Ɛ́zùɖùà 9 - Ɓǎsɔ́ɔ̀ Báɓòɔ̀

Ɛ́zùɖùà wɔ̃́ɔ kà Éézùɖùɛ̀-nyɔ̀ ɓěɔ̀ kè nyɔ ɓě ɓɛ́ wa se Éézùɖùɛ̀-nyɔ̀ kɛɛ kpɔ̃ìn kpɔ̃̀ìn dyiɛ

¹ “Sɔ̀ìn ɓó ɖɛ ɓěɛ̀ gboɛɛ, Éézùɖùɛ̀-nyɔ̀ ɓěɔ̀ nyɔ vɛ̀nɛ̀ ɖíɛ́ ɓě dyi ma ḿ gbo, ké wa cɛ̃ɛ ma ḿ gbo, ké wa ɖá, ‘Sáa-zà-nyɔ̀ ɓěɔ̀ kè Ɖíìváà-nyɔ̀ ɓěɔ̀ ɔ kè nyɔ tɔ̀ɔ̀ ɓěɔ̀ nì kpeɖe nyàìn Gèɖèpɔ́ɔ̀ dyi, ɓɛ́ ɓóɖó-dù kà kò ɖò ɓě nìà ɓó wa ɖeiɛɛ nìà nyuɛń nyɛɛ nyuɛń ɖekè. Ɓóɖó ɓěɔ̀ mɔ̀ Kénà-ɓòɖòɔ̀ kè Hítì-ɓòɖòɔ̀ kè Pɛ́wìɖì-ɓòɖòɔ̀ kè Jɛ́ɓù-ɓòɖòɔ̀ kè Ámànà-ɓòɖòɔ̀ kè Móà-ɓòɖòɔ̀ kè Íjè-ɓòɖòɔ̀ ɔ kè Ámɔ̀-ɓòɖòɔ̀.

² Wa ɖǎ ɓóɖó-dù kà kò ɖò ɓěɔ̀ dyú-màà ɓě dyi kpɔ̃, ɓɛ́ màa-dyù ɓěɔ̀ ké wa kè waà dyú-gàà ɓěɛ̀ gmàà ɓě jǔ. Ɖɛ nìà kɛ nyuɛ ké nyɔ hwɛ̀ǐn-hwɛ̀ǐn ɓěɔ̀ kè ɓóɖó ɓěɔ̀ nyɔ ɓěɔ̀ ɖǎ caìn. Nyɔ ɓěɔ̀ wuɖuí-kɔ̃̀-nyɔ̀ ɓěɔ̀ kè nyɔ vɛ̀nɛ̀ ɓěɔ̀ mɔ̀ nyɔ zi ɖɛ gbà nìà kɛ wàǐ.’

³ Ti ɓɛ́ ḿ wɔ̃́ ma ɖɛa kɛɛ, ḿ fáìn ma ḿ mìɔùn ɖɔún dyi, ké ḿ nì ma ḿ mìɔùn mí dúi kpã́uń, ké ḿ nì ma ḿ mìɔùn vɛ̃̌ wĩin kpã́uń ɖekè, ké ḿ kò ma dyi ɖé hwòɖǒɛ̀-ɖé-ɖei-kpá-kpá mú.

⁴ Púɛɛ, nyɔ séín ɓě dyé ma Éézùɖùɛ̀ Gèɖèpɔ́ɔ̀ wuɖuɔ̀ kpéín nyɛɛ poìn ma ɓó ḿ ɖei dyí, sepóɛɖé nyɔ ɓě sɔ̀à to-xwàɖàǔn wɛ̃ɛ ɖǎ ma Gèɖèpɔ́ɔ̀ wuɖuɔ̀ mú jaɖa jè. Ní hwòɖǒɔ̀ zi ma ɖé ɖei kpáuń mìɔ jèɛɛ, ḿ kò ma ɓó dyi tee, ké ɔ dyɛ̀ìn ma hwìo-sàǎ-zà-tìɔ̀.

⁵ “Ti ɓɛ́ hwìo-sàǎ-zà-tìɔ̀ ɖǎ ma ɓó nyiniɛɛ, ḿ sɔ̀ ma ɓó dɛ̀ ḿ hwèɖè ma kà wɔ̃ kɔ̃ɛɛ dyí, ké ní ɖɔ fá-fáɔ̀ nì ma ḿ mú. Ké ḿ taɓa ma kɔ́-dù hwuɖu, ké ḿ gba ma sɔ̃ xwáɖáí ɖé Bounɓo mɔ̀à ní Gèɖèpɔ́ɔ̀ kɛɛ gbo.

