Hágàì 2 - Ɓǎsɔ́ɔ̀ Báɓòɔ̀

Gèɖèpɔ́ɔ̀ gbǒ ɖìèɔ̀ dĩ́ín-dĩ̀ìnɔ̀

¹ Ɖé zɔ̃ dyúáɖòɔ̀ dɛ̀nɛ̀ mɛ̀nɛ̌ìn-sɔ̃́ nììnɔ̀ wé kpáɖá-nyɔ sè dyúáɖò nììnɔ̀ ɓaɖaa, Bounɓoɔ̀ wùɖùìn ma Hágàì mɔ̀à kpáá-ɖɛ̀-cɛ̃-nyɔ̀ɔ̀ kɛɛ mú ɖe, ké ɔ ɖá,

² “Cɛ̃ɛ Zɛ̀wáɖáɓèɓò mɔ̀à Sɛ́àtíèɛ̀ dyú-gàà, ɓɛ́ ɔ mɔ̀à Júɖà-ɓòɖòɔ̀ wuɖuí-kɔ̃̀-nyɔ̀ɔ̀ kɛɛ kè Jasúé mɔ̀à Jɛ̀hózàɖàà dyú-gàà, ɓɛ́ ɔ mɔ̀à sáa-zà-nyɔ̀ vɛ̀nɛ̀ɔ̀ kɛ ɔ kè Júɖà-nyɔ̀ ɓěɔ̀ xwéɖé wèɔ̀ gbo, ɓɛ́ m̀ ké níiń, ‘Bounɓoɔ̀ ɖá,

³ “Nyɛ́ nì ɓě hwìɛ̀, ké ɔ dyéó zɔ̃̌ɔ̀ ní gbǒ sùàɔ̀ nììn dĩ́ín-dĩ̀ìnɔ̀ kɛ́? Xwɛ̌ nyɔà nyu nìɛ̀ kɛ́? Má, nyɔ nìà kɛ se dyíin nɔ̀mɔ̀ ɓɛ́ ɔ kéɛ súáɔ̀ dyɛ̀ìne?

⁴ Kɛɛ wɛ̃́ɛ́ kɛɛ, Zɛ̀wáɖáɓèɓò, m̀ kè Jasúé mɔ̀à Jɛ̀hózàɖàà dyú-gàà, ɓɛ́ ɔ mɔ̀à sáa-zà-nyɔ̀ vɛ̀nɛ̀ɔ̀ kɛ ɔ kè nyɔ tɔ̀ɔ̀ ɓěɔ̀ kɛɛ, ɓě ku dúún, ɓɛ́ ɓě ké kũ̀àɔ̀ nyu, sepóɛɖé ḿ nì ɓó ɓě gbo.

⁵ Ḿ ɖǎ ma ɓě ɖɛ nìà kɛ nyɛ́nɛ́ín ɖáìn kĩ́ín, ti ɓɛ́ ɓě sɔ̀ ma kà ɖé Íjè-ɓòɖòɔ̀ kɔ̃ɛ. Ní Zùùɔ̀ nì ɓó ɓě hwìɛ̀ kánáá pū. Ɔ jèɛɛ, ɓě ɓɔ́ fɛ̃̀ìn. Mɔ̄ Bounɓo mɔ̀ nyɔ nìà ɖɛ séín kɔ̃in nyɛɛ mɔ̀ nyɔ cɛ̃à kɛ̀.

⁶ “ ‘ “Ti wè dyi ziín, ní mu dyɔɔ̀ kè ɓóɖó-kpà gànáɔ̀ ɔ kè dyóóɔ̀ dyi túòùn.

⁷ Ní mu ɓóɖó-dù séín dyi túòùn, ké wa mu waà kɔ́mɔ́-ɖɛ̀ ɓěɔ̀ nɔ̄ dyàùn. Ké ní mu ní dĩ́ín-dĩ̀ìnɔ̀ gbǒ nìà kɛ múin dyíìn.

⁸ Séɓàɖàɔ̀ mɔ̀ ní kɔ̃̀ɔ̀-ɖɛ̀, ké góòɔ̀ mɔ̀ ní kɔ̃̀ɔ̀-ɖɛ̀.

