Hòzéà 2 - Ɓǎsɔ́ɔ̀ Báɓòɔ̀

¹ “Ɔ ná nì jèɛɛ, ɓě ɖáìn ɓě mǔè Éézùɖùɛ̀-dyù ɓěɔ̀ ‘Gèɖèpɔ́ɔ̀ nyɔ ɓě’ ɔ kè ‘Nyɔ ɓě ɓɛ́ Bounɓoɔ̀ ɖɛ̀ɓɛ̀ múɛ.’ ”

Gómɛ̀ nììn se jǎà nyuɔ̀ kè Éézùɖùɛ̀-nyɔ̀ ɓěɔ̀ nììn se jǎà nyuɔ̀

² Bounɓoɔ̀ cɛ̃ɛ ɖe, ké ɔ ɖá, “Ní dyú ɓě, ɓě ɖe se ní gmàà ɖe, ké ḿ se ɔ dyú-ɓǎ ɖe dyɛo, kɛɛ wɛ̃́ɛ́ kɛɛ, ɓě wùɖù ɔ gbo, ɓɛ́ ɔ ké ɔ gbàɖàùn-po-poɔ̀ dyi táà.

³ Ɔ se ná nìǐn, ní mu ɔ gbɔ fɔ̀nɔ̀ìn kà ɔ nyu zɔ̃̌ɔ̀ kà ɖé ɔ ɖe xwíníín wóɖóɛ kɛ. Ké ní mu ɔ nyuùn kà gbǎùn-fúɖúá kè ɓóɖó dyɛ kɔ̃in nìà kɛ, ɓɛ́ ḿ ké ɔ ní-ná-tò dyí ɖáɓáìn.

⁴ Ḿ se ɓě mɔ̀à ɔ dyú ɓěɛɛ mú ɖɛ̀ɓɛ̀ɛ̌ mu, sepóɛɖé ɓě mɔ̀ gbàɖàùn-dyù ɓě.

⁵ Ɓě ɖe po ma gbàɖàùn. Ɔ nyu ma dɛ̃-ɖɛ̀ɔ̀, hwɛ̀ ké ɔ nì ma ɓěɛ̀ zùù kɔ̃. Ɔ cɛ̃ɛ ma, ké ɔ ɖá, ‘Ní mu ní gmaɖe ɓěɔ̀ gbo muùn, sepóɛɖé wa mɔ̀ nyɔ nyí ḿ ɖii-ɖɛ̀ kè náá-nì kè ɓáɖáá-mì-ɖɔ̀ kè ɖénì-ɖɔ̀ kè cáná ɔ kè náá-ɖɛ̀.’

⁶ “Ɔ jèɛɛ, ní mu wí-cù ɔ hwìèɔ̀ dyí kã̀ìn. Ní mu ɔ gba-gba mú poùn, ɔ ní kɔ̃ ɖǎ hwìè ɖò dyé.

⁷ Ɔ ɖǎ ná nìǐn, nìí, ɔ mu ɔ gmaɖe ɓěɔ̀ kúmúìn, kɛɛ ɔ se wa dyɛ̀ǐn mu. Ɔ mu wa dyi mɔ́ùn, kɛɛ ɔ se wa dyéɛ mu. Ɔ ɖǎ ná nìǐn, nìí, ɔ muɛ cɛ̃ìn, ɓɛ́ ɔ ké níiń, ‘Ní mu ní dyú-ɓǎ sùàɔ̀ gbo ɖe muùn, sepóɛɖé ḿ nì ma nɔ̀mɔ̀ dyíin mú, ké ɔ zi kà ḿ nyuà nìɛ̀ kàǔn wɛ̃ɛ dyí.’

⁸ “Ɔ seɛ dyuò kà mɔ̄ mɔ̀ nyɔ nyí ɔ ɖii-ɖɛ̀ kè wã́ìn kè cáná ɔ kè kà mɔ̄ mɔ̀ nyɔ nyí ɔ séɓàɖà kè góò kúɖúú ɓɛ́ wa nyuà Béò múɛɛ kɛ.

