Hòzéà 10 - Ɓǎsɔ́ɔ̀ Báɓòɔ̀

¹ Éézùɖùɛ̀-nyɔ̀ ɓěɔ̀ nì ma kà géɖéè-gbǎ tòɖò-tòɖò nìà kɛ. Kà wa nyu ɓo ɓáún-ɓáún tòɖòɛ̀ kɛɛ, kǎà wa nyu waà sáa-kɔ̃-zàìn-gbàà ɓěɔ̀ kɔ̃ poɛ. Kà waà ɓáá-ɖɛ̀ ɓěɔ̀ nyu dúún zaìn nyɛɛ, kǎà wa nyu ɓiè-sɔ̀ɔ̌-kpò ɓě ɓɛ́ wa nyànàìn dyiɛɛ xwa nɔ̀mɔ̀ìn.

² Nyɔ ɓěɔ̀ ɓéɖé nyɔ-cá-hwòɖò-dyùà. Ɔ jèɛɛ, wa muá waà nàmàǔn ɓěɔ̀ kpa dyí ɖúùn. Bounɓoɔ̀ mu waà sáa-kɔ̃-zàìn-gbàà ɓěɔ̀ wáɖáùn, ké ɔ mu waà ɓiè-sɔ̀ɔ̌-kpò ɓěɔ̀ dyíin nyìnììn.

³ Ɔ ɖǎ ná nìǐn, nìí, nyɔ ɓěɔ̀ muɛ cɛ̃ìn, ɓɛ́ wa ké níiń, “À se Bounɓoɔ̀ dyi fɛ̃̀ìn jèɛɛ, à se kã́á ɖò ɓéɖé. À dyiɔ́ kã́á ɓéɖé dyɛ mɔ̀ùn ní, nìí, ɖɛ́ ɔ muɔ́ má à bìì nyuùn wɛ̃́?”

⁴ Wa cɛ̃ wuɖu fóɖóún ɓě, ké wa nyu wuɖu-ɖi-ɖi kè dèè-wùɖù fóɖóún ɓě. Ɔ jèɛɛ, zaa-dúún-wáɖá-wáɖá ɓáìn wa kɔ̃in wàɖà kà pìǐ nyìnììn dyíin ɓáìn pá wa-wa kɔ̃in nyɛ.

⁵ Nyɔ ɓě cĩ́ ɖé Sɛ̀mɛ́ɖìà-hwɔ̀ɖɔ̀ɔ̀ múɛɛ mu fɛ̃̀ìn ɓó ɓìɖǐ-dyù-kũ̀ùn-kpò nìà ɖé Bɛ̀-Ávɛ̃̀-hwɔ̀ɖɔ̀ɔ̀ múɛɛ jè, ké wa mu vĩ̌ìn. Kǎà kũùn-kpòɔ̀ nììn sáa-zà-nyɔ̀ ɓě ɓɛ́ wa kpá ma kà múàǔn ɓóɛ dyíin nɔ̀mɔ̀ jèɛɛ muɛ nyuùn ɖekè. Sepóɛɖé wa ɖǎ waà kũùn-kpò dĩ́ín-dĩ̀ìnɔ̀ ɓóɖó-dù kà kò ɖò kɔ̃ kpa.

⁶ Wa mu kũùn-kpòɔ̀ nyíí-ɖɛ̀ mú nyuùn, ɓɛ́ wa kéɛ Àsíwíɖíà-ɓòɖòɔ̀ kã́á vɛ̀nɛ̀ɔ̀ nyí. Dɛ̃ mu Éézùɖùɛ̀-nyɔ̀ ɓěɔ̀ nyuùn. Dɛ̃ mu wa nyuùn ɓó ná-wùɖù ɓɛ́ wa kpɔ̃à dyiɛɛ jè.

⁷ Sɛ̀mɛ́ɖìà-kã̀ǎɔ̀ jè mu dyi ziìn kà ní-dyèɖè zĩ̀àìn cu-xwɛ̃̀ ɖò ɓɛ́ ɔ fúɖú ní kɔ̃in nyɛ.

⁸ Ké kũùn-kpo ɓièìn-naín nìà ɖé Bɛ̀-Ávɛ̃̀-tòɖòɔ̀ dya dɛ̀ mɔ̀à Éézùɖùɛ̀-nyɔ̀ ɓěɔ̀ hwòɖǒ-kɔ̃in-nyìnììn-ɖɛ̀ nyùìn-naín nyɛɛ mu mú gbɔɔ̀ùn. Wí kè pìǐ mu waà sáa-kɔ̃-zàìn-gbàà ɓěɔ̀ dyí ɖúùn. Ɔ ɖǎ ná nìǐn, nìí, wa muɛ toɖo vɛ̀nɛ̀ ɓěɔ̀ gbo cɛ̃ìn, ɓɛ́ wa ké níiń, “Ɓáìn à kɔ̃in.” Ké wa muɛ toɖo-dyù ɓěɔ̀ gbo cɛ̃ìn, ɓɛ́ wa ké níiń, “Kpá à kɔ̃.”

