Gàɖézìà 6 - Ɓǎsɔ́ɔ̀ Báɓòɔ̀

Ɓě mɛ ɓéɖéìn ɓèɖèìn ɓě mǔè ɖòɛ̀ gbɛ̌

¹ Ḿ ɖíí ɓě, ɔ jǔ ké ɓě dyi nyɔ ɖò ɖɛ gbà ɖò nyuɛ dyéín, ɓě mɔ̀ nyɔ ɓéɖéà Zùùɔ̀ kɛɛ mɛ sɛ́ɖɛ́ìn ɔ dyí. Kɛɛ ɓě mɛ nyuɛ ɖéɛ hwòɖǒ-dyùà ɓɛ̀ɖɛ̀ɛ̀-ɓɛ̀ɖɛ̀ɛ̀ mú. Ɓě mɛ màìn ɓě mìɔùn jè mú, ɓɛ́ ɓě mɔ̀ùn ní kɔ̃̀ ɖà mú-dɔ̃̌-dɔ̃̌ dyé ɖekè.

² Ɓě ɓéɖéìn ɓèɖèìn ɓě mǔè ɖòɛ̀ gbɛ̌. Kǎà ɓě mu kàa Kɛ́ɖɛ́ì gmaɔ̀ dyi kpɔ̃ɔ nyuùn.

³ Ɔ jǔ ké nyɔ ɖò dyiɛ hwìɖǐi poìn kà ɖɛ ɖò nì ɔ múɛɛ, ké ɖɛ ɖò se ɔ mú nìǐn, nìí, ɔ cá ɔ mìɔùn.

⁴ Nyɔ séín mɛ dɔ̃̌ wa mìɔùn nììn nyuu-ɖɛ̀ mú. Nìí, ɖɛ kɔ̃̀ jè ɔ ɓɔ́ɖɔ́à kɛɛ mu ɔ mìɔùn nììn nyuu-ɖɛ̀ jè jǔùn, ké ɔ seɛ ɖɛ ɓɛ́ nyɔ ɖò mɔ̀ùn ɖǎ nyuɛɛ gboi kpaá mu.

⁵ Sepóɛɖé nyɔ séín ɓéɖé ɓɛ́ wa ké wa mìɔùn nììn gbɛ̌ ɓéɖé.

⁶ Nyɔ ɓɛ́ wa nìà Gèɖèpɔ́ɔ̀-wùɖùɔ̀ tɛ̀mɛ̀ìn nyɛ kè ɔ ɖɛ-tɛ̀mɛ̀ìn-nyɔ̀ɔ̀ mɛ peɖeìn ɔ ɖɛ nɔ̀mɔ̀ dyíin séín ɓěɔ̀ mú.

⁷ Ɓěǐn ɖá ɓɛ́ ɓě ké ɓě mìɔùn cá. Nyɔ ɖò ní cá Gèɖèpɔ́ɔ̀. Ɖɛ nyɔ ɓá kɛɛ, ɔ kɔ̃̀ ɓo ɔ ɖi.

⁸ Ɔ nì kà ɔ mìɔùn nììn mɔ́ɔ́-ɖɛ̀ mɔ̀ɔ̌ kà geɖeɛ. Ɔ dyi ɖé ɖɛ ɓá ní, ɖɛ ɔ mu ɔ kɔ̃ún dyéìn nyɛɛ mɔ̀ mú-gbɔɔ̀-gbɔɔ̀. Ké Zùùɔ̀ nì kà geɖe nìà kɛɛ ɖekè. Ɔ dyi ɖé ɖɛ ɓá ní, ɖɛ ɔ mu ɔ kɔ̃ún dyéìn nyɛɛ mɔ̀ sè-ná-sèɛ̀ fɛ̀ɛ̀.

⁹ Ɓěà ní ɖá ɓɛ́ ɓěà ké sa ɓó ɖɛ nɔ̀mɔ̀ dyíin nyu jè. Ɔ jǔ ké kpé se à dyí hwɛ̀ǐn, nìí, ti ɖò mu dyiìn, ɓɛ́ à ké ɖɛ ɓě à ɓáà kɛɛ ɓo ɖi.

