Hòzéà 4 - Ɓǎsɔ́ɔ̀ Báɓòɔ̀

Zaa ɓɛ́ Bounɓoɔ̀ kɔ̃̀ Éézùɖùɛ̀-nyɔ̀ ɓěɔ̀ múɛ

¹ Éézùɖùɛ̀-nyɔ̀ ɓě, ɓě tò Bounɓoɔ̀ wuɖuɔ̀ gbo ɖùǔ, sepóɛɖé ɔ ɓéɖé zaa ɖò, ɓɛ́ ɔ kè ɓě mɔ̀ nyɔ ɓě cĩ́à ɖé ɓóɖóɔ̀ kɔ̃ɛɛ kéɛ zi. Zaaɔ̀ kɛà kɛ̀. Bounɓoɔ̀ ɖá, “Jǎà ɖò se ɖé ɓóɖóɔ̀ kɔ̃ nì, hwɛ̀ ḿ po níiń, ɖɛ̀ɓɛ̀ǐn-ɖɛ̀ɓɛ̀ǐn ɖò ké ɖé ɓóɖóɔ̀ kɔ̃ nì. Ké nyɔ ɖò ní nyu ní wuɖu ɖé ɓóɖóɔ̀ kɔ̃.

² Ɖɛ nì ɖéɛɛ mɔ̀ gboò-gboò kè se-tɔ́mɔ́-tɔ́mɔ́ kè kú-ɖáɓá-ɖáɓá kè dyíɖí-dyíɖí ɔ kè gbàɖàùn-po-po. Ɖɛ ɓěɛ̀ se sèìn-naín kɔ̃̀. Ké kú-ɖáɓá-ɖáɓá ní sɔìn kɔ̃in.

³ Ɓó ɖɛa jèɛɛ, ɓóɖóɔ̀ dyɛ kɔ̃in, ké ɖɛ séín cĩ́ ɖéɛ kɔ̃ɛɛ nì mú gbɔɔ̀ǔn. Ɔ hwɔìn kà xwáɖá-xwíɖíi-nìmìì ɓěɔ̀ kè naà ɓěɔ̀ ɔ kè zimii ɓěɔ̀ nì mɛ́iń.

Zaa ɓɛ́ Bounɓoɔ̀ kɔ̃̀ sáa-zà-nyɔ̀ ɓěɔ̀ múɛ

⁴ “Kɛɛ nyɔ ɖò mɛ ɓɔ́ ɔ mǔè ɖò jìì gbo tòɛ̀. Nyɔ ɖò mɛ ɓɔ́ ɔ mǔè ɖò ɖɛ dúún poɛ. Óó sáa-zà-nyɔ̀ ɓě, ɓě mɔ̀ nyɔ ḿ kɔ̃̀ zaaún.

⁵ Ɔ jèɛɛ, ɓě mu dyi kpáùn ɓó dyóɖóaún sá-sá kè máaún. Kǎà ɓěɛ̀ kpáá-ɖɛ̀-cɛ̃-nyɔ̀ ɓěɔ̀ mɔ̀ùn mu nììn ɖekè. Ké ní mu ɓě ɖe mɔ̀à Éézùɖùɛ̀-ɓòɖòɔ̀ kɛɛ mú gbɔɔ̀ùn.

⁶ Ní nyɔ ɓěɔ̀ mu mú gbɔɔ̀ùn ɓó se ɖɛ dyuò jè. Ɓě se wɔ̃́ ɓɛ́ wa ké ní wuɖu nyu jèɛɛ, ní mu ɓě mɔ̀ùn ɓɔ́ùn. Ɓě se ní sáa-zà-nyɔ̀ jǔɛ mu ɖe. Ɓě ɖǎ mɔ̄ mɔ̀à ɓěɛ̀ Gèɖèpɔ́ɔ̀ kɛɛ gma ɓěɔ̀ dyi táà jèɛɛ, ní mu ɓě nììn dyú ɓěɔ̀ dyi táàùn ɖekè.

⁷ “Kà ɓě mɔ̀ sáa-zà-nyɔ̀ ɓěɛɛ nyu dúún zaìn nyɛɛ, kǎà nàmàǔn ɓě ɓɛ́ ɓě nyu ḿ bũ̌ɛɛ nyu kɔ̃ kpáa. Ɔ jèɛɛ, ní mu ɓěɛ̀ dĩ́ín-dĩ̀ìn-ɖɛ̀ɔ̀ dɛ̃-ɖɛ̀ mú zɛ̃̀ìn.

⁸ Ní nyɔ ɓěɔ̀ nàmàǔnɔ̀ mɔ̀ ɓěɛ̀ ɖii-ɖɛ̀. Waà ɖɛ gbà ɓěɔ̀ ɖéè ɓě wĩin mìɔ jèɛɛ, ɓě ɓɛ wĩin.

⁹ Ɖɛ ɔ mu jǔùn wɛ̃ɛ mɔ̀, kà nyɔ ɓěɔ̀ nìɛɛ, kǎà ɓě mɔ̀ùn nì. Ní mu ɓě gǎ kɔ̃ tòùn ɓó ɓěɛ̀ ɖɛ gbà ɓěɔ̀ jè. Ní mu ɓě pɛ́ɛ̀ìn ɓó ɓěɛ̀ nyuu-ɖɛ̀ ɓěɔ̀ jè.

