Hòzéà 12 - Ɓǎsɔ́ɔ̀ Báɓòɔ̀

¹ Ɖɛ Éézùɖùɛ̀-dyù ɓěɔ̀ nyu ɓó wé kè wé múɛɛ mɔ̀ ɖɛ fóɖóún. Wa poìn waà se-tɔ́mɔ́-tɔ́mɔ́ɔ̀ kè waà nyɔ-ɖɛ-gana-xwa-zàìn-zàìnɔ̀ kɔ̃in kánáá pū. Wa kè Àsíwíɖíà-nyɔ̀ ɓěɔ̀ po wuɖu ɓíín ɓá gìɖìǐ jè dyí, ké wa pèɖèìn waà ɔ́ɖè-cànà ɖé Íjè-ɓòɖòɔ̀ kɔ̃.

² Ḿ ɓéɖé zaa ɖò, ɓɛ́ ḿ kè Júɖà-nyɔ̀ ɓěɔ̀ kéɛ cɛ̃. Ké ní mu Éézùɖùɛ̀-dyù ɓěɔ̀ gǎ kɔ̃ dyàùn, ɓɛ́ ɔ ké waà pɛ́ɛ̀-ɖɛ̀ jǔ ɓó ɖɛ gbà ɓɛ́ wa nyuà kɛɛ jè.”

³ À ɓǎ Jékɔ̀ kpɔ̃ zɔ̃̌ɔ̀ ɔ ɖíí-gààɔ̀ ɓò-kéɖé dyi, ti ɓɛ́ wa nì zɔ̃̌ɔ̀ ɖé wa ɖe xwíníín keɛ. Ké ti ɔ ɖǎ ma wóɖó ké ɔ ɖǎ ma gàa hwɛ̀ɛ, ɔ kè Gèɖèpɔ́ɔ̀ vɔ̃ ma gbàà-pɛ̀ɛ̀.

⁴ Ǹdye, ɔ kè ínjàɔ̀ vɔ̃ ma, ké ɔ sɔ̃ nì ɖé kɔ̃in. Sɔ̀ìn ɓóɛ gboɛɛ, ɔ ɓaà, ɓɛ́ Gèɖèpɔ́ɔ̀ ké ɔ mana kɔ̃ po. Hwɛ̀ ké wé ɖòɛ̀ ɓaɖaa, à ɓǎ Jékɔ̀ kè Gèɖèpɔ́ɔ̀ dyéìn ma ɖé Bɛ́fèò-pàɔ̀ mú, ké ɔ kè Gèɖèpɔ́ɔ̀ dèìn ma ɖé dɔ́ɔ́.

⁵ Nyɔ kè ɔ dè ma kà dɔ́ɔ́ kɛɛ mɔ̀ Bounɓo Gèɖèpɔ́ɔ̀ mɔ̀ nyɔ nìà ɖɛ séín kɔ̃in nyɛ. Ɔ Bounɓo-nyɛ̀nɛ̀ɔ̀ mɔ̀ nyɛ́nɛ́ ɓɛ́ ɔ mɔ́ nyɔ séín ké ɔ dyí dyuòìn nyɛ.

⁶ Ɔ jèɛɛ, ɓě mɔ̀à Jékɔ̀ɛ̀ xwíníín-dyù ɓěɛɛ, ɓě gmɔ̀ìn ɖé ɓěɛ̀ Gèɖèpɔ́ɔ̀ gbo ɖe. Ké ɓě mɛ kpɔ̃ ɖɛ̀ɓɛ̀ǐn-ɖɛ̀ɓɛ̀ǐn kè dyí-sɛ́ɖɛ́ìn-ɖɛ̀ dyi kóɖó-kóɖó, ɓɛ́ ɓě ké hwòɖǒ ku, ɓɛ́ ɓě ké ɓěɛ̀ Gèɖèpɔ́ɔ̀ fòìn kánáá pū.

Ɖɛ tɔ̀ɔ̀ ɓá gǎ ké Éézùɖùɛ̀-nyɔ̀ ɓěɔ̀ kɔ̃ dyiɛɛ jè dyíɛ

⁷ Bounɓoɔ̀ cɛ̃ɛ ɖe, ké ɔ ɖá, “Éézùɖùɛ̀-dyù ɓěɔ̀ nì kà ɖɛ-peɖe-nyɔ̀ ɓɛ́ ɔ ɓéɖé pṹá se wɔ̃ ɓɛ́ìn nyɛɛ nìà kɛ. Wa ɖɛ̀ɓɛ̀ wa ké gbá-gbá nyu.

