Hòzéà 11 - Ɓǎsɔ́ɔ̀ Báɓòɔ̀

Ɖɛ̀ɓɛ̀ǐn-ɖɛ̀ɓɛ̀ǐn Gèɖèpɔ́ɔ̀ ɓéɖé ɓó ɔ wuɖuún-jaɖa-nyɔ̀ ɓěɔ̀ bììɛ

¹ Bounɓoɔ̀ cɛ̃ɛ ɖe, ké ɔ ɖá, “Ti ɓɛ́ Éézùɖùɛ̀-dyù ɓěɔ̀ mɔ̀ zɔ̃̌ɔ̀ dyú-gbɔ́ɔ́ keɛɛ, ḿ ɖɛ̀ɓɛ̀ zɔ̃̌ɔ̀ wa mú. Ké ḿ ɖá ní dyú ɓěɔ̀, ɓɛ́ wa ké ɖé Íjè-ɓòɖòɔ̀ kɔ̃ sɔ̀.

² Kɛɛ kà ḿ nyu wa ɖáa mìɔ kɛɛ, kǎà wa nyu ḿ bũ̌in tɔmɔìn ɖe mìɔ. Wa zà sáa ɖé Béò gbo, ké wa fɔ̃ nyɔ́ún-nɔ̀mɔ̀-ɖɛ̀ ɓó kũùn-kpò ɓě bìì.

³ Mɔ̄ mɔ̀ nyɔ ɓá ma Éézùɖùɛ̀-dyù ɓěɔ̀ sɔ̃ún, ké ḿ zà ma wa táá-dɛɛ. Kɛɛ wa seɛ ma dyí dyuò kà mɔ̄ mɔ̀ nyɔ kánáìn ma wa dyiɛ.

⁴ Ḿ po ma wa ní nyɔ-wìǐn-dyé-ɖùǔɔ̀ sɔ̃, ké ḿ nàìn ma wa ɖé ní ɖɛ̀ɓɛ̀ǐn-ɖɛ̀ɓɛ̀ǐnɔ̀ mú. Ḿ zà ma gɛ̀ɛ̀ɔ̀ wa ɖɔ, ké ḿ kíɖí ma kɔ̃, ké ḿ nyí ma wa ɖii-ɖɛ̀.

⁵ “Wa mu ɖé Íjè-ɓòɖòɔ̀ kɔ̃ ɖe kɔ́ìn, ké Àsíwíɖíà-nyɔ̀ ɓěɔ̀ mu wa wuɖuí kɔ̃̀ùn, sepóɛɖé wa se wɔ̃́ ɓɛ́ wa ké ḿ gbo gmɔ̀ìn ɖe.

⁶ Gàsíà mu wa ɖé wa hwɔɖɔ ɓěɔ̀ mú dyi sámáùn. Ɔ mu waà gmɔ-wɔ̃̀ ɓěɔ̀ dyíin nyìnììn, ɓɛ́ ɔ ké wa mìɔùn nììn hwòɖǒɛ̀-gbɔ-po-ɖɛ̀ ɓěɔ̀ kɔ̃in cá.

⁷ Ní nyɔ ɓěɔ̀ hwòɖǒ ɖǎa dyí sɔ́, ɓɛ́ wa ké ḿ kɔ̃ín pòìn jèɛɛ, kɛbì wa mɛ ɖá mɔ̄ mɔ̀à Ɖɛɓíɔ́ kɛɛ, ḿ se wa dya dèɛ̌ mu.

⁸ “Éézùɖùɛ̀-dyù ɓě, xwɛ̌ ḿ ɓɛ́ìn ɓě jè hwòɖǒ gbo zàà kɛ́? Xwɛ̌ ḿ ɓɛ́ìn ɓě dyi táà kɛ́? Ḿ se ɓě mú gbɔɔ̀ ɓɛ́ìn, kà ḿ gbɔɔ̀ ma kà Àdámà-hwɔ̀ɖɔ̀ɔ̀ kè Zɛ̀ɓódyììn-hwɔ̀ɖɔ̀ɔ̀ múɛ. Ní hwòɖǒ se wɔ̃́ ḿ kéɛ náa nyu, sepóɛɖé ḿ ɖɛ̀ɓɛ̀ ɓě mú mìɔ cá.

⁹ Ḿ se ɓě gǎ kɔ̃ dyàǎ mu ɖé ní dyoɖo-hwòɖòɔ̀ mú. Ḿ se ɓě mú gbɔɔ̌ mu ɖe, sepóɛɖé ḿ mɔ̀ Gèɖèpɔ́ɔ̀, ké ḿ se nyɔǔn-dyù. Mɔ̄ mɔ̀à Mú-hwɛ̀-nyɔ̀ɔ̀ kɛɛ, ḿ nì ɓó ɓě gbo. Ḿ se ɓě gbo dyiɛ́ mu ɖé ní dyoɖo-hwòɖòɔ̀ mú.

¹⁰ “Ní nyɔ ɓěɔ̀ mu ḿ kíɖíí síìn, ti ní mu kuɖuùn kà ganìǎ kuɖuà kɛ. Ní dyú ɓěɔ̀ mu ɖé dyóɖó-dyi-kpáìn-naínɔ̀ sɔ̀ìn, ɓɛ́ wa ké ḿ gbo dyi wàɖà.

¹¹ Wa mu ɖé Íjè-ɓòɖòɔ̀ kɔ̃ sɔ̀ùn, ɓɛ́ wa ké dyi wàɖà kà naà nyuà kɛ. Ké wa mu ɖé Àsíwíɖíà-ɓòɖòɔ̀ kɔ̃ sɔ̀ùn, ɓɛ́ wa ké dyi wàɖà kà gbúɛ́ nyuà kɛ. Ɔ ɖǎ ná nìǐn, ní mu wa ɖé wa mìɔùn nììn ɓíɖí-taà ɓěɔ̀ mú dyàùn ɖe. Mɔ̄ Bounɓoɔ̀ mɔ̀ nyɔ cɛ̃à kɛ̀.”

Zaa kpɔ̃ Éézùɖùɛ̀-nyɔ̀ ɓěɔ̀ kè Júɖà-nyɔ̀ ɓěɔ̀

¹² Bounɓoɔ̀ cɛ̃ɛ ɖe, ké ɔ ɖá, “Éézùɖùɛ̀-dyù ɓěɔ̀ tɔ́mɔ́ìn ḿ se wĩin kánáá pū, ké nyɔ-cá-cá dyíìn ɖé wa múin. Ké Júɖà-nyɔ̀ ɓěɔ̀ nì mɔ̄ mɔ̀à Jǎà-nyɔ̀ kè Mú-hwɛ̀-nyɔ̀ɔ̀ kɛɛ gbo vɔ̃uń ke kánáá pū.