Gàɖézìà 4 - Ɓǎsɔ́ɔ̀ Báɓòɔ̀

¹ Ḿ ɖáo, dyúɔ̀ mu ɔ ɓǎɔ̀ ɖɛ ɓěɔ̀ kɔ̃ sèìn, ké ɔ kɔ̃̀ wa séín dyɛo, kɛɛ kà ɓɛ́ ɔ mɔ̀ dyú-gbɔ́ɔ́ keɛɛ, wa kpɔ̃ ɔ kà wa kpɔ̃à gǐìɛ.

² Kà ɓɛ́ ɔ mɔ̀à dyú-gbɔ́ɔ́ keɛɛ, nyɔ ɓěɔ̀ gmɔ̀ ɔ dyí, ké ɔ ɖɛ ɓěɔ̀ sè wa gbo tee, ɓɛ́ ti ɓɛ́ ɔ ɓǎɔ̀ ɖǎ ma gbɔ poɛɛ ké nyini.

³ Kà dyúáɖòɔ̀ kǎà à nì. Hwɛ̀ ɓɛ́ à ké ma nyɔ vɛ̀nɛ̀ jǔ cáa, à mɔ̀ ma ɖɛ ɓě ɓɛ́ wa kɔ̃̀à ɓóɖó-kpàà wuɖuíɛɛ gǐì ɓě.

⁴ Kɛɛ ti ɓɛ́ ti jɛ́ɛ́ɔ̀ nyini ma kɛɛ, Gèɖèpɔ́ɔ̀ tò ma ɔ Dyú-gààɔ̀. Màa ɖò wóɖóìn ma ɔ, ké ɔ nì ma gmaɔ̀ xwíɖíi,

⁵ ɓɛ́ ɔ ké nyɔ ɓě nì ma gmaɔ̀ xwíɖíiɛɛ gbǎà, ɓɛ́ à ké Gèɖèpɔ́ɔ̀ dyú ɓě jǔ.

⁶ Gèɖèpɔ́ɔ̀ ɖoɓo ma ɔ Dyú-gààɔ̀ Zùùɔ̀ ɖé à hwòɖǒ-dyùà mú, ɓɛ́ ɔ kéɛ nyɔǔn dyí tɛ̀mɛ̀ìn kà ɓɛ́ à mɔ̀ ɔ dyú ɓěɛ. Ɔ mɔ̀ Zùù ɓɛ́ ɔ ɖáà “Ḿ ɓǎ” kɛ.

⁷ Nìí, à se gǐì ɖe, kɛɛ à mɔ̀ǎ Gèɖèpɔ́ɔ̀ dyú. Ké kà à mɔ̀ǎ kà ɔ dyúɛɛ, ɔ muá ɖɛ séín ɓě ɓɛ́ ɔ ɓéɖé ɓó ɔ dyú ɓěɔ̀ bììɛɛ à nyíìn.

Gàɖézìà-nyɔ̀ ɓěɔ̀ jè kpɔ̃ Pɔ́ɔ̀ hwòɖǒ

⁸ Kĩ́ín-kĩ́ín nyɛɛ, ɓě se ma Gèɖèpɔ́ɔ̀ dyí dyuò. Ɔ jèɛɛ, ɓě mɔ̀ ma ɖɛ ɓě se gèɖèpɔ́ɔ̀ ɓěɛɛ gǐì ɓě.

⁹ Kɛɛ kàǔn, kà ɓɛ́ ɓě ɖǎà Gèɖèpɔ́ɔ̀ dyí dyuò wɛɛ, ḿ mɛ ɖá, kà Gèɖèpɔ́ɔ̀ ɖǎà ɓě mɔ̀ùn dyí dyuò wɛɛ, xwɛ̌ ɓě ɓɛ́ìn ɖɛ ɓě ɓɛ́ wa mɔ̀ kpéí-hwɛ̀-ɖɛ̀ nì wìì, ké wa kɔ̃̀ ma ɓě wuɖuíɛɛ gbo gmɔ̀ìn ɖeɛ́? Ɖɛ́ kɔ̃̀ jè ɓě mɔ́ ɓɛ́ ɓě kéà wa gǐì jǔ ɖeɛ́?

¹⁰ Ɓě kpɔ̃ wé ɓě kè dɛ̀nɛ̀ ɓě kè ti ɓě ɔ kè zɔ̃ ɓě dyi.

¹¹ Ɓě nyuɛ ké ḿ fɛ̃̀ìn, ti ɖòɛ̀ ɓaɖaín, kũ̀à séín ɓě ḿ nyu ma kà ɓě bììɛɛ, mɔ́ún kɔ̃̀ ɖà wa nyu pídyi.

