Hòzéà 6 - Ɓǎsɔ́ɔ̀ Báɓòɔ̀

Éézùɖùɛ̀-nyɔ̀ ɓěɔ̀ kè Júɖà-nyɔ̀ ɓěɔ̀ se wìǐn kpá jɛ́ɛ́ cá

¹ Ɓě nìɛ̀ gbo cɛ̃ìn cɛ̃̀ìn, ké ɓě ɖá, “Ɓě dyi, ɓɛ́ ɓěà ké ɖé Bounɓoɔ̀ gbo gmɔ̀ìn ɖe. Ɔ ɖǎ à dyi fáìn dyɛo, kɛɛ ɔ mu à dyi kánáìn ɖe. Ɔ ɖǎ à puà dyɛo, kɛɛ ɔ mu à jě ɓěɔ̀ kũùn dyí poùn ɖe.

² Wé sɔ̃́ dyi zi ní, ɔ mu à kpéí poùn. Ɔ mu à dyí sɔ̀ìn ɖe ɓó wéɔ̀ tã nììnɔ̀ ɓaɖa, ɓɛ́ à ké ɓó ɔ dyúa cĩ́.

³ Ɓěà mɛ vɔ̃ kóɖó-kóɖó, ɓɛ́ ɓěà ké Bounɓoɔ̀ wuɖu nyu. Ɔ mu dyiìn wɛ̃́ɛ́ kà hwuɖu dyià hwɔ ní, zɔ̃ zɔ̃à wɛ̃́ɛ́ kɛɛ jè nìà kɛ, mɔɔ kà ní ɖaɓaà ɓóɛ ɖaɓa-tì kĩ́ín-kĩ́ínɔ̀ kèɛ̀ ɓɔ́ìn-ɖeɔ̀ nììn tiín, ɓɛ́ ɔ dyià ɓóɖó-kpàɔ̀ ní nyíɛɛ jè nìà kɛ.”

⁴ Kɛɛ Bounɓoɔ̀ ɖá, “Óó Ífèɖèìn-nyɔ̀ ɓě, xwɛ̌ ḿ mɛ nyu ɓě kɛ́? Óó Júɖà-nyɔ̀ ɓě, xwɛ̌ ḿ mɛ nyu ɓě kɛ́? Sepóɛɖé ɓěɛ̀ ɖɛ̀ɓɛ̀ǐn-ɖɛ̀ɓɛ̀ǐnɔ̀ nì kà dunu ɓɛ́ ɔ fṹà dyií dyi cɛ̃̀ǐn ɓó gànà-kṹún wɛ̃ɛ jè nìà kɛ.

⁵ Ɔ jèɛɛ, ḿ ɖǎ ɓě dyi cɛ̃ìn dyììn ɖé ní kpáá-ɖɛ̀-cɛ̃-nyɔ̀ ɓěɔ̀ mú. Ḿ ɖǎ ɓě ɖáɓá dyììn ɖé ní wĩín-wùɖùɔ̀ mú. Zaa-kpɔ̃-kpɔ̃ sɔ̀ìn ḿ gboɛɛ ɖǎ ɓě kɔ̃ dyi kà wɛ́ɖɛ́-wɛ́ɖɛ́ poà kɛ.

⁶ Ɖɛ ní hwòɖǒ dèìn múin nyɛɛ mɔ̀ ɖɛ̀ɓɛ̀ǐn-ɖɛ̀ɓɛ̀ǐn, ké ɔ zi sáa-zà-zà dyí. Ké ɓɛ́ nyɔ ké mɔ̄ mɔ̀à Gèɖèpɔ́ɔ̀ kɛɛ wuɖu nyuɛɛ kpa ɖɛ, ké ɔ zi fɔ̃ɔ-sàǎ-zàìn-ɖɛ̀ dyí.

⁷ “Kɛɛ ɓě nyu ɖɛ dyúáɖò ɓɛ́ Áɖɔ̀ùn nyu ma kà kɛ. Ɖɛɔ̀ mɔ̀, ɓě jaɖa dèè-wùɖùɔ̀ mú. Ké dyììn ɖéɛ múɛɛ, ɓě ɖǎ ḿ ɖɛ gbà bũ̌ nyu.

⁸ Gíɖèà-hwɔ̀ɖɔ̀ɔ̀ mɔ̀ ɖɛ-gbà-nyu-nyɔ̀ ɓěɔ̀ hwɔɖɔ. Ɔ ɖǎ zɛ̀nɛ̌ kpɔ̃ dyììn ɖé nyɔmɔɔ-dyi-wáɖáìn-wáɖáìn mú.

⁹ Kà sṹún-gɔ̀-nyɔ̀ ɓě fòà nyɔ ɖò hwìèɛɛ, kǎà sáa-zà-nyɔ̀ ɓěɔ̀ poìn dyí, ké wa ɖáɓá kú ɖé Sɛ́kɛ̃̀ìn-hwìèɔ̀ kɔ̃. Ɖɛ gbà ɓě ɓɛ́ wa nyuà kɛɛ mɔ̀ dɛ̃-ɖɛ̀.

¹⁰ Ḿ ɖǎ ɖɛ nyìnììn dyíin mìɔ ɖò dyé ɖé Éézùɖùɛ̀ɛ̀ gbǒ-xwíníínɔ̀ mú. Ɖɛɔ̀ mɔ̀, gbàɖàùn-po-po nì ɖé Éézùɖùɛ̀-dyù ɓěɔ̀ hwìɛ̀. Ɔ jèɛɛ, wa ɖǎ se-mú-hwɛ̀-nyɔ̀ ɓě jǔ.

¹¹ “Ɓá ɓě mɔ̀ Júɖà-nyɔ̀ ɓěɛɛ jè dyíɛɛ, ḿ ɖǎ ti ɖò táí po, ɓɛ́ ḿ ké ɓě gǎ kɔ̃ tò ɓó ɖɛ gbà ɓě ɓɛ́ ɓě nìà nyuɛń nyɛɛ jè.