Ɛ́zùɖùà 8 - Ɓǎsɔ́ɔ̀ Báɓòɔ̀

Nyɔ ɓě ɓɛ́ wa sɔ̀ ma kà to-xwàɖàǔn wɛ̃ɛ kɛà kɛ̀

¹ Gbǒ-xwíníín-dù ɖò-ɖò ɓěɔ̀ ɓǎ ɓě ɓɛ́ wa sɔ̀ ma kà to-xwàɖàǔn ɖé Báɓèɖɔ́ùn-ɓòɖòɔ̀ kɔ̃ɛɛ, waà nyɔ ɓě ɓɛ́ wa kè Ɛ́zùɖùà kɔ́ìn ma ɖe, ɓɛ́ wa dyi ma kà ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú ɖe mu ɓó Àtàzɛ́sì nììn ɓóɖó-wuɖuí-kɔ̃̀-tìɔ̀ múɛɛ kɛà kɛ̀.

^2-3 Ɖé Fíníhà nììn xwíníín-dyù ɓěɔ̀ hwìɛ̀ kɛɛ, Gésɔ̃̀ sɔ̀ ɖé. Ɖé Ìfámà nììn xwíníín-dyù ɓěɔ̀ hwìɛ̀ kɛɛ, Dànyá sɔ̀ ɖé. Ɖé Dèɓé nììn xwíníín-dyù ɓěɔ̀ hwìɛ̀ kɛɛ, Hátù ɓɛ́ ɔ mɔ̀ Sɛ́kàníàà dyú-gàà kɛɛ sɔ̀ ɖé. Ɖé Páwòɖò nììn xwíníín-dyù ɓěɔ̀ hwìɛ̀ kɛɛ, Zɛ́kɔ̀wáɖádyà sɔ̀ ɖé. Ɔ kè gàa hɔ̃dɛ̀ɖɛ̀ ɖò kè kpáɖá-nyɔ sɔ̃́ ɓaɖa-bùè ɓɛ́ wa sɔ̀ ɖé ɔ nììn gbǒ-xwíníínɔ̀ múɛɛ, waà gbǒ-xwíníínɔ̀ deìn dúún ɓěɔ̀ nyɛ́nɛ́ céè ma céè-ɖɛ̀ ɖò mú.

⁴ Ɛ́ɖìɛ̀hòénàì ɓɛ́ ɔ mɔ̀ Zɛ̀wáɖáhìà ɓɛ́ ɔ mɔ̀ Páhà-Móà nììn xwíníín-dyù ɓěɔ̀ ɖòɛɛ dyú-gàà kɛ kè gàa hɔ̃dɛ̀ɖɛ̀ sɔ̃́ mu ma.

⁵ Sɛ́kàníà ɓɛ́ ɔ mɔ̀ Jàházìèɛ̀ dyú-gàà kɛɛ sɔ̀ ɖé Zátù nììn gbǒ-xwíníínɔ̀ mú. Ɔ kè gàa hɔ̃dɛ̀ɖɛ̀ tã mu ma.

⁶ Ɛ́ɓɛ̀ ɓɛ́ ɔ mɔ̀ Jònétɔ̃̀ɛ̀ dyú-gàà kɛɛ sɔ̀ ɖé Áɖììn nììn gbǒ-xwíníínɔ̀ mú. Ɔ kè gàa kpáɖá-nyɔ sɔ̃́ ɓaɖa-bùè mu ma.

⁷ Jɛ̀sádyà ɓɛ́ ɔ mɔ̀ Áfàɖíàà dyú-gàà kɛɛ sɔ̀ ɖé Éɖàùn nììn gbǒ-xwíníínɔ̀ mú. Ɔ kè gàa kpáɖá-nyɔ tã ɓaɖa-bùè mu ma.

⁸ Zɛ́ɓàɖíà ɓɛ́ ɔ mɔ̀ Makɔ́ɛ̀ dyú-gàà kɛɛ sɔ̀ ɖé Sɛ̀fátìà nììn gbǒ-xwíníínɔ̀ mú. Ɔ kè gàa kpáɖá-nyɔ hĩinyɛ mu ma.

⁹ Òbòdádyà ɓɛ́ ɔ mɔ̀ Jɛ̀híòɛ̀ dyú-gàà kɛɛ sɔ̀ ɖé Jóà nììn gbǒ-xwíníínɔ̀ mú. Ɔ kè gàa hɔ̃dɛ̀ɖɛ̀ sɔ̃́ kè ɓaɖa-bùè sè mɛ̀nɛ̌ìn-tã mu ma.

