Hòzéà 13 - Ɓǎsɔ́ɔ̀ Báɓòɔ̀

Gǎ hwɛ̀ìn-gbɔ dyi Éézùɖùɛ̀-nyɔ̀ ɓěɔ̀ kɔ̃ɛ

¹ Ífèɖèìn-nyɔ̀ ɓěɔ̀ dyi ma wùɖù ní, nìí, Éézùɖùɛ̀ɛ̀ xwéɖé-dù tɔ̀ɔ̀ ɓěɔ̀ tɛɖɛ ma kɔ̃in. Wa dyé ma Ífèɖèìn-nyɔ̀ ɓěɔ̀ kpéín mìɔ cá. Kɛɛ Ífèɖèìn-nyɔ̀ ɓěɔ̀ nyu ma nàmàǔn dyììn ɖé Béò ɓiè-ɓiè mú. Ɔ jèɛɛ, wa ɓéɖé wa ké mɛ́.

² Ké wa mu dyúa, ké wa nì nàmàǔn nyuɛń kánáá pū. Wa ɖú waà séɓàɖà ɓěɔ̀ dyí, ké wa mɛɛ kũùn-kpò ɓě mú xwa-nɔ̀mɔ̀-kà. Kũùn-kpò séín ɓěɔ̀ mɔ̀ sɛ́ɖɛ́-dyuò-nyɔ̀ ɓěɔ̀ sɔ̃ɛ̀ mɛɛ-ɖɛ̀. Ɔ ɖǎ ná nìǐn, wa cɛ̃ɛ nyɔ ɓěɔ̀ gbo, ké wa ɖá, “Ɓě zà ɓìɖǐ-dyù-kũ̀ùn-kpò ɓěɔ̀ sáa, ɓɛ́ ɓě ké wa wɔ̃ nyá.”

³ Ɔ jèɛɛ, wa mu nììn kà dunu ɓɛ́ ɔ fṹà dyií dyi cɛ̃̀ǐn ɓó gànà-kṹún wɛ̃ɛ nìà kɛ. Ké wa mu nììn kà feɖe ɓɛ́ pìɔ̌ zàà ɓó mɔɔ́-dyí-síìn-naín nyɛɛ nìà kɛ. Wa mu nììn kà nyànà-sò sɔ̀à ɖé gbǒ ɖò múɛɛ nìà kɛ.

⁴ Bounɓoɔ̀ cɛ̃ɛ ɖe, ké ɔ ɖá, “Mɔ̄ mɔ̀ Bounɓo mɔ̀à ɓěɛ̀ Gèɖèpɔ́ɔ̀ kɛɛ mɔ̀ nyɔ zà zɔ̃̌ɔ̀ kà ɓě ɖé Íjè-ɓòɖòɔ̀ kɔ̃ɛ̀. Ɓě mɛ ɓɔ́ Gèɖèpɔ́ɔ̀ kà kò ɖò ɓéɖéɛ ɖe, ɔ sèìn ḿ ɖòǔn, sepóɛɖé póìn-nyɔ̀ kà kò ɖò se ɓó ḿ wáún nì ɖe.

⁵ Mɔ̄ mɔ̀ nyɔ gmɔ̀ ma ɓě gbo ɖé gbǎùn-fúɖúáɔ̀ kɔ̃ dɛ̀ ɓɛ́ ní ɖò se ma kà nìɛ.

⁶ Ké ḿ nyí ma ɓě ɖii-ɖɛ̀, kɛɛ ti ɓɛ́ ɓě ɖoɓo ma kɛɛ, púɛɛ, ɓě ɓúáìn ma ɓě mìɔùn dyí, ké ní jè sɔ̀ ma ɓě hwìɖǐi.

⁷ Ɔ jèɛɛ, ní mu ɓě hwìè fòùn kà ji nyuà kɛ, ké ní mu ɓě kpɔ̃ùn kà ganìǎ nyuà kɛ.

⁸ Ní mu ɓě dya kpáùn kà kìɖìǒ ɓɛ́ wa zà dyú gboɛɛ nyuà kɛ. Ní mu ɓěɛ̀ kɛ́ ɓěɔ̀ mú fáùn, ɓɛ́ ḿ ké ɓě tà kà ganìǎ nyuà kɛ. Ní mu ɓě dyi fáìn kà xwáɖá-xwíɖíi-nìmìì ɖò dyià ɖɛ ɖò kpɔ̃ ní, ɔ fáìn dyiɛ.

