Hòzéà 5 - Ɓǎsɔ́ɔ̀ Báɓòɔ̀

¹ “Ɓě mɔ̀à sáa-zà-nyɔ̀ ɓěɛɛ, ɓě tò ɖùǔo. Ɓě mɔ̀ kã́á gbǒ-xwíníín-nyɔ̀ ɓěɛɛ, ɓě tò ɖùǔ. Ɓě mɔ̀ Éézùɖùɛ̀-dyù tɔ̀ɔ̀ ɓěɛɛ, ɓě tò ɖùǔ. Zaa ɖǎ ɓě kpɔ̃, sepóɛɖé ɓě gbǎ xwáɖá ɖé Mípà-pàɔ̀ mú, ké ɓě dè kpéɖé ɖé Táɓɔ̀-tòɖòɔ̀ dya.

² Ké nyɔ-gbo-vɔ̃-nyɔ̀ ɓěɔ̀ ɖǎ kú ɖáɓá mìɔ cá. Ní mu ɓě séín kpeɖe zàùn.

³ Ḿ dyuò ɖɛ séín ɓá Éézùɖùɛ̀-dyù ɓěɔ̀ jè dyíɛɛ dyí. Éézùɖùɛ̀-dyù ɓěɔ̀ ɖò jè se ḿ dyí vǐè. Óó Éézùɖùɛ̀-dyù ɓě, ɓó kàǔn wɛ̃ɛ, ɓě ɖǎ gbàɖàùn-po-po kíɖíí sí, ké ɓě se mú-hwɛ̀-nyɔ̀ ɖe.”

Hòzéà po nyɔ ɓěɔ̀ náún ɓá kũùn-kpò ɓiè jè dyí

⁴ Éézùɖùɛ̀-nyɔ̀ ɓěɔ̀ nyuu-kpèɖè ɓěɔ̀ nyuɛ ké wa se Gèɖèpɔ́ɔ̀ gbo ɖe gmɔ̀ìn ɓɛ́ìn. Gbàɖàùn-po-hwòɖò nì wa xwíníín. Ɔ jèɛɛ, wa ní nyu Bounɓoɔ̀ wuɖu.

⁵ Éézùɖùɛ̀-nyɔ̀ ɓěɔ̀ mìɔùn dyí-ɓúáìn-ɓúáìnɔ̀ wáɖá wa zaa dúún. Ɔ jèɛɛ, Éézùɖùɛ̀-nyɔ̀ ɓěɔ̀ mu dyi kpáùn ɖé waà ɖɛ gbà ɓěɔ̀ mú. Kǎà Júɖà-nyɔ̀ ɓěɔ̀ mɔ̀ùn mu nììn ɖekè.

⁶ Wa mu waà ɓáɖáá kè waà ɓìɖǐ ɓěɔ̀ dyí ɖúùn, ɓɛ́ wa ké Bounɓoɔ̀ dyi mɔ́uń mu. Kɛɛ wa se ɔ dyéɛ mu, sepóɛɖé ɔ ɖǎ ɔ mìɔùn ɖe jiɖi sɔ̀ìn ɓó wa bũ̌.

⁷ Wa ɖǎ dèè-wùɖù nìà ɓó wa kè Bounɓoɔ̀ pṹa kɛɛ mú jaɖa. Wa wóɖóìn gbàɖàùn-dyù ɓě. Ɔ jèɛɛ, waà Dɛ̀nɛ̀-Ɖìè-Hwèɖè-hwɔ̀ ɓěɔ̀ mu wa kè waà geɖe ɓěɔ̀ mú gbɔɔ̀ùn.

To nì ɓó Júɖà-nyɔ̀ ɓěɔ̀ kè Éézùɖùɛ̀-nyɔ̀ ɓěɔ̀ pṹa kɛ

⁸ Óó Bɛ̃́címà-nyɔ̀ ɓě, ɓě ɓaɖa ɖɔ-kpaɔ̀ ɖé Gíɓìà-hwɔ̀ɖɔ̀ɔ̀ mú. Ɓě ɓaɖa ɖɔ-kpaɔ̀ ɖé Wáɖámà-hwɔ̀ɖɔ̀ɔ̀ mú. Ɓě páná mú ɓó toɔ̀ gbo mu jè ɖé Bɛ̀-Ávɛ̃̀-hwɔ̀ɖɔ̀ɔ̀ mú. Ɓě mu toɔ̀ wɔ̃, Bɛ̃́címà-nyɔ̀ ɓě.