¹⁰ Sɛ̀ɖómìtì ɓɛ́ ɔ mɔ̀ Jósìfíàà dyú-gàà kɛɛ sɔ̀ ɖé Bánì nììn gbǒ-xwíníínɔ̀ mú. Ɔ kè gàa hɔ̃dɛ̀ɖɛ̀ ɖò kè kpáɖá-nyɔ tã mu ma.

¹¹ Zɛ́kɔ̀wáɖádyà ɓɛ́ ɔ mɔ̀ Béɓàìɛ̀ dyú-gàà kɛɛ sɔ̀ ɖé Béɓàì nììn gbǒ-xwíníínɔ̀ mú. Ɔ kè gàa kpáɖá-nyɔ sè mɛ̀nɛ̌ìn-tã mu ma.

¹² Jòhánà ɓɛ́ ɔ mɔ̀ Hákàtàùnɛ̀ dyú-gàà kɛɛ sɔ̀ ɖé Ázìgà nììn gbǒ-xwíníínɔ̀ mú. Ɔ kè gàa hɔ̃dɛ̀ɖɛ̀ ɖò kè ɓaɖa-bùè mu ma.

¹³ Ɛ̀ɖìfáɖɛ̀ kè Jɛ̀dyíò ɔ kè Sɛ̀mádyà ɓɛ́ wa sɔ̀ ɖé Àɖòníkàùn nììn gbǒ-xwíníínɔ̀ múɛɛ, wa kè gàa kpáɖá-nyɔ tã mu ma, kɛɛ wa mɔ̀ùn sè ma ɖe.

¹⁴ Dyúfàì kè Zákù ɓɛ́ wa sɔ̀ ɖé Bívàì nììn gbǒ-xwíníínɔ̀ múɛ kè gàa kpáɖá-nyɔ tã ɓaɖa-bùè mu ma.

Ɛ́zùɖùà dyé Ɖíìváà-nyɔ̀ ɖíɛ́ ɓě ɓó Gèɖèpɔ́ɔ̀ gbǒɔ̀ jè

¹⁵ Ɛ́zùɖùà ɖá, “Ḿ poìn ma nyɔ ɓěɔ̀ dyí ɖé ní ɓɛ́ ɔ zĩ̀ìn ma kà ɖé Àhávà-hwɔ̀ɖɔ̀ɔ̀ múɛɛ wĩín, ké à nyànàìn ma ɓó à jàɖàìn-gbò ɓěɔ̀ dyi, ké à nyu ma ɓó wé tã. Ti ɓɛ́ ḿ gmɔìn ma nyɔ ɓěɔ̀ kè sáa-zà-nyɔ̀ ɓěɔ̀ hwìɛ̀ dyiɛɛ, ḿ se ma Ɖíìváà-nyɔ̀ ɖò ɖé wa hwìɛ̀ dyé.

¹⁶ Hwɛ̀ ké ḿ ɖá ma waà nyɔ vɛ̀nɛ̀ ɓěɔ̀ nyɔ-kpò mɛ̀nɛ̌ìn-hĩinyɛ. Wa mɔ̀ Ɛ̀ɖìɛ́zɛ̀ kè Áwìɖìò kè Sɛ̀mádyà kè Ɛ̀nétɔ̃̀ kè Jáwìɖì kè Ɛ̀nétɔ̃̀ ɖò ɖe kè Nétɔ̃̀ kè Zɛ́kɔ̀wáɖádyà ɔ kè Mɛ̀súɖàùn. Ké ḿ ɖá ma Jòdyáwìɖì kè Ɛ̀nétɔ̃̀ ɓɛ́ wa mɔ̀ hwòɖǒ-fɔ̀nɔ̀-nyɔ̀ vɛ̀nɛ̀ ɓěɛɛ ɖekè.

¹⁷ Ké ḿ ɖoɓo ma wa ɖé gàa ɖò kɔ̃̀ nyɛ́nɛ́ mɔ̀ Íɖò ɓɛ́ ɔ mɔ̀ nyɔ vɛ̀nɛ̀ ɖé Kásìfíà-hwɔ̀ɖɔ̀ɔ̀ múɛɛ gbo. Ké ḿ dèìn ma wa wuɖu wĩín, ɓɛ́ wa kéɛ Íɖò kè ɔ ɖíí-gàà ɓě mɔ̀ Gèɖèpɔ́ɔ̀ gbǒɔ̀ mú-kũ̀à-nyu-nyɔ̀ɛɛ gbo kpa, ɓɛ́ wa ké Íɖò kè ɔ ɖíí-gàà ɓěɔ̀ dyi diè, ɓɛ́ wa ké à nyɔ ɓě ké ɖé à Gèɖèpɔ́ɔ̀ gbǒɔ̀ mú kũ̀à nyuɛɛ nyí.

