mɔ́-tɔ́mɔ́ɔ̀ po gɔ̌mànà-nyɔ̀ ɓě nìà ɖé kã́áɔ̀ gboɛɛ múàǔn ɖekè.

⁴ Wa séín se hwòɖǒ-kɔ̃-dè-nyɔ̀. Wa nì kà bɛɖɛɛ̀-mú-pĩ̀ìn-gbò kɔ̃̀ mú ɓɛ́ bɛɖɛɛ̀-nyu-nyɔ̀ ɖò daɓa nyɛ-ɓɔ́ɔ́, ké ɔ sèɛ̀ wãa, ké ɔ mu, ké ɔ ɖoò ɔ bɛɖɛɛ̀ɔ̀, ké ɔ fòìn, ké bɛɖɛɛ̀ɔ̀ dyá séín hwɛ̀ ké ɔ dyi, ké ɔ dyɛ̀ìn nyɛ-ɓɔ́ɔ̀ wãa dyiɛɛ nìà kɛ.

⁵ Ɓó kã́áɔ̀ hwɔ-wè ɓěɔ̀ ɓaɖa ní, Éézùɖùɛ̀-dyù ɓěɔ̀ nyuɛ ké wã́ìn nyu kã́áɔ̀ kè gɔ̌mànà-nyɔ̀ ɓěɔ̀, ké wa kè nyɔ-dyɔ́-ɓaɖa-nyɔ̀ ɓěɔ̀ mɔ̀ǎ nyɔ dyúáɖò.

⁶ Sepóɛɖé Éézùɖùɛ̀-dyù ɓěɔ̀ ɖǎ waà hwòɖǒ-dyùà ɓěɔ̀ ti dyéìn kà bɛɖɛɛ̀-mú-pĩ̀ìn-gbò nìà kɛɛ dyììn ɖé gbá-gbá mú. Hwuɖu dyi hwɔ ní, waà dyoɖo-hwòɖòɔ̀ gã̀ ɓúɛń dyi tee ɓó máaún-hwùɖù gànáɔ̀ mú kà nyɛ ɓúà kɛ. Zɔ̃ zɔ̃ nyɛ̀nɛ̀ɛ̀ ní, ɔ kpɔ̃ dyí kà nyɛ-mìɔ̀ nìà kɛ.

⁷ Wa séín ɓéɖé zùzù kà bɛɖɛɛ̀-mú-pĩ̀ìn-gbò nìà kɛ, ké wa ɖáɓá waà wuɖuí-kɔ̃̀-nyɔ̀ ɓěɔ̀. Waà kã́á séín ɓěɔ̀ ɖǎ dyi kpá, ké nyɔ ɖò ké ɖé wa hwìɛ̀ nì, ɓɛ́ ɔ ké ḿ ɖáa ɖò se nì.”

Éézùɖùɛ̀-ɓòɖòɔ̀ kè ɓóɖó-dù kà kò ɖò ɓě

⁸ Bounɓoɔ̀ cɛ̃ɛ ɖe, ké ɔ ɖá, “Éézùɖùɛ̀-dyù ɓěɔ̀ kè ɓóɖó-dù kà kò ɖò ɓě ɖǎ caìn. Éézùɖùɛ̀-dyù ɓěɔ̀ nì kà bɛɖɛɛ̀ se dyiɖi nìà kɛ.

⁹ Ɓóɖó-dù kà kò ɖò ɓěɔ̀ ɖǎ wa kpé múin nyɔ́, ké wa seɛ dyuò. Ké dyùì nìǎ wa dúún kpáuń, ké wa seɛ dyuò.

¹⁰ Éézùɖùɛ̀-dyù ɓěɔ̀ mìɔùn dyí-ɓúáìn-ɓúáìnɔ̀ ɖǎ wa zaa dúún wáɖá. Kɛɛ wa se mɔ̄ Bounɓo mɔ̀à waà Gèɖèpɔ́ɔ̀ kɛɛ gbo gmɔ̀ìn ɖe. Wa ní mɔ́ ḿ dyi.

¹¹ Éézùɖùɛ̀-dyù ɓěɔ̀ nì kà gbúɛ́ se hwòɖǒ fɔ̀nɔ̀ nìà kɛ. Wa se cáuń kàmà. Kĩ́ín-kĩ́ín nyɛɛ, wa ɖá Íjè-nyɔ̀ ɓěɔ̀, hwɛ̀ ké wa kpa peɖeɛ ɖé Àsíwíɖíà-nyɔ̀ ɓěɔ̀ gbo ɖe.

¹² Kɛɛ ti wa mu muɛń nììn nyɛɛ, ní mu ní kpéɖéɔ̀ wa kɔ̃ wáɖáùn, ɓɛ́ ḿ ké wa ɓíɖíi dyà kà nyɔ dyàà naà ɓíɖíiɛ. Ní mu wa kpeɖe zàùn ɓó waà ɖɛ gbà ɓěɔ̀ jè.

¹³ “Gboò-wùɖù nì wa kɔ̃, sepóɛɖé wa ɖǎ ḿ dyi táà. Wa mu mú gbɔɔ̀ùn, sepóɛɖé wa ɖǎ ní wuɖuɔ̀ mú jaɖa. Ní mɔ́ ɓɛ́ ḿ kéɔ́ wa gbǎà, kɛɛ wa tɔ́mɔ́ se ɓá ḿ jè dyí.

¹⁴ Wa ní pòìn ḿ kpé dyi hwòɖǒɛ̀-ɖé-hwɛ̀-kà. Kɛɛ wa nì waà kɔ̃-pɛ̃́-ɖɛ̀ ɓěɔ̀ kɔ̃, ké wa nì kpé poɛń. Wa ɖaɓaìn wa mìɔùn dyi ɓó ɖii-ɖɛ̀ kè wã́ìn jè. Wa nì ní wuɖuún jaɖauń.

¹⁵ Mɔ̄ mɔ̀ nyɔ gmɛ̀ìn wa, ké mɔ̄ po wa kpéí. Kɛɛ wa sɔ́ ɖɛ gbà dyí ɓá ní jè dyí.

¹⁶ Wa ní gmɔ̀ìn ɖé mɔ̄ mɔ̀à Ɖɛɓíɔ́ kɛɛ gbo ɖe. Wa nì kà pɔnɔ kíɖíìn múin nìà kɛ. Waà wuɖuí-kɔ̃̀-nyɔ̀ ɓěɔ̀ mu gàsíà dyí mɛ́ìn ɓó ɓɔ́ɖɔ́-wùɖù ɓě ɓɛ́ wa cɛ̃ kɛɛ jè. Ɔ ɖǎ ná nìǐn, nìí, Íjè-nyɔ̀ ɓěɔ̀ mu wa dyɔ́ ɓaɖaùn.”