⁶ Ké ḿ ɖá, ‘Óó ní Gèɖèpɔ́ɔ̀, dɛ̃ nyu ḿ mìɔ, ké ḿ se dyéɖé dyií ɖúɛ ɓɛ́ìn, ɓɛ́ ḿ ké ɖé m̀ gbo gmɔ̀, sepóɛɖé à nàmàǔn ɓěɔ̀ ɖǎ à dya zi. Ké zaa wáɖá à dúún wɛ̃ɛ dyiɔ́ ɖɛ kéɔ́ dyí gbǒìn nyɛɛ jǔ ní, ɔ kòòɔ̀ muɔ́ ɖé dyɔún nyiniìn.

⁷ Sɔ̀ìn ɖé à ɓǎ ɓě nììn tiín ké zɛ̃̌ɛ̀ dyɛ̀ìn nyɛɛ, zaa ɖǎ à dúún wáɖá kánáá pū. Ké ɓó à nyuu-ɖɛ̀ gbà ɓěɔ̀ jèɛɛ, à kè à kã́á ɓěɔ̀ kè à sáa-zà-nyɔ̀ ɓěɔ̀ ɖǎ ɓóɖó-dù kà kò ɖò ɓěɛ̀ kã́á ɓě xwaún dyi kpá. À ɖǎ gàsíà dyúa dyi kpá. À ɖǎ gǐì jǔ ɖé ɓóɖó-dù kà kò ɖò ɓě kɔ̃. Wa ɖǎ à hwu. Ɓó ɖɛ ɓěɛ̀ jèɛɛ, dɛ̃ ɖǎ à nyuɛń zi mìɔ kà ɔ nyuà nìɛ̀ ɓó zɛ̃̌ɛ̀ kɛ.

⁸ Kɛɛ mɔ̀ Bounɓo mɔ̀à à Gèɖèpɔ́ɔ̀ kɛɛ, m̀ ɖǎ à wìǐn dyé ɖɛ wè, nìí ɓɛ́ à nyɔ xwéɖé wè ké ɓíɖíi sè, ɓɛ́ à ké gìɖìǐ mú cĩ́ nɔ̄ nì pá hwɛ̀ǐn-hwɛ̀ǐnɔ̀ mú. À mɔ̀ gǐì ke dyɛo, ɓɔ̌ɔ̀, kɛɛ m̀ ɖǎ à fɛ̀ɛ̀ ɖìè nyí ɖé à gǐì-jǔ-jǔɔ̀ mú.

⁹ À mɔ̀ gǐì ɓě, kɛɛ mɔ̀ mɔ̀à à Gèɖèpɔ́ɔ̀ kɛɛ, m̀ se à kɔ̃ín pòìn. Kɛɛ m̀ ɖǎ nì ɖɛ̀ɓɛ̀ǐn-ɖɛ̀ɓɛ̀ǐn se-sèìn-naín-kɔ̃̀ɔ̀ à dyí tɛ̀mɛ̀ìn ɓó Pɔ́sìà-kã̀ǎ ɓěɔ̀ dyúa, ɓɛ́ wa ké à wuɖu kɔ̃ zà, ɓɛ́ à ké mɔ̀ mɔ̀à à Gèɖèpɔ́ɔ̀ kɛɛ gbǒɔ̀ xwa nɔ̀mɔ̀ìn ɖe, ɓɛ́ m̀ ké à dyí gmɔ̀ nɔ̄ Júɖà-ɓòɖòɛ̀ kɔ̃ kè nɔ̄ Jùɖúsɛ̀ɖɛ̀ìn-hwɔ̀ɖɔ̀ɛ̀ mú. M̀ ɖǎ à fɛ̀ɛ̀ ɖìè nyí.

¹⁰ “ ‘À Gèɖèpɔ́ɔ̀, m̀ ɖǎ à nɔ̀mɔ̀ dyíin dyí nyu. Kɛɛ ɓó kàǔn wɛ̃ɛ, à ɖǎ nì gma ɓěɔ̀ dyi pɛ̃́ìn ɖe. Xwɛ̌ à mɛ ɖá kɛ́?