¹² Ḿ ɖíí ɓě, ḿ ɓaà ɓě, ɓě mɛ nì kà ḿ nìà kɛ, sepóɛɖé ḿ nì kà ɓě nìà kɛ. Ɓě se ḿ ɖɛ gbà ɖò bũ̌ nyu.

¹³ Ɖɛ kɔ̃̀ jè ḿ cɛ̃ ma kà ɓě bɔ̃̌ nɔ̀mɔ̀ dyíinɔ̀ gbo kĩ́ín nyɛɛ, ɓě dyuòɛ̀ dyí. Ɔ mɔ̀, ḿ nì ma wɛ́iń jè.

¹⁴ Kà ɓɛ́ ḿ nyu ma nìɛ̀ kɛɛ, ɔ mɔ̀ ma mú-dɔ̃̌-dɔ̃̌ ɖé ɓě gbo dyɛo, kɛɛ ɓě se ma ḿ zùǔn zàìn, mɔɔ ɓě se ma ḿ ɓɔ́. Kɛɛ ɓě kpɔ̃ ma ḿ jè dyi kà ɓě kéɔ́ kà Gèɖèpɔ́ɔ̀ ínjà ɓěɔ̀ ɖò jè dyi kpɔ̃ɔ nyuɛ. Ɓě kpɔ̃ ma ḿ jè dyi kà ɓě kéɔ́ kà Kɛ́ɖɛ́ì Jízɛ̀ jè dyi kpɔ̃ɔ nyuɛ.

¹⁵ Ɓě kpá ma múàǔn, kɛɛ ɖɛ́ kpá kàǔn wɛ̃́? Ḿ ɓɛ́ìn ɓě bìì zàse nyuɛ. Ɔ mɔ̀, ɓě dyi ma ɓě mìɔùn dyéɖé dú zàà ɓɛ́ìn ní, nìí, ɓě muɛ ma náa nyuùn, ké ɓě muɛ ma ḿ nyíìn.

¹⁶ Kà ɓɛ́ ḿ ɖǎà ɓě jǎàɔ̀ gbo cɛ̃ɛ, ḿ mɔ̀ǎ ɓěɛ̀ mú-nyɛ́-nyɔ̀ kàǔne?

¹⁷ Ɓě jè kpɔ̃ nyɔ tɔ̀ɔ̀ ɓě nìà kɛ hwòɖǒ, kɛɛ ɖɛ kɔ̃̀ jè ɓě jè kpɔ̃à wa hwòɖǒɛɛ se dyíin nɔ̀mɔ̀. Wa mɔ́ ɓɛ́ wa ké ɓě ḿ gbo zà, ɓɛ́ wa jè ké ɓě hwòɖǒ kpɔ̃.

¹⁸ Ɔ nɔ̀mɔ̀ dyíin ɓɛ́ nyɔ ɖò jè ké ɓě hwòɖǒ kpɔ̃, ɔ jǔ ké ɖɛ kɔ̃̀ jè ɔ jè kpɔ̃à ɓě hwòɖǒɛɛ dyi xwíníín nɔ̀mɔ̀ dyíin ɓéɖéín. Ɖɛ nìà kɛ mɔ̀ jǎà tee. Ɔ se ɖɛ ɓɛ́ ḿ ké ɓó ɓě gbo nì hwɛ̀ɛ.

¹⁹ Ní dyú ɓě, màa ɖò dyi ɓíɖíi dyiɛń nìǐn, kà ɔ nyuà gǎ dyéɛ kɛɛ, kǎà ḿ nì ɓě mɔ̀ùn jè gǎɔ̀ ɖò dyéɛń ɖe tee ɓɛ́ Kɛ́ɖɛ́ìɛ̀ kpeɖeɔ̀ ké ɖé ɓě mú mɛ hwɛ̀.

²⁰ Nyɛ́ ɖá ḿ nìɔ̌ ɖé ɓě gbo kàǔn, ɓɛ́ ḿ ké se kà ḿ nìà wùɖùɛ̌n nyɛɛ wùɖù kɛ́? Sepóɛɖé ɓě jè kpèìn ḿ hwìɖǐi.

Hégà kè Seɖɔ́ mɔ̀ dyí-tɛ̀mɛ̀ìn-ɖɛ̀

²¹ Ɓě mɔ̀ nyɔ mɔ́ ɓɛ́ ɓě kéà gmaɔ̀ xwíɖíi nìɛɛ, ɓě se ɖɛ gmaɔ̀ cɛ̃ɛ wɔ̃́ɔ̀? Ɓě cɛ̃ɛ ḿ gbo.