¹⁸ Sepóɛɖé à Gèɖèpɔ́ɔ̀ nì ɓó à gbo jèɛɛ, wa tò ma à Séwèɖèɓíà gbo. Ɔ mɔ̀ gàa ɓɛ́ ɔ ɓɛ́ìn kũ̀àɔ̀ dyí kɛ. Ɔ mɔ̀ Ɖíìváà-nyɔ̀ ɓěɔ̀ ɖò ɓɛ́ ɔ sɔ̀ ɖé Máɖì nììn gbǒ-xwíníínɔ̀ múɛ. Máɖì mɔ̀ Ɖíìváà ɓɛ́ ɔ mɔ̀à Jékɔ̀ɛ̀ dyú-gàà ɓěɔ̀ ɖòɛɛ dyú. Séwèɖèɓíà kè ɔ dyú-gàà ɓěɔ̀ kè ɔ ɖíí-gàà tɔ̀ɔ̀ ɓěɔ̀ poìn dyíɔ̀ mɔ̀ nyɔ-kpò ɓaɖa-bùè sè mɛ̀nɛ̌ìn-hĩinyɛ.

¹⁹ Ké wa ɖoɓo ma Hàsáɓíà kè Jɛ̀sádyà ɓɛ́ wa sɔ̀ ɖé Mɛ̀wáɖáwìɖì nììn gbǒ-xwíníínɔ̀ múɛ kè waà ɖíí kpáɖá-nyɔ ɖò ɖekè.

²⁰ Ké ɓó kɔ̃in ɖeɛɛ, wa ɖoɓo ma Gèɖèpɔ́ɔ̀ gbǒɔ̀ mú-kũ̀à-nyu-nyɔ̀ ɓě ɓɛ́ Dèɓé kè ɔ mǔè gɔ̌mànà-nyɔ̀ ɓěɔ̀ po zɔ̃̌ɔ̀ wáká, ɓɛ́ wa ké zɔ̃̌ɔ̀ Ɖíìváà-nyɔ̀ ɓěɔ̀ gbo kpáa nììn xwíníín-dyù ɓěɔ̀ nyɔ-kpò hɔ̃dɛ̀ɖɛ̀ sɔ̃́ kè kpáɖá-nyɔ. Wa ɖò-ɖò séínɛ̀ nyɛ́nɛ́ céè ma ɓíɖíi.

Ɛ́zùɖùà nyuɛ ké nyɔ ɓěɔ̀ hwèɖè wɔ̃ kɔ̃, ké wa ɓaà

²¹ “Hwɛ̀ ké ḿ po ma wuɖui ɖé ní zĩ̀àìn ɖé Àhávà-hwɔ̀ɖɔ̀ɔ̀ múɛɛ wĩín, ɓɛ́ à ké wɔ̃ kɔ̃ hwèɖè, ɓɛ́ à ké à mìɔùn ɓíɖíi dyà ɓó Gèɖèpɔ́ɔ̀ dyúa, ɓɛ́ à ké ɔ dyi diè, ɓɛ́ ɔ ké à nàìn, ɓɛ́ ɔ ké à kè à dyú ɓěɔ̀ kè à kɔ̃̀ɔ̀-ɖɛ̀ ɓěɔ̀ dyí gmɔ̀.

²² Dɛ̃ nyu ma ḿ, ké ḿ se ma sójà ɓě kè sǒ-nàìn-nyɔ̀ ɓě kã́áɔ̀ zɔ̀ìn ɓɛ́ìn ɓó à dyí gmɔ̀ jè sɔ̀ìn ɖé à mú-nyɛ́-nyɔ̀ ɓěɔ̀ xwaún ɓó hwìèɔ̀ kɔ̃, sepóɛɖé à ɖǎa ma kã́áɔ̀ gbo cɛ̃ kà à Gèɖèpɔ́ɔ̀ gmɔ̀ ɔ nyɔ séín ɓě ɓɛ́ wa ɓiè ɔ kɛɛ dyí kánáá pū kɛ, ké ɔ kpáìn nyɔ séín ɓě ɓɛ́ wa táà ɔ dyiɛɛ dyoɖoún wɛ̃.

²³ Ɔ jèɛɛ, à hwèɖè ma wɔ̃ kɔ̃, ké à zɔ̀ìn ma à Gèɖèpɔ́ɔ̀ ɖɛ nìà kɛ, ké ɔ wɔ̃́ ma à ɖɛ-zɔ̀-wùɖùɔ̀.