⁹ Ɔ jèɛɛ, ti ɔ geɖe ɓěɔ̀ kɔ́-tì mu ɓó nyiniìn nyɛɛ, ní mu ní ɖii-ɖɛ̀ɔ̀ kè ní cánáɔ̀ ɔ xwa zàùn. Ké ní mu ní ɓáɖáá-mì-ɖɔ̀ kè ɖénì-ɖɔ̀ ɓɛ́ ḿ nyí ma kà ɔ, ɓɛ́ ɔ kéà ɔ gbɔ-fɔ̀nɔ̀-fɔ̀nɔ̀ vǐèɛɛ ɔ xwa zàùn.

¹⁰ Ní mu ɔ gbɔ fɔ̀nɔ̀ìn ɓó ɔ gmaɖe ɓěɔ̀ dyúa, ké nyɔ ɖò se nìɛ̌ mu, ɓɛ́ ɔ ké ɔ póìn sɔ̀ìn ɖé ḿ xwaún.

¹¹ Ní mu ɔ hwɔ séín ɓě mɔ̀à ɔ zɔ̃ séínɛ̀ hwɔ kè ɔ Dɛ̀nɛ̀-Ɖìè-Hwèɖè-hwɔ̀ séín kè ɔ fɔ̀-wè ɓěɔ̀ hwɔ kè hwɔ tɔ̀ɔ̀ séín ɓá ɓiè jè dyíɛɛ jè dyi zĩ̀ìn.

¹² Ní mu ɔ géɖéè-gbǎ ɓě kè ɔ féè-cù ɓě kɔ̃̀ jè ɔ cɛ̃à, ɓɛ́ ɔ dyi níiń, ‘Ɖɛ ɓěɛ̀ mɔ̀ ní pɛ́ɛ̀-ɖɛ̀ ɓě ɓɛ́ ní gmaɖe ɓěɔ̀ nyíín’ nyɛɛ dyíin nyìnììn. Ní mu wa xwáɖá-kpòò mú nyuùn, ɓɛ́ wa ké xwáɖá-xwíɖíi-nìmìì ɓěɔ̀ ɖii-ɖɛ̀ jǔ.

¹³ Ní mu ɔ gǎ kɔ̃ tòùn ɓó ti ɔ táà ma kà ḿ dyi, ɓɛ́ ɔ dyi ma kà nyɔ́ún-nɔ̀mɔ̀-ɖɛ̀ fɔ̃ ɓó Béò bìì, ɓɛ́ ɔ dyià ɔ mìɔùn ɖùǔn-po-ɖɛ̀ kè bɛ̃̀ìn-ɖɛ̀ tɔ̀ɔ̀ ɓě bɛ̃̀ìn, ɓɛ́ ɔ dyià ɔ gmaɖe ɓěɔ̀ kíɖíí síɛɛ jè. Mɔ̄ Bounɓoɔ̀ mɔ̀ nyɔ cɛ̃à kɛ̀.

Ɖɛ̀ɓɛ̀ǐn-ɖɛ̀ɓɛ̀ǐn ɓɛ́ Bounɓoɔ̀ ɓéɖé ɓó ɔ nyɔ ɓěɔ̀ bììɛ

¹⁴ “Kɛɛ sɔ̀ìn ɓó ɖɛ ɓěɛ̀ gboɛɛ ní, gmɔ̀ nɔ̄, ní mu ɔ ɖé gbǎùn-fúɖúáɔ̀ kɔ̃ kpaùn, ɓɛ́ ḿ ké ɔ pɛ́í po ɖé wìì-wùɖù ɓɛ̀ɖɛ̀ɛ̀-ɓɛ̀ɖɛ̀ɛ̀ mú.

¹⁵ Ké ɖéɛ̀ ní mu ɔ géɖéè-gbǎ ɓěɔ̀ nyíìn ɖe, ké ní mu ɔ Ákɔ̀ Bɔɔ-kpàɔ̀ nyíìn, ɓɛ́ dyììn ɖéɛ múɛɛ, ɔ ké hwòɖǒ-po-naín dyé. Ɔ ɖǎ ná nìǐn, ɖéɛ̀ ɔ mu ɓeɖeìn kà ɔ nyuɛ zɔ̃̌ɔ̀ kà nyuɛ ɖé ɔ nyɔ-gmɔ̀-tìɔ̀ mú, ti ɔ sɔ̀ zɔ̃̌ɔ̀ kà ɖé Íjè-ɓòɖòɔ̀ kɔ̃ɛ.”

