Híìbúɖúù 13 - Ɓǎsɔ́ɔ̀ Báɓòɔ̀

Kà nyɔ ké Gèɖèpɔ́ɔ̀ hwòɖǒ dyi dèɛ̀ nyuɛ

¹ Kà ɓɛ́ ɓě mɔ̀à ɖíí-gàà ɓěɛɛ, ɓě mɛ ɖɛɓɛìn ɖɛ̀ɓɛ̀ìn mú tee.

² Ɔ mɛ nì ɓě hwìɖǐi ɓɛ́ ɓě ké ɖéè ɓě jè dyi kpɔ̃. Nyɔ ɖíɛ́ ɓě nyuɛ ma ké wa kpɔ̃ ma ínjà ɓě jè dyi, ké wa seɛ ma jè dyuò.

³ Nyɔ ɓě nìà kpɔɖɔ ɖeín nyɛɛ jè mɛ nì ɓě hwìɖǐi kà ɓě nìɔ̌ kà kpɔɖɔ ɖeín ɖekèɛ. Nyɔ ɓě nìà gǎ dyéɛń nyɛɛ jè mɛ nì ɓě hwìɖǐi kà ɓě mɔ̀ùn nìɔ̌ kà gǎ dyéɛń kà wa mɔ̀ùn nìà kɛ.

⁴ Dyi-kpɔ̃ìn-kpɔ̃ìn jè mɛ kpa ɖɛ ɖé nyɔǔn séín gbo. Nyɔ́nɔ́-ɓǎ ɓě kè wa gmàà ɓě ní ɖá ɓɛ́ wa ké ɖɛ gbà nyu, sepóɛɖé Gèɖèpɔ́ɔ̀ mu nyɔ ɓě ɓɛ́ wa nyu kpeɖe gbà, ké wa po gmaɖe kɛɛ zaa kpɔ̃̀ìn.

⁵ Wíɖí mú ɖɛ̀ɓɛ̀ jè ní ɖá ɓɛ́ ɔ ké ɓě hwòɖǒ kpɔ̃. Ɓě hwòɖǒ mɛ dè dyi ɓó ɖɛ ɓě ɓéɖé kɛɛ jè. Sepóɛɖé Gèɖèpɔ́ɔ̀ ɖá, “Ḿ se ɓě dyi táǎ mu fɔɔ, ké ɓě jè se ḿ hwìɖǐi sɔ̀ɔ̌ mu fɔɔ.”

⁶ Ɔ jèɛɛ, à se fɛ̃̀ìn, ké à ɓɛ́ìn cɛ̃ɛ, ɓɛ́ à ké níiń, “Bounɓoɔ̀ mɔ̀ ní gbo-kpá-nyɔ̀. Ḿ se fã̀à ɖò peɖeɛ́ mu. Ɖɛ́ nyɔǔn-dyù ɓɛ́ìn ḿ bũ̌ nyuɛ kɛ́?”

⁷ Nyɔ ɓě nì ma ɓě nàǐn, ké wa cɛ̃ ma ɓě Gèɖèpɔ́ɔ̀-wùɖùɔ̀ gboɛɛ jè mɛ nì ɓě hwìɖǐi. Ɓě mɛ poìn kà wa nyu ma cĩ́ɛ, ɔ kè kà wa nyu ma mɛ́ɛ kɛɛ jè hwìɖǐi. Kà wa mɔ̀ùn nyu ma hwìɖǐǐ-taɓa-taɓa ɓéɖéɛ kɛɛ, kǎà ɓě mɔ̀ùn mɛ nyuɛ ɓéɖéɛ.

⁸ Kà Jízɛ̀ Kɛ́ɖɛ́ì nyu ma nìɛ̀ mabã̀a kɛɛ, kà ɔ nì ke ɓó zɛ̃̌ɛ̀, ké kǎà ɔ mu nììn kánáá pū.