¹⁰ Ɓě mu ɖɛ ɖiìn, kɛɛ ɓě se ɖoɓoɛ́ mu. Ɓě mu gbàɖàùn poùn, kɛɛ ɓě seɛ dyú ɖò kɔ̃ún wóɖóɛ̌n mu, sepóɛɖé ɓě ɖǎ mɔ̄ Bounɓoɔ̀ dyi táà.

Bounɓoɔ̀ kpɔ̃̀ìn kũùn-kpò-ɓiè-nyɔ̀ ɓěɔ̀ zaa

¹¹ “Gbàɖàùn-po-po kè wã́ìn sùà kèɛ̀ ɖie ná-ná ɖǎ ní nyɔ ɓěɔ̀ fɔ̀nɔ̀-hwòɖǒ sɛ́ɖɛ́ìn dyíɔ̀ wa mú zà.

¹² Ní nyɔ ɓěɔ̀ diè waà cu sɛ-sɛ ɓěɔ̀ dyi, ké cu mɔ̀ nyɔ cɛ̃ wa ɖɛ wa mɔ́ wa ké dyuòɛɛ gbo. Gbàɖàùn-po-hwòɖò nìà wa xwíníín nyɛɛ ɖǎa nyu ké wa ɖǎ hwìǐ sɔ̀ìn. Wa ɖǎ ḿ dyi táà ɓó gèɖèpɔ́ɔ̀ kà kò ɖò ɓě ɓiè jè.

¹³ Wa zà sáa ɖé toɖo vɛ̀nɛ̀ ɓěɔ̀ dya. Ké wa fɔ̃ nyɔ́ún-nɔ̀mɔ̀-ɖɛ̀ ɖé toɖo-dyù ɓěɔ̀ dya, ɖé cu gùsùù ɓéɖé pɛ̀ɛ̀ nɔ̀mɔ̀ dyíin ɓěɛɛ xwíɖíi. “Ɔ jèɛɛ, ɓěɛ̀ dyú-màà ɓěɔ̀ ɖǎ gbàɖàùn po, ké ɓěɛ̀ dyúɛ̀ gmàà ɓěɔ̀ ɖǎ gmaɖe po.

¹⁴ Kɛɛ ḿ se ɓěɛ̀ dyú-màà ɓěɔ̀ gǎ kɔ̃ tòɛ̌ mu ti wa po gbàɖàùn wɛ̃, mɔɔ ké ḿ se ɓěɛ̀ dyúɛ̀ gmàà ɓěɔ̀ gǎ kɔ̃ tòɛ̌ mu ti wa mu gmaɖe poùn wɛ̃, sepóɛɖé ɓě mìɔùn sí gbàɖàùn-màà ɓě ɓɛ́ gbàɖàùn-po-po mɔ̀à waà kũùn-kpò-gèɖèpɔ́ɔ̀ ɓiè-ɓièɛɛ kíɖíí, ké ɓě kè wa nyu waà sáa-zà-zà ɓěɔ̀. Ɔ nyuɛ ké ɓěɛ̀ nyɔ ɓě ɓɛ́ wa se hwòɖǒ fɔ̀nɔ̀ɛɛ ɓuɖu.

¹⁵ “Éézùɖùɛ̀-dyù ɓě, ɓě po gbàɖàùn dyɛo, kɛɛ Júɖà-nyɔ̀ ɓěɔ̀ mɔ̀ùn mɛ ɓɔ́ ɖɛ dyúáɖòɔ̀ nyuɛ ɖekè. Ɓě mɛ ɓɔ́ ɖé Gíógàò-pàɔ̀ mú mɔɔ ɖé Bɛ̀-Ávɛ̃̀-hwɔ̀ɖɔ̀ɔ̀ mú muɛ, ɓɛ́ ɓě ké wuɖu ɖi, ɓɛ́ ɓě ké níiń, ‘À ɖi wuɖu ɓó Bounɓoɔ̀ dyúa.’

¹⁶ Éézùɖùɛ̀-dyù ɓěɔ̀ dú kùmù kà ɓìɖǐ nyɔ́nɔ́ gmɔ̀ nìà kɛ. Kà ɓɛ́ ɔ nìà náa, nìí, xwɛ̌ mɔ̄ Bounɓoɔ̀ ɓɛ́ìn wa dyi-ɖi-naín kpaa kà ɓáɖáá-dyí-gmɔ̀-nyɔ̀ kpaà ɓáɖáá-dyù ɓě ɖé gbǎùn-fúɖúá kɔ̃ kɛ́?

¹⁷ Ífèɖèìn-nyɔ̀ ɓěɔ̀ ɖǎ kũùn-kpò-ɓiè-nyɔ̀ jǔ. Ɓě táà wa dyi, ɓɛ́ wa kéɛ dyúa kpa kánáá pū.

¹⁸ Kɛbì waà náá-ɖɛ̀ ɓěɔ̀ mɛ hwɛ̀ dyiɛɛ, wɛ̃́ɛ́ kɛɛ, wa kpa waà gbàɖàùn-po-poɔ̀ dyúa kánáá pū. Waà wuɖuí-kɔ̃̀-nyɔ̀ ɓěɔ̀ ɖɛ̀ɓɛ̀ dɛ̃-ɖɛ̀ nyu-nyu mú.

¹⁹ Wa mu wa kpaùn kà wɔ́ɔ́-pìɔ̌ kpaà ɖɛɛ. Ké dɛ̃ mu wa nyuùn ɓó waà sáa-zà-zà ɓěɔ̀ jè.