⁹ “Éézùɖùɛ̀-dyù ɓě, ní mu ɓě mú gbɔɔ̀ùn. Ɔ ɖǎ ná nìǐn, nìí, nyɛ́ muá ɓě gbo kpáùn wɛ̃́?

¹⁰ Dɛ̌ ɓěɛ̀ kã́áɔ̀ nì, ɓɛ́ ɔ ké ɓě póìn nyɛ́? Dɛ̌ ɓěɛ̀ kã́áɔ̀ kè gɔ̌mànà-nyɔ̀ ɓě nìà ɖé ɓěɛ̀ hwɔɖɔ séín ɓěɔ̀ mú kɔ̃̀ jè ɓě cɛ̃à, ɓɛ́ ɓě dyi níiń, ‘Nyí à kã́á kè gɔ̌mànà-nyɔ̀ ɓě’ kɛɛ nì kɛ́?

¹¹ Ḿ nyí ma ɓě kã́á ɓě ɖé ní dyoɖo-hwòɖòɔ̀ mú, ké ḿ zà ma ɓě kã́á ɓěɔ̀ xwa ɖé ní dyoɖo-hwòɖòɔ̀ mú.

¹² “Ḿ ɖǎ Éézùɖùɛ̀-dyù ɓěɔ̀ nàmàǔn ɓěɔ̀ kè waà ɖɛ gbà ɓěɔ̀ jè céè ɖé ní céè-ɖɛ̀ɔ̀ mú, ké ḿ ɖǎa da po.

¹³ Éézùɖùɛ̀-dyù ɓěɔ̀ nì kà dyú se hwòɖǒ fɔ̀nɔ̀ nì ɖé ɔ ɖe xwíníín keɛɛ nìà kɛ. Ɔ ɖeɛ̀ póó-xwìɖì puà ní ɓó ɔ jè. Kɛɛ ti ɓɛ́ ɔ mɔ̀ǎ ma ti déín dyúɔ̀ ké ma síɛɛ, púɛɛ, dyúɔ̀ nɔ́ɔ̀ ɓɛ́ ɔ ké sí.

¹⁴ Ḿ se nyɔ ɓěɛ̀ póɛ̌n mu sɔ̀ìn ɖé xwɛ́-gmàà nììn kpéɔ̀ xwaún. Ḿ se wa gbǎà mu sɔ̀ìn ɖé gĩɔ kpéɔ̀ xwaún. Óó gĩɔ, dyà nì nyɔ-puà-puàɔ̀. Óó xwɛ́-gmàà, dyà nì nyɔ-mú-gbɔɔ̀-gbɔɔ̀. Ḿ se wa wìǐn dyéɛ mu ɖe fɔɔ cá.

¹⁵ Kɛbì wa mɛ wóɖó mú kà ɓáá-ɖɛ̀ nìà kɛɛ, mɔ̄ mɔ̀à Bounɓoɔ̀ kɛɛ, ní mu pìɔ̌ sùmùù ɖò tòùn sɔ̀ìn ɖé gbǎùn-fúɖúá nìà ɖé dyóɖó-xwáɖáún-wóɖóìn-naínɔ̀ kɛɛ kɔ̃. Ké ɔ muɛ nyuùn ɓɛ́ waà ní-dù ɓěɔ̀ kè waà ní-ɓì ɓěɔ̀ ké múin ma. Ké ɔ mu waà ɖɛ kpa ɖɛ séín nì ɖé waà ɖɛ-dyi-dèìn-naín ɓěɔ̀ kɛɛ kpaùn nyɛ̀nɛ̀ɛ̀.

¹⁶ Éézùɖùɛ̀-dyù ɓěɔ̀ mu waà nàmàǔn ɓěɔ̀ kpa dyí ɖúùn, sepóɛɖé wa vɔ̃ mɔ̄ mɔ̀à waà Gèɖèpɔ́ɔ̀ kɛɛ gbo. Wa mu wa gàsíà dyí ɖáɓáùn. Ké wa mu waà dyú mɛ́nɛ́ɛ́ ɓěɔ̀ dyi wàìn, ɓɛ́ wa ké waà xwíɖí-nì-màà ɓěɔ̀ ká.”