Bounɓoɔ̀ ɖá ɔ mu Éézùɖùɛ̀-nyɔ̀ ɓěɔ̀ gǎ kɔ̃ tòùn

⁹ Bounɓoɔ̀ cɛ̃ɛ, ké ɔ ɖá, “Éézùɖùɛ̀-dyù ɓěɔ̀ ɖúó nàmàǔn nyuɛń dyí sɔ̀ìn ɖé Gíɓìà-hwɔ̀ɖɔ̀ɔ̀ múɛɛ, wa nìɛ̀ nyuɛń ke kánáá pū. Má, to dyɛ̀ìn ma wa ɖé Gíɓìà-hwɔ̀ɖɔ̀ɔ̀ mú dyie?

¹⁰ Ní mu dú-kùmù-nyɔ̀ ɓěa gǎ kɔ̃ tòùn ti ní hwòɖǒ muɛ náa mɔ́ùn wɛ̃. Ní muɛ nyuùn ɓɛ́ ɓóɖó-dù kà kò ɖò ɓě ké dyí poìn, ɓɛ́ wa ké wa to kɔ̃ dyà, ɓɛ́ wa ké wa gǎ dyéìn ɓó waà nàmàǔn deìn kɔ̃in ɓěɔ̀ jè.

¹¹ “Éézùɖùɛ̀-dyù ɓěɔ̀ nì kà ɓìɖǐ nyɔ́nɔ́ gmɔ̀ ɓɛ́ wa ɖǎ ɖɛ tɛ̀mɛ̀ìn nɔ̀mɔ̀ dyíin ké ɔ ɖɛ̀ɓɛ̀ mɔɔ́ dyí-sí-sí múɛɛ nìà kɛ. Kɛɛ ɓó kàǔn wɛ̃ɛ, ní mu wa bùnù nɔ̀mɔ̀ dyíinɔ̀ gɛ̀ɛ̀ ɖɔ poùn. Júɖà-nyɔ̀ ɓěɔ̀ mu ɓóɖó-xwa-cɛ́ɛ̀-nyɔ̀ jǔùn, ɓɛ́ Éézùɖùɛ̀-dyù ɓěɔ̀ ké ɓóɖó-kpòɔ̀ dyi-wàìn-nyɔ̀ jǔ.

¹² Éézùɖùɛ̀-dyù ɓě, ɓě wàìn ɓóɖó kùmù-kùmùɔ̀ dyi. Ɓě ɓá dyí-sɛ́ɖɛ́ìn-sɛ́ɖɛ́ìn kà nyɔ ɓáà ɓáá-ɖɛ̀ ɖòɛ. Ɓě ɓéɖé ɖɛ̀ɓɛ̀ǐn-ɖɛ̀ɓɛ̀ǐn ɓó ḿ bìì, ké ɔ mu ɓo tòɖòùn. Sepóɛɖé ɔ mɔ̀ǎ ti ɓɛ́ ɓě ké mɔ̄ Bounɓoɔ̀ kúmúìn tee ɓɛ́ ḿ ké dyi, ɓɛ́ ḿ ké ní manaɔ̀ ɓě kɔ̃ púè kà ní ɖaɓaà kɛ.

¹³ Kɛɛ ɖɛ ɓě ɓáa mɔ̀ hwòɖǒ-kɔ̃in-nyìnììn-nyìnììn, ké ɓo ɔ tòɖòɛɛ mɔ̀ ɖɛ gbà. Ɓě ɖǎ cu-ɓò mɔ̀ nyɔ-cá-cáa ɖi. “Ɓě taɓa ɓě mìɔùn nììn kpéɔ̀ kè ɓěɛ̀ sójà kúɖúú ɓěɔ̀ hwìɖǐǐ jèɛɛ,

¹⁴ to ɖò mu ɓě kɔ̃ kpáùn, ké ɓěɛ̀ to-pèɖèìn-naín séín ɓěɔ̀ mu mú gbɔɔ̀ùn. Ɔ mu nììn kà ɔ nì ma kà ti ɓɛ́ Kã́á Sáámà gbɔɔ̀ ma kà Bɛ̀-Áɓè-hwɔ̀ɖɔ̀ɔ̀ mú ɖé to-tìɔ̀ múɛɛ nìà kɛ. Ɓó tia ɓaɖaa, wa wàìn ma dyú-ɖɛ̌ ɓěɔ̀ kè waà dyú ɓěɔ̀ dyi.

¹⁵ Éézùɖùɛ̀-dyù ɓě, kǎà ɔ mu nììn ɓó ɓě bìì, sepóɛɖé ɓěɛ̀ hwòɖǒ-kɔ̃in-nyìnììn-nyìnììnɔ̀ ɓúá kpéín mìɔ. Ti ɓɛ́ wéɔ̀ mu ɓó nyìnììn nyɛɛ, Éézùɖùɛ̀-kã̀ǎɔ̀ mu mú gbɔɔ̀ùn nyɛ̀nɛ̀ɛ̀ cá.”