⁹ Ɓěǐn ɖá ɓɛ́ tɛ̀mɛ̀ìn-ɖɛ̀ kò-kò ɓě kè ɔ kã̀ìn-kã̀ìn ɓě kéɛ nyu ɓɛ́ ɓě ké hwìǐ sɔ̀ìn. Ɔ nɔ̀mɔ̀ dyíin ɓɛ́ Gèɖèpɔ́ɔ̀ kpeɖeɛ̀-dyíin-nɔ̀mɔ̀-nɔ̀mɔ̀ɔ̀ ké nyu, ɓɛ́ à hwòɖǒ ké kpéí kpá, kɛɛ ɔ se ɖé gma ɓě ɓá ɖii-ɖɛ̀ ɖi jè dyíɛɛ dyi-kpɔ̃-kpɔ̃ mú. Nyɔ ɓě kpɔ̃ gma ɓě nìà kɛ dyiɛɛ, ɔ se wa gbo kpá.

¹⁰ À ɓéɖé sáa-kɔ̃-zàìn-gbàà ɖò, ké nyɔ ɓě ɓɛ́ wa nyu kũ̀à ɖé jàɖàìn-gbòɔ̀ múɛɛ se kpé ɖò ɓéɖé ɓɛ́ wa ké ɖɛ ɓě nìà à sáa-kɔ̃-zàìn-gbààɔ̀ kɔ̃ɛɛ ɖi.

¹¹ Sáa-zà-nyɔ̀ vɛ̀nɛ̀ɔ̀ dyà nyúà-ɖɛ̀-nyɔ̀mɔ̀ɔ̀ ɖé Pá Hwɛ̀ Mú Mìɔɔ̀ mú, ɓɛ́ ɔ kéɛ Gèɖèpɔ́ɔ̀ nyí ɓó nàmàǔn-kɔ̃in-ɓáìn-ɖɛ̀ jè, kɛɛ wa fɔ̃̀ìn nyúà-ɖɛ̀ ɓěɔ̀ kú ɓěɔ̀ ɖé jàɖàìn-hwɔ̀ɖɔ̀ɔ̀ ɖeín.

¹² Ɖɛa kɔ̃̀ jè, Jízɛ̀ mɛ́ ma kà ɖé hwɔɖɔɔ̀ gmɔ-wɔ̃̀ɔ̀ ɖeín ɖekèɛ̀. Ɔ nyuɛ náa, ɓɛ́ ɔ ké nyɔǔn waà nàmàǔn ɓěɔ̀ mú zà dyììn ɖé ɔ mìɔùn nììn nyɔmɔɔ̀ mú.

¹³ Ɔ jèɛɛ, ɓěà mɛ mu ɖé ɔ gbo ɖé jàɖàìn-hwɔ̀ɖɔ̀ɔ̀ ɖeín, ɓɛ́ à kèɔ̀ kè ké ɔ dɛ̃-ɖɛ̀ɔ̀ mú peɖeìn.

¹⁴ Sepóɛɖé hwèɖèìn-hwɔ̀ɖɔ̀ ɖò se nɔ̄ ɓóɖó-kpàà kɔ̃ nì ɓó à bìì. À nì hwɔɖɔ ɓɛ́ ɔ kéà ɓíɖíi dyiɛɛ jè hwìǐ gmɔ̀ǔn.

¹⁵ Ɖɛa kɔ̃̀ jè, à mɛ ɓàìn Gèɖèpɔ́ɔ̀ ti séín. Ɔ mɔ̀ sáa-zàìn-ɖɛ̀ ɓɛ́ à ɓɛ́ìn ɔ nyíɛ dyììn ɖé Jízɛ̀ múɛ. Ɔ mɔ̀, à mɛ po Gèɖèpɔ́ɔ̀ zùo tee ɓó ɔ nyɛ́nɛ́ɔ̀ jè, dyììn ɖé à wĩín-wùɖù mú.

¹⁶ Ɓěǐn ɖá ɓɛ́ ɖɛ nɔ̀mɔ̀ dyíin nyu jè, ɔ kè gbo-kpáìn-kpáìn jè ké ɓě hwìɖǐi sɔ̀, sepóɛɖé ɖɛ ɓě nìà kɛ mɔ̀ nyíí-ɖɛ̀ ɓɛ́ à ɓɛ́ìn Gèɖèpɔ́ɔ̀ nyíɛ, ké wa nyuɛ ké Gèɖèpɔ́ɔ̀ hwòɖǒ dè dyi.