⁸ Ɔ ɖǎ ná nìǐn, nìí, wa ɖá, ‘Dyéɛ, à ɖǎ bã mìɔ cá. À dyé à kɔ́mɔ́ɔ̀ ɖé jǎà-nyu-nyu mú, ké gbá-gbá ɖò se ɖéɛ mú nì.’

⁹ Kɛɛ mɔ̄ mɔ̀à Bounɓo mɔ̀à ɓěɛ̀ Gèɖèpɔ́ɔ̀ zà zɔ̃̌ɔ̀ kà ɓě ɖé Íjè-ɓòɖòɔ̀ kɔ̃ɛɛ, ní muɛ nyuùn ɓɛ́ ɓě ké jàɖàìn-gbò mú cĩ́ ɖe kà ɓě nyuɛ zɔ̃̌ɔ̀ kà ɖé gbǎùn-fúɖúáɔ̀ kɔ̃ɛ.

¹⁰ “Ḿ wùɖùìn zɔ̃̌ɔ̀ ní kpáá-ɖɛ̀-cɛ̃-nyɔ̀ ɓěɔ̀ mú. Ké ḿ tɛ̀mɛ̀ìn ma wa ɖɛ ɓáún-ɓáún dyí, ké ḿ poìn ma ɖɛ ɖɛí dyììn ɖé wa mú.

¹¹ Hwòɖǒ-kɔ̃in-nyìnììn-ɖɛ̀ nyu-nyu nì ɖé Gíɖèà-hwɔ̀ɖɔ̀ɔ̀ mú. Ɔ jèɛɛ, wa se kpáná ɖò mú nìɛ̌ mu. Wa zàìn ɓìɖǐ ɓíɔ́ ɓě sáa ɖé Gíógàò-hwɔ̀ɖɔ̀ɔ̀ mú. Ɔ jèɛɛ, waà mú-nyɛ́-nyɔ̀ ɓěɔ̀ mu waà sáa-kɔ̃-zàìn-gbàà ɓěɔ̀ sɔ́ɔ́-kòò kɔ̃ gbǒìn. Waà sáa-kɔ̃-zàìn-gbàà ɓěɔ̀ mu nììn kà nyɔ ɖò cɛ̃́à sɔ́ɔ́ dyi ké ɔ gbǒàìn dyí ɖé ɔ geɖeɔ̀ gboɛɛ nìà kɛ.”

¹² À ɓǎ Jékɔ̀ kpá zɔ̃̌ɔ̀ xwáɖáún, ké ɔ mu ɖé Áwàɖàùn-ɓòɖòɔ̀ kɔ̃, ké ɖéɛ̀ ɔ sè nyɔ́nɔ́ zɔ̃̌. Kũ̀à ɔ nyu ma kɛɛ mɔ̀ ma ɓáɖáá-dyí-gmɔ̀-kũ̀à.

¹³ Bounɓoɔ̀ zà zɔ̃̌ɔ̀ Éézùɖùɛ̀-nyɔ̀ ɓěɔ̀ ɖé Íjè-ɓòɖòɔ̀ kɔ̃ dyììn ɖé kpáá-ɖɛ̀-cɛ̃-nyɔ̀ ɖò mú, ké ɔ gmɔ̀ wa dyí dyììn ɖé kpáá-ɖɛ̀-cɛ̃-nyɔ̀ɔ̀ mú.

¹⁴ Kɛɛ Éézùɖùɛ̀-nyɔ̀ ɓěɔ̀ po ma Bounɓoɔ̀ dyoɖoún mìɔ. Ɔ jèɛɛ, wa mu wa mìɔùn nììn nyɔmɔɔ̀ kpa dyí ɖúùn. Ké Bounɓoɔ̀ mu wa gǎ kɔ̃ tòùn ɓó dɛ̃ wa dyàà Bounɓoɔ̀ nyɛ́nɛ́ɔ̀ kɔ̃ɛɛ jè.