Gàɖézìà 3 - Ɓǎsɔ́ɔ̀ Báɓòɔ̀

Gmaɔ̀ mɔɔ hwìɖǐǐ-taɓa-taɓa

¹ Gàɖézìà-nyɔ̀ ɓě, ɓě zuɖuín. Ɓě mɔ̀ nyɔ ɓɛ́ wa tɛ̀mɛ̀ìn ma kà Jízɛ̀ Kɛ́ɖɛ́ì kɔ́ɖɔ́sìɔ̀ kɔ̃ mɛ́ jè dyí jɛ́ɛ́ kɛɛ, nyɛ́ taɓa ɓě hweɛ́?

² Ɓě mɛ cɛ̃ ḿ ɖɛ dyúáɖò nìà kɛ gbo. Gmaɔ̀ dyi-kpɔ̃-kpɔ̃ɔ̀ nyuɛ ké ɓě ɓéɖé ma Gèɖèpɔ́ɔ̀ Zùùɔ̀, mɔɔ ɔ mɔ̀ ma bɔ̃̌ nɔ̀mɔ̀ dyíinɔ̀ wɔ̃́-wɔ̃́ kè ɔ hwìɖǐǐ-taɓa-taɓaɔ̀ɔ̀?

³ Xwɛ̌ ɓě ɓɛ́ìn kà zuɖuɛ nyuɛ cáá? Ɓě dè ma ɖɛɔ̀ nyuɛ gbɔ ɖé Gèɖèpɔ́ɔ̀ Zùùɔ̀ mú. Kɛɛ kàǔn wɛ̃ɛ, ɓě mɔ́ ɓɛ́ ɓě mìɔùn nììn nyuu-ɖɛ̀ kéá ɔ dúí jaɖaà?

⁴ Ɖɛ séín ɓě ɓɛ́ ɓě ɖǎ mú mùìn nyɛɛ, ɔ mɔ̀ pídyiì? Ɔ mɔ̀ pídyi cáà?

⁵ Ti ɓɛ́ Gèɖèpɔ́ɔ̀ nyí ɓě Zùùɔ̀, ké ɔ nyu zɛ̃̀ìn-ɖɛ̀ ɖé ɓě hwìɛ̀ kɛɛ, ɔ nyuɛ, sepóɛɖé ɓě kpɔ̃ gmaɔ̀ dyi jèè, mɔɔ ɓě wɔ̃́ bɔ̃̌ nɔ̀mɔ̀ dyíinɔ̀, ké ɓě taɓa ɔ hwìɖǐǐ jèè?

⁶ Kǎà Ééɓòɖòhɛ̃́ɛ̀ nyuɛ ma. Gèɖèpɔ́ɔ̀-cèè-ɖɛ̀ɔ̀ ɖá, “Ɔ taɓa ma Gèɖèpɔ́ɔ̀ hwìɖǐǐ, ké Gèɖèpɔ́ɔ̀ ɖáìn ma ɔ dyí-sɛ́ɖɛ́ìn-nyɔ̀ dyììn ɖé ɔ hwìɖǐǐ-taɓa-taɓaɔ̀ mú.”

⁷ Ɔ jèɛɛ, ɓě mɛ dyéɛ kà nyɔ ɓě ɓéɖé hwìɖǐǐ-taɓa-taɓa kɛɛ, wa mɔ̀ nyɔ ɓě mɔ̀à Ééɓòɖòhɛ̃́ɛ̀ nyúà-dyú ɓěɔ̀ kɛ̀.

⁸ Gèɖèpɔ́ɔ̀-cèè-ɖɛ̀ céè-nyɔ̀ ɓěɔ̀ dyéɛ zɔ̃̌ɔ̀ kĩ́ín kà ɓɛ́ Gèɖèpɔ́ɔ̀ muɛ ma nyuùn, ɓɛ́ ɓóɖó-dù kà kò ɖò ɓěɛ̀ nyɔ ɓěɔ̀ ké ma dyí sɛ́ɖɛ́ìn ɖé ɔ dyéɖéín, dyììn ɖé hwìɖǐǐ-taɓa-taɓa múɛ. Ɔ jèɛɛ, Gèɖèpɔ́ɔ̀-cèè-ɖɛ̀ɔ̀ cɛ̃ zɔ̃̌ɔ̀ Ééɓòɖòhɛ̃́ɛ̀ bɔ̃̌ nɔ̀mɔ̀ dyíinɔ̀ gbo kĩ́ín. Ɔ cɛ̃ɛ zɔ̃̌ɔ̀, ké ɔ ɖá, “Dyììn ɖé m̀ múɛɛ, Gèɖèpɔ́ɔ̀ mu ɓóɖó-dù séín mana kɔ̃ poùn.”