¹⁷ Ɓě mɛ nyu nyɔ ɓě nì ɓě nàǐn nyɛɛ wuɖu, ké ɓě mɛ nì wa xwíɖíi. Wa nì ɓěɛ̀ zùùɔ̀ gbo gmɔ̀ǔn, sepóɛɖé wa ɓéɖé ɓɛ́ wa ké wa mìɔùn jè kɔ̃in zaìn ɖé Gèɖèpɔ́ɔ̀ gbo. Ɓě mɛ nyuɛ ɓɛ́ wa kũ̀àɔ̀ ké múà-ɖɛ̀ jǔ ɖé wa gbo. Ɓě ní nyuɛ ké ɔ ní mɔ̀ wìì-ɖɛ̀, sepóɛɖé ɖɛ nì náa se ɓě gbo kpáa mu.

¹⁸ Ɓě mɛ ɓaà à bìì. À dèɛ̀ hwòɖǒ kɔ̃ kà ɓɛ́ à ɓéɖé hwòɖǒ wáɖáá kɛ, sepóɛɖé à mɔ́ ɓɛ́ à ké ɖɛ mɔ̀ ɖɛ sɛ́ɖɛ́ìn dyí kɛɛ nyu ti séín.

¹⁹ Ḿ ɓaà ɓě bóóbòfíɛ̀, ɓě mɛ ɓaà, ɓɛ́ Gèɖèpɔ́ɔ̀ ké ḿ ɖé ɓě gbo ɖe ɖoɓoɛń fṹà.

Wuɖu hwɛ̀ìn-gbɔ

^20-21 Gèɖèpɔ́ɔ̀ ɖǎ à Bounɓo Jízɛ̀ gĩɔ zà. Ɔ mɔ̀ à mɔ̀à ɓáɖáá ɓěɔ̀ kɛɛ dyí-gmɔ̀-nyɔ̀ vɛ̀nɛ̀. Ɔ nyɔmɔɔ̀ nyuɛ ké sè-ná-sèɛ̀ dèè-wùɖùɔ̀ kpa ɖɛ. Gèɖèpɔ́ɔ̀ mɔ̀ nyɔ tòà gìɖìǐɛɛ, ɔ mɛ nyí ɓě ɖɛ nɔ̀mɔ̀ dyíin séín ɓě ɓɛ́ ɓě kɔ̃̀ ɓě kéɔ́ dyé, ɓɛ́ ɓě ké ɔ mɔ́ɔ́-ɖɛ̀ nyuɛ. Ké ɔ mɛ nyu ɖɛ dè ɔ hwòɖǒ dyi dyììn ɖé Jízɛ̀ Kɛ́ɖɛ́ì múɛɛ ɖé à mú. Kɛ́ɖɛ́ì mɛ ɓéɖé ɓàìn-ɓàìn ɓó sè-ná-sèɛ̀ tiín. Kǎà ɔ mɛ nì.

²² Ḿ ɖíí ɓě, ní ɓaà ɓě ní, ɓě mɛ ku hwòɖǒ, ɓɛ́ ɓě ké nyɔǔn kpéí-po-wùɖù ɓě nìà kɛ ɖùǔ gbo tò, sepóɛɖé céè-ɖɛ̀ ɓɛ́ ḿ céèà ɓě gboɛɛ se ɓoún tɔ̀mɔ̀ mìɔ.

²³ Ḿ mɔ́ ɓɛ́ ɓě kéɛ dyuò kà ɓɛ́ à ɖíí-gàà Tímétè ɖǎ kpɔɖɔ ɖeín sɔ̀ kɛ. Ɔ dyi dyiɛń fṹà ní, ḿ dyi ɓě dyéɛń dyiín, ḿ kè ɔ mu dyiìn.

²⁴ À zà nyɔ séín ɓě nì ɓě nàǐn nyɛ kè Gèɖèpɔ́ɔ̀-nyɔ̀ séín ɓěɔ̀ nyíɔún. À ɖíí ɓě sɔ̀ìn ɖé Ítáɖè-ɓòɖòɔ̀ kɔ̃ɛɛ zà ɓě nyíɔún.

²⁵ Mana mɛ nì ɓě séín kɔ̃. Kǎà ɔ mɛ nì.