Hòzéà 3 - Ɓǎsɔ́ɔ̀ Báɓòɔ̀

Hòzéà kè ɔ gmàà se jǎà nyuɔ̀

¹ Hwɛ̀ ké Bounɓoɔ̀ cɛ̃ɛ ḿ gbo, ké ɔ ɖá, “Mu, ɓɛ́ m̀ ké nì gmààɔ̀ mú ɖɛ̀ɓɛ̀ ɖe, kɛbì nyɔ kà kò ɖò mɛ ɖɛ̀ɓɛ̀ ɔ mú, ɓɛ́ ɔ ké gbàɖàùn-màà jǔɛ. Ɖɛ̀ɓɛ̀ ɔ mú kà dyúáɖò kà mɔ̄ Bounɓoɔ̀ nyuà Éézùɖùɛ̀-dyù ɓěɔ̀ mú ɖɛ̀ɓɛ̀ɛ̀ kɛ. Wa gmɔ̀ìn kà gèɖèpɔ́ɔ̀ kò-kò ɓě gbo, ké wa ɖɛ̀ɓɛ̀ géɖéè-hwàɖà dyɛ-dyɛ ɓě ɓɛ́ wa zàìn gèɖèpɔ́ɔ̀ ɓěɛ̀ sáa kɛɛ mú dyɛo, kɛɛ ḿ ɖɛ̀ɓɛ̀ wa mú.”

² Ɔ jèɛɛ, ḿ dɔ̃ ma ɔ séɓàɖà-cɛ̀kò ɓaɖa-bùè sè hm̀m̌ kè báɖè-ɓɔ̀ɔ̌ hm̀m̌ mú.

³ Hwɛ̀ ké ḿ cɛ̃ɛ ma ɔ gbo, ké ḿ ɖá, “M̀ ɓéɖé m̀ ké hwòɖǒ ku ɓó ti tɔ̀mɔ̀ǔn-tɔ̀mɔ̀ǔn mú. Ké mɔ́ún mu hwòɖǒ kuùn ɖekè. Mɔ̀ǔn ɖá m̀ ké gmaɖe po, mɔɔ ɓɛ́ m̀ ké gàa kà kò ɖò xwa kpá.”

⁴ Kǎà Éézùɖùɛ̀-nyɔ̀ ɓěɔ̀ se kã́á mɔɔ nyɔ vɛ̀nɛ̀ ɖò ɓéɖéɛ mu ɓó ti tɔ̀mɔ̀ǔn-tɔ̀mɔ̀ǔn xwíníín. Wa se sáa-zà-zà mɔɔ ɓiè-sɔ̀ɔ̌-kpò ɓɛ́ wa nyànàìn dyiɛ mɔɔ ífɔ̀ mɔɔ kũùn-kpò ɖò ɓéɖéɛ mu.

⁵ Ɔ ɖǎ ná nìǐn, nìí, Éézùɖùɛ̀-nyɔ̀ ɓěɔ̀ mu ɖe kɔ́ìn, ɓɛ́ wa ké Bounɓo mɔ̀à waà Gèɖèpɔ́ɔ̀ kɛɛ gbo gmɔ̀ìn, ké wa mu Dèɓé mɔ̀ ma kà waà kã́áɔ̀ kɛɛ xwíníín-dyù ɖò dyi mɔ́ùn. Wa mu Bounɓoɔ̀ dyi fɛ̃̀ìn, ɓɛ́ ɔ ké wa mana kɔ̃ po ɖé wé hwɛ̀ìn-gbɔɔ̀ mú.