⁹ Gbǒ ɖìè nìà kɛ nììn dĩ́ín-dĩ̀ìnɔ̀ mu kpéín ɓúáùn, ɓɛ́ ɔ ké gbǒ nìǒ zɔ̃̌ɔ̀ kà kĩ́ín nyɛɛ dyí zi. Ké ní mu gìɖìǐ dà pá nìà kɛ mú tòùn. Mɔ̄ Bounɓo mɔ̀ nyɔ nìà ɖɛ séín kɔ̃in nyɛɛ mɔ̀ nyɔ cɛ̃à kɛ̀.” ’ ”

Hágàì diè sáa-zà-nyɔ̀ ɓěɔ̀ dyi

¹⁰ Ɖé Dìwáɖádyà nììn ɓóɖó-wuɖuí-kɔ̃̀-zɔ̃̀ɔ̀ sɔ̃́ nììnɔ̀ dɛ̀nɛ̀ mɛ̀nɛ̌ìn-hĩinyɛ nììnɔ̀ wé kpáɖá-nyɔ sè hĩinyɛ nììnɔ̀ ɓaɖaa, Bounɓo mɔ̀ nyɔ nìà ɖɛ séín kɔ̃in nyɛɛ wùɖùìn ma Hágàì mɔ̀à kpáá-ɖɛ̀-cɛ̃-nyɔ̀ɔ̀ kɛɛ mú ɖe, ké ɔ ɖá,

¹¹ “Diè sáa-zà-nyɔ̀ ɓěɔ̀ dyi, ɓɛ́ m̀ ké níiń, ‘Xwɛ̌ gmaɔ̀ ɖá kɛ́?

¹² Ɔ jǔ ké nyɔ ɖò dyi suaɖɛ̀ ɖò mɔ̀ sáa-zàìn-ɖɛ̀ hwɛ̀ǐn-hwɛ̀ǐn nyɛɛ ɖò dyí ɖú, ké ɔ dyiɛ ɔ mú-po-ɖɔ̀ɔ̀ máná ɖò dyi bĩìn, ké ɔ mú-po-ɖɔ̀ɔ̀ mɔ̀ùn dyi bɛɖɛɛ̀ ɖò mɔɔ cɔ́ɔ́ ɖò mɔɔ wã́ìn ɖò mɔɔ cáná ɖò mɔɔ ɖii-ɖɛ̀ kà kò ɖò dyi tìnììn ní, ɖii-ɖɛ̀ɔ̀ dyɛ mɔ̀ɔ̀ mɔ̀ùn hwɛ̀ mú ɖekèe?’ ” Ti ɓɛ́ Hágàì mu, ké ɔ diè ma sáa-zà-nyɔ̀ ɓěɔ̀ dyiɛɛ, wa jǔ ma ɔ gɔ̃̌, ké wa ɖá, “Gbào.”

¹³ Ké Hágàì ɖá, “Nyɔ ɖò ɓɛ́ ɔ tìnììn xwɛ́ dyi, ké xwɛ́ɔ̀ nyuɛ ké ɔ se mú hwɛ̀ɛ dyi ɖɛ ɓěa ɖò dyi tìnììn ní, má, ɖɛ ɔ tìnìàìn dyiɛɛ mɔ̀ùn se mú hwɛ̀ ɖekèe?” Ké sáa-zà-nyɔ̀ ɓěɔ̀ ɖá, “Ǹdye. Ɖɛɔ̀ mɔ̀ùn se mú hwɛ̀ ɖekè.”

¹⁴ Hwɛ̀ ké Hágàì ɖá, “Bounɓoɔ̀ ɖá kǎà nyɔ ɓě mɔ̀ ɓóɖó-dù nìà dà ɔ dyúa kɛɛ jè nyu nìɛ̀. Ɖɛ kã̀ìn séín ɓě nyuɛ kè sáa-zàìn-ɖɛ̀ kã̀ìn séín ɓě nyuɛɛ se mú hwɛ̀.”

Bounɓoɔ̀ ɖá ɔ mu mana tòùn

¹⁵ Bounɓoɔ̀ cɛ̃ɛ, ké ɔ ɖá, “Sɔ̀ìn ɓó zɛ̃̌ɛ̀ gboɛɛ, ɓě poìn ɖɛ ɓěɛ̀ jè hwìɖǐi nɔ̀mɔ̀ dyíin. Ɓě poìn hwìɖǐi kà ɓɛ́ ɖɛ ɓě nyu ma nìɛ̀ hwɛ̀ ɓɛ́ wa dyi ma sɔ́ɔ́-kpò ɖò ɔ mǔè ɖò kɔ̃ dè ɖé ní gbǒɔ̀ múɛ.

¹⁶ Ɔ jǔ ké nyɔ ɖò dyiɔ́ má hwítì-zòɖò ɖò dyí sí ní, ɓɛ́ ɔ kéɔ́ má ɖé ɖɛ-mú-ɖàɓàìn-ɖɛ̀ɔ̀ wé kpáɖá-nyɔ ɖò dyéɛɛ, nìí, ɔ dyé ɖé ɖɛ-mú-ɖàɓàìn-ɖɛ̀ɔ̀ wé ɓaɖa-bùè nyɛ̀nɛ̀ɛ̀. Ɔ jǔ ké nyɔ ɖò dyiɔ́ má ɖé géɖéè-mú-píníìn-naínɔ̀ mu, ɓɛ́ ɔ kéɔ́ má ɖé wã́ìn-mú-ɖàɓàìn-ɖɛ̀ɔ̀ wé kpáɖá-nyɔ sɔ̃́ ɓaɖa-bùè dyéɛɛ, nìí, ɔ dyé ɖé wã́ìn-mú-ɖàɓàìn-ɖɛ̀ɔ̀ wé kpáɖá-nyɔ ɖò nyɛ̀nɛ̀ɛ̀.