²² Ɔ céè ɖé gmaɔ̀ mú kà ɓɛ́ Ééɓòɖòhɛ̃́ɛ̀ ɓéɖé ma dyú sɔ̃́ɛ. Ɔ kè gǐì-mààɔ̀ wóɖóìn dyúáɖò, ké ɔ kè màa se gǐìɛɛ wóɖóìn ma dyúɔ̀ tɔ̀ɔ̀.

²³ Dyú ɓɛ́ ɔ kè gǐì-mààɔ̀ wóɖóìn ma kà kɛɛ wóɖó ma kà nyɔ tɔ̀ɔ̀ ɓě wóɖóà kɛ. Kɛɛ dyú ɓɛ́ ɔ kè màa seà gǐìɛɛ wóɖóìn ma kà kɛɛ wóɖó ma dyììn ɖé Gèɖèpɔ́ɔ̀ nyɛ́nɛ́ín-ɖáìn-ɖɛ̀ɔ̀ mú.

²⁴ Ɖɛ nìà kɛ mɔ̀ dyí-tɛ̀mɛ̀ìn-ɖɛ̀. Màa sɔ̃́ ɓě nìà kɛ mɔ̀ dèè-wùɖù-dù sɔ̃́. Dyúáɖò sɔ̀ Sányà-tòɖòɔ̀ dya. Dyú ɓě ɓɛ́ ɔ wóɖóìn nyɛɛ mɔ̀ gǐì. Nyɔ nìà kɛ mɔ̀ Hégà.

²⁵ Hégà mɔ̀ ma Sányà-tòɖò nìà ɖé Àwéɖéɓìà-ɓòɖòɔ̀ kɔ̃ɛɛ hwɔìn-ɖɛ̀. Ké ɔ mɔ̀ Jùɖúsɛ̀ɖɛ̀ìn-hwɔ̀ɖɔ̀ nìà kàǔn wɛ̃ɛ dyí-tɛ̀mɛ̀ìn-ɖɛ̀, sepóɛɖé Jùɖúsɛ̀ɖɛ̀ìn-hwɔ̀ɖɔ̀ɔ̀ nì gǐì-kũ̀àǔn, ké nyɔ ɓě nì ɔ múɛɛ mɔ̀ gǐì ɓě.

²⁶ Kɛɛ Jùɖúsɛ̀ɖɛ̀ìn-hwɔ̀ɖɔ̀ nìà ɖé dyiíɛɛ se gǐì-kũ̀àǔn nì. Ɔ hwɔìn kà ɔ mɔ̀ɔ̌ kà à ɖeɛ.

²⁷ Sepóɛɖé Gèɖèpɔ́ɔ̀-cèè-ɖɛ̀ɔ̀ ɖá, “Mɔ̀ hwɔìn kà ɖàà-màà kɛɛ, nyu múà-kùɖǔ-kuɖu. Mɔ̀ mɔ̀ nyɔ ɓɛ́ m̀ séè kà póó-gbò ɖeín nì ɖòɛɛ, kpá múàǔn, ɓɛ́ m̀ ké mú páná. Sepóɛɖé mɔ̀ mɔ̀ nyɔ seà dyú ɖò ɓéɖéɛɛ, nì dyú mu dyí vòùn, ɓɛ́ ɔ ké màa tɔ̀ɔ̀ ɓě dyí zi.”

²⁸ Ké ɓě mɔ̀à ḿ ɖíí ɓěɛɛ, ɓě mɔ̀ Gèɖèpɔ́ɔ̀ dyú ɓě dyììn ɖé ɔ nyɛ́nɛ́ín-ɖáìn-ɖɛ̀ɔ̀ mú kà Áázè nì ma kà kɛ.

²⁹ Ké ɓó tia ɓaɖaa, dyúɔ̀ nyɔ wóɖóà kà nyɔ tɔ̀ɔ̀ ɓě wóɖóà kɛɛ dyéìn ma nyɔ ɓɛ́ Zùùɔ̀ nyuɛ ké ɔ wóɖó ma kɛɛ gǎ. Ké kǎà ɔ nì ke kàǔn.

³⁰ Kɛɛ ɖɛ́ Gèɖèpɔ́ɔ̀-cèè-ɖɛ̀ɔ̀ cɛ̃ɛ́? Ɔ ɖá, “Kúmú gǐì-màà nìà kɛ kè ɔ dyúɔ̀, sepóɛɖé gǐì-mààɔ̀ dyúɔ̀ kè màa seà gǐìɛɛ dyúɔ̀ se dúí-sè-ɖɛ̀ɔ̀ mú peɖeɛ̌n mu.”

³¹ Ɔ jèɛɛ, ḿ ɖíí ɓě, à se gǐì-màà dyú, kɛɛ à mɔ̀ǎ màa se gǐìɛɛ dyú ɓě.