¹¹ Wa mɔ̀ gma ɓě ɓɛ́ m̀ tòìn zɔ̃̌ɔ̀ kà nì kpáá-ɖɛ̀-cɛ̃-nyɔ̀ ɓěɔ̀ múɛ. M̀ cɛ̃ɛ zɔ̃̌ɔ̀, ké m̀ ɖá, “Ɓóɖó ɓě nìà kɔ̃ muɛń ɓɛ́ ɓě kéà dyí ɖúɛɛ mɔ̀ ɓóɖó kɔ̃̀ kɔ̃ ɓɛ́ nyɔ ɓě nì ɖéɛɛ ɖɛ-gbà-nyu-nyu dyíìn dyiɛ. Waà Gèɖèpɔ́ɔ̀ dyi-nyàìn-ɖɛ̀ ɓěɔ̀ nyuɛ ké ɓóɖóɔ̀ se mú hwɛ̀.

¹² Ɔ ná nì jèɛɛ, ɓěǐn ɖá ɓɛ́ ɓě ké ɓěɛ̀ dyú-màà ɓěɔ̀ ɖò dyia dè ɖé wa gbo, mɔɔ ɓěǐn ɖá ɓɛ́ ɓě ké waà dyú-màà ɓěɔ̀ ɖò bùǐ po ɓó ɓěɛ̀ dyú-gàà ɓěɔ̀ bìì. Ɓěǐn ɖá ɓɛ́ ɓě ké wa gbo kpá ɓó waà gìɖìǐ ɓéɖé jè, mɔɔ ɓó waà sɔ̃ún zaìn jè. Ɓě dyi gma nìà kɛ dyi kpɔ̃ ní, ɓě mu gana ɓéɖéìn kánáá pū, ké ɓě mu ɓóɖóɔ̀ ɖɛín-ɖɛ̀ ɓěɔ̀ ɖiìn, ké ɔ mu ɓěɛ̀ dyú ɓěɔ̀ sèìn-sèìn-ɖɛ̀ jǔùn kánáá pū.”

¹³ À Gèɖèpɔ́ɔ̀, ɖɛ jĩ̀ kàà ɖǎ à kɔ̃ dyi ɓó ɖɛ gbà ɓě ɓɛ́ à nyuɛɛ jè, ké zaa wáɖá à dúún, kɛɛ ɔ se gǎ jĩ̀ kà ɓɛ́ m̀ kɔ̃̀ ɓɛ́ m̀ kéɔ́ à kɔ̃ tòɛɛ dyɛ mɔ̀ùn, ké m̀ nyuɛ ké à nyɔ xwéɖé wèɛ̀ ɖǎ ɓíɖíi sè.

¹⁴ Kà ɔ nìà náa, ɓɔ̌ɔ̀, à ɓéɖé à kéɔ́ nì gmaɔ̀ wáɖá ɖe, ɓɛ́ à kè nyɔ ɓě ɓɛ́ wa nyuà ɖɛ ɓě ɓɛ́ wa nyàìn m̀ dyiɛɛ kéɔ́ dyi kpɔ̃ìne? Má, ɔ dyi ná nìǐn, nì mu à dyoɖoún kpáìn, ɓɛ́ m̀ ké à mú gbɔɔ̀ hwɔe? Má, m̀ dyiɛ náa nyuín, à ɖò seɛ xwaún póɛ mu, ké à nyɔ xwéɖé ɖò se ɓíɖíi sèɛ̌ mue?

¹⁵ Óó Bounɓo, mɔ̀ mɔ̀à Éézùɖùɛ̀ Gèɖèpɔ́ɔ̀ kɛɛ, mɔ̀ mɔ̀ kpeɖeɛ̀-dyíin-nɔ̀mɔ̀-nyɔ̀, sepóɛɖé m̀ sè à nyɔ xwéɖé wè ɓíɖíi kà ɔ nyuà nìɛ̀ ɓó zɛ̃̌ɛ̀ kɛ. Dyéɛ kà à nì ɓó m̀ dyúa ɖé à zaa-dúún-wáɖá-wáɖáɔ̀ múɛ. Ɓó ɖɛa jèɛɛ, à ɖò se ɓó m̀ dyúa dyi nyànàà ɓɛ́ìn.’ ”