⁹ Ééɓòɖòhɛ̃́ɛ̀ taɓa ma ɔ hwìɖǐǐ, ké ɔ dyé mana. Ɔ jèɛɛ, nyɔ séín ɓě ɓéɖé hwìɖǐǐ-taɓa-taɓaa dyé mana kà ɔ mɔ̀ùn dyéɛ ma kà kɛ.

¹⁰ Nyɔ ɓě ɓɛ́ wa dèà gmaɔ̀ dyi-kpɔ̃-kpɔ̃ɔ̀ hwòɖǒ kɔ̃ kɛɛ, hwòɛ̌-wùɖù nì wa kɔ̃, sepóɛɖé Gèɖèpɔ́ɔ̀-cèè-ɖɛ̀ɔ̀ ɖá, “Hwòɛ̌-wùɖù mu nyɔ séín ɓě ɓɛ́ wa se Gèɖèpɔ́ɔ̀ gma ɓěɔ̀ dyi kpɔ̃ɔ́ muɛɛ kɔ̃ nììn.”

¹¹ Ɔ nì wáɖáá cá kà ɓɛ́ nyɔ ɖò se dyí sɛ́ɖɛ́ìn ɖé Gèɖèpɔ́ɔ̀ dyéɖéín dyììn ɖé gmaɔ̀ múɛ, sepóɛɖé Gèɖèpɔ́ɔ̀-cèè-ɖɛ̀ɔ̀ ɖá, “Nyɔ ɓě sɛ́ɖɛ́ìn dyíɛɛ mu cĩ́ìn dyììn ɖé hwìɖǐǐ-taɓa-taɓa mú.”

¹² Kɛɛ gmaɔ̀ se hwìɖǐǐ-taɓa-taɓa dyí ɓá, sepóɛɖé Gèɖèpɔ́ɔ̀-cèè-ɖɛ̀ɔ̀ ɖá, “Nyɔ ɓě ɓɛ́ wa kpɔ̃ gma ɓěɔ̀ dyiɛɛ mu cĩ́ìn dyììn ɖé wa mú.”

¹³ Kɛ́ɖɛ́ì ɖǎ à gboò-wùɖù ɓɛ́ gmaɔ̀ dyà kɛɛ xwaún gbǎà, sepóɛɖé ɔ mɔ̀ ma nyɔ ɓɛ́ gboò-wùɖù nì ma kɔ̃ ɓó à bììɛ. Kà Gèɖèpɔ́ɔ̀-cèè-ɖɛ̀ɔ̀ nyuɛ cɛ̃ɛ kɛɛ, ɔ kɛ̀. Ɔ ɖá, “Gèɖèpɔ́ɔ̀ gboò-wùɖù nì xwɛ́ séín ɓě beè kà ɓó cu dyaiɛɛ kɔ̃.”

¹⁴ Kɛ́ɖɛ́ì nyuɛ ma náa, ɓɛ́ mana ɓɛ́ Gèɖèpɔ́ɔ̀ ɖáìn ma kà Ééɓòɖòhɛ̃́ɛ̀ nyɛ́nɛ́ín nyɛɛ ké ɓóɖó-dù kà kò ɖò ɓěɛ̀ nyɔ ɓěɔ̀ kɔ̃̀ɔ̀-ɖɛ̀ jǔ dyììn ɖé Kɛ́ɖɛ́ì Jízɛ̀ mú, ɓɛ́ à mɔ̀ùn ké Zùù ɓɛ́ Gèɖèpɔ́ɔ̀ ɖáìn ma à nyɛ́nɛ́ín nyɛɛ ɓéɖé dyììn ɖé hwìɖǐǐ-taɓa-taɓa mú.

Gmaɔ̀ kè nyɛ́nɛ́ín-ɖáìn-ɖɛ̀ɔ̀

¹⁵ Ḿ ɖíí ɓě, ní mu m̀ nyɔǔn-dyùɛ̀ dyí-tɛ̀mɛ̀ìn-ɖɛ̀ ɖò nyíìn. Ɔ jǔ ké nyɔ sɔ̃́ dyi wuɖu dè, ké wa dyiɛ ɓíɖíi céè, ké wa dyi ɓó waà nyɛ́nɛ́ poín, nyɔ ɖò seɛ nyuɛ ɓɛ́ìn ɓɛ́ ɔ ké ɖɛ fóɖóún jǔ, mɔɔ nyɔ ɖò se ɓó ɖɛ ɖò kɔ̃in poɛ ɓɛ́ìn.