¹⁶ Hwɛ̀ ké Bounɓoɔ̀ cɛ̃ɛ ɖe, ké ɔ ɖá, “Sɔ̀ìn ɓó wéa gboɛɛ, ɔ muá ḿ ɔ dyú-ɓǎ ɖáìn. Ɔ se ḿ Béò ɖáǐn mu ɖe.

¹⁷ Ɖɛ kɔ̃̀ jè ɔ muà ná nììn nyɛɛ mɔ̀, ní mu Béò ɓěɔ̀ nyɛ́nɛ́ ɔ wĩín zàùn, ké ɔ se waà nyɛ́nɛ́ɔ̀ mú ɖɛ zɔ̀ǐn mu ɖe.

¹⁸ “Ɓó wéa ɓaɖaa, ḿ kè nimii ɓě kè naà ɓě kè ɓíɖíi-dyi-nà-ɖɛ̀ ɓě mu wuɖu dèìn ɓá ní nyɔ ɓěɔ̀ jè dyí, ɓɛ́ wa ní kɔ̃̀ ɖà ní nyɔ ɓěɔ̀ fũ̀à-fṹá nyùìn. Ní mu pɔnɔ kè gàsíà kè to jè dyi zĩ̀ìn ɖé ɓóɖóɔ̀ kɔ̃, nìí ɓɛ́ ní nyɔ ɓěɔ̀ kéá dyi pɛ̃́ ɖé hwìɖǐi-zaìn-zaìn mú.

¹⁹ “Éézùɖùɛ̀-dyù ɓě, ní mu ɓě bùǐ poùn, ɓɛ́ ḿ ké ɓěɛ̀ dyú-ɓǎ jǔ ɓó sè-ná-sèɛ̀ tiín. Ní mu jǎà-nyɔ̀ kè hwòɖǒ-kɔ̃-dè-nyɔ̀ jǔùn ɓó ɓě gbo. Ní mu ní ɖɛ̀ɓɛ̀ǐn-ɖɛ̀ɓɛ̀ǐn kè wììɔ̀ ɓě kɔ̃ ɓéɖéìn.

²⁰ Ní mu ɓě bùǐ poùn, ɓɛ́ ḿ ké ɓě jǎà gbo nyu, nìí ɓɛ́ ɓě ké mɔ̄ mɔ̀à Bounɓoɔ̀ kɛɛ jè jǎà po.

²¹ Ní mu ɓě gɔ̃̌ jǔùn ɓó wéa ɓaɖa, ké ní mu dyɔɔ̀ gbo wùɖùùn, ɓɛ́ ɔ ké ní tò.

²² Ké ɓóɖó-kpàɔ̀ mɔ̀ùn mu ɖii-ɖɛ̀ kè wã́ìn ɔ kè cáná tòùn, ɓó ɓě mɔ̀ Jìzéɖéò-nyɔ̀ ɓěɔ̀ bìì.

²³ Ní mu ní nyɔ ɓěɔ̀ ɓáùn ɖé ɓóɖóɔ̀ kɔ̃ ɓó ḿ mìɔùn bìì. Ní muá nyɔ ɓě ḿ se ma mú ɖɛ̀ɓɛ̀ɛ mú ɖɛ̀ɓɛ̀ìn. Ké ní muá nyɔ ɓě ɓɛ́ wa se ma ní nyɔ ɓě kĩ́ín nyɛɛ gbo cɛ̃ìn, ɓɛ́ ḿ ké níiń, ‘Ɓě mɔ̀ǎ ní nyɔ.’ Ké wa mɔ̀ùn muɛ cɛ̃ìn, ɓɛ́ wa ké níiń, ‘Mɔ̀ mɔ̀ à Gèɖèpɔ́ɔ̀.’ ”