¹⁷ Ḿ nyuɛ ké wɛ́ kpã̀ìn ma ɓěɛ̀ ɓáá-ɖɛ̀ séín ɓěɔ̀, ké waà mí ɓě páɖáìn ma kɔ̃in, ké sɔ̃̀ɔ̀-kpò ɓě nyìnììn ma wa dyíin, kɛɛ wɛ̃́ɛ́ kɛɛ, ɓě se ɖé ḿ gbo gmɔ̀ìn ɖe.

¹⁸ Ɓě dyéɛ kà zɛ̃̌ɛ̀ mɔ̀ dɛ̀nɛ̀ mɛ̀nɛ̌ìn-hĩinyɛ nììnɔ̀ wé kpáɖá-nyɔ sè hĩinyɛ kɛ. Ɔ mɔ̀ wé kɔ̃̀ ɓaɖa ɓɛ́ ní gbǒɔ̀ hìɖì-kpà ɖǎ dèɛ̀ hwɛ̀ kɛ. Ɓě mɛ dè ɖɛ nìà kɛ dyéɖé gbo.

¹⁹ Má, ɓáá-ɖɛ̀-dyùà ɖò se ɖé ɓěɛ̀ sáɖá ɓěɔ̀ mú nì ɖee? Ti ɓáún-ɓáún ɖǎ ziɛɛ, ɓěɛ̀ géɖéè-gbǎ ɓěɔ̀ kè ɓěɛ̀ féè-cù ɓěɔ̀ kè ɓěɛ̀ pɔ́mɛ́gàɖànɛ̀-cù ɓěɔ̀ ɔ kè ɓěɛ̀ ɔ́ɖè-cù ɓěɔ̀ séè ɓo ɖò toɖo ɖò. Kɛɛ sɔ̀ìn dà ké dyúa muɛɛ, ní muá ɓě mana kɔ̃ poùn.”

Ɖɛ Bounɓoɔ̀ ɖáìn Zɛ̀wáɖáɓèɓò nyɛ́nɛ́ín nyɛ

²⁰ Ké Bounɓoɔ̀ wùɖùìn ma Hágàì mú ɖe kpa sɔ̃́ nììn ɓó wé dyúáɖò mɔ̀à dɛ̀nɛ̀ mɛ̀nɛ̌ìn-hĩinyɛ nììnɔ̀ wé kpáɖá-nyɔ sè hĩinyɛ kɛɛ ɓaɖa, ké ɔ ɖá,

²¹ “Cɛ̃ɛ Zɛ̀wáɖáɓèɓò mɔ̀à Júɖà-ɓòɖòɔ̀ wuɖuí-kɔ̃̀-nyɔ̀ɔ̀ kɛɛ gbo kà ní mu dyɔɔ̀ kè ɓóɖó-kpàɔ̀ dyi túòùn wɛ̃.

²² Ké ní mu kã́á-zèè ɓě wáɖáùn, ké ní mu ɓóɖó-dù ɓě nììn wuɖuí-kɔ̃̀-kpè ɓěɔ̀ dyi wàìn. Ní mu hwíì-sǒ ɓě kè waà nàìn-nyɔ̀ ɓěɔ̀ ɓíɖíi dyi poùn. Sǒ ɓě kè waà kɔ̃ún-kò-nyɔ̀ ɓěɔ̀ mu waà mǔè ɖòɛ̀ gàsíà dyí mɛ́ìn.

²³ Cɛ̃ɛ ní gbo-nì-nyɔ̀ Zɛ̀wáɖáɓèɓò mɔ̀à Sɛ́àtíèɛ̀ dyú-gààɔ̀ kɛɛ gbo kà ɓó wéa ɓaɖaa, ní muɛ nyuùn ɓɛ́ ɔ ké nyɔ ɓěɔ̀ wuɖuí kɔ̃̀ ɖé ní nyɛ́nɛ́ múɛ, sepóɛɖé ḿ ɖǎ ɔ gã. Mɔ̄ Bounɓo mɔ̀ nyɔ nìà ɖɛ séín kɔ̃in nyɛɛ mɔ̀ nyɔ cɛ̃à kɛ̀.”