¹⁶ Gèɖèpɔ́ɔ̀ ɖáìn ma Ééɓòɖòhɛ̃́ɛ̀ kè ɔ nyúà-dyúɔ̀ ɖɛ ɓěɔ̀ nyɛ́nɛ́ín. Ɔ seɛ cɛ̃, ɓɛ́ ɔ ké níiń, “Ɔ kè ɔ nyúà-dyú ɓěɔ̀,” ɓɛ́ ɔ xwíníín mɔ̀à nyɔ pàɖǎ kɛ. Kɛɛ ɔ ɖá, “Ɔ kè nì nyúà-dyú,” ɓɛ́ ɔ xwíníín mɔ̀à nyɔ dyúáɖò ɓɛ́ ɔ mɔ̀à Kɛ́ɖɛ́ì ɖòùn wɛ̃.

¹⁷ Ɖɛ ḿ nìà cɛ̃iń nyɛɛ, ɔ kɛ̀. Gèɖèpɔ́ɔ̀ nyu ma dèè-wùɖù ɖò, ké ɔ cɛ̃ɛ kà ɔ muɛ dyi kpɔ̃ùn wɛ̃. Gma ɓɛ́ ɔ dyi ma kà ti ɓɛ́ zɔ̃ hɔ̃dɛ̀ɖɛ̀ hĩinyɛ kè kpáɖá-nyɔ ɓaɖa-bùè ɖǎ ma ziɛɛ, ɔ seɛ nyuɛ ɓɛ́ìn ɓɛ́ dèè-wùɖù nì ma kà kɛɛ ké ɖɛ fóɖóún jǔ, ɓɛ́ ɔ kéɛ nyu ɓɛ́ ɖɛ ɖò ké se nyɛ́nɛ́ín-ɖáìn-ɖɛ̀ɔ̀ mú nì ɖe.

¹⁸ Sepóɛɖé ɔ jǔ ké ɖɛ ɓɛ́ Gèɖèpɔ́ɔ̀ tòà kɛɛ dyi gmaɔ̀ mú dyììn ní, nìí, ɔ se ɔ nyɛ́nɛ́ín-ɖáìn-ɖɛ̀ɔ̀ mú dyììn ɖe. Kɛɛ Gèɖèpɔ́ɔ̀ nyíɛ ma Ééɓòɖòhɛ̃́ɛ̀, sepóɛɖé ɔ ɖáìn zɔ̃̌ɔ̀ ɔ nyɛ́nɛ́ín.

¹⁹ Ɖɛ́ kɔ̃̀ jè gmaɔ̀ nìà kɛ́? Gèɖèpɔ́ɔ̀ tòɛ̀ ma, ɓɛ́ ɔ ké ɖɛ ɓɛ́ ɖɛ-gbà-nyu-nyu jǔɛɛ nyɔǔn dyí tɛ̀mɛ̀ìn, ɓɛ́ ɔ ké nì ɓɛ́ Ééɓòɖòhɛ̃́ɛ̀ nyúà-dyú ɓɛ́ Gèɖèpɔ́ɔ̀ ɖáìn ma kà ɖɛɔ̀ nyɛ́nɛ́ín nyɛɛ ké ma dyi hwɛ̀. Ínjà ɓěɔ̀ mɔ̀ nyɔ zàìn ma gmaɔ̀ nyɔǔn-dyù xwáɖáún dyììn ɖé nyɔ mɔ̀ ma kà nyɔ-dù sɔ̃́ ɓěɔ̀ bìì mú-zĩìn-nyɔ̀ kɛɛ mú.

²⁰ Kɛɛ wa se nyɔ mɔ̀à nyɔ sɔ̃́ ɓěɔ̀ bìì mú-zĩìn-nyɔ̀ kɛɛ mɔ́, ɔ jǔ ké nyɔ ɓě kɔ̃̀ bìì ɔ kéɔ́ kà mú zĩìn nyɛɛ dyi dyúáɖò nìǐn. Ké Gèɖèpɔ́ɔ̀ nì dyúáɖò.