¹⁰ Ɔ jèɛɛ, kà à mu ti dyéìn, ɓɛ́ à ké nɔ̀mɔ̀ dyíin nyuɛɛ, à mɛ nyu nyɔǔn séín bìì nɔ̀mɔ̀ dyíin. Nyɔ ɓě kɔ̃̀ bìì à mɛ nyuɛ jɛ́ɛ́ kɛɛ, ɔ mɔ̀ nyɔ ɓě ɓɛ́ à kè wa kè mɔ̀à nyɔ dyúáɖò ɖé hwìɖǐǐ-taɓa-ɖɛ̀ ɓěɔ̀ múɛ.

Náún-po-wùɖù hwɛ̀ìn-gbɔ kè cuò-wùɖù

¹¹ Ɓě dyé kà céè-dyèɖè ɓě ɓɛ́ ḿ mìɔùn nìà ɓě gbo céèɛ̌n kàǔn wɛ̃ɛ ɓúá kɔ̃in nyɛ.

¹² Nyɔ ɓě ɓɛ́ wa nìà vɔ̃uń ɓɛ́ wa kéà ɓě ganaún kpɔ̃̀ìn, ɓɛ́ wa kéà ɓě sàà ɖáɓáa, ɔ mɔ̀ nyɔ ɓě ɓɛ́ wa nyu ɖɛ ɓě, ɓɛ́ nyɔǔn-dyù ɓě ké wa dyéɛń nìǐn, ɓɛ́ wa ké ku-kɔ̃in-ɖɛ̀ ɓě jè ɓɔ́ɖɔ́ɛ. Ké wa nyuɛ ɓɛ́ nyɔǔn ní kɔ̃̀ ɖà wa Kɛ́ɖɛ́ìɛ̀ kɔ́ɖɔ́sìɔ̀ jè gǎ dyéìn.

¹³ Nyɔ ɓě ɓɛ́ wa mɔ̀ùn zià sàà ɖáɓá jè dyíɛɛ, wa mìɔùn ní kpɔ̃ gmaɔ̀ dyi. Ɖɛ kɔ̃̀ jè wa mɔ́ ɓɛ́ ɓě kéà sàà mɛ́ɛ, ɔ mɔ̀, ɓɛ́ wa ké ɓɔ́ɖɔ́ kà ɓɛ́ ɓě ɖǎ ku-kɔ̃in-ɖɛ̀ɔ̀ xwíɖíi nìɛ.

¹⁴ Kɛɛ ɔ dyi mɔ́ún jè jǔǐn, ɖɛ kɔ̃̀ jè ɓɛ́ ní mu ɓɔ́ɖɔ́ùn wɛ̃ɛ, ɔ mɔ̀ à Bounɓo Jízɛ̀ɛ̀ kɔ́ɖɔ́sìɔ̀ jè ɖòùn. Sepóɛɖé dyììn ɖé ɔ kɔ́ɖɔ́sìɔ̀ múɛɛ, ɔ nì kà ɓóɖó-kpàà mɛ́ ɖé ḿ gbo, ké mɔ́ún mɛ́ ɖé ɔ gboɛ.

¹⁵ Sàà-mɛ́-mɛ́ se ɖɛ ɖò kpa, ké se sàà mɛ́ se ɖɛ ɖò kpa. Kɛɛ ɖɛ kpa ɖɛɛ mɔ̀, ɓɛ́ nyɔǔn ké mɛɛ-ɖɛ̀ ɖìè jǔ.

¹⁶ Gìɖìǐ kè Gèɖèpɔ́ɔ̀ kpeɖeɛ̀-dyíin-nɔ̀mɔ̀-nɔ̀mɔ̀ mɛ nì nyɔ séín ɓě ɓɛ́ wa kpɔ̃ cɛ̃́ɛ́-ɖɛ̀ nìà kɛ dyi ɖé waà fɛ̀ɛ̀-wè séín múɛɛ kɔ̃. Ɔ mɛ nì wa kè Gèɖèpɔ́ɔ̀-nyɔ̀ ɓě mɔ̀à Éézùɖùɛ̀-nyɔ̀ séín ɓěɔ̀ kɛɛ kɔ̃.

¹⁷ Sɔ̀ìn dà ké dyúa muɛɛ, nyɔ ɖò ní ɖá ɓɛ́ ɔ ké ḿ fũ̀à-fṹá nyùìn, sepóɛɖé ḿ ɓéɖé Jízɛ̀ɛ̀ bɛ̃̌ ɓě ní kpóɖó-dyùàɔ̀ bũ̌in.

¹⁸ Ḿ ɖíí ɓě, à Bounɓo Jízɛ̀ Kɛ́ɖɛ́ì mana mɛ nì ɓě kɔ̃. Kǎà ɔ mɛ nì.