Wa dyà nyíí-ɖɛ̀ ɓó Gèɖèpɔ́ɔ̀ gbǒɔ̀ bìì

²⁴ “Hwɛ̀ ké ḿ po ma sáa-zà-nyɔ̀ vɛ̀nɛ̀ ɓěɔ̀ nyɔ ɓaɖa-bùè sè sɔ̃́ wáká. Wa mɔ̀ Séwèɖèɓíà kè Hàsáɓíà ɔ kè waà ɖíí ɓěɔ̀ nyɔ-kpò ɓaɖa-bùè.

²⁵ Ké ḿ po ma séɓàɖàɔ̀ kè góòɔ̀ ɔ kè ɖɛ-fùù ɓě ɓɛ́ kã́áɔ̀ kè ɔ gɔ̌mànà-nyɔ̀ vɛ̀nɛ̀ ɓěɔ̀ kè ɔ gɔ̌mànà-nyɔ̀ tɔ̀ɔ̀ ɓěɔ̀ ɔ kè Éézùɖùɛ̀-nyɔ̀ séín ɓěɔ̀ tò ma kà ɓó à Gèɖèpɔ́ɔ̀ gbǒɔ̀ jèɛɛ pṹá kɔ̃ ɓó wa dyéɖé waí, ɓɛ́ à kéɛ xwa-ku-ku dyé.

²⁶ Ḿ nyí ma wa séɓàɖà kɔ̃̀ xwa-ku-ku mɔ̀ pṹá-dyèɖè táázĩ̀ìn kpáɖá-nyɔ sɔ̃́ sè mɛ̀nɛ̌ìn-hĩinyɛ kɛ kè séɓàɖà-ɖɛ̀-fùù ɓě kɔ̃̀ xwa-ku-ku mɔ̀ pṹá-dyèɖè táázĩ̀ìn mɛ̀nɛ̌ìn-sɔ̃́ kè hɔ̃dɛ̀ɖɛ̀ hm̀m̌ kɛ kè góò kɔ̃̀ xwa-ku-ku mɔ̀ pṹá-dyèɖè táázĩ̀ìn mɛ̀nɛ̌ìn-sɔ̃́ kè hɔ̃dɛ̀ɖɛ̀ hm̀m̌ kɛ

²⁷ kè góò-gbòɖòò kpáɖá-nyɔ kɔ̃̀ xwa-ku-ku mɔ̀ pṹá-dyèɖè ɓaɖa-bùè sè mɛ̀nɛ̌ìn-hĩinyɛ kɛ. Ké bàɖàsǐ-ɖɛ̀-fùù nɔ̀mɔ̀ kɔ̃in sɔ̃́ nì ɓóɛɛ, wa kpa ɖɛ kà góò kpaà ɖɛ kɛ.

²⁸ “Ké ḿ cɛ̃ɛ wa gbo, ké ḿ ɖá, ‘Ɓě kè ɖɛ-fùù ɓěɛ̀ kpá wáká ɓó Bounɓo mɔ̀à ɓě ɓǎ ɓěɛ̀ Gèɖèpɔ́ɔ̀ kɛɛ bìì. Séɓàɖà kè góò ɓěɔ̀ mɔ̀ hwòɖǒ-wáɖáá-nyìǐ-ɖɛ̀ ké nyɔ ɓěɔ̀ tòɛ̀.

²⁹ Ɓě mɛ gmɔ̀ wa dyí tee ɓɛ́ tiɔ̀ ké ɓó nyini, ɓɛ́ ɓě ké wa zɛɖɛ ɓó sáa-zà-nyɔ̀ vɛ̀nɛ̀ ɓěɔ̀ kè Ɖíìváà-nyɔ̀ ɓěɔ̀ ɔ kè gbǒ-xwíníín-dù ɖò-ɖò ɓěɔ̀ ɓǎ ɓěɔ̀ dyéɖé waí, ɖé Éézùɖùɛ̀-ɓòɖòɔ̀ kɔ̃, ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ɖé Bounɓoɔ̀ gbǒɔ̀ ɓí-dyù ɓěɔ̀ mú.’

³⁰ Ɔ jèɛɛ, sáa-zà-nyɔ̀ ɓěɔ̀ kè Ɖíìváà-nyɔ̀ ɓěɔ̀ ɖú ma séɓàɖà kè góò kè ɖɛ-fùù ɓěɔ̀ dyí, ɓɛ́ wa ké wa ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú kpa ɖé à Gèɖèpɔ́ɔ̀ gbǒɔ̀ mú.