Ɖɛ kɔ̃̀ jè Gèɖèpɔ́ɔ̀ tòà gmaɔ̀ kɛ

²¹ Nìí, ɖɛ nìà kɛ xwíníín mɔ̀, gmaɔ̀ nì Gèɖèpɔ́ɔ̀ nyɛ́nɛ́ín-ɖáìn-ɖɛ̀ ɓěɔ̀ gbo vɔ̃uńe? Hée, ɔ se ná nì fɔɔ. Sepóɛɖé ɔ jǔ ké Gèɖèpɔ́ɔ̀ dyi ma gma ɖò ɓɛ́ ɔ ɓɛ́ìn nyɔǔn fɛ̀ɛ̀ nyíɛ kɛɛ tòǐn, nìí, nyɔǔn-dyù ɓɛ́ìnɔ̌ dyí sɛ́ɖɛ́ìn ɖé Gèɖèpɔ́ɔ̀ gbo, dyììn ɖé gmaɔ̀ mú.

²² Kɛɛ Gèɖèpɔ́ɔ̀-cèè-ɖɛ̀ɔ̀ ɖǎa cɛ̃ kà ɓɛ́ ɓóɖó-kpà gàná nìà kɛ nì nàmàǔn kpé xwíɖíiɛ, ɓɛ́ nyɔ ɓě ɓɛ́ wa ɓéɖéà hwìɖǐǐ-taɓa-taɓa kɛɛ ké ɖɛ Gèɖèpɔ́ɔ̀ ɖáìn ma kà nyɔǔn nyɛ́nɛ́ín, ɓɛ́ ɔ nyí nyɔǔn ɓó wa Jízɛ̀ Kɛ́ɖɛ́ì hwìɖǐǐ taɓa jèɛɛ dyé.

²³ Hwɛ̀ ɓɛ́ hwìɖǐǐ-taɓa-taɓa nìà kɛ ké ma dyiɛɛ, à nì ma kà kpɔɖɔ-ɖeín-nì-nyɔ̀ ɓě nìà kɛ, ké gmaɔ̀ mɔ̀ ma à dyí-gmɔ̀-nyɔ̀ tee, ɓɛ́ hwìɖǐǐ-taɓa-taɓa nìà kɛ ké xwáɖáún wóɖó hwɛ̀.

²⁴ Ɔ jèɛɛ, gmaɔ̀ gmɔ̀ ma à dyí, ɓɛ́ ɔ ké à dyi-kpɔ̃-nyɔ̀ jǔ tee, ɓɛ́ Kɛ́ɖɛ́ì ké ma dyi hwɛ̀, ɓɛ́ dyììn ɖé hwìɖǐǐ-taɓa-taɓa múɛɛ, à ké dyí sɛ́ɖɛ́ìn ɖé Gèɖèpɔ́ɔ̀ dyéɖéín.

²⁵ Kɛɛ kàǔn wɛ̃ɛ, kà hwìɖǐǐ-taɓa-taɓa nìà kɛ ɖǎà dyiɛɛ, à dyi-kpɔ̃-nyɔ̀ɔ̀ ní gmɔ̀ à dyí ɖe.

²⁶ Sepóɛɖé dyììn ɖé hwìɖǐǐ-taɓa-taɓa múɛɛ, ɓě séín mɔ̀ǎ Gèɖèpɔ́ɔ̀ dyú ɓě ɖé Kɛ́ɖɛ́ì Jízɛ̀ mú.

²⁷ Sepóɛɖé nyɔ séín ɓɛ́ wa ɖǎ níɔ kpá, ké ɔ nyuɛ ké wa kè Kɛ́ɖɛ́ì ɖǎ nyɔ dyúáɖò jǔɛɛ, ɔ nì kà Kɛ́ɖɛ́ì mɔ̀ɔ̌ kà ɖɔ, ké wa ɖǎɔ̌ kà ɔ mú poɛ.

²⁸ Ɔ jèɛɛ, gbo-zaìn-zaìn ɖò se ɓó Júù-nyɔ̀ kè ɓóɖó-dù kà kò ɖò ɓěɛ̀ nyɔ ɔ kè gǐì kè nyɔ se gǐìɛ ɔ kè gàa kè màa pṹa nì. Ɓě séín mɔ̀ǎ nyɔ dyúáɖò ɖé Kɛ́ɖɛ́ì Jízɛ̀ mú.

²⁹ Kɛɛ ɔ jǔ ké Kɛ́ɖɛ́ì dyi ɓě kɔ̃̀ǐn, nìí, ɓě mɔ̀ǎ Ééɓòɖòhɛ̃́ɛ̀ nyúà-dyú ɓěɔ̀, ké ɓě mu ɖɛ Gèɖèpɔ́ɔ̀ ɖáìn nyɔǔn nyɛ́nɛ́ín nyɛɛ kɔ̃̀ùn.