Hòzéà 14 - Ɓǎsɔ́ɔ̀ Báɓòɔ̀

Hòzéà ɓaà Éézùɖùɛ̀-nyɔ̀ ɓěɔ̀ ní

¹ Éézùɖùɛ̀-nyɔ̀ ɓě, ɓě gmɔ̀ìn Bounɓo mɔ̀à ɓěɛ̀ Gèɖèpɔ́ɔ̀ kɛɛ gbo ɖe, sepóɛɖé ɓěɛ̀ nàmàǔnɔ̀ ɖǎa nyu ké ɓě ɖǎ ɓíɖíi dyi kpá.

² Ɓě mɛ gmɔ̀ìn Bounɓoɔ̀ gbo ɖe, ɓɛ́ ɓě ké ɔ ɓaà, ɓɛ́ ɓě ké níiń, “Zĩ̀ìn à nàmàǔn séín ɓěɔ̀ kɔ̃in, ɓɛ́ m̀ ké à jè dyi kpɔ̃ dyììn ɖé nì jĩ́á-jèɔ̀ mú. Ɔ dyi ná nìǐn, à mu m̀ ɓàìn-ɓàìn nyíìn.

³ Àsíwíɖíà-nyɔ̀ ɓěɔ̀ se à póɛ̀n ɓɛ́ìn. À se sǒ ɓě kɔ̃ún kpáa mu ɖe, ɓɛ́ à ké to gbo mu, mɔɔ ké à seɛ à sɔ̃ɛ̀ mɛɛ-ɖɛ̀ ɓěɔ̀ gbo cɛ̃ɛ́ mu ɖe, ɓɛ́ à ké níiń, ‘Ɓě mɔ̀ à gèɖèpɔ́ɔ̀,’ sepóɛɖé mɔ̀ mɔ̀ xwíè-dyù wìǐn-dyé-nyɔ̀.”

Bounɓoɔ̀ ɖáìn Éézùɖùɛ̀-nyɔ̀ ɓěɔ̀ fɛ̀ɛ̀ ɖìè nyɛ́nɛ́ín

⁴ Bounɓoɔ̀ cɛ̃ɛ, ké ɔ ɖá, “Ní mu ní nyɔ ɓěɔ̀ ḿ mìɔùn gbo ɖe dyàùn ɖe. Ḿ se wa dyoɖoún kpáǐn mu ɖe. Kɛɛ ní muá wa mú ɖɛ̀ɓɛ̀ìn hwòɖǒɛ̀-ɖé-hwɛ̀-kà.

⁵ Ní mu nììn kà dunu ɓuɖuà kɛɛ ɓó Éézùɖùɛ̀-dyù ɓěɔ̀ bìì. Ké wa mu bùèìn kà ɓáá-ɖɛ̀ bùèà kɛ. Wa mu gmɛ̀nɛ̀ɛ̀ kpaùn vɛ̃in, kà síɖà-cù nìà ɖe Ɖɛ́ɓèɖɔ́ùn-ɓòɖòɔ̀ kɔ̃ɛɛ nyuà kɛ.

⁶ Ké wa mu ɖɔ́ zàùn, ké wa mu kɔ̃in nɔ̀mɔ̀ùn kà ɔ́ɖè-cù nìà kɛ. Ké wa mu nyɔ́ún nɔ̀mɔ̀ùn, kà síɖà-cù nìà ɖé Ɖɛ́ɓèɖɔ́ùn-ɓòɖòɔ̀ kɔ̃ɛɛ nìà kɛ.

⁷ Nyɔǔn ɓě mu dyiìn ɖe, ɓɛ́ wa ké waà pɛ̀ɛ̀ɔ̀ xwíɖíi pèɖèìn ɖe. Wa mu mí ɓɛ̀ɖɛ̀ɛ̀-ɓɛ̀ɖɛ̀ɛ̀ poùn ɖe, kà ɓáá-ɖɛ̀-gbǎ nyuà kɛ. Wa mu tòɖòùn kà géɖéè-ɖúú-gbǒ nyuà kɛ. Ké waà bɔ̃̌ mu muùn kà wã́ìn sɔ̀à ɖé Ɖɛ́ɓèɖɔ́ùn-ɓòɖòɔ̀ kɔ̃ɛɛ bɔ̃̌ muà kɛ.

⁸ Éézùɖùɛ̀-dyù ɓěɔ̀ se kũùn-kpò ɓièɛ̌ mu ɖe fɔɔ cá. Ní mu waà ɓaà-wùɖù ɓěɔ̀ gɔ̃̌ jǔùn, ɓɛ́ ḿ ké wa dyí gmɔ̀. Ní mu pɛ̀ɛ̀ jǔùn, ɓɛ́ ḿ ké wa kɔ̃in nì, kà cu ɓɛ́ ɔ ɓéɖé mí ɓɛ̀ɖɛ̀ɛ̀-ɓɛ̀ɖɛ̀ɛ̀ kánáá pūɛɛ nìà kɛ. Mɔ̄ kɔ̃̀ xwaún waà mana séín ɓěɔ̀ sɔ̀à kɛ̀.”

Wuɖu hwɛ̀ìn-gbɔɔ̀

⁹ Nyɔ fɔ̀nɔ̀ hwòɖǒɛɛ, ɔ mɛ wɔ̃́ ɖɛ ɓěɛ̀ múin. Nyɔ ɓɛ́ìn ɖɛ múin ɖeɛ kɛɛ, ɔ mɛ dyuò ɖɛ ɓěɛ̀ dyí. Sepóɛɖé Bounɓoɔ̀ nììn hwìèɔ̀ sɛ́ɖɛ́ìn dyí, ké dyí-sɛ́ɖɛ́ìn-nyɔ̀ ɓěɔ̀ mɔ̀ nyɔ nàà xwíníín. Kɛɛ wuɖuún-jaɖa-nyɔ̀ ɓěɔ̀ dyiɛ xwíníín nà ní, nìí, wa gbǒ, ké wa ɓuɖu.