Jùɖúsɛ̀ɖɛ̀ìn-hwɔ̀ɖɔ̀ɔ̀ mú ɖe-dyi-dyi

³¹ “Hwɛ̀ ké à sɔ̀ ma ɖé ní zĩ̀àìn ɖé Àhávà-hwɔ̀ɖɔ̀ɔ̀ múɛɛ wĩín, ɓó zɔ̃ɔ̀ dɛ̀nɛ̀ kĩ́ín-kĩ́ínɔ̀ wé ɓaɖa-bùè sè sɔ̃́ nììnɔ̀ ɓaɖa, ɓɛ́ à ké ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú ɖe mu. Bounɓoɔ̀ gmɔ̀ ma à dyí sɔ̀ìn ɖé à mú-nyɛ́-nyɔ̀ ɓěɔ̀ xwaún, ɔ kè sɔ̀ìn ɖé nyɔ ɓě kò ma pìǐn ɓó à bũ̌in puà jèɛɛ xwaún.

³² Ké à nyini ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ké à nyu ma ɖé wé tã.

³³ Ké ɓó wéɔ̀ hĩinyɛ nììnɔ̀ ɓaɖaa, à zɛɖɛ ma séɓàɖà kè góò kè ɖɛ-fùù ɓěɔ̀ ɖé à Gèɖèpɔ́ɔ̀ gbǒɔ̀ mú, ké à pɛ̃́ìn wa Mɛ̀wéɖémɔ̀ mɔ̀à Dyùwáɖádyàà dyú-gàà, ɓɛ́ ɔ mɔ̀à sáa-zà-nyɔ̀ɔ̀ kɛɛ xwaún. Ɛ̀ɖɛ̀ázà mɔ̀à Fíníhàà dyú-gààɔ̀ kɛɛ nì ma ɓó ɔ gbo. Ké Ɖíìváà-nyɔ̀ ɓě nì ma ɓó wa gboɛɛ mɔ̀ Jòzáɓà mɔ̀à Jésùàà dyú-gààɔ̀ kɛ kè Nòàɖíà mɔ̀à Bìnúìɛ̀ dyú-gààɔ̀ kɛ.

³⁴ À zɛɖɛ ma ɖɛ séín ɓěɔ̀, ké wa hwɛ̀ ma ɖé, ké à céè ma kà ɖɛ ɓěɔ̀ poìn dyí nyu jĩ̀ɛ̀ kɛɛ ɓíɖíi.

³⁵ “Ɓó tia ɓaɖaa, nyɔ ɓě ɓɛ́ wa sɔ̀ ma kà to-xwàɖàǔn, ɓɛ́ wa dyi ma kà ɖe kɔ́ìn nyɛɛ nyu ma fɔ̃ɔ-sàǎ-zàìn-ɖɛ̀ ɓě ɓó Éézùɖùɛ̀ Gèɖèpɔ́ɔ̀ bìì. Ɖɛ ɓě wa zàìn ma kà sáa kɛɛ mɔ̀ ɓìɖǐ ɓíɔ́ ɓaɖa-bùè sè sɔ̃́ ɓó Éézùɖùɛ̀-nyɔ̀ séín ɓěɔ̀ bìì kè ɓáɖáá ɓíɔ́ kpáɖá-nyɔ hĩinyɛ ɓaɖa-bùè sè mɛ̀nɛ̌ìn-ɖò kè ɓáɖáá-dyù kpáɖá-nyɔ tã ɓaɖa-bùè sè mɛ̀nɛ̌ìn-sɔ̃́ ɔ kè vã́á ɓaɖa-bùè sè sɔ̃́ ɓó nàmàǔn-sàǎ-zàìn-ɖɛ̀ jè. Ɖɛ séín ɓěa mɔ̀ ma fɔ̃ɔ-sàǎ-zàìn-ɖɛ̀ ɓó Bounɓoɔ̀ bìì.

³⁶ Hwɛ̀ ké wa zà ma ɖé céè-ɖɛ̀ ɓɛ́ kã́áɔ̀ tò ma kà kɛ, ké wa nyíɛ ma kã́áɔ̀ sɔ̃-xwíɖíi-dè-nyɔ̀ ɓěɔ̀ kè gɔ̌mànà-nyɔ̀ tɔ̀ɔ̀ ɓě ɓɛ́ wa kè wa kɔ̃̀ ma kà ɓóɖó ɓě nìà ɖé Dyùféɖétì-nìɔ̀ dyóɖó-dyi-kpáìn-naínɔ̀ kɛɛ wuɖuíɛ. Púɛɛ, nyɔ ɓěɔ̀ ɖú ma ɓó wa gbo kpɔ̃̀ìn kpàǐ ɓá Gèɖèpɔ́ɔ̀ gbǒɔ̀ jè dyí.