⁹ Ífèɖèìn-ɓòɖòɔ̀ mu fóɖóún kpáùn, ti Bounɓoɔ̀ mu ɓóɖóɔ̀ gǎ kɔ̃ dyàùn wɛ̃. Éézùɖùɛ̀-nyɔ̀ ɓě, ḿ nì ɓě ɖɛ mu kpáùn jɛ́ɛ́ kɛɛ gbo cɛ̃iń.

¹⁰ Bounɓoɔ̀ cɛ̃ɛ ɖe, ké ɔ ɖá, “Júɖà-ɓòɖòɔ̀ wuɖuí-kɔ̃̀-nyɔ̀ ɓěɔ̀ nì kà nyɔ ɓě ɓɛ́ wa zàìn ɓóɖó-bã̀àɔ̀ dyíɛɛ nìà kɛ. Ɔ jèɛɛ, ní mu ní dyoɖoɔ̀ wa kɔ̃ púèìn kà dyíí-nì nìà kɛ.

¹¹ Wa ɖǎ Ífèɖèìn-nyɔ̀ ɓěɔ̀ ɓíɖíi dyi nɛ́ìn, ké wa ɖǎ dyi wɛ̀ìn ɖé wa gǎ-dyéìn-dyéìnɔ̀ mú, sepóɛɖé wa ku ɖùǔn, ké wa nì kũùn-kpò ɓièɛ̌n kánáá pū.

¹² Ní mu dùǔ jǔùn, ɓɛ́ ḿ ké Ífèɖèìn-nyɔ̀ ɓěɔ̀ ɓɛ, ké ní mu ga-bùè jǔùn, ɓɛ́ ḿ ké Júɖà-ɓòɖòɔ̀ taɓa, ɓɛ́ ḿ kéɛ nyu ɓɛ́ ɔ ké zɔ̃̌.

¹³ “Ti ɓɛ́ Ífèɖèìn-nyɔ̀ ɓěɔ̀ dyéɛ ma kà wa nì ma wɛ́iń mìɔ, ké Júɖà-nyɔ̀ ɓěɔ̀ dyé ma wa mìɔùn nììn jě ɓěɔ̀ kɛɛ, púɛɛ, Ífèɖèìn-nyɔ̀ ɓěɔ̀ mu ma ɖé Àsíwíɖíà-ɓòɖòɔ̀ kã́á vɛ̀nɛ̀ɔ̀ gbo, kɛɛ ɔ se waà jě ɓěɔ̀ ɓɔ́ìn ɓɛ́ìn, ké ɔ se wa dyi kánáìn ɓɛ́ìn.

¹⁴ Ní mu nììn kà ganìǎ nìà kɛɛ ɓó Ífèɖèìn-nyɔ̀ ɓěɔ̀ kè Júɖà-nyɔ̀ ɓěɔ̀ gbo. Ní mu wa kpɔ̃ùn, ɓɛ́ ḿ ké wa dyi fáìn, ɓɛ́ ḿ ké mu. Ní mu wa kpaùn, ké nyɔ ké wa ḿ xwaún zà kɛɛ ɖò se nìɛ̌ mu.

¹⁵ “Ní mu wa jè dyi táàùn, ɓɛ́ ḿ ké ḿ ɓíɖí ɖe mu, ɓɛ́ wa ké waà ɖɛ gbà ɓěɔ̀ mú wɔ̃́ìn, ɓɛ́ wa ké ḿ dyi mɔ́ hwɛ̀. Ti ɖíɛ́ ɓě ní, wa mu ḿ dyi mɔ́ùn ɖé wa gǎ-dyé-tìɔ̀ mú hwòɖǒɛ̀-ɖé-